Pɔl'lè tswɛ̀ɛ
16
1 Mun mùn neema taan Foyɛbɛ̀ goojaa wɔɔ̀ e suun, tɔ̀ niì Sankere ɲɛynamoo kur'là rè faagoofabaa. 2 Y'a ladɔn Ŋaa re mòdzin neè ladɔun'n kur'la. À màgoo nà tsìì e ra goo o goo ra, ye wɔ a ra tɔ̀ ka. È ɲɛn à tsɛ, à mòò giri dzwɛ̀mau, arì mun yɛ̀r'la.3 Ye tswɛ̀y sin Pirisiyì ko Akilasì rà, mun faagoofasi rèè Yesù Kirisà ɲàn. 4 Ye tswɛ̀y sin è ra, è ɲɛn à tsɛ, yè e xɔɔn sìun, yè bà ni mun xɔɔn tsi. À na mun soo re tswɛ̀y sinkɔɔn è ra waa, kun kpɛrɛ mòdzin neè fi ɲɛynamoo kur'lèè sapɛ rii yè tswàa. 5 Ɲɛynamoo kur'lìi yè e ladzyèe è re gàne rɔ̀n, ye tswɛ̀y sin twɛy sa ra. Ye tswɛ̀y sin Epayinɛtsì rà, mun ne kɛ̀niunmaà. Wò rii jɔ̀na yeè e yɛrɛ siun Kirisà rà Azhi mar'lɔn. 6 Ye tswɛ̀y sin Mariyamùn nà, tɔ̀ niì faagoo giri fau ye re. 7 Ye tswɛ̀y sin Andoronikusì ko Zhiniyasì rà, twɛy nìi reè mun kunsi reè, mùn sa ye bà kàsoò fau esire. È kɛɛradzinbe tsoo bou, yè bà bàu Kirisà raa mun jɔɔn. 8 Ye tswɛ̀y sìn Anpiliyatusì rà, mun ne kɛ̀niunmaà Tsìfaà ɲàn. 9 Ye tswɛ̀y sin Uribɛn nà, mùn faagoofasià Kirisà ɲàn, ko Sitakisì, mun ne kɛ̀niunmaà. 10 Ye tswɛ̀y sin Apɛlɛsì rà, tɔ̀ y'a kpàdèu, ci wo ɲɛynamoo dzii tsyɛunma Kirisà ɲàn. Ye tswɛ̀y sin Arisitobul'laa gbà dòùn dzin neè rà. 11 Ye tswɛ̀y sin Erodiyɔ̀n nà, mun kunsia. Narikusì raa gbà dòùn dzin niì reè ni Tsìfaà ɲàn, ye tswɛ̀y sin twɛy ra. 12 Ye tswɛ̀y sin Tsirifayinà ko Tsirifosà rà, twɛy tàan nìì reè yè e yɛrɛ siun faagoò rà Tsìfaà rè. Ye tswɛ̀y sin Pɛrɛsisì sa ra, tàan kɛ̀niunmaà, tɔ̀ niì sa faagoo giri fau Tsìfaà rè. 13 Ye tswɛ̀y sin Rufɔsì rà, Tsìfaà jaara modzìàn. Ye tswɛ̀y sin à naà sa ra, tɔ̀ niì mun sa na. 14 Ye tswɛ̀y sin Asunkiritɔsì rà, ko Filɛgɔ̀n, ko Ɛrɛmɛsì, ko Patorobasì, ko Ɛrɛmasì, ko neema dzyee niì reè sapɛ ni twɛy ka. 15 Ye tswɛ̀y sin Filologɔsì ko Yulì rà, Nerɔsì ko e keresi taàn, Olɛnpasì ko Ŋaa re mòdzin niì reè sapɛ ni twɛy ka, ye tswɛ̀y sin è sapɛ ra. 16 Ye e si tswà kɛ̀nbààbè tswɛy doùn. Kirisà rè ɲɛynamoo kur'lèè sapɛ yeè e tswaà.
Pɔl'lè làtsìì lataan
17 Neema reè, mun ye màxɔ̀ɔn nìi ra, tɔ̀ rii yɛ, ci nìì reè mòdzian fi vyɛɛ̀, yè bà sàn nà baan kpàà ye re kàràn tàraumaà tsɛ, ye e kaàwɔ twɛy ra. Ye e dan gbànbe è ra. 18 È ɲɛn a tsɛ, twɛy mòdzìn tsu rèè na faagoò faa Kirisà, mùn Tsìfaà rè waa, ŋà y'à faa e yɛr'la doòn rìì lè. È dzugoomaa tsiinbee ko e re nanmara goòmà rèè saabu rɔ̀n, è mòdzin kunsɔ̀ɔ̀ma reè sàn fìr'la. 19 Ye Tsìfaà dzugoomaa shi jiì nìi faa, mòdzian sapɛ tɔ̀ tɔ̀. Tà doùn, ye kàjaa tsɛ, mun taama dzi. Ŋà mun nìi gaa, tɔ̀ rii yɛ ci wùɔ kàjaa tsɛ, ye yè bà akiritsi. Ɲaan kàjaa tsɛ, noo mà bà ni ye kpà waa. 20 Sani dɛyn, jaanciàn tsìfa Ŋaablà nà Sùtana tsyɛɛnma vu ye sàn dzuun. Arì she, mùn Tsìfa Yesù ɲanwùɔ yè bà ni e tsɛ !
Tswɛ̀ɛ lataan
21 Tsìmotè, mun faagoofasia ye tswàa. Lukiyɔsì, ko Yasɔ̀n, ko Sosipatɔrɔsì, mun kunsi reè sa yeè bà ye tswàa. 22 Àwà mun Tɛritiyɔsì, mun nìi nèe sɛbɛn nee fau, mun sa re tswɛ̀y ni ye re Tsìfaà ɲàn. 23 Àwà Gayɔsì, mun tɔɔnsi kpir'là, ɲɛynamoo kur'là sapɛ yeè e ladzyèe tɔ̀ niì rè, tɔ sa ye tswàa. Erasitɔsì, wɔ̀ɔ̀ ɲɛynmarabaà, ko Kuwarisitɔsì, mùn neema kpir'la, twɛy sa ye tswàa. [ 24 ]
Tsoo dzi ye ɲɛn Ŋaa tsɛ
25 Mìn tsoo dzi ɲɛn Ŋaa tsɛ ! À dzi ni à ra è fààn sin ye ra ɲɛynaà doùn, è kòrò Kùnàgoo Dziɔ̀ ka, mun tɔ̀ niì dèe, Yesù Kirisà raa kùnàgoo goomaa. È kòrò gòndo ka tɔ̀ niì na mɛnɛn tsùuŋnà fɔ gbìyaarà, è bà kpàdèu. 26 Àwà dòònun, kɛɛra reè rè sɛbɛn neè baraka rɔ̀n, à kpàdèu è fyɛ. Tɔ fau a ci Ŋaablà dobɛɛ y'à dèu niì tsuru, nìi yɛ, kun kpɛrɛ mòdzin neè sapɛ y'a tɔ̀, yè ɲɛynaà shi jiì. 27 Àwà Ŋaablà, tɔ̀ niì soo pe akiritsi, arì she, nɔɔrɔ yè ɲɛn à tsɛ Yesù Kirisà baraka rɔ̀n, watsi sen ɲɛn watsi tsɛ. Àmiinà.