Ŋaabla nà mòdzian sapɛ sarà è kòrò è faadziɛ ka
2
1 Tà doùn, wo bàu mòò o moò, wo nìi dzyee rèè jààkia, dzi tarama pɛn na ni wo re waa. Dzyee rèè jààkikɔɔn, wo kitsi mɛɛ̀ a yɛrɛ tsɛ. È ɲɛn à tsɛ, wo yè è jààkia nìi rà, wo sa tɔ̀ soo rìì faa. 2 Mùn to y'à tɔ̀, ci nìì reè twɛy goo rèè faa, Ŋaablà kitsi riì kùn'na è tsɛ, à tɔ̀ faa è kòrò sààbeen ka. 3 Nìì ree twɛy goo rèè faa w'e bà è jààkia, wo sa to tɔ̀ soo rìì faa, w'e bà à kɛ̀sɛɛ ci wo nà a tsi Ŋaablà raa kitsia rà gbɛ ? 4 Ŋaablà re wùɔ blàbee nìi boò, ko à re goo kua, ko a re mɔ̀nɲɔɔn, wo na tɔ̀ jàa goo dɛ ? Tɔ̀ to y'à tàrà wo na à tɔ̀ ci Ŋaablà ɲanwùɔ wo gaa nìi mà, tɔ̀ rii yɛ w'e nimisa, w'a re jaamabee fau'n kur'la lakere o ? 5 È ɲɛn wo re tantaamaxɔbeè ko wo re dùsùkùnxɔ̀beè tsɛ, wo vununta rìì lamɔnɔ̀n tsùɔ a yɛrɛ tɛyn jisee kamà, nìi Ŋaablà re vununtaà jisee, ko à re kitsi tereunmaà kpàdè jisee. 6 Àwà tɔ̀ jisee, à nà mòdzian soo sookɔɔn sapɛ sarà è kòrò è faadziɛ ka. 7 Nìì reè ɲanshiɔ̀ wùù faa rà, yè bà Ŋaablà nɔɔrɔɔ̀ ko à blàbee, ko jaamabe dobɛɛ gaa, twɛy nà jaamabe dziù dòbɛɛ tàrà. 8 Ŋà nìì reè yè e nɔɔ̀n sààbeen mà, yè e maban à mà, è to yè e tsiiŋnà terenbɛybee rà, Ŋaablà re vununta brìsià twɛy nìn. 9 Mòò o moò ɲaan faa, byɛnbe ko jaanta tɔ̀ nìn, è jɔ̀n Dzyèèsìbee mòdzin neè tsɛ, è bè suu kun kpɛrɛ mòdzin neè sa rà. 10 Mòò o moò to wùɔ faa, nɔɔrɔɔ̀ ko blàbee ko jaanciàn tɔ̀ nìn, è jɔ̀n Dzyèèsìbee mòdzin neè tsɛ, è bè suu kun kpɛrɛ mòdzin neè sa rà. 11 È ɲɛn à tsɛ, mòdzian sapɛ soo Ŋaablà re, à na mòò boò mòò ɲàn waa.12 Àwà nìì reè sapɛ gooɲaan fau sàriyaa bɛy, twɛy sa nà bara, nìi na sàrìyaa ka waa. Nìì reè sapɛ to gooɲaan fau è kòrò sàrìyaa ka, twɛy sa nà kitsi, è kòrò sàrìyaa ka. 13 Nìì reè dàan sàrìyaa myɛ̀ɛ̀n bàsɔùn mà, twɛy na tereòn Ŋaablà jaa dzuun waa, ŋà nìì reè y'à shi jiɛ, twɛy rìì nà kpàdè ci è tereòn. 14 Àwà nìi kun kpɛrɛ mòdzin neè, twɛy nìì reè na Ŋaablà re sàrìyaa tɔ̀ waa, yè ba à goo rèè shi jiɛ e yɛrɛma, à to na ni è suun waa, tɔ̀ y'a kpàdèe ci è sàrìya e yɛr'la rè. 15 È fau'n kur'la y'à kpàdèe ci sàriyaa ci nìi yè fa, tɔ sɛbɛɔ̀n è dùsùkuan tsɛ. È akir'là sa y'a shɛɛrɛbe faa, nìi doùn è kɛ̀sɛmàà yè è jààkia watsia sɔn ɲan, watsia sɔn ɲan è dzi sìn è ra. 16 Ŋaablà ye ba nà mòdzian rè goo mɛnɛunma rèè kitsi kunun jisee riì, è bo Yesù Kirisà ɲàn, a ci mun ne Kùnàgoo Dziɔ̀ y'à dèe nìi tsuru, tɔ̀ sapɛ nà kpàdè tɔ̀ sii sèè.
Goo nìì reè nà kitsi mɛɛy Dzyèèsìbee mòdzin neè tsɛ
17 Ŋà, wo rìi ci wo Dzyèèsìbee mòdzin, wo si xɔ sàriyaa tsɛ, w'e bà Ŋaabla goo ka a yɛrɛ blabee, 18 wo Ŋaablà saɔ tɔ̀, w'e bà dzia à tɔ̀ nìi wù, kàtsu wo kàraɔ̀n sàrìyaa rà. 19 Wo si xɔ à tsɛ, ci wo jaana reè kurukunbaa, nìi reè ni tsiitsiɛ̀ ɲàn, wo twɛy rè vyevyee, 20 wo fàànmùnyà bɛy reè kàrànbaa, w'e bà dziinkoomɛyna modzìn nèè kàrànfa, è ɲɛn à tsɛ wo re, twɛ̀ɛ ko sààbeen takia sa tàr'la sàrìyaa ɲàn. 21 Àwà, wo rìi mòdzian kàr'na, wo na a yɛrɛ kar'na ɔn ? Wo rìì y'à kàr'na ci shɔnbe mà fa waa, wo to shɔnbeè faa. 22 Wo ci ɲànmɔ̀ɔ̀be mà fa waa, wo to tɔ̀ faa. Ɲɔ̀n rèè goo xɔ wo mà, wo rìì to yè è shɔn boò ɲɔ̀n gba rèè doùn. 23 Sàrìyaa yɛ̀rɛ̀blàbeè ni wo ɲan, wo to Ŋaablà ɲanfyanbee sàrìyaa bar'la goo rèè ka. 24 Tà doùn, à sɛbɛɔ̀n Ŋaablà re Goomaa doùn ci: «Ye kamà, Ŋaablà tsoò baraɔ̀ kun kpɛrɛ mòdzin neè fi.» 25 Àwà, a kpɛynto ye ba sàrìyaa shi jiɛ, mòo dzia dzin ci nàfa ni a shɛunmaà ɲàn. Ŋà w'e ba à bar'la rìì, a shɛunmaà ko e raa sa, à ni a ci a na shɛɔn tsu. 26 Mòò riì na shɛɔn waa, tɔ̀ ye ba shi kpadèunma rèè shi jiɛ, à shɛnbɛybeè ko e raà sa, à fa dan ci à shɛɔn fyeu ɔ ? 27 Tɔ̀ niì na shimaangoo faɔ̀ e tsùàn ɲàn waa, tɔ̀ ye ba sàrìyaa shi jiɛ, tɔ nà wo jààki, e ɲɛn à tsɛ, sàrìyaa sɛbɛunmaà ni wo re, ko shimaangoo sa, wo to na à shi jiɛ waa. 28 Àwà, a y'a myɛ̀n Dzyèèsìbee mòdzin, à na jaara jɛ̀ɛ bàsɔùn kpɛyn waa, à to na tsùàn ɲàn raa shimaangoo jakɔɔn bàsɔùn tsu waa. 29 Ŋà Dzyèèsìbee mòdzin takia, tɔ̀ rii yɛ, duùn naà, shimaangoo yè bà dùsùkuan raa shimaangoo. Shimaangoo riì faɔ̀ Ŋaabla re Dzia baraka rɔn, nìi na sɛbɛn goo waa. Tɔ̀ mòdzian yè e raa tsoo dzia tàr'la è bo Ŋaablà rii lè, à na mòdzin neè waa.