Nìi ni gooɲaantsiɛ ko Ŋaablà ɲanwùɔ tsɛ
6
1 Mùn dzia fèe dè tɔ̀un ? Mìn to gooɲaan nì ɲàn Ŋaablà ɲanwùɔ yè bà ni giribe gbɛ ? 2 Ayì dɛrɛ, mùn saunmaà shɔ̀ùn gooɲaan kàjaa tsɛ, mùn dzia to tsùù gooɲaan ɲàn dzùrù kɔn ? 3 Ye na à tɔ̀ ci mùn nìì reè jaara fòoŋ Ŋaablà re shia goo rèè rà Yesù Kirisà ɲan, ci mùn jaara fòoŋ à saàn rìì ɲàn ɔ̀n ? 4 Tɔ̀ jaara foo saabu rɔ̀n à saàn ɲàn, mùn sa fun wɔu à ka, gè riì n'a to, Kirisà kpunaun nìi tsuru è bo fùn nèè fi Fà Ŋaablà nɔɔrɔɔ̀ baraka rɔ̀n, mùn sa yeè jìì tà tsuru jaamabe yeu ɲan. 5 Tà doùn, ɲe ko à sa ye ba bàu soo a ci à saun nìi tsuru, awà mùn sa nà bà soo, a ci à sèè kpunaun nìi tsuru. 6 Mìn bà à tɔ̀, ci juu bɔrɔɔ riì na ni mùn ɲan, tɔ gbaun gɔɔ̀ rà ko Yesù ka. Tɔ fau, gè riì n'a to mùn gooɲaan gɔɔn yè bara, mùn mà bà gooɲaan rè jon ì dɛ. 7 À tà tsuru, è ɲɛn à tsɛ, mòò riì saun, tɔ bou gooɲaan suun. 8 Ŋà mìn ba saun Kirisà ka, min ɲɛn à ra ci mùn nà jaamabee sa fa ko à ka. 9 Àwà m'a tɔ̀ ci Kirisà sèè kpunaunmaà è bo fùn nèè fi, à na naà san dɛ, saàn rè dzi to na ni à tsɛ. 10 À yè san, tɔ fau gooɲaan nì kàjaa tsɛ. Tɔ̀ fau jaa soo pe rii, kpɛrɛ na ni nìi shɔ̀ùn dɛ. À to ni jaamabe riì rà, à tɔ̀ faa Ŋaablà re fa rii ɲàn. 11 Tà doùn, e sa y'a jà, ci ye saùn gooɲaan kàjaa tsɛ, ye to ni jaamabe riì rà, ye tɔ̀ faa Ŋaablà re fa rii ɲàn, Yesù Kirisà ɲàn.12 Tà doùn, e gɔn nìi sanàma, e maà à to gooɲaan yè dzi tara tɔ̀ tsɛ fɔ è bè wɔ y'a kur'la goo ɲaan neè shi jiì dɛ. 13 E maà e gɔɔ̀n min sɔn pɛn to gooɲaan suun, è bà terenbɛybeè rè faagoo faa gè waa. Ŋà ye e yɛrɛ sin Ŋaablà ra, ye bà mòdzin ì, nìì reè sèè kpunan bou saàn ɲàn, yè bà jaama, è gɔɔ̀n min niì sapɛ yeè bà ni terenbee faagoo rà Ŋaablà re. 14 Tà tsuru, gooɲaan fa bà ye kùntsii dɛ, kàtsu ye na ni sàrìyaa dzuun dɛ, fɔ Ŋaablà ɲanwùɔ.
Nìi ni gooɲaan raa jònbee ko terenbee raa jònbee tsɛ
15 À ni dzùrù ? Mìn gooɲaan nì fa kàtsu mùn na ni sàrìyaa dzuun dɛ fɔ Ŋaablà ɲanwùù ra ɔ̀ ? Àyi dɛrɛ ! 16 Ye na à tɔ̀ ci ye ye e yɛrɛ wɔ mòò suun ye bà à re jòn, y'a dzugoomaa shi jiɛ, ci ye tɔ̀ niì dzugooma shi jiɛ, y'a re jòn nì sààben na ɔ ? Tà tsuru, ye ma ba gooɲaan rè jòn tɔ̀ niì nàa saàn ka, ye kpɛ̀yn Ŋaablà dzugoomaa nì shi jiɛ, tɔ̀ niì nàa terenbee ka. 17 Mìn tswɛ̀y fa Ŋaablà re, è ɲɛn à tsɛ, ye na gooɲaan rè jon ì, ŋà ye kàr'nìi tàrau, ye tɔ̀ shi jiiŋ e duɔ̀n sapɛ ka. 18 Ye tsi boumaà gooɲaan suun, dòònun ye bàu terenbee rè jon ì. 19 Mun goomaa adamadzin mòdzin goomau'n kur'la, è ɲɛn ye re fààn dzyɛ̀nbeè tsɛ. Àwà, ye yè e gɔɔ̀n gàne rèè bàu goo nooŋmaà ko terenbɛybee rè faagoo faa ge ì nìi tsuru è ɲɛn terenbɛybee tsɛ, tɔ̀ soo tsuru, ye è bà terenbee rè jon ì dòònun, nìi ye bàa Ŋaablà raa. 20 Ye na gooɲaan rè jon ì watsi riì bwèy, ye re shi naà ni terenbe ɲan waa. 21 Ye na twɛy goo nìì reè faa, ye na fèe nàfa rìì jàa è ɲan ? She do, n ci è seey ye kuàn, è ɲɛn à tsɛ, à lataan saàn rìì. 22 Ŋà dòònun, ye xɔrɔnbeumaà ye bo gooɲaan ɲàn, ye bàu Ŋaablà re jon ì. Tɔ̀ nàfaà rìì yɛ goo nìì reè dzi Ŋaablà ra, à lataan yè bà jaamabe dziù dòbɛɛ. 23 Àwà gooɲaan sàr'là, tɔ saàn rìì, ŋà Ŋaablà gè niì sìan maana, tɔ jaamabe dziu dòbɛɛ rìì, mùn Tsìfa Yesù Kirisà ɲàn.