Ŋaablà rii sààbèntsià
3
1 Àwà, Dzyèèsìbee mòdzian fyanbemaà nì kɛ̀n, shimaangoo nàfaà yè bà kɛ̀n ? 2 E bà Dzyèèsìbee mòdzin, tɔ̀ nàfaà blà kàjaa sapɛ tsɛ. È ɲɛn à tsɛ, Ŋaablà re Gooma reè kɛ̀ɛ̀yfau ye rìì jɔ̀na ma. 3 À ni dzùrù ? Swey kɛ̀nsɛɛn ma ba bàu vusootsi tɔ̀ goò doùn, tɔ dzia Ŋaablà raa vusootsibee sà ɔ̀ ? 4 Àyi dɛrɛ ! À wù è tɔ̀ ci Ŋaablà rii sààbèntsi, mòdzin sapɛ yeè bà doodebaa, a ci à yɛ sɛbɛɔ̀n nìi tsuru Ŋaablà re Goomaa doùn ci: «À wù è tɔ̀ ci wo tereòn a re gooma reè doùn, kitsia doùn w'e bà dzi tarabaa.» 5 Ɲe raa terenbɛybeè to ye ba Ŋaablà raa terenbee rìì kpàdèe, mùn dzia fee rìì dè ? È kpàdè ci Ŋaablà na tereòn à re vununta jikɔɔn doùn ɲe tsɛ gbɛ ? Mun goomaa adamadzin mòdzin gomau'n kur'la. 6 Ŋaablà teren bɛy ? Àyi dɛrɛ ! È ba na tà tsuru, à na nà dziɲan kitsi dzùrù ? 7 Ŋà mun ne doò ye ba bàa saabu Ŋaablà re saabeen yè kpàdè fyɛ è nɔɔrɔ ɲɛn à tsɛ, fèe bèe à to kitsi yeè mɛɛy mun tsɛ kɔn, ci mun gooɲaantsiitsi ? 8 Tà doùn mùn to fa ɲaan fa wùù yeè bà ni bo à doùn a ci swey tɔ̀ goomaa doò wɔɔ̀ mun na nìi tsuru ɔ ? Kitsia nà mɛɛy twɛy mòdzin neè tsɛ, tɔ̀ to wù è ka.À kpàdèò min niì, ci Ŋaablà boshɔ̀ùn mòò pɛn na tereòn waa
9 Àwà, à ni dzùrù ? Ɲe Dzyèèsìbee mòdzin neè fyan dzyee rèè mà gbɛ ? Àyi dɛrɛ ! M'a dè kpàdèu nòn, ci Dzyèèsìbee mòdzin o, kun kpɛrɛ mòdzin o, gooɲaan fààn ɲinaɔn è sapɛ ma. 10 À sɛbɛɔ̀n Ŋaablà re Goomaa doùn ci: «Mòò pɛn na tereòn waa, arì mòò sɔn. 11 Akiritsi pɛn na ni, mòò pɛn na Ŋaablà gaa. 12 È sapɛ sèè bou Ŋaablà kpɛyn, è sapɛ yeè bà nàfà bɛy esire. Goowuufabaa pɛn na ni è ɲan, arì mòò sɔn. 13 È naanaakuan ni a ci fùnkɔɔ saunma, è nɛɛ̀n mòdziìn sàn fìr'la, è dziɛ̀ yè bà ni a ci myɛn baà. 14 È dzuà tsyɛɔ̀n nìi rà, à sapɛ danga goòmà soùn. 15 È sàn ma ta mòdzìn vua ra. 16 È nà dɔ̀n bo min o min, à sapɛ baragoò ko màtsuru. 17 È na jaanciàn shi pɛn tɔ̀. 18 Ŋaablà jɔɔn shiɲaanbe pɛn na ni è ɲan». 19 Àwà, m'à tɔ̀ ci sàrìyaa nìi sapɛ deè, nìì reè ni sàrìyaa dzuun, à y'à dè siàn twɛy rìì là. À y'à dè siàn twɛy rìì là, gè riì ni à to dzii pɛn mà goomama jà waa, mòdzian sapɛ to yè jà fìrìgòòtsi Ŋaablà biìn. 20 Tɔ̀ kamà, mòò pɛn fa kpàdè ci à tereòn Ŋaablà jaa dzuun, sàrìyaa goo rèè yè bà saabu waa. È ɲɛn à tsɛ, sàrìyaa y'à toò mòdzian yè gooɲaan nì tɔ̀.
È kpàdè ci a tereòn, tɔ faa ɲɛynaà nì baraka ɲan
21 Ŋà dòònun, Ŋaablà re terenbee kpàdeò, nìi na sàrìyaa fyɛ̀ waa. Sàrìyaa ko kɛɛra reè dèvuà sa tɔ̀ shɛɛrɛbe faa. 22 Ɲɛynaà nì baraka ɲan Yesù Kirisà rà, Ŋaablà ye e re terenbee kpàdèe mòdzian sapɛ kajaa tsɛ. À tɔ̀ tsuru, è ɲɛn à tsɛ Ŋaablà na mòò boò mòò ɲàn waa. 23 Àwà mòdzian sapɛ gooɲaan fau, è sapɛ yeè fɔn Ŋaablà nɔɔrɔɔ̀ ɲan. 24 Ŋà Ŋaablà ɲanwùɔ baraka rɔ̀n, à kpàdèu ci è sapɛ tereun maana, è ɲɛn à tsɛ, Yesù Kirisà saabu ɲan, mòdziìn kùngɔ maboò. 25 Ŋaabla wò rii sìun mòdzian rè gooɲaantsiɛ mɛɛ̀ saaka ɲɛynaà baraka rɔ̀n, à y'à tsìɛn ka à re terenbee kpàdè. È ɲɛn à tsɛ, gooɲaan niì reè fa dɔun bɔrɔɔ, à na twɛy dan waa. 26 È mɔɲɔun tɔ̀ tsuru è tɔ̀ fa, è tɔ̀ ka à kpàdè ci arì she wò re terenbee ni e nima nɔ̀n. Wò tereonmaà doùn, mòò riì ɲɛɛn Yesù rà, wò y'a kpàdèe ci tɔ tereòn.
27 Tà doùn, mòò rè e yɛrɛ̀blàbè kun ni kɔn ɔn ? Ayì, tɔ̀ kùn na ni dɛ ! Sàrìya kɛn daàn tɔ̀ ka ? Faadziɛ raà gbɛ ? Fyeu ! Fɔ ɲɛynaà raa sàrìyaa. 28 Àwà ɲe raa jàma nɔ̀n, à kpàdèe ci mòo tereòn ɲɛynaà nì baraka ɲàn, à na faadziɛ raa sàrìyaa fyɛ̀ waa. 29 Tà doùn, Ŋaablà Dzyèèsìbee mòdzin neè bàsɔùn nì nè Ŋaablà gbɛ ? À na kun kpɛrɛ mòdzin neè sa raa ? Taki kɛ, à kun kpɛrɛ mòdzin neè sa raa dɛrɛ ! 30 À tɔ̀ tsuru, è ɲɛn à tsɛ, Ŋaabla soo rii, è bà à kpàdèe ci mòdzin shɛunma ko shɛn bɛy sa tereòn ɲɛynaà baraka rɔ̀n. 31 Tɔ̀ y'a kpàdèe ci ɲɛynaà kamà, ɲe sào ni ɲe yè Sàrìyaa bà gè nàfà bɛy gbɛ ? Àyi dɛrɛ, à na tɔ̀ tsuru waa. Ɲe yɛ̀rɛ̀ to nìi kpàdèe, tɔ̀ rii yɛ ci Sàrìyaa gè nàfàma.