À wù mìn majàà fàan rè
13
1 Àyìwà mòdzian soo sookɔɔn sapɛ yeè e majàà mùn kùùn fàànma tsuuŋma rèè rè. È ɲɛn à tsɛ, fààn pɛn na tsùuŋnà Ŋaablà shɔùn waa, nìì reè to ni, Ŋaablà rii yè è tsùuŋnà. 2 È ɲɛn tɔ̀ tsɛ, mòò riì yè e mabaàn fààn mà, tɔ̀ yeè e nɔɔn Ŋaablà devuà rìì mà. Nìì reè to yè e nɔɔn Ŋaablà devuà mà, twɛy nà kitsi mɛɛy e yɛrɛ tsɛ. 3 Àwà, mòò riì wùɔ faa, tɔ̀ shi kun na ni kùntsiɛ̀ jɔɔn waa, fɔ ɲaanfabaà. E dzin ci a maà shi fàan jɔɔn, wùɔ fa, à nà wo saan. 4 È ɲɛn à tsɛ, à ni Ŋaablà re faagoo rìì là, wo wùbee kamà. A to ye ɲaan fa, shi, kàtsu, kaa mun'nà na ni à suun maana waa. À ni Ŋaablà re faagoò rìì là, à nà wo koron, è tɔ̀ re vununtaà kpàdè gooɲaanfabaà rà. 5 Tɔ̀ rii y'à to, à wù mìn majàà fàan rè. À wù mìn majàà à re, è ɲɛn à tsɛ Ŋaablà re vununtaà ni, è bà akir'la goo sa. 6 Tɔ̀ soo rìì kamà ye yè bà kɔnsɔɔn sa sar'la. Ye to y'à sàr'la nìì reè rè, twɛy tɔ̀ faagoò faa Ŋaablà re fa rii ɲàn. 7 Nìì wù nìi ka, ye tɔ̀ fa tɔ̀ re. Kɔnsɔɔn wù è sìn nìi rà, ye tɔ̀ sìn tɔ̀ ra, siigur'la to wù è sìn nìi rà, ye tɔ̀ sìn tɔ̀ ra. Nìi gàsin wù è tsùù, ye tɔ̀ gàsin tsuù, nìi to wù è blàbe, ye tɔ̀ blàbe.Mìn kɛ̀nbààbee shi jiì
8 Mòò pɛn ne tsìi mà bà ni e ra, fɔ kɛ̀nbààbee tsìɛ̀ e ko e si fi, kàtsu, mòò riì dzyee rèè kɛ̀ɛn, tɔ sàriyaa ko e kuru dzii tsyɛun. 9 È ɲɛn à tsɛ, Ŋaablà dzugooma xɔù nìì reè ci: «Maà ɲànmɔ̀ɔ̀be fa waa, maà mòò vu waa, maà shɔnbe fa waa, maà a jaàn bo mòò rè gè rè waa», ko dzugooma xɔù dzyee rèè sapɛ, tɔ̀ sapɛ ni nèe gooma ree ɲan, nìi yɛ ci: «A modzìnsia kɛ̀n, jàci a yɛr'la». 10 Àwà a y'a modzìnsia kɛ̀n, a na ɲaan pɛn faa à ra waa. Tà doùn, kɛ̀nbààbee rìì sàrìyaa ko e kuru dzii tsyɛunmaà.
11 Ye tɔ̀ fa, è ɲɛn à tsɛ mùn ni watsi riì ɲàn dòònun, ye tɔ̀ tɔ̀. Watsi wɔu, ye kpunan bo ciɛ̀ ɲàn, kàtsu mìn tsi, tɔ̀ watsi tsyɛnbeu mùn na dòònun è geren mùn ne ɲɛynaà fa watsia tsɛ. 12 Feèn gbàmaun, jisee yè bà tsyɛnbeò. Mìn tsitsii dzuun goo sapɛ bo e ra, mìn vyevyeè kaa faa gè rèè ji e ma. 13 Mìn re jaamabee fa fyɛu tsɛ, a ci bwèytaaruɔ̀n ni nìi tsuru. È bà jaamabe, ɲwɛyn ɲɔn na ni nìi ɲàn baragooma, dɔ̀ɔ̀kɔ̀ɔ̀nbe to na ni à ɲan. Ɲànmɔ̀ɔ̀be na ni nìi ɲàn, kɛ̀kɛ̀ɛ̀ybe to na ni à ɲan. Kaa na ni nìi ɲàn, jaaɲininbe to na ni à ɲan. 14 Ye Tsìfa Yesù Kirisà rìì ji e ma, nìi to gɔɔ̀n raa goo rèè, e maà e yɛrɛ to twɛy suun, y'a kur'la goo ɲaan neè fa waa.