Mùn y'a gaa mìn dzibe e mòdzìnsia rà
15
1 Àwà ɲe nìì reè fàan blà ɲɛynaà ɲàn, ɲe wù ɲe yè nìì fa, tɔ̀ rii yɛ nìì reè fààn dzyɛ̀n, ɲe yè twɛy raa fààn bɛ̀y goo reè sen, ɲe mà à gaa ɲe yè e dzibee goo fa waa. 2 Mùn soo sookɔɔn sapɛ y'a gaa rii mìn dzibe e modzìnsia rà à yɛ̀r'la nàfaà kamà, sɔn yeè bà ni ba à barakaà tɛ̀y. 3 Àwà arì Kirisà, tɔ̀ tsu na à gaa è yɛrɛ dzibee goo fa waa, ŋà Ŋaablà re Goomaa doùn, à sɛbɛɔ̀n rìì ci: «Wo ɲɛ̀nbaa rèè rè ɲɛ̀ɛn dziu mun tsɛ.» 4 Nìi sapɛ sɛbɛun dan, tɔ fau nì, è bà ni mùn kàràn. Tà ko twɛy gooma reè nà mɔ̀ɲɔn niì sìn mùn na, yè mùn màxɔ̀n, tɔ̀ yeè bà saabu mìn sixɔbema tarà. 5 Arì she Ŋaablà riì mɔ̀ɲɔn siàn mòò rà, è mòò màxɔ̀n, tɔ̀ yeè e kɛsɛmàà bà soo, ye bà byɛɔ̀n a ci Yesù Kirisà ci nìi tsuru. 6 Ye tɔ̀ fa, gè riì ni à to ye nɔɔrɔ ɲɛn mùn Tsìfa Yesù Kirisà Fà Ŋaablà tsɛ duungoo soo, ko vu soo ka.Kirisà nàu mòdzian sapɛ kamà
7 Tà doùn, ye e si kuun'n kuru wuu fa a ci Kirisà ye kuun nìi tsuru, è bà ni nɔɔrɔ ɲɛn Ŋaablà tsɛ. 8 Àwà, mun nà nìi dè, tɔ̀ rii yɛ, ci Ŋaablà re sààbeen rìì kamà, Kirisà yè e ba Dzyèèsìbee mòdzin neè rè faagoofadzin. À tɔ̀ fau nì, sànko Ŋaabla làyiri nìì reè seun fàbɔɔ rèè rè, twɛy yè bà ni bo e shi tsɛ. 9 Nìi kun kpɛrɛ mòdzin neè, twɛy sa Ŋaablà blabee è ɲɛn à re màtsur'la tsɛ, a ci à yɛ sɛbɛɔ̀n nìi tsuru Ŋaablà re Goomaa doùn ci: «Tɔ̀ kamà, mun nà nɔɔrɔ ɲɛn wo tsɛ kun neè fi, min ye ceè m'a ka wo tsoò blàbe.» 10 È bà deò kɔn ci: «Kun neè, e ko à re mòò rèè yè taamadzibe fa esire.» 11 Nèe sa yeè bà deò ci: «Kun neè sapɛ, ye tsoo dzi ɲɛn Tsìfaà tsɛ ! Jàmàan rèè sapɛ modzin ì, y'a màkìrì vu bla bo !» 12 Kɛɛra Esayì sa yeè bà ci nèe tsuru ci: «Yesè tsua jiɛ̀ nà xe bo. Wò rii nà kun neè màrà, kun neè to nà e sixɔbe à tsɛ.» 13 Arì she, Ŋaablà riì sixɔbema sìan mòò rà, tɔ̀ yeè e ɲantsyɛn taamadzibee ko xɛɛrɛɛ sapɛ ka ɲɛynaà baraka rɔ̀n, gè riì ni à to ye yè sixɔbema tàrà è giribe ye ɲan Ŋaabla re Dzia fàan baraka rɔ̀n.
Pɔl'lè faagoò
14 Mun neema reè, nìi mun yɛr'la, mun ɲɛɔ̀n à ra è fyɛ, ci nìi ye, ye ɲan tsyɛɔ̀n ŋɛ̀nɛ̀ɲan wuɔ rà, twɛ̀ɛ sapɛ ni ye ɲan, ye yè bà dzia e si latsi. 15 Ŋà min bà ni ye taa to, min ku'ùn xɔbeu min sɛbɛn fa kàjaa reè swey tsɛ ye re, è ɲɛn Ŋaablà ɲanwùɔ tsɛ, à tɔ̀ niì faɔ̀ mun ne. 16 È ɲɛn à tsɛ, à mun bàu Yesù Kirisà rè faagoofadzin kun kpɛrɛ mòdzin neè rè, è mun bo ji n si e re Kùnàgòò Dzìɔ̀ faagoò kamà, gè riì ni à to kun kpɛrɛ mòdzin neè yè bà kɔ̀ì ge, nìi dzi Ŋaablà ra, è bà fɛnɛɔ̀ Ŋaablà re Dzia baraka rɔ̀n. 17 Tà doùn, Yesù Kirisà bàraka rɔ̀n, mun dzia n yɛrɛblabe è ɲɛn Ŋaablà re faagoò tsɛ. 18 Àwà dèràmà pɛn na ni mun ne fɔ Kirisà nìi fau è bo mun ɲan, tɔ̀ niì yɛ kun kpɛrɛ mòdzin neè yè Ŋaablà devuà shi jiì mun ne gooma reè ko goo fakɔɔn reè saabu rɔ̀n. 19 Tàànmàshɛn kabagooma reè ko kabagoo goo reè fàan yè ɲɛn twɛy tsɛ, Ŋaablà re Dzia fàan baraka rɔ̀n. Tà doùn, è sen Yerusalɛmùn è bè fɔ Iliri mar'lɔn, min guruguruu twɛy gàne nìì re sapɛ ɲan, mun Kirisà rè Kùnàgoo Dziɔ̀ goomaa dèu, mun y'à dzii tsyɛn. 20 Àwà min faan jiu nìi tsɛ n ne faagoò doùn, tɔ̀ rii yɛ, Kirisà tsoo na kiri jà min niì ŋe fyeu, min bè Kùnàgoo Dziɔ̀ dè mɔn, n mà nà to n naa gbàkur'la fù sɔn naa gbà dzun bauma tsɛ. 21 È ɲɛn à tsɛ, à sɛbɛɔ̀n Ŋaablà re Goomaa doùn nèe tsuru ci: «À gooma na de jà nìì reè rà ŋe, twɛy nà à jà. Nìì reè to na à gooma myɛn jà ŋe, twɛy nà à fàànmun.»
22 Àwà min bà ni be bo ye kpà, tɔ̀ rii mun jɔɔn shu jaa giri fau. 23 Dòònun, faagoo na ni mun ne twɛy wòòɲan reè ɲàn dɛ à jii gir'lì to yɛ, m'a gaa gaaŋ'n kur'la sapɛ, min bè bo ye kpà. 24 Tà doùn, min na bà bèe Ɛsipaɲin jamaan nɔn watsi riì bwèy, mun dɔ̀n bokɔɔn à ni mun duùn, min ye jà. Tà tsuru, mun màgoo ni nìi rà jìɛ̀ doùn, ye dzia mun kèèse tɔ̀ ka. Tɔ̀ nìn yè bo à ra, sani min bè, à kɛ̀sɛɛn ye be bà watsi dɛɛnin, mun nà dzi tɔ̀ fa ye ka, min ye kuru bo. 25 Ŋà sani tɔ̀ yeè fa, mun bèe Yerusalɛmùn nèe watsi ree ɲan ŋe, min bè Ŋaablà re mòdzin neè rè faagoò fa mɔn. 26 È ɲɛn à tsɛ, Maseduwanin mar'la ko Akayi mar'la ɲɛyna moo rèè y'à ŋɛ̀nɛ̀ɲaun yè dzyèè, yè e si ji e si tsɛ, y'à ka Yerusalɛmùn Ŋaablà re mòdzin gbakɔɔn reè dzwɛ̀ma. 27 À kpɛ̀yn sààben y'à ŋɛ̀nɛ̀ɲaun, ŋà è na wù y'à fa sa, kàtsu è re tsìi ni è ra. È ɲɛn à tsɛ, kun kpɛrɛ mòdzin neè ye ba e ninma jau xɔn raa goo rèè ɲàn è bo è re, à wù è sa yeè e ninma ja suun ge reè ɲàn, è bo kun kpɛrɛ mòdzin neè rè. 28 Àwà min na dò twɛy goo rèè rà watsi riì bwèy peu, min tɔ̀ sitɛ̀ɛ̀ sìn fyɛ è ra, mun nà dɔ̀n bo ye re, min bè Ɛsipaɲìn. 29 M'a tɔ̀ min ba nà bè ye re, mun ko Kirisà rè dzwɛ dzii tsyɛunmaà nì nà bè.
Pɔlì nìi gaaŋ Ɔ̀rɔmùn ɲɛynamoo rèè rè
30 Àwà neema reè, mun nà ye màxɔ̀n nìi rà, tɔ̀ rii yɛ, ci mùn Tsifà Yesù Kirisà ko Ŋaablà re Dzia rè kɛ̀nbààbee baraka rɔ̀n, ye wɔ n na mìn kaà fa Ŋaabla mafyɛɛ̀n doùn mun ne. 31 Ye Ŋaa màfyɛ̀n gè riì ni à to, min dzi n tsiuma tàrà Yude mar'la ɲɛyna bɛy reè rà, tà ko n beè dzwɛ̀ma riì ka Yerusalɛmùn, mɔn Ŋaablà re mòdzin neè yè bè e tsiì à ra taamadzibe ka. 32 Tà tsuru, è ba Ŋaablà sao, mun nà dzi wɔ ye re mɔn taamadzibe ka, min ɲànwɔ dɛyn fa ye ka. 33 Arì she, jaanciàn tsìfa Ŋaablà yeè to e sapɛ ka ! Àmiinà !