Pɔlì kɛ̀sɛmàà Isirayɛlidzin neè kàjaa tsɛ
9
1 Kirisà ɲàn, mun sààbeen rìì dèe, mun na doò dèe waa. Ŋaablà re Dzia baraka rɔ̀n, mun akir'là sa mun shɛɛrɛ, 2 ci mun taama ŋununbeuma bla ni, mun vunu'un yeè bà kɔ̀n tsùuŋnà kudɛyn. 3 Àwà à yɛ̀rɛ̀ na dzi mun na min bà dangaɔ̀, min vyɛ̀ bo Kirisà rà, n neema reè kamà, mun kun si reè, adamadzinbee kàjaa tsɛ. 4 Ye rìì Isirayɛlidzin neè, Ŋaablà nìì reè bàu e dzin ì. À nɔɔrɔɔ̀ bàu ye rìì laa, ko à re dzyèèsìbe reè, ko sàrìyaa, ko à blàbèu'n kur'la, ko làyiri seunma rèè. 5 Nìì reè bou fàbɔɔ rèè ɲàn, à ye rìì. Ŋaablà Jaara Modzìan sa to yè bo è ɲan adamadzinbee kàjaa tsɛ, è bà ni gè sapɛ kuùn. Tsoo dzi yeè ɲɛn Ŋaa tsɛ kudɛyn ! Àmiinà !Ibraxima tsua dzin taki reè
6 À na ni a ci Ŋaablà re goomaa nì bàu gè nàfà bɛy dɛ ! Ɔ̀ɔɔn ! Nìì reè sapɛ Isirayɛlì tsua mòdzin, twɛy sapɛ rii na Isirayɛlì waa ! 7 Nìì reè to Ibraximà tsua mòdzin, à na ni a ci twɛy sapɛ rii y'à dzin ì waa. È ɲɛn à tsɛ, à dèu ci: «Ishakà tsua dzin nèè rìì nà bà wo tsua.» 8 Tɔ̀ dzuɔn nì yɛ, ci nìì reè dzin adamadzinbee kàjaa tsɛ, à na ni a ci twɛy rìì Ŋaablà dzin ì waa, ŋà nìì reè dzin è ɲɛn làyir'là tsɛ, twɛy rìì daɔn Ibraximà tsua dzin taki reè. 9 È ɲɛn à tsɛ, Ŋaablà làyir'là seun nèe tsuru ci: «Jii sɔn na kèseema, min na, Saràn nà bà dzin kpiri soo kereo.» 10 À na tɔ̀ basɔùn waa. Nìi Àràbɛkà, tɔ̀ sa don seun ɲe fà Ishakà rè, è dzin ì kere. 11 Àwà, dziin nèè naà kereo ŋe waa, yè nà dzin yè goowùù tàmafa gooɲaan fa waa, ŋà Ŋaablà saɔ na ni tsuù nòn è ɲankɛr'na tsɛ è kòrò à jaaraa ka. 12 Faadziɛ na tɔ̀ saabu waa, ŋà tɔ boo kiribaà rìì ɲan, nìi doùn à dèu Àràbɛkà rà ci: «Bɔɔmaà nà bà dzininmaà rè jòn», 13 a ci à yɛ sɛbɛɔ̀n nìi tsuru Ŋaablà re Goomaa doùn ci: «Mun Yàkubà kɛ̀niun, min Isawù to.»
14 Mùn dzia fèe dè tɔ̀un ? Ci terenbɛybe ni Ŋaablà ɲan gbɛ ? Ayi dɛrɛ ! 15 È ɲɛn à tsɛ, à dziun Musà rà ci: «Min dzin ci mun màtsur'la nìi rà, mun màtsur'la tɔ̀ ra, mun to ye dzin ci mun wùù faa nìi rà, mun wùù faa tɔ̀ ra.» 16 Tɔ̀ tsuru, tɔ̀ goò na mòò sàò, à to na fààn, à Ŋaablà ɲan màtsur'la rìì. 17 Ŋaablà re goomaa tɔ̀ rii deò Fàràwuna na, nìi yɛ kìtaabuà doùn ci: «Mun wo bou ni taki, min bà ni wo ka n ne dzibaabee kpàdè, tà ko mun tsoò yè bà ni kiri dziɲantsiɛ min niì sapɛ.» 18 Tà tsuru, nìi y'a dzibe, à màtsur'la tɔ̀ ra, nìi to y'a dzibe è tɔ̀ dùsùkuan xɔbe.
Ŋaablà rii sào ni
19 Wo dzia dzin mun na tɔ̀un ci, è bà dzùrù Ŋaablà yeè jàà mùn na kɔn ? Tsì rii dzia e nɔn à sàɔ mà ?. 20 Wo tsì tɔ̀ tsuru, wo mòdzìnkɔɔn yè bà ni Ŋaablà sɔswɛɛy ! Tsyɛɛn ni dzi dzin e myɛnbaa rà feera wo yè mun myɛ̀n nèe tsuru ɔ ? 21 Tsyɛnmyɛnbaà rìì sàò na ni dzùà tsɛ gbɛ ? Tɔ̀ dzù soo, à y'a byɛ̀n à y'à fa faagoo wuu faa gè, à to y'a byɛ̀n à y'à fa faagoo ɲaan faa gè. 22 Àwà, à na Ŋaablà sao, è re vununtaà ko e re dzibaabee kpàdè mòdzin ì nà, nìì reè kiriɔ vununtaà mòdzin neè. È na wɔɔ bara, ŋà, è mɔɲɔun è tɛyn cɛyn. 23 Ta fau nì, è bà ni e nɔɔrɔ brisià kpàdè mòdzin ì nà, nìì reè kiriɔ à ɲan màtsur'la mòdzin neè, à twɛy nìì reè màbyɛ̀n tsuuŋnà e nɔɔrɔɔ̀ kamà. 24 À ɲan màtsur'la mòdzin neè, à ɲe rìì gooma dekɔɔn, ɲe nìì reè kiri bou Dzyèèsìbee mòdzin neè fi, kun kpɛrɛ mòdzin neè. 25 À tɔ̀ rii deò kɛɛra Ushè rè kìtaabuà doùn nìi yɛ ci: «Nìì re naà mun ne moo ì waa, mun nà twɛy kiri n ne mòò rèè. Nìi to naà kɛ̀niɔ̀n waa, mun nà tɔ̀ kiri kɛ̀niunmaà». 26 À to na deò è ra min niì ci: «Ye na mun ne mòdzin ì waa, tɔ̀ gàne soo ɲàn, è nà kiri ci Ŋaablà jaamaa dzin nèè.» 27 Nìi kɛɛra Esayì, tɔ̀ sa dziun Isirayɛlì kàjaa tsɛ nèe tsuru fààn na ci: «Isirayɛlidzin neè kɛ̀sɛɛn ye giribe a ci kòòyù dziɛ rà cɛncɛndzian, è dzyee touma bàsɔùn nì nà tsi. 28 Àwà Tsìfaà nà e devuà shi jiì dzɔ̀nxɔɔ̀ tsɛ, à to nà à fa tabe, à y'à dzii tsyɛn.» 29 Kɛɛra Esayì tabeu è tɔ̀ rii dè tsùù ci: «Jìrànxɔɔ̀ ko dzɔ̀nxɔɔ̀ sa Dzyeèsìbee Ŋaablà ma ba na swey tou ɲe tsu fyeu, ɲe na nà bà a ci Sodomùn wɔ̀ɔ̀. Ɔ̀ɔn, ɲe na nà bà Gɔmɔrɔ̀n wɔ̀ɔ̀ bosi.» 30 Mùn nà fèe rìì dè sa ? Mìn dzin nì ci nìì reè kun kpɛrɛ mòdzin neè, twɛy nìì reè naà terenbe gaa, twɛy terenbee tàrau kɛ̀ ? Terenbe riì tàr'la ɲɛynaà baraka rɔ̀n. 31 Tɔ̀ to y'à tàrà, nìi Isirayɛlidzin neè, twɛy nìì reè na sàrìyaa terenbe gaa, è na à tàrà waa. 32 Feera è na à tàrà ? È na à tàrà waa, è ɲɛn à tsɛ à na dan ɲɛynaà kàjaa tsɛ waa, fɔ faadziɛ goo rèè. Yè e san nà baun sàn nà baan kpàa rà. 33 Tɔ fau, a ci à yɛ sɛbɛɔ̀n nìi tsuru Ŋaablà re Goomaa doùn ci: «À yɛ, mun nà kpàà tsuù Tsiɲɔ̀n jɔɔn, sàn nà baan kpàà, mòdzìn mɛɛ kpàà. Mòò riì nà ɲɛn à ra, tɔ̀ fa seey fyeu.»