Pɔlì sɛbɛn jɔna niì kau
Korɛntsika reè rè
Sɛbɛn siɔ̀n nìì reè rà ko tswɛ̀ɛ
1
1 Àyìwà mun Pɔlì, mun nìi kiriu Ŋaablà saɔ baraka rɔ̀n, min bà Yesù Kirisà rè kɛɛradzin, ko neema kpiri Sɔsitɛnìn 2 nèe sɛbɛn nee sìan ye Ŋaablà re ɲɛynamoo kur'là rà Korɛntsì wɔ̀ rɔ̀n. Nìì reè fɛnɛbeu Yesù Kirisà ɲàn, yè bà kiriɔ yè bà Ŋaablà raa, tà ko nìì reè sapɛ mùn Tsìfa Yesù Kirisà tsoò kir'là min niì sapɛ, è Tsìfaà è bà ɲe sa Tsifa. 3 Arì she, Ŋaablà ɲanwùɔ ko jaanciàn, mùn Fà Ŋaablà, ko Tsìfa Yesù Kirisà yè twɛy sìn e ra !Ŋaablà re wùɔ Kirisà baraka ɲan
4 Kudɛyn mun baraka sìan n ne Ŋaablà ra ye kamà, è ɲɛn Ŋaablà ɲanwùù siunmaà tsɛ ye ra Yesù Kirisà ɲàn. 5 Ɔ̀ɔn, Yesù Kirisà ɲàn, Ŋaabla ye bàu gètsi kàjaa sapɛ tsɛ. Goomaa kàjaa tsɛ, twɛ̀ɛ kàjaa tsɛ. 6 È ɲɛn à tsɛ, Kirisà rè shɛɛrɛbee fààn tarau ye fi. 7 Tà tsuru, mùn Tsìfa Yesù Kirisà nà nà e yɛrɛ kpadè rìi fa, è ye to tɔ̀ màshua rà, Ŋaablà ɲanwùɔ kɔ̀ì ge pɛn na ye fɔɔn waa. 8 Wò rii nà fààn wɔ ye ɲan sa fɔ à lataan, gè riì ni à to mùn Tsìfa Yesù Kirisà raa jisee sii sèè, jààma mà jà ye ra waa. 9 Ŋaablà riì ye kiriu, è ye ko e Dzin Kpiri Yesù Kirisà, mùn Tsìfaà bà gè soo, tɔ vusootsi.
Pɔlì nìi dèu è ɲɛn Korɛntsì ɲɛynamoo kur'là fi vyɛumaà tsɛ
10 Àwà neema ì, mun ye màxɔ̀ɔn nìi rà, tɔ̀ rii yɛ, ci mùn Tsìfa Yesù Kirisà tsoò kamà, ye e vuà ji soo, e fi mà vyɛ̀ waa. Kɛsɛmà soo yeè bà ni e sapɛ re, ko akiri soo. 11 È ɲɛn à tsɛ n neema ì, Klowè raa mòò rèè swey mun toro kɔ̀u ye kàjaa tsɛ, ci byɛ̀n na ni ye fi waa. 12 Mun tɔ̀ dèe kàtsu ye ɲan, sɔn ci wo Pɔl'laa, sɔn ci wo Apolɔsì raa, sɔn ci wo Piyɛr'laa, sɔn yeè bà ci wo Kirisà raa. 13 Tà bwèy Kirisà tarau gbɛ ? Pɔl'lì gbaun gɔɔ̀ rà ye kamà ɔ̀, tàà ye jaara fòoŋ Pɔl'lì tsoo ra ? 14 Ŋaablà kɔfɛɛy, Kiripusì ko Gayusì nìn yè bo ra, mun na mòò pɛn jaara foò ye ɲan. 15 Tà tsuru, mòò fa dzi dzin ci ye jaara fòoŋ mun tsoo ra waa. 16 À sààben n dzi, mun Sitefanasì raa tsiidzin neè sa jaara fooŋ, ŋà nìi dzyee rèè, mun taa na ni mòò mà mun nìi jaara fooŋ dɛ waa. 17 È ɲɛn à tsɛ, Kirisà na mun kaɔ min mòò jaara foò waa, ŋà min Kùnàgoo Dziɔ̀ rìì dè. Mun to mà tɔ̀ fa mòdzin ne akiri gooma ì ka, tɔ̀ yeè nà Kirisa gbaàn gɔɔ̀ bà gè nàfà bɛy waa.
Nìi ni dziɲaan raa akiritsifabee ko Ŋaablà raa akiritsifabee fi
18 Nìì ree ni e bar'la gè doùn, Yesù gbaàn gɔɔ̀ goomaa fàkɔ̀ɔ̀nbe rìì twɛy jaa ra. Ŋà, ɲe nìì re ni e tsia shia tsɛ, ɲe re, à Ŋaablà re dzibaabe rii. 19 À tà tsuru, katsu à sɛbɛɔ̀n Ŋaablà re Goomaa doùn nèe tsuru ci: «Mun nà akiritsi rèè raa akiritsifabee bara, min akiridzi reè raa akiridzibee bà fuu. 20 Akiritsia ni min ? Sàrìyà kaamoo ni min ? Nèe watsi ree sɔ̀swɛ̀yfabaà ni min ? Ŋaablà na nèe dziɲan ree akiritsifabee kpàdè ci à fàkɔ̀ɔ̀nbe o ? 21 Àwà, dziɲaan ko e raa akiritsifabee na dzi Ŋaablà tɔ nìi fa e raa akiritsifabee doùn, gbaàn gɔɔ̀ raa waajibia fàkɔ̀ɔ̀nbee, Ŋaablà tɔ̀ rii seun à ka ɲɛynamoo rèè tsi. 22 Dzyèèsìbee mòdzin neè ci tàànmàshɛ̀n goo reè, Gɛ̀rɛ̀ki rèè yè bà akiritsifabee gaa. 23 Ŋà ɲe, Ŋaablà jaara modzìn gbaunmaà gɔɔ ra, ɲe tɔ̀ rii gooma deè. Tɔ sàn nà baan kpàà Dzyèèsìbee mòdzin neè rè, è bà fàkɔ̀ɔ̀nbe kun kpɛrɛ mòdzin neè jaa ra. 24 Ŋà, Ŋaabla nìì reè kiriɔ, Dzyèèsìbee mòdzin sen ɲɛn Gɛ̀rɛ̀ki tsɛ, Kirisà Ŋaablà re dzibaabee ko à re akiritsifabee rìì twɛy jaa ra. 25 È ɲɛn à tsɛ, Ŋaablà raa fàkɔ̀ɔ̀nbee tɔ vùn mòdzian raa akiritsifabee mà, fààn yeè bà ni Ŋaablà raa fàànbɛ̀ybeè ɲàn è geren mòdzian raa fàan tsɛ.
Ŋaablà jaaraa
26 Neema reè, Ŋaabla ye nìì reè kirirɔ, ye siin fa siin, ye ni nìi tsuru: ye bɛrɛ na akiritsi a ci adamadzin mòdzin y'a jàtsi kuàn nìi tsuru, ye bɛrɛ na fààntsi, ye bɛrɛ to na mòdzìn blà dzin ì. 27 Ŋà dziɲan nìi jàa fàkɔ̀ɔ̀nbe, Ŋaabla tɔ̀ rii bou e jaara, à y'à ka akiritsi rèè kùngɔ sùùru. Dziɲan to nìi jàa ci fààn na ni à ɲan waa, Ŋaabla tɔ̀ rii seun, à y'à ka fààntsi rèè kùngɔ sùùru. 28 Dziɲan na gè nìì reè daàn waa, à nìì reè kɔɔ̀n, nìì reè na pɛn tsu waa, Ŋaabla twɛy rìì bou e jaara, gè riì ni à to, dziɲan gè nìì reè daàn gè nàfàma, twɛy yè bara bo mɔn. 29 Tɔ fau, gè riì ni à to mòò pɛn mà dzi e yɛrɛ blabe Ŋaablà jaaterema waa. 30 Ŋaabla rii baraka ɲan, ye ni Yesù Kirisà ɲàn, tɔ̀ niì bàu ɲe re akiritsifabe è bo Ŋaablà re, è bà ɲe re terenbe. À bàu ɲe fɛnɛbee ko ɲe kùngɔ̀ màboo saabu, 31 gè riì ni à to, «mòò riì ye ba e yɛrɛ blabee, è yɛrɛ blabe Tsìfaà ɲàn», a ci à sɛbɛɔ̀n Ŋaablà re Goomaa doùn nìi tsuru.