Pɔlì jɛ̀ì fau goo nìi reè tsɛ ko nìì reè kpàdèu à ra
12
1 E bà ni a yɛrɛ blabe rii gbɛ ? Tɔ̀ kùn na ni waa. Tà ko e sa ra, Tsìfaà y'à tou min jɛ̀y fa goo nìì reè tsɛ, ko à nìì reè kpàdèu mun na, mun dzii nà wɔ twɛy tsɛ. 2 Àwà mun kpiri sɔn tɔ, nìi ni Kirisà ɲàn. Ŋaablà na tɔ̀ kpir'la sen fu dɔ̀n beò jìrànxɔɔ̀ zhììgìraa doùn, à jii teeŋ naàlen yɛ. À sen fu bèu gɔɔ̀n rìì ɲàn sa wà, à to yɛ̀rɛ̀ na gɔɔ̀n ɲàn sa wa, mun kpɛ̀yn na tɔ waa, ŋà Ŋaablà y'a tɔ̀. 3 Ɔ̀ɔn, tɔ̀ kpir'la sen fu bèu gɔɔ̀n rìì ɲàn sa wà, à to na gɔɔ̀n ɲàn sa wà, mun kpɛ̀yn na tɔ waa, ŋà Ŋaablà y'a tɔ̀. 4 À sen fu bèu àrìjinɛɛ̀ doùn è gooma ì myɛ̀n, adamadzin mòdzin na dzia nìì reè dè waa, à shi to na ni à suun à y'à dè waa. 5 È ɲɛn tɔ̀ kpir'la kpɛ̀yn tsɛ, mun nà n yɛrɛ blabe. Ŋà nìi mun, mun nà n yɛrɛ blabe è ɲɛn mun gbaa goo rèè rìì tsɛ. 6 Mun to kɛ̀sɛɛn ye ba na nà n yɛrɛ blabe, tɔ̀ na akiribɛybe mun ne waa, è ɲɛn à tsɛ, mun nà bà sààben ni dèe. Ŋà min yɛrɛ kuàn tɔ̀ ra, gè riì ni à to è nìi jàa mun ɲan, tà ko è nìi myɛ̀ɛn mun ne, è mà nà mun jàtsi kun è geren tɔ̀ tsɛ waa.7 Twɛy goo kpàdèuma rèè bàu kabagoo goo nìi tsuru, goo rìi ni à to mun mà n yɛrɛ blabe, daa sɔn jiu mun tsùn nɔ̀n, nìi yɛ Sùtan'ne mɛ̀rɛ̀kɛɛ̀ sɔn si wɔu mun tsɛ, mun mà nà to n yɛrɛ blabe waa. 8 È ɲɛn tɔ̀ goò tsɛ, mun Tsìfaà màfyɛun fɔ jaa zhììgi, è bà ni à màbo mun na. 9 Ŋà à dziun mun na ci: «Mun ɲanwùɔ, tɔ wo boò. È ɲɛn à tsɛ, mun ne dzibaabee yè e kpadèe gbaa goo rèè rìì doùn.» Tà tsuru mun sa nà n yɛrɛ blabe è ɲɛn mun gbaa goo rèè rìì tsɛ, gè riì ni à to Kirisà rè dzibaabee yè bà ni to mun tsɛ. 10 Tɔ̀ rii y'à to Kirisà kamà, mun taama dzi gbaa goo rèè doùn, ɲɛ̀yn neè doùn, fààntsì goo reè doùn, byɛnbe goo reè doùn, ko taamaŋununbe goo reè doùn. È ɲɛn à tsɛ, min ba gbaɔ̀ watsi riì bwèy, tɔ̀ rii bwèy, fàan bàa ni mun ɲan.
Pɔlì vyɛ̀ìràgoo reè Korɛntsì ɲɛynamoo rèè kàjaa tsɛ
11 Mun bàuma yɛ akiri bɛy, ye rìì to mun jiu à ra, è ɲɛn à tsɛ, ye rìì na wù ye yè mun goo dè, kàtsu arì mun kɛ̀sɛɛn ma ba gèsɔn pɛn, twɛy kɛɛradzin bla reè na gereon mun tsɛ kàjaa pɛn tsɛ waa. 12 Kɛɛradzinbee tààmàshɛn reè kpàdeu ye fi: mɔ̀ɲɔɔn goò doùn, tààmàshɛn kabagooma reè ko kabagoo goo reè, ko dzibaabe goo reè. 13 Ye fèe soo rii tàrau nìi na ɲɛynamoo kuru dzyee reè raà bo, fɔ mun na ba nìi fa ye kùùn seyn ? Tɔ̀ na teren waa, ye yɛrɛ to n ne tɔ̀ ra.
14 Àwà mun sɔ̀n byɛ̀unma yɛ kɔn, mun nà bè n jaa zhiigira ɲan ye kpà. Ŋà mun fa bà ye kùùn seyn waa. Mun nìi gaa, tɔ̀ na ye suun ge reè waa, ŋà ye yɛ̀r'la. È ɲɛn à tsɛ à na ni dziin nèè mà twɛy yè nàforo ladzyèè tsùù ker'là gè rèè rè waa, ŋà ker'là gè rèè rìì wù y'à ladzyeè tsùù dziin nèè rè. 15 Àwà mun ne, à ni mun mà, min suun gee sin ye kamà, mun to nà n yɛrɛ ko e kur'la sapɛ rii sìn ye xɔɔn kamà. Min ye kɛ̀n è bè jɔɔn, mun kɛ̀nbààbee ni dzyɛnbe ye re o ?
16 Mun kpɛ̀yn na ba ye kùùn seyn waa, tɔ̀ yeè byɛ̀n sààben ma, ŋà, swey ci mun bàu sànbè moo, mun to yè bà ye tàràu sànbe ka. 17 Àwà mun nìì reè sapɛ kau ye re mɔn, mun ye tɔ̀ɲɔun è bo twɛy sɔn ɲan ɔn ? 18 Mun Tsitè màfyɛ̀un è bè ye kpà, tà ko mun mùn neema kpir'liì goo dèu ye ra. Tsitè bèumaà, à ye tɔ̀ɲɔn ɔn ? À ko mun sa na faagoò fa akiri soo ka ɔ ? Mùn sa na wò shi soo rìì jìì ɔ̀ ?
19 Fɔ watsi gbaan y'a kɛ̀sɛɛ̀ ci ɲe yè e dzi rìì dèe ye jaa ra. Àyi, à na tɔ̀ tsuru waa, ɲe goomaa Ŋaablà rii jaaterema, Kirisà ɲàn. Àwà neema kɛniunma rèè, ɲe tɔ̀ sapɛ faa ye rìì yè bà ni fààn tarà. 20 Mun shiɔ̀ nìi jɔɔn, tɔ̀ rii yɛ mun mà wɔ ye re mɔn, min ye jà jàu'n kur'la, mun na nìi gaa waa, ye tsu to mà mun jà jàu'n kur'la, ye na ni gaa waa. Mun na à gaa min bè kaa jà ye fi, min jaaɲininbe jà ye fi, min vununta jà ye fi, min si sɔɔn ja ye fi, min si tsoo bara ja ye fi, min si shɔun de ja ye fi, min yɛ̀rɛ̀blàbe jà ye fi, min goo gbiimaunma ì jà ye fi waa. 21 Mun shiɔ̀ ci mun nà nà dɔ̀n bo rìi fa ye re mɔn kɔn, mun ne Ŋaabla mà nà bè mun màjàà ye kamà waa. Mun mà nà gɛɛy mòò giri kamà, twɛy nìì reè sapɛ gooɲaan fa dɔun è to na e tsiiŋnà yè e re jaamabee fau'n kur'la lakere, yè sèè bo e re nookɔɔn goo reè, ko e re kɛ̀kɛ̀ɛ̀ybè goo reè, ko e re seebɛybe goo reè kpɛyn waa.