Romains 5

Nàfa rìi ni ɲɛynaà ɲàn

1 Tà doùn, ɲɛynaà baraka rɔ̀n, à kpàdè niì fau ci mùn tereòn, tɔ jaancin dɔ̀un mùn ko Ŋaablà fi, mùn Tsìfa Yesù Kirisà bàraka rɔ̀n. 2 Yesù rìì baraka ɲan, è kòrò ɲɛynaà ka, mùn nìn bàu ni Ŋaablà ɲanwùɔ ɲàn mùn sàn gbaunma ni tɔ̀ niì ɲàn. Ɲe wàsau, è ɲɛn à tsɛ, ɲe si xɔ à tsɛ ci ɲe nà Ŋaablà nɔɔrɔɔ̀ tàrà. 3 À na tɔ̀ bàsɔùn waa, byɛnbe niì ni ɲe tsɛ, tɔ ɲe wàsaɔ kɔn è geren, kàtsu m'à tɔ, ci byɛnbee nàa ko mɔ̀nɲɔn ka, 4 mɔ̀nɲɔɔn yè nà ko vusootsibe ka dzuunbweè doùn, dzuunbweè doùn vusootsibeè yè nà sixɔbema ka. 5 Àwà, tɔ̀ sixɔbemaà na mòò màniɛn waa, è ɲɛn à tsɛ, Ŋaablà kɛnbààbee jee jiu mùn dùsùkuan ɲàn à re Dzia baraka rɔ̀n, tɔ̀ niì sìun mùn na. 6 È mùn to ŋɔ̀n fyɛ̀nbeè ɲàn, watsi kpadèumaà doùn, nìì reè na shia Ŋaablà jɔɔn waa, Kirisà saun twɛy mòdzin neè kamà. 7 Mòò yè bà ni san mòdzin tereunma kamà, tɔ̀ fa na dzi waa. Gè sɔ̀n ge mòò yɛ̀rɛ̀ dzia san mòdzin wuu rii kamà. 8 Ŋà Ŋaablà, tɔ mùn kɛ̀niɔ̀n nìi tsuru, à tɔ̀ kpàdèu mùn na. È ɲɛn à tsɛ, è mùn to gooɲaan ɲàn, Kirisà saun mùn kamà. 9 Tà doùn, è ba kpàdèu nòn ci ɲe tereòn à tsìɛn baraka rɔ̀n, fèe y'à toò kɔn ɲe fa tsi Ŋaablà re vununtaà rà à baraka rɔ̀n ? 10 Àwà è ɲe to Ŋaablà ɲan ì, ɲe ko à fia ye ba dziu lamɔ̀nɔun à Dzin Kpir'la saàn yè bà saabu, à fyɛɔ ci tɔ̀ làmɔn'na shɔ̀ùn, à re jaamabee baraka rɔ̀n, ɲe nà tsi. 11 À na tɔ̀ bàsɔùn waa, Ŋaabla ɲe wàsau mùn Tsìfa Yesù Kirisà yè bà saabu, tɔ̀ niì baraka ɲan dòònun, ɲe ko Ŋaablà fia lamɔ̀nɔun.

Adamà ko Yesù Kirisà fia

12 Àyìwà, mòò sɔn nì saabu ɲan, gooɲaan dɔ̀un dziɲantsiɛ doùn, gooɲaan to yè nà ko saàn ka adamadzin mòdzian sapɛ ma, kàtsu è sapɛ gooɲaan fau. 13 È bè suu fɔ sàrìyaa tsùɔ̀ dzu, gooɲaan na ni tsuù dziɲaan doùn, tɔ̀ to y'à tàrà gooɲaan na dzia dan gooɲaan ni sàrìya na ni waa. 14 Tà ko e sa ra, è sen Adamà nà è bè suu fɔ Musà rà, saàn dzi tarau mòdzian sapɛ tsɛ, arì nìì reè naà Adamà raa gooɲaan tsuru faɔ̀ waa. Mòò riì na nà nà, Adamà na tɔ̀ rii bosi.

15 Ŋà Adamà rè fìr'là ko Ŋaablà ɲanwùɔ kɔ̀ìgeè yè e si e si ra. Àwà mòò sɔn ne gooɲaan ye ba bàu saabu saàn yè wɔ mòò giri tsɛ, gooma na ni Ŋaablà ɲanwùɔ mà waa. Tɔ sìun kɔn giri mòò gir'la maana è bo mòò sɔn ɲan, tɔ̀ niì Yesù Kirisà. 16 À na ni a ci tɔ̀ kɔ̀ì geè sìun a ci mòò sɔn gooɲaan fau nìi tsuru waa. Àwà mòò sɔn ne gooɲaan fauma nì kamà, kitsia kùnuun è mɛɛy mòdzian tsɛ. Ŋà fìrìgoo giri fauma nì y'à tou, Ŋaablà ɲanwùɔ yè nà ko dzi tar'la ka. 17 Àwà, mòò sɔn ne gooɲaan fauma ye ba bàu saabu saàn yè dzi tarà tɔ̀ mòò sɔɔ̀n baraka rɔ̀n, gooma na ni Ŋaablà ɲanwùù brisià ko terenbee kɔ̀ì geè tàràbaa rèè mà waa. Mòò sɔn, Yesù Kirisà baraka rɔ̀n, twɛy nà dzi tarà jaamabee doùn. 18 Tà doùn, mòò sɔn ne fìrìgoo bàu nìi tsuru saabu kitsia yè mɛɛy adamadzin mòdzian sapɛ tsɛ, tɔ̀ soo tsuru, terenbe riì jaamabee sìan, mòò sɔn ne tɔ̀ shi jiiŋmaà bàu saabu adamàdzin mòdzian sapɛ yeè kpàdè tereunma. 19 Mòò sɔn ne Ŋaablà dzugoomaa shi jiìbɛ̀ybee to bàu nìi tsuru saabu mòò giri yè bà gooɲaantsiitsi, tɔ̀ soo tsuru, mòò sɔn ne Ŋaablà dzugooma shi jiiŋmaà bàu saabu, mòò giri sa yeè kpàdè tereunma. 20 Àwà sàrìyaa tsùuŋmaà, tɔ nàu fìrìgoò giribe rii ka. Gooɲaan to giribeu min niì, Ŋaablà ɲanwùɔ sa buuŋ mɔn a ci goo kpɛ̀rɛ̀. 21 Tɔ fau nì, gè riì ni à to gooɲaan bàu nìi tsuru saabu saàn yè dzi tarà, tɔ̀ soo tsuru, terenbe baraka rɔn, Ŋaablà ɲanwùɔ sa yeè dzi tarà è ɲɛn jaamabe dziù dòbɛɛ tsɛ, mùn Tsìfa Yesù Kirisà baraka rɔ̀n.