Mìn wɔ e si ra ɲɛynaà doùn
14
1 Mòò riì ŋɔn fyɛn ɲɛynaà doùn, ye tɔ̀ tsìfa kuun'n kuru wuu fa. E maà siin à kɛ̀sɛmàà mà, y'a dè waa. 2 Sɔn naa ɲɛyna doùn, tɔ̀ y'a jàa, wo dzia gè sapɛ ɲɔn, tɔ̀ to y'à tàrà mòò riì ŋɔn fyɛn, tɔ nange rèè bàsɔùn nì ɲɔɔ̀n. 3 Mòò riì ɲwɛɛ̀n ɲɔɔ̀n, tɔ mà a ɲɔn bɛɛ kɔn waa. Mòò riì to na à ɲɔɔ̀n waa, tɔ mà à ɲɔnbaà jààki waa, è ɲɛn à tsɛ, Ŋaabla y'a kun wùù faɔ̀. 4 Wo tsì tɔ̀ tsuru, wo yè bà mòò kpɛr'laa faagoofadzin jaàkia ? À sàn gbaunma tou o, à to mɛrɔn o, tɔ ni à tsìfaà rìì mà. À sàn gbaunma to nà to, kàtsu à dzi ni Tsìfaà rà à y'à sàn gban. 5 Sɔn ne, jisee sɔn blà sɔn ma, ŋà sɔn ne, è sapɛ soo. Tà doùn, nìi ye ba nìi kɛ̀sɛɛ̀, à wù è tsiì tɔ̀ ra.6 Mòò riì jisee reè blàbee e si mà, tɔ tɔ̀ faa Tsìfaà rìì lè. Mòò riì to ɲwɛɛ̀n ɲɔɔ̀n, tɔ tɔ̀ faa Tsìfaà rìì lè, è ɲɛn à tsɛ, à barika sìan Ŋaablà ra. Nìi tsu na à ɲɔɔ̀n waa, tɔ̀ sa tɔ̀ faa Tsìfaà rìì lè è ɲɛn à tsɛ, à sa barika sìan Ŋaablà ra. 7 Mùn pɛn na jaamabee faa e yɛr'la rè, mùn pɛn to na saàn e yɛr'la rè. 8 Mìn jaamabee fa, m'a faa Tsìfaà rìì lè. Mùn to yè san, mùn saàn Tsìfaà rìì lè. Tà doùn, mùn jaamabee fau ò, mùn to saun o, mùn Tsìfaà rìì laa. 9 Àwà, a y'a jà Kirisà yè san è sèè kpunan, tɔ fau nì, è bà ni ba fùn nèè ko jaama reè sa kuntsii. 10 Ŋà wo do, fèe kamà wo yè bà a neemaa jààkia ? Wo sa do, feera wo sa yeè bà a neemaa kɔɔ̀n ? Àwà mùn soo sookɔɔn sapɛ nà e tsiì Ŋaablà re kitsikununma nɔ̀n, è kitsia kùnùn mùn tsɛ. 11 È ɲɛn à tsɛ, à sɛbɛɔ̀n Ŋaablà re Goomaa doùn nèe tsuru ci: «Mun Tsìfaà ci, min bà jaama, kun'nà sapɛ nà gban mun bììn, nɛɛ̀n sapɛ yeè nɔɔrɔɔ ɲɛn Ŋaablà tsɛ.» 12 Tɔ̀ tsuru, mùn soo sookɔɔn sapɛ nà e re jaamabee kpunan bo Ŋaablà re.
Mòo mà bà mòò sàn nà baan kpàà waa
13 Tà doùn, mùn mà e si jààki waa. Sani ye jaaki fa, y'a gaa rii e maà bà e neemaa mɛɛ̀ saabu tàmafa à sàn nà baan kpàà waa. 14 M'a tɔ̀, min bà ɲɛɔ̀n à ra Tsìfa Yesù ɲàn, ci gèsɔn pɛn na ni, nìi ko e yɛrɛ è bà nooŋnà waa. Ŋà mòò ye gèè sɔn ja ci à nooŋnà, à nooŋnà tɔ̀ re. 15 Àwà, ɲwɛyn goo ye ba saabu wo neemasia yè taamaŋununbe tàrà, tɔ̀ y'a kpàdèe ci wo na jiɛ kɛ̀nbààbee shia tsɛ dɛ. A yɛrɛ kaàwɔ ɲwɛyn goo mà nà bà saabu, Kirisà saun mòò riì kamà, tɔ̀ yeè bara waa. 16 Tà doùn, e nìi jàa ci à wù, tɔ̀ mà nà bà tsoo bara saabu waa. 17 Àwà Ŋaablà re màsàbee na ɲwɛyn goo à to na mììngè goo, ŋà à terenbee rìì, ko jaanciàn, ko taamadzibeè Ŋaablà re Dzi Fɛnɛɛ baraka rɔ̀n. 18 Mòò riì faagoò faa Kirisà rè tà tsuru, tà goo dzi Ŋaablà ra, mòdzian sa to y'à tsoo dzi kir'là. 19 Tà doùn, goo nìì reè nàa jaancin ka, mìn twɛy rìì gaa, ko nìì reè nà à to mìn fààn wɔ e si ɲan. 20 Ɲwɛyn goo mà à to e Tsìfaà rè faagoò bara waa. Gèsɔn pɛn na nooŋnà waa tɔ sààben, ŋà a naà nìi ɲɔn tɔ̀ yeè bà ni ba mòò mɛɛ̀ saabu, tɔ̀ na wù waa. 21 Nìi y'à wùɔ, tɔ̀ rii yɛ, a maà shu ɲɔn a to mà mììn fa. Gè o ge nà bà a neemaa mɛɛ̀ saabu, tɔ̀ sapɛ jɔɔn bo. 22 A ɲɛɔ̀n nìi rà tà goò doùn, tɔ̀ bà a soo raa Ŋaablà jaaterema. Wo mòò riì akiri na wo jààkia a re làtigɛɛ doùn, wo raa wùbeu ! 23 Ŋà mòò riì ɲwɛɛ̀n ɲɔɔ̀n, tɔ̀ to y'a tàrà è cir'la, kitsia mɛrɔn tɔ̀ tsɛ nòn. È ɲɛn à tsɛ à nìi faa, à na à faa ɲɛyna taki tsɛ waa. Goo o goo to na faa ɲɛyna taki tsɛ fyeu, tɔ gooɲaan.