Nìi ni Ibraximà raa shɛɛrɛbee tsɛ
4
1 Àyìwa, Ibraximà nìi ɲe fabɔɔ adamadzinbee kàjaa tsɛ, mùn dzia fèe rìì dè tɔ̀ raa goò tsɛ ? Mùn dzia dzin ci à fèe tàrau ? 2 Ibraxima ye ba na kpàdeu ci à teròn e fadziɛ rìì baraka ɲan, tɔ̀ na dzia bà à yɛ̀rɛ̀blabee goo, ŋà à fa dzi tɔ̀ fa Ŋaablà rii jaaterema waa. 3 Àwà Ŋaablà re goomaa fèe dèe mùn na ? À sɛbɛɔ̀n ci: «Ibraxima ɲɛun Ŋaablà ra, tɔ̀ yeè dan à re terenbe». 4 M'à tɔ, ci mòò riì ye faagoo fa, sàr'lìi sìan à ra, tɔ̀ na maana ge waa, ŋà à sàr'lì. 5 Ŋà mòò riì na faagoo faɔ̀ waa, mòò rii na shia Ŋaablà jɔɔn waa tɔ̀ ye ɲɛn à ra ci Ŋaabla mòò bàa tereonma, tɔ̀ ɲɛynaà daàn à re terenbe. 6 Tɔ̀ soo sa tsuru, Ŋaabla mòò riì daàn tereunma, à to na à faadziɛ fyɛ̀ waa, màsà kpiri Dawudà dzii wɔɔ tɔ̀ raa xɛɛrɛɛ̀ goomaa tsɛ ci: 7 Ŋaabla nìì reè rè teren bɛy goo ì mɛɛy boò è mà, è vu ra gooɲaantsiɛ dzii tsyee, twɛy raa wùbeu ! 8 Ɔ̀ɔn, Tsìfaà na mòò riì rè gooɲaan tsii daàn dɛ, tɔ̀ raa wùbeu !» 9 Tɔ̀ xɛɛrɛɛ̀ shɛunma rèè bàsɔùn nì naa ràà, tàà à shɛn bɛy reè sa raa ? Mùn kpɛ̀yn dzia nìi dè, tɔ̀ rii yɛ ci Ibraxima ɲɛunmaà kamà Ŋaablà ra, tɔ daun à re terenbe. 10 Tɔ̀ fau fau'n kuru kɛn na ? Ibraxima shɛunmaà shɔ̀ùn nàà tàà à shɛunmaà bònè ? À na fa à shɛunmaà shɔ̀ùn waa, ŋà à fau nì sani è shɛn. 11 Tɔ̀ rii shɔ̀ùn, à shimaangoo tàànmàshɛn tarau, nìi fyɛ̀, è kpàdè ci à terenbe tarau ɲɛynaà baraka rɔ̀n, tɔ̀ y'a tàrà à na shɛn ŋe waa. Tɔ̀ fau, gè riì ni à to, shɛn bɛy reè gè o ge ɲɛynaà faa, è bà ni ba twɛy sapɛ fa, tɔ̀ ɲɛynaà to yè bà ni dan twɛy sa re terenbe. 12 È bà shɛunma rèè sa fa, nìi yɛ, nìì reè na daɔ̀n shimaangoo bàsɔùn mà waa, ŋà è jìɛ ɲe fà Ibraximà rè ɲɛynaà sa fyɛ'ùn, tɔ̀ y'a tàrà à na shɛn ŋe waa.13 Àwà, Ŋaablà y'a làyiri sen Ibraxima ko e tsua dzin nèè rè ci è nàà dziɲaan tàrà shɛn, tɔ̀ na sàriyaa fyɛ̀ dɛ, ŋà à ɲɛynaà raa terenbee rìì fyɛ̀. 14 Shɛn sen neè ye ba na dzia tɔ̀ shɛɛ̀n tàrà Sàriyaa baraka ɲan, ɲɛynaà kùn naà ni dɛ, làyir'là sa to na mɛrɔn. 15 Àwà Sàrìyaa, tɔ nàa Ŋaablà re vununtaà rìì ka, ŋà sàrìya na ni min niì, à bar'la gooma tsu na ni mɔn waa. 16 Tɔ̀ kamà, e bà ni tɔ̀ shɛɛ̀n tàrà, tɔ faa ɲɛynaà nì baraka ɲan, gè riì ni à to è bà kɔ̀ì ge nìi làyir'là dzii tsyɛɛn Ibraximà tsua dzin nèè sapɛ re. À na sàrìyaa dzuun dzin neè bàsɔùn waa, fɔ nìì reè sapɛ ɲɛynaà faa Ibraximà raà tsuru. È ɲɛn à tsɛ, Ibraximà mùn sapɛ fa rìì. 17 Àwà à tɔ̀ tsuru, è ɲɛn à tsɛ, à sɛbɛɔ̀n Ŋaablà re Goomaa doùn ci: «Mun wo bàu kun giri fà.» À ɲe fà Ŋaablà biìn, à ɲɛun tɔ̀ niì rà, niì fùn bàa jaama, gè niì na ni waa, à to tɔ̀ yeè bà ni. 18 Ibraximà ɲɛun goo ra è si xɔbe à tsɛ, mòò fa dzi e si xɔbe nìi tsɛ waa. Tà doùn, à bàu kun giri fà, a ci Ŋaablà re goomaa y'à deò nìi tsuru ci: «Wo tsua dzin nèè nà giribe tà tsuru.» 19 Àwà Ibraximà sìà tsyɛnbeumaà ko e raà sa jii caànmoò rà, à na e gɔɔ̀n siin ci à tsyɛn saàn rà nòn, à fàan yè dzyɛ̀nbe ɲɛynaà doùn waa. À re tààn Saràn, tɔ̀ tsu naà dzin ker'là waa, ŋà à na tɔ̀ tsu siin waa. 20 Ŋaabla tɔ̀ làyir'lìi seun à rè, à na e ciri tɔ̀ tsɛ, è to ɲɛn bɛy à ra waa. Ŋà ɲɛynaà fààn ni wɔu à ɲan, è nɔɔrɔ ɲɛn Ŋaa tsɛ. 21 À si na xɔ à tsɛ taki, ci Ŋaabla nìi làyiri seòn, à dzi ni à rà, à y'à bo e shi tsɛ. 22 Tɔ̀ kamà, tɔ̀ ɲɛynaà yè dan à re terenbe. 23 Tɔ̀ to y'à tàrà, à sɛbɛn niì faɔ̀ ci: «Tɔ̀ yeè dan à re terenbe», tɔ̀ na sɛbɛɔ̀n à soo kamà waa. 24 Ɲe nìì reè raa ɲɛynaà sa nà dan terenbe, à sɛbɛɔ̀n ɲe sa kamà. È ɲɛn à tsɛ, nìi mùn Tsìfa Yesù sèè kpunan bou fùn nèè fi, ɲe ɲɛɔ̀n tɔ̀ ra. 25 À dɔ̀un dzii ra mùn ne fìrìgoo rèè rìì kamà, è sèè kpunan bo saàn ɲàn, è kpadè ci mùn tereòn.