Pɔlì sɛbɛn niì kau
Ɔ̀rɔ̀mùnka reè rè
Pɔlì kiri kùàn ko dzwɛɛ̀
1
1 Nèe mun Pɔl'lè sɛbɛn, Yesù Kirisà rè jòn kpir'la. Mun kiriu min bà kɛɛradzin, min bo n si, min Ŋaablà re Kùnàgoo Dziɔ̀ dè. 2 Ŋaabla na tɔ̀ Kùnàgoo Dziɔ̀ rìì làyiri seòn fɔ watsi gbaan è bo à re kɛɛra reè dzu, à re Goomaa doùn. 3 Kùnàgoo Dziù rèe goomaa à Dzin Kpir'la rìì tsɛ, tɔ̀ niì bàu mòdzin, è bo màsà kpiri Dawudà tsua ɲàn. 4 À kpunan boumaà fùn nèè fi, Ŋaablà re Dzi Fɛnɛɛ y'a kpàdèu dzibaabe ka ci à Ŋaablà dzin, Yesù Kirisà, mùn Tsìfaà. 5 À bàraka rɔ̀n, mùn y'a ɲanwùɔ tàrau, mun bàu kɛɛradzin, min bà ni wɔ kuan mòdzian sapɛ ra à tsoò kamà, yè ɲɛyna fa à ra, y'à dèvuà shi jiì. 6 Ye sa twɛy mòdzin neè sɔn ni, Yesù Kirisà nìì reè kiriɔ. 7 Ye nìì reè sapɛ ni Ɔ̀rɔmùn wɔ̀ rɔ̀n, Ŋaabla yeè bà ye kɛ̀niɔ̀, è ye kiri e raa, sɛbɛn nee kaɔ ye rìì lè. Arì she, Ŋaablà ɲanwùɔ ko jaanciàn, mùn Fà Ŋaablà ko Tsìfa Yesù Kirisà yè twɛy sìn e ra.Pɔlì y'à gaa wò yeè bè bo Ɔ̀rɔ̀mùnka reè kpà
8 Àwa, mun nà n ne goomaa jɔ̀n nìi ka, tɔ̀ rii yɛ, Yesù Kirisà baraka rɔ̀n, min tswɛ̀y fa n ne Ŋaablà re ye sapɛ kamà, è ɲɛn à tsɛ, ye re ɲɛynaà gooma dèe dziɲantsiɛ min niì sapɛ. 9 Mun faagoò faa Ŋaablà riì rè ko n duɔ̀n sapɛ ka, à Dzin Kpir'la rè Kùnàgoo Dziɔ̀ dèè doùn, tɔ̀ sa mun shɛɛrɛ, ci mun taa ni tsuù ye mà kudɛyn. 10 Mun nìi gaa à re kudɛyn n ne màfyɛyn nèè doùn, tɔ̀ rii yɛ è ba à sàò, è nà watsi wuɔ sɔn ka, min dzi be bo ye kpà. 11 À kuru ni mun na kɔsɔbɛ min ye jà, min bà ni ye kɔ̀ Ŋaa re kɔ̀ì geè sɔn na, ye fààn tarà. 12 Mun nìi gaa tɔ̀ rii yɛ, ye ko mun yè bè dzi e si màxɔ̀n ɲɛynaà doùn. Ye raa ɲɛynaà yè mun màxɔ̀n, mun sa raà yè ye màxɔ̀n. 13 Neema reè, mun n'a re y'a tɔ̀, ci m'a gaa jaa giri fau min bè bo ye kpà, ŋà è bè suu fɔ dòònun dzu, mun na dzi be ŋe waa. Àwà, mun nìi gaa, tɔ̀ rii yɛ, mun yè n ne faagoò nàfaà tàrà ye re mɔn a ci m'a tàrau kun kpɛrɛ ì sa re nìi tsuru. 14 Mòdzian sapɛ re tsìi ni mun vu ra. aGɛ̀rɛ̀ki sen ɲɛn kun kpɛrɛ ì tsɛ, mòdzin karaunma ì sen ɲɛn mòdzin karàn bɛy ì tsɛ. 15 Tɔ̀ kamà à kuru ni mun na cèreoma, min kùnàgoo dziɔ̀ dè ye sa ra, ye nìì reè tsùuŋnà Ɔ̀rɔmù.
Kùnàgoo Dziɔ̀ nàfaà
16 Àwà Kùnàgoo Dziɔ̀ seey na ni mun na waa, kàtsu à Ŋaablà re dzibaabe rii, sànko nìì reè sapɛ ɲɛɛn Ŋaablà ra, yè dzi tsi. È jɔ̀n Dzyèèsìbee mòdzin neè tsɛ, è suu kun kpɛrɛ mòdzin neè rà. 17 Ŋaablà re terenbee kpàdeò è bo Kùnàgoo Dziɔ̀ rìì ɲàn. Tɔ̀ terenbee tàr'la ɲɛynaà soo ko e soo rii baraka ɲan a ci à yɛ sɛbɛɔ̀n Ŋaablà re Goomaa doùn nìi tsuru ci: «Mòò riì tereòn, tɔ nà jaamabee fa ɲɛynaà nì baraka ɲan.»
Goo nìi nà kitsi mɛɛy adamàdzin nèè tsɛ
18 Àwà, mòdzian shibɛybeè Ŋaablà jɔɔn ko è re terenbɛybeè kamà, Ŋaablà re vununtaà yè e kpadeò è bo jìran nɔ̀n. È re terenbɛy goo reè saabu rɔ̀n, è sààbeen màmɛnɛɔn. 19 Tɔ̀ to y'à tàrà è dzia nìi tɔ̀ è bo Ŋaablà re, tɔ fyɛɔ. Ŋaablà yɛr'la tɔ̀ kpàdèu è ra. 20 È ɲɛn à tsɛ fɔ dziɲaan ɲɛn bwey, à re goo nìì rèè na jaa waa, à re goo fauma rèè saabu rɔ̀n, twɛy fàànmuan yè jà yè fyɛ, nìì yɛ à re dzibaabe dobɛɛ, ko à re ŋaablabee. Tà doùn mòò pɛn jààki bɛy fa to waa. 21 Àwà è re Ŋaablà tɔumaà ko e ra sa, è na nɔɔrɔ ɲɛɛn à tsɛ, è to na tswɛ̀y faa à re. Sani yè tɔ̀ fa, è kɛ̀sɛmàà bàu goo kùnjàà bɛy, è re akiribɛybeè yè bà tsitsiì brìsi è mà. 22 È yè e yɛrɛ baà mòdzin akiribla ì, ŋà è bàu akiri bɛy ì. 23 Ŋaablà riì na saàn waa, è tɔ̀ nɔɔrɔɔ̀ ɲancinaun ko ge ì ka, nìì reè saàn, nìi yɛ mòdzin bosi ge ì, kɛ̀yn neè, sàn nààlèn ge reè, ko gè nìì reè yè e ger'na e don tsɛ.
24 Tɔ̀ kamà, è kur'la goo ɲaan neè yè bà saabu, Ŋaablà yeè è to e noo goo rèè suun, yè e yɛrɛ ceu bo. 25 Àwà è doò ka Ŋaablà re sààbeen ɲancinaun, yè gè ɲɛunmaà blàbe yè faagoo fa à re, y'à Ɲɛnbaà to, tsoo dzi ɲɛɛn tɔ̀ niì tsɛ kudɛyn. Àmiinà ! 26 Tɔ̀ kamà, Ŋaablà sa yeè è to e ceù boo kur'la goo ɲaan neè suun. È ɲɛn à tsɛ, tàan ko tàan na e si gaa waa è re tàan rèè to tɔ̀ rii faa. 27 Tɔ̀ soo tsuru, sani kpir'leè sa yeè tàan rèè gaa, twɛy sa tɔ̀ tou mɔn, è kpirisia rìì kuru yè è kun fɔ è bè geren. Kpiri ko kpiri yeè dzyèè, è tɔ̀ cèùbòkɔ̀ɔ̀n goo fau, è to na wù nìi ka e fìr'là tsìì sara, è tɔ̀ tàrau e yɛrɛ ɲan. 28 È na e tsiì yè Ŋaabla tɔ cɛyn nìi fa waa, tɔ̀ kamà Ŋaablà sa yeè è ko e akiri ɲaan to e si ra, yè goo dàà bɛɛ faa. 29 È ɲan tsyɛɔ̀n terenbɛybe goo kaatsià sapɛ ka, ɲanbee, kur'la goo ɲaan neè, jaaɲininbeè, mòdzìn vua, kaà, jàànfaà, ɲaan kaatsià sapɛ. È tsoo bar'la faa. 30 È mòdzìn tsòò barabaa ì, è Ŋaablà ɲan ì, è dzu gaa faa, è blà e yɛr'le, è yɛ̀rɛ̀dèra, è jaara sàn ɲaan ka, è na ker'làgè blàbee. 31 Akiri na ni è re, sààben na ni è dzu, mòò ɲììɲii na è kuàn è to na matsur'la. 32 Y'à tɔ̀ y'à fyɛ ci Ŋaabla kitsi riì kùn'na twɛy goo rèè faabaa rèè tsɛ, tɔ saàn rìì. Tà ko e sa ra, è na daàn twɛy goo rèè faa mà waa, ŋà nìì rèè sa y'a faa, y'à màkuàn twɛy rè.