Ŋaablà re Dzia raa sàrìyaa mùn tsi bou gooɲaan sàrìyaa suun
8
1 Dòònun kpɛ̀yn, nìì reè ni Yesù Kirisà ɲàn, kitsi pɛn na mɛɛ̀ twɛy tsɛ dɛ. 2 È ɲɛn à tsɛ, Ŋaablà re Dzia raa sàrìya riì jaamabee sìan Yesù Kirisà baraka rɔ̀n, tɔ y'a tsi bou gooɲaan ko saàn raa sàrìyaa suun. 3 Àwà sàrìyaa fa ni dzi nìi fa waa kàtsu à ŋɔn fyɛnbeu mòdzin ne fààn dzyɛnbee kamà, Ŋaablà tɔ̀ fau. Gooɲaan yè bà saabu, è yɛr'la Dzin Kpir'la bàji nau adamadzin mòdzin gooɲaantsi rèè bosi, è nà gooɲaan raa bara gɔɔ̀n ɲàn. 4 Tɔ fau, gè riì n'a to sàrìyaa ci nìi yè fa è bà tereòn, tɔ̀ dzii yè tsyɛn mùn ɲan, mùn nìì reè na jiɛ gɔɔ̀n kàjaa tsɛ dɛ, fɔ Ŋaablà re Dzia. 5 Àwà nìì reè ni gɔɔ̀n raa fààn dzuun, twɛy gɔɔ̀n raa dzibee goo reè rìì faa, ŋà nìì ree ni Ŋaablà re Dzia raa fàan dzuun, twɛy tɔ̀ raa dzibee goo reè rìì faa. 6 Nìi gɔɔ̀n dzibee goo, tɔ bèe saàn rìì là, ŋà Ŋaablà re Dzia raa dzibee goo, tɔ bèe jaamabee ko jaanciàn nì nà. 7 È ɲɛn à tsɛ, gɔɔ̀n raa dzibee goo rèè, twɛy dzun wɔɔ Ŋaablà ra. È mà na jàaŋnà Ŋaablà re sàrìyaa rè, è to yɛ̀rɛ̀ na dzia à fa tsu waa. 8 Nìì reè ni gɔɔ̀n raa fàan dzuun, twɛy na dzia dzibe Ŋaablà ra waa. 9 Àwà nìi to ye, ye na ni gɔɔ̀n raa fàan dzuun waa, fɔ Ŋaablà re Dzia raà, è ɲɛn à tsɛ, Ŋaablà re Dzia tsùuŋnà ye ɲan. Kirisà rè Dzia na ni mòò riì ɲàn fyeu, tɔ̀ tsìfa na à raa waa. 10 Kirisà yè bà ni ye ɲan, gɔɔ̀n raa saàn kpɛ̀yn ni e nima nɔ̀n, gooɲaan yè bà saabu, ŋà Ŋaablà re Dzia ɲàn raa jaamabee, tɔ̀ sa ni, terenbee yè bà saabu. 11 Tà doùn, mòò riì rè Dzi Yesù kpunan bou fùn nèè fi, tɔ̀ ye ba ni ye ɲan, tɔ̀ niì Kirisà kpunan bou fùn nèè fi, tɔ nà à to ye gɔn nìì reè saàn, twɛy yè jaamabee fa e re Dzia baraka rɔ̀n, tɔ̀ niì tsùuŋnà ye ɲan.12 Tɔ̀ tsuru n neema ì, tsìi ni mùn vu ra, ŋà à na gɔɔ̀n raa tsìì waa, nìi yɛ mìn re jaamabee fa a ci gɔɔ̀n ci è fa nìi tsuru waa. 13 È ɲɛn à tsɛ, ye ye ba e re jaamabee faa a ci gɔɔ̀n ci è fa nìi tsuru, ye nà san. Ŋà Ŋaablà re Dzia baraka rɔ̀n, ye ye gɔɔ̀n juu ɲaan vu bo e ɲan, ye nà jaamabee fa. 14 Àwà, Ŋaablà re Dzia nìì reè sapɛ kuru kuɔn e re jaamabee doùn, twɛy sapɛ Ŋaablà dzin ì. 15 Ye na Dzi taraɔ̀ nìi ye bàa jòn, è shiɲaanbe ka ye ra yeu dɛ waa, ŋà à Dzi rii, nìi ye bàa làmɔ̀nɔ̀n dzin ì à y'à to mìn vu bo ci: «Bàa, ɲe Fàà !» 16 Tɔ̀ Dzi niì Ŋaablà re Dzia, tɔ̀ yɛ̀r'la y'à shɛɛrɛbee faa ɲe akir'là rè, ci ɲe Ŋaablà dzin ì. 17 Tà doùn, mìn ba à dzin ì, mùn shɛnsenbaa ì sa: Ŋaablà shɛnsenbaa ì ko Kirisà shɛnsensi ì, è ɲɛn à tsɛ, mìn ba ni byɛnbee rà ko à ka, nɔɔrɔ nà ɲɛn mùn sa tsɛ ko à ka.
Nɔɔrɔ nìi nàa bònè
18 M'a jàa ci nèe watsi ree raa byɛnbee, ko Ŋaabla nà nà nɔɔrɔ rìi kpàdè ɲe ɲan, è na e si'un goo waa. 19 Àwà Ŋaablà re gè ɲɛunma rèè sapɛ kɔɔtɔɔ nìi rà, yè bà à màshua, tɔ̀ rii yɛ, Ŋaablà dzin nèè yè kpàdè. 20 Ŋaablà re gè ɲɛunma rèè sapɛ wɔu fààn suun, nàfa na ni nìi ɲàn waa. Tɔ̀ na ba è yɛ̀r'la dzibee goo waa, nìi yè è wɔu tɔ̀ fàan suun, à tɔ̀ rii fyɛ̀, ŋà, è sixɔbemaà na baraɔ̀ waa. 21 È ɲɛn à tsɛ, arì twɛy gè ɲɛunma rèè yɛ̀r'la, è sa nà tsi bo goo baraumaà jònbee suun, è nìn yè jà Ŋaa dzin nèè labaumaà nɔɔrɔɔ̀ ɲàn. 22 Àwà m'a tɔ̀ ci è bè suu fɔ she dzu, gè ɲɛunma rèè ko e kur'la sapɛ ŋmunaa yè bà byɛɛn, a ci dzin ker'la ɲìnnìnbee nìi boò. 23 À na gè ɲɛunma rèè bàsɔùn ŋmunakɔɔn waa, arì mùn nìì reè Ŋaablà re Dzia kɔ̀ì gè jɔnaa tàrau, mùn sa byɛɔ̀n e yɛrɛ duùn, mìn bà e re Ŋaabla dzinbee dzii tsyɛɛn màshua, mùn gɔɔ̀n yè tsi. 24 Àwà, mùn kpɛ̀yn tsiu tɔ sààben, ŋà tɔ faɔ̀ rìì ci mùn si xɔ à tsɛ. A si to xɔ goo rìi tsɛ, e dzi tɔ̀ jà nòn, tɔ na kir'la ci a si xɔ à tsɛ dɛ. A goo nìi jàa nòn, a si xɔbee tɔ̀ tsɛ dzùrù kɔn ? 25 Mùn na goo rìi jàa waa, mùn si to xɔ à tsɛ, mùn màxɔ̀unma tɔ̀ màshua.
26 Tɔ̀ soo tsuru, Ŋaablà re Dzia sa wɔɔ̀ ɲe ra e re ŋɔ̀nfyɛ̀nbeè doùn. È ɲɛn à tsɛ, ɲe nà Ŋaablà mafyɛ̀n nìi tsuru, ɲe na tɔ waa. Ŋà Ŋaablà re Dzia yɛ̀r'la tɔ̀ faa ɲe kɔ̀, nìi yɛ è Ŋaablà mafyɛ̀n ŋmuna vu ka ɲe kɔ̀, nìi na dzia dè waa. 27 Àwà, nìi dùsùkun neè ɲansiɛ̀n, tɔ Ŋaablà re Dzia ŋɛ̀nɛ̀ɲaan tɔ̀. À y'à tɔ̀ ci à màfyɛyn nìi faa Ŋaablà re mòdzìn neè rè, tɔ kòroò Ŋaablà saɔ ka. 28 Mùn y'a tɔ̀ sa, ci goò sapɛ faagoò faa esire, è goowùù fa Ŋaablà kɛnbaa rèè rà, nìì reè sapɛ kiriɔ è kòrò à re goo sɔ̀n byɛunmaà ka. 29 È ɲɛn à tsɛ, à nìì reè tɔ̀u jɔ̀na, à twɛy jɔ̀na sa ŋɛnɛ̀ɲan tsuuŋ, è bà e Dzin Kpir'la bosi, gè riì n'a to tɔ̀ yeè bà dzin jɔna kereumaà neema giri fi. 30 À nìì reè jɔ̀na ŋɛnɛ̀ɲan tsuuŋ, à twɛy kiriu sa. À to nìì reè kiriu, è kpàdèu tereunma ì sa. À nìì reè sa kpàdèu tereunma ì, à nɔɔrɔ sa ɲɛun twɛy tsɛ. 31 Mùn dzia fèe rìì dè kɔn twɛy goo rèè doùn ? Ŋaablà ye ba ni ɲe ka, tsì rii dzia bà ni ɲe kamà ? 32 Tɔ̀ riì na e Dzin Kpir'la yɛ̀r'la tsu to waa, ŋà à y'à sìun mùn sapɛ kamà, à bèe bà dzùrù, à fa gè sapɛ sin mùn na ko à ka ? 33 Tsì rii nà Ŋaablà jaara modzìn nèè sàn wɔ ? Ŋaablà rii na à kpàdèe ci moo tereòn gbɛ ? 34 Tsì rii nà kitsi mɛɛy è tsɛ ? [Yèsù] Kirisà rìì na san, è sèè kɔn è kpunan bo fùn nèè fi gbɛ ? Wò rii na tsùuŋnà Ŋaablà sirama si jaa rè, è bà ni màfyɛɛ̀n nà mùn ne o ? 35 Tsi nà ɲe vyɛ̀ bo Kirisà rè kɛ̀nbààbee rà ? Byɛnbe gbɛ tàà jaanta rìì ? Xɔn tɔɔrɔ gbɛ tàà dzu blà rii ? Gba rii gbɛ tàà shiɲaan goo brisi rìì tàmafa kaamun'nà ? 36 È ɲɛn a tsɛ, à sɛbɛɔ̀n Ŋaablà re Goomaa doùn nèe tsuru ci: «Màan ji o ji seron, wo kamà, ɲe ko vuɛ rìì ni e si ra. Ɲe jàtsi kuun a ci dzwɛkà vurama ì.» 37 Ŋà tɔ̀ sapɛ doùn, ɲe kɛ̀nbaà baraka rɔ̀n, ɲe bàu dzibaa ì fɔ è bè geren. 38-39 Àwà mun ɲɛɔ̀n à ra, ci goo sɔn pɛn fa dzi ɲe vyɛ̀ bo Ŋaablà re kɛ̀nbààbee rà waa, à tɔ̀ niì kpàdèu Yesù Kirisà ɲàn, mùn Tsìfaà. Ɔ̀ɔn, a ci à saà ò, jaamabee ò, mɛ̀rɛ̀kɛ rèè ò, kùntsii rèè ò, dòònun naa watsia goo rèè ò, watsi nakɔɔn raa rèè ò, dzitsi rèè ò, jìran nɔ̀n gè rèè ò, dzɔ̀nxɔɔ̀ dzuun naa rèè ò, gè ɲɛunma kpɛrɛ gè o ge, è pɛn fa dzi ɲe vyɛ̀ bo Ŋaablà re kɛ̀nbààbee rà waa.