Ɲɛynamoò ko sàrìyaa
7
1 N neema ì, mun goomaa sàrìyaa tɔ̀baa ì rìì ka. Ye na à tɔ̀ ci è mòdzin jaamakɔɔn to, ci à ni sàrìyaa dzuun ɔn ? 2 Tà tsuru, tàan nìi furuɔ̀, à y'à re kpir'la to sì rà, à shiɔ̀ à ra, è ɲɛn Sàrìyaa tsɛ. Ŋà kpir'la ye dzi san nòn, fur'la Sàriyaa bou à kùùn. 3 Tà doùn, à y'à re kpir'la to sì rà, è ba kpiri kpɛrɛkur'le, tɔ bàu ɲànmɔ̀ɔ̀be. Ŋà à re kpir'la ye san, à labau sàrìyaa kàjaa tsɛ. À kɛ̀nsɛɛn ye ba kpiri kpɛrɛkur'le tɔ̀un, tɔ̀ na ɲànmɔ̀ɔ̀be dɛ. 4 Tà soo tsuru n neema ì, ye sa saun sàrìyaa kàjaa tsɛ Kirisà gɔɔ̀n saabu rɔ̀n ye bà kpɛr'laa, tɔ niì kpunaun, è bo fùn nèè fi. Tɔ fau gè riì ni à to, mìn bà gè nàfàma ì Ŋaablà re. 5 Àwà, juu bɔrɔɔ na ni mùn ɲan watsi riì bwèy, sàrìyaa na kur'la goo ɲaan niì reè ɲan fu jia, twɛy na faagoo faa mùn gɔɔ̀n gàne rèè ɲàn, nìi nàfaà naà kpɛrɛ saàn tɛ̀y waa. 6 Ŋà dòònun, mùn tsi bou Sàrìyaa suun. Tɔ̀ niì na mùn baɔ̀ e re jòn, mùn saun tɔ̀ kàjaa tsɛ. Tà tsuru, mùn ni faagoo yeu rii là sa, nìi Ŋaablà re Dzia raa. À na Sàrìyaa sɛbɛndzian raa dɛ, è ɲɛn à tsɛ, tɔ bɔrɔu.Gooɲaan ko sàriyaa
7 Mùn dzia fèe dè tɔ̀un ? Sàrìyaa bàu gooɲaan gbɛ ? Ayi dɛrɛ ! Ŋà a y'a jà min gooɲaan tɔ̀, à sàrìyaa rìì fyɛ̀. Sàrìyaa ma ba na dziun ci: «Maà a jaàn bo mòò rè gè rè», mun fa ni à tɔ̀, ci mòò yè e jaàn boò mòò rè gè rè waa. 8 È ɲɛn tɔ̀ dzugooma xɔɔ̀ tsɛ, gooɲaan sa tɔ̀ seun, è mun jaan bo goo kaatsià sapɛ re. Àwà sàrìya ma ba ni fyeu, gooɲaan gè saunma nì. 9 Dan, mun na ni jaamabee rà, tɔ̀ y'a tàrà sàrìya na ni waa. Ŋà, fɔ Ŋaablà dzugooma xɔɔ̀ dziu nà nòn, gooɲaan sa bàu jaama, 10 mun to yè san. Tà doùn, dzugooma xɔù rìi sìun ci è nà jaamabee ka, tɔ bàu saàn saabu mun ne. 11 Àwà gooɲaan siin è dzugooma xɔɔ̀ sen è mun sàn fìrì, è nà saàn ka mun mà. 12 Tà tsuru, sàrìyaa gè fɛnɛ, dzugooma xɔɔ̀ sa yeè bà gè fɛnɛ, à tereòn, è bà wù.
13 Tà doùn, gè niì gè wùù, tɔ̀ ni dzi ba dzùrù kɔn è bà san mun ne ? Ayì dɛrɛ ! Ŋà gooɲaan yè bà ni kpadè rìì ci à gooɲaan, à goowùɔ rìì sen bau e tɛy, è nà saàn ka mun mà, gè riì ni à to è bà gooɲaan taki taki dzugooma xɔɔ̀ saabu rɔ̀n.
Gooɲaan jònbee
14 Àwà, m'a tɔ̀ ci sàrìyaa kpɛ̀yn, tɔ beò Ŋaablà raa goò tsɛ, ŋà nìi mun, mun naa goo beò gɔɔ̀n raà tsɛ, mun to yè bà gɔrɔɔ gooɲaan rè a ci jòn. 15 Sààben fyan, mun na n ne goo fakɔɔn fàànmuan waa. Mun gaa nìi rà, mun na tɔ̀ faa waa, ŋà nìi xɔ mun mà, mun tɔ̀ rii faa. 16 Tà doùn, mun na gaa nìi rà, min ba tɔ̀ faa, tɔ mun tsìɛ sàriyaa rà, ci à wù 17 Tà doùn, nìi faa, à na mun ne fakɔɔn waa, ŋà gooɲaan niì ni mun ɲan, à tɔ̀ rii. 18 Mun kpɛ̀yn y'à tɔ̀ ci mun ɲan, nìi dzuɔn mun gɔɔ̀n, wùù na ni waa. Wùɔ kpɛ̀yn ŋɛ̀nɛ̀ɲaan, tɔ ni, ŋà è bà ni fa rii, tɔ̀ na ni waa. 19 È ɲɛn à tsɛ mun gaa min wùù riì fa, mun na tɔ̀ faa waa, mun na gaa min ɲaan niì fa, mun tɔ̀ rii faa. 20 Tà doùn, mun na gaa nìi ra, min ba tà faa, à na mun ne goo fakɔɔn dɛ, ŋà gooɲaan niì ni mun ɲan, à tɔ̀ rii. 21 Mun sàò ye ba ni min goowùɔ fa, mun nìi jàa sàrìya, tɔ̀ rii yɛ sani min goowùɔ fa, mun gooɲaan nì faa. 22 Àwà, mun duùn nɔ̀n, Ŋaablà re sàriyaa goò dzi mun na. 23 Ŋà, m'a jàa ci sàrìya kpɛrɛ ni mun gɔɔ̀n min niì sapɛ, nìi ni kaà rà mun akir'là ɲàn raa sàrìyaa ka, è mun bà tsùù gooɲaan raa sàrìyaa rè kàsòdzin, tɔ̀ niì ni mun gɔn nɔ̀n min niì sapɛ. 24 Sààben fyan, mun tsuru màtsùrùkɔɔn na ni ! Tsì rii nà mun tsi saàn raa gɔn nèe ra ? 25 Tswɛ̀i Ŋaablà raa, Yesù Kirisà baraka rɔ̀n, mùn Tsìfaà ! Nìi dzia dè, tɔ̀ rii yɛ, ci akir'la kàjaa tsɛ, mun Ŋaablà raa sàrìyaa rè jòn, ŋà gɔɔ̀n kàjaa tsɛ, mun gooɲaan raa sàrìyaa rè jòn.