Pɔlì nìi gaa Isirayɛlidzin neè kàjaa tsɛ
10
1 Neema reè, mun nìi gaa gaaŋ'n kur'la sapɛ, min bà Ŋaablà mafyɛ̀ɛn à ra Dzyèèsìbee mòdzin neè rè, tɔ̀ rii yɛ, yè tsi. 2 Àwà mun sa yeè è shɛɛrɛ ci Ŋaabla goo fàan ni è ɲan, ŋà à fààn niì kuru, è na à kùn taki tɔ waa. 3 È bà nìi fau Ŋaablà raa terenbee tɔ̀ bɛy, y'à gaa yè e yɛr'la raa terenbee tsùù, tɔ̀ y'a kpàdèe ci è na e majàà Ŋaablà raa terenbee rè waa. 4 Àwà Kirisà rìì bàu sàrìyaa goo rèè dàntsiima, gè riì n'a to mòò o moò nà ɲɛn à ra, è kpàdè ci tɔ tereòn.Mòo tsià ɲɛynaà nì baraka ɲan
5 Terenbee sàrìyaa nìi, Musà sɛbɛn fau tɔ̀ tsɛ, nìi doùn à ci: «mòò riì y'a shi jiì, tɔ nà jaamabe fa à baraka rɔ̀n». 6 Ŋa terenbe riì daàn è bo ɲɛynaà kàjaa tsɛ, tɔ dziàn nèe tsuru ci: «M'a dzin a duùn ci: tsì rii nà tèyn jìrànxɔ rɔ̀n, tɔ̀ dzuɔn è bà ni Kirisà sen jaà na ? 7 Tàmafa, tsì rii nà jàà fùn nèè tà rɔ̀n, tɔ̀ dzuɔn è bà ni Kirisà sen teyn bo fùn nèè fi ?» 8 Ŋaablà re goomaa ci dzùrù ? À ci gooma ree ni wo tɛyn, à ni wo dzu, è bà ni wo duùn. À na gooma kpɛrɛ waa, à ɲɛynaà goomaa nì, ɲe tɔ̀ niì waajibi faa. 9 Tà doùn, wo ye dzi à dè a dzii ra, ci Yesù rìì Tsìfaà, wo yè ɲɛn à ra taki ci Ŋaablà y'a sèè kpunan bou fùn nèè fi, wo nà tsi. 10 È ɲɛn à tsɛ, e ɲɛn à ra a duùn, tɔ nàa terenbee ka, a to y'à dè a dzii ra, tɔ nàa nìi ka, tɔ̀ rii yɛ e tsi. 11 Awà Ŋaablà re Goomaa ci: «Mòò o moò nà ɲɛn à ra, tɔ̀ fa seey jà waa». 12 Tà doùn, dànfaran na ni Dzyèèsìbee mòdzin ko kun kpɛrɛ mòdzin fi waa, è ɲɛn à tsɛ, Tsìfa soo rìì ni è sapɛ re, nìi gètsi, è bà e tsoò kiribaa rèè sapɛ magoo wubee. 13 Àwà à deò ci mòò o moò nà Tsìfaà tsoo kiri, tɔ nà tsi.
14 Tà doùn è nà a tsoo kiri dzùrù, ni è na ɲɛn à ra ? E to nà ɲɛn à ra dzùrù, ni è na à gooma myɛn ? È to na à gooma myɛn dzùrù, ni mòò pɛn na à waajibi fa è ra ? 15 À waajibi to nà dzi fa è ra dzùrù, ni mòò na kaɔ ? Àwà à sɛbɛɔ̀n Ŋaablà re Goomaa doùn nèe tsuru ci: «Nìì reè nàa kùnàgoo dziù dè, twɛy sàn nèè na gè wùbè san !» 16 Ŋà mòdzian sapɛ na e tsiì tɔ̀ kùnàgoo dziɔ̀ goomaa nà waa. Kɛɛra Esayì dziun ci: «Tsìfaà, tsì rii ɲɛun ɲe re waajibia goomaa nà ?» 17 Tà doùn, ɲɛynaà tàr'la waajibia rìì ɲàn, waajibia yè bà ni Kirisà raa goomaa tsɛ. 18 Ŋà mun ci ɔ, Dzyèèsìbee mòdzin neè na à myɛ̀n ni gbɛ ? Y'à myɛun dɛrɛ ! Gooma ree dèbaa rèè vuà bou dzɔ̀nxɔɔ̀ min niì sapɛ. È bè fɔ dzɔ̀nxɔɔ̀ dààn rà, è re goomaa dziu fɔ mɔn. 19 Mun ci ɔ, Isirayɛlidzin neè na à dzin myɛ̀n ni gbɛ ? À na de è ra è bo Musà jɔ̀na dzu nèe tsuru ci ɔ: «Mun nà mòdzin ì jaaɲininbe ka ye ra, nìì re na kun taki waa. Ɔ̀ɔn, mun nà ye vunun ta mòdzin ì kpɛyn, akiri na ni nìì reè rè waa.» 20 Nìi to kɛɛra Esayì, à bèu wɔ fɔ tɔ̀ yeè e kuun xɔbe è dzin nèe tsuru ci: «Ŋaablà ci mòdzin ì wò jàu, nìì reè naà wò gaa waa. Ɔ̀ɔn, ci nìì reè naà wò tey faa waa, w'è yɛrɛ kpadèu twɛy rà.» 21 Isirayɛlì kàjaa tsɛ, è dzin ci: «Ŋaablà ci bwèè ko kur'la doùn w'è si foroo mòdzin ì rè, nìì reè yè e nɔɔ̀n wò dzugoomaa mà, yè bà wò sɔ̀swɛɛ̀.