Actes 1

Kɛɛradzin neè faadziɛ

Yesù y'à làyiri seun kɛɛradzin neè rè min niì, ci wo nà Ŋaablà re Dzia sìn è ra

1-2 Mòdzìn sɔbɛn Tewofilì, àwà Yesù goo nìì reè sapɛ fau, ko à nìì reè sapɛ karaun mòdzian nà, è sen fɔ à dzun jɔn bwey rɔ̀n, è bè suu fɔ à sen teèn dzu jìrànxɔɔ̀ doùn, mun tɔ̀ sapɛ lakɛ̀rɔn wo ra, n ne sɛbɛn jɔna faumaà doùn. Tà doùn, sani è sen teyn jìrànxɔɔ̀ doùn, à na nìì reè boo è bà e re kɛɛradzin ì, twɛy wù yè nìi fa, à tɔ̀ shi kpadè tou twɛy rà Ŋaablà re Dzi Fɛnɛɛ baraka rɔ̀n.

3 Àwà, à saunmaà shɔ̀ùn, è nà e yɛrɛ kpadè e re kɛɛradzin neè rà, è goo giri ka à kpàdè è ra, ci wò rii sèè bàuma yɛ jaama. È bè tàrà fɔ bwèy dzyèè, è yɛrɛ kpadèe è ra tà tsuru, è Ŋaablà re Màsàbee gooma deè è ra.

4 Àwà, sii sɔn see, Yesù ko e re kɛɛradzin neè ni ɲwɛɛ̀n nà, à y'à dè màxɔbe è ra nèe tsuru ci: «E maà bo Yerusalɛmùn waa. Ye to mɔn, fɔ mun Fà Ŋaabla goo nìi làyiri seun ye re, fɔ tɔ̀ yeè fa e re. Mun làyir'lìi gooma deu ye ra, à tɔ̀ rii.

5 Yùxanà mòdzian jaara fooŋ Ŋaablà re shia goo rèè rà ko yu rìì ka. Ŋà, nìi ye, ye jaara nà fòò ko Ŋaablà re Dzi Fɛnɛɛ rìì ka. Sani bwèy dàman, tɔ nà fa.»

Kɛɛradzin neè nìi fau, Yesù tèronmaà shɔ̀ùn jìrànxɔɔ̀ doùn

6 Àwà, è kɛɛradzin neè ladzyeeŋma to Yesù ka, y'à tey tɔ̀un ci: «Mùn Tsìfaà, wo yè Isirayɛlì màsàbee sèè tsùù yeu, tɔ̀ to nà fa tɔ̀ rii bwèy gbɛ ?»

7 Yesù yè dzin è ra ci: «Ye yè bà ni twɛy goo rèè fa watsi tɔ, tɔ̀ na ni ye suun waa. È nà fa watsi riì bwèy, mùn Fà Ŋaablà rii tɔ̀ tɔ̀, kàtsu à faa shia ni wò soo pe rii suun.

8 Tɔ̀ Dzi Fɛnɛɛ baraka rɔ̀n, ye nà dzi mun ne goò lakɛɛ̀y dziɲantsiɛ min niì sapɛ, è sen Yerusalɛmùn, è bè Yude mar'la ko Samari mar'la min niì sapɛ, è bè suu fɔ dziɲaan dààn rà.»

9 Àwà, twɛy gooma reè dè dòumaà shɔ̀ùn, Yesù rè, è sen fu bè kɛɛradzin neè jaa ra jìran. Twɛy y'à tèyn bekɔɔn siin fur'lu, fɔ munun sɔn yeè b'a tsyee bo è mà, è jaa yè fɔn à ra.

10 È jaà gbɛ̀rɛ̀ toumaà tɔ̀ tsuru, yè Yesù bèkɔɔn siɛ̀n, yè nà bàràma jaa soo, yè kpiri mɛyɛ̀fyɛ̀tsi fii jà e tɛyn.

11 Twɛy yè dzin è ra ci: «Galileka reè, fee rìì ye tsìiŋnà mìin, ye yè bà Ŋaablaxɔɔ̀ siɛ̀n ? Yesù nìi bou ye fi, è sen fu bè jìrànxɔɔ̀ doùn, à sen fu bèu nìi tsuru, ye nà à sèè jàà nakɔɔn ja sii sɔn see tɔ̀ fau'n kuru soo rà.»

12 Àyìwà, twɛy goo rèè shɔ̀ùn, kɛɛradzin neè na ni jèn nìi tsɛ, tɔ̀ yeè bà Oliviku rèè jèèn, yè jàà bo tɔ̀ tsɛ, yè e kpɛyn sèè na Yerusalɛmùn wɔ̀ɔ̀ doùn. Oliviku rèè jèèn ko Yerusalɛmùn fia cilo soo tsuru boò.

È mòò sɔn ka Kɛɛradzin neè dzii tsyɛun min niì teeŋ fii

13 È nàu wɔ Yerusalɛmùn, è dɛ̀rɔɔ̀n yè e si ladzyee sangaso nìi doùn, yè bè dɔ̀n mɔn. À na Piyɛrì, ko Yùxanà, ko Yàkubà, ko Andère, ko Fìlipù, ko Tomà, ko Batelemi, ko Matsiyù, ko Àlifù raa dzin kpiri Yàkubà, ko Shimɔ̀n, nìi kir'là ci Zhelɔtsì fàtsiɛ kùùn kààfabaà, tɔ̀ yeè kòmànà ɲɛn Yàkubà raa dzin kpiri Yudè tsɛ.

14 È sapɛ na byɛɔ̀n à mà, yè e si ladzyee kudɛyn, yè Ŋaablà mafyɛ̀ɛn ko duungoo soo ka. Tàan dàman na ni è ka, tɔ̀ yeè ɲɛn Yesù na Mariyamùn tsɛ, ko Yesù tseyn nèè.

15 Àwà, sii sɔn see, kàràndzin neè yè nà e ladzyèè kɔn, è giribee yè bà na mòkun caànmoò ko dzin mòò boò. Tɔ̀ sii sèè, nìi Piyɛrì, tɔ̀ yeè fù, è tsiì è fi, è dzin nèe tsuru ci:

16 «N neema ì, Ŋaablà re Dzi Fɛnɛɛ baraka rɔ̀n, màsà kpiri Dawudà na gooma niì dè dɔɔ̀n bɔrɔɔ, è bà sɛbɛɔ̀n Ŋaablà re goomaa Kìtaabuà doùn, fɔ tɔ̀ yeè bà na bou e shi tsɛ. Tɔ̀ gooma ree na deò Yudà rìì tsɛ, tɔ̀ niì bàu Yesù jàànfabaà, è ji à kuunbaa rèè jɔɔn, y'à kun.

17 Àwà, ɲe nìi reè Yesù rè kɛɛradzin neè, Yudà sa na ɲe kur'li, è bà na mùn sa ko e raa faagoo.

18 À ɲɛyn niì tàrau e re gooɲaan faumaà sàrà, à bèu tɔ̀ ka dzù fì. Tà doùn, à mɛɛykɔɔn nàu kuu e doòn tsɛ, à doòn yè fɔn, à nwɛyn nèè yè kon ji dzɔn nɔ̀n.

19 Yerusalɛmunka reè sapɛ toro jiu tɔ̀ goò ɲàn. Tɔ̀ rii kamà, è re kungoòmàà ɲàn, yè tɔ̀ dzù rèe tsoo wɔ ci: Akɛlidama, nìi dzuɔn ci: "Tsììn dzuà".

20 Tɔ̀ y'a tàrà, à sɛbɛɔ̀n Zàbur'leè sɛbɛɛn doùn nèe tsuru ci:

À re gàneè yè bà koron,

mòò pɛn mà e tsuù à doùn dɛ.

Ci kɔn:

Mòò kpɛrɛ y'à tsɔ̀saan sen e re faagoò doùn.»

21-22 Piyɛrì yè geren gomaa ka kɔn ci: «Àwà, à wù mòò sɔn yè bà mùn tɛ̀y, nìi wù à sa yeè bà na ni ɲe ko Yesù ka e re jìì rèè sapɛ doùn, è sen fɔ Yesù jaara foò bwey Yùxanà rè, è bè suu fɔ à boò dzu ɲe ɲan, è sen fu bè jìrànxɔɔ̀ doùn. Tà tsuru, tɔ̀ tsìfa sa nà wɔ ɲe ra, à y'à lakɛɛ̀y mòdzian na ci Yesù saun, è sèè kpunan.»

23 Tɔ̀un, yè mòkun fii kpàdè. Twɛy mòkun fiɛ̀ ɲan, soo tsoo na ci Yusufù, soo tsoo yè bà ci Matsiyasì. Yusufù raa tsoo sɔn na Barisabasì, yè bà à kir'là sa, ci Yusitusì.

24 Tà shɔ̀ùn, è sa yeè dzyèè, yè Ŋaablà mafyɛ̀n nèe tsuru ci: «Mùn Tsìfa Ŋaablà, wo rìì mòdzian sapɛ duùn tɔ̀. Tà doùn, nèe mòkun fii rìi yɛ nèe, mòò riì wo jaa ra twɛy mòkun fiɛ̀ ɲàn, tɔ̀ kpàdè mùn na.

25 Tɔ nà bà kɛɛradzian sɔn, è Yudà tsɔ̀saan sen e re faagoò doùn, kàtsu tɔ̀ yeè e raa kɔ̀ɔ̀ bàjiu, è maa be e bema.»

26 Àwà, è Ŋaablà mafyɛ̀n dòu tà tsuru watsi riì bwèy, yè kaan ji. E kaan jiu, kaan yè Matsiyasì rìì kpàdè. Tɔ̀un, Matsiyasì yè bà kɛɛradzin neè dzyee teeŋ sɔɔn tɛ̀y.