Ŋaablà na Isirayɛlidzin neè maaŋnà waa
11
1 Àwà mun ci ɔ, Ŋaablà yeè e re mòò rèè maaŋnà nì gbɛ ? Ayi dɛrɛ ! È ɲɛn à tsɛ mun sa Isirayɛlidzin ni, Ibraximà tsua mòdzian sɔn, è bo Bɛyamɛn tsua ɲàn. 2 Ŋaablà tabeu è nìì reè tɔ̀, nìi y'à re mòò rèè, à na twɛy maaŋnà waa. Tàà nìi deò à re Goomaa doùn, kɛɛra Àliì yè bà na e byɛnma dèe Ŋaablà ra Isirayɛlì kàjaa tsɛ, ye na tɔ̀ tɔ̀ gbɛ ? 3 À dziun ci: «Tsìfaà, è wo re kɛɛra reè vuu, yè wo re saakaboma rèè ci, mun soo rii too, è to mun sa gaa vurama.» 4 Ŋaablà y'a latsiu dzùrù ? À ci wo mòkun gbaa ɲɛ̀ɛ̀nun bo jiɔ̀ e re, nìì reè na e kunun gbaɔn ɲɔ̀n Bàalì bììn waa. 5 Tɔ̀ soo tsuru, nèe watsi ree sa ɲan, dzyee touma ni, à nìì reè ɲankɛrɛɔn, è kòrò à ɲanwùɔ ka. 6 È ba tɔ̀ fau e ɲanwùɔ rìì baraka ɲan, tɔ̀ y'a kpàdèe ci à na faadzii fyɛ waa. Tà boshɔ̀ùn, à ɲanwùɔ na kir'là wùù dɛ. 7 Àwà, à ni dzùrù ? Isirayɛlì na nìi gaa, à na tɔ̀ tàrà waa, ŋà nìì reè ɲankɛrɛɔ̀n, twɛy y'à tàrau. Dzyee rèè, twɛy dùsùkuan xɔbeu, 8 a ci à yɛ sɛbɛɔ̀n nìi tsuru Ŋaablà re Goomaa doùn ci: «Ŋaabla akiri sìun è ra, nìi vùn. È jaa sìn è ra, nìì reè na jɛ̀ì faa waa, ko toro nìì reè na myɛ̀ìn faa waa, è bè suu fɔ she.» 9 Màsà kpiri Dawùdà sa dziun nèe tsuru ci: «È re ɲwɛɛ̀n yè bà è yɛ̀r'leè kuàn myɛ̀ɛ̀n, è bà è kuàn kɛ̀ìn fɛɛ, è bà è sàn nà baan kpàà, è bà è re tsìì sara. 10 È jaa rèè yè tsitsiì wɔ, fɔ è mà bà jɛ̀ì faa dɛ, a to è bòn nèè yè kpɛ̀n tsùù kudɛyn.»Dzyèèsìbee mòdzin neè ko kun kpɛrɛ mòdzin neè raa goò
11 Àwà mun ci ɔ, è sàn nà baunmaà bàu è mɛɛy peu rii ɔ̀ ? Ayi dɛrɛ ! Ŋà è re fìr'la kamà, kun kpɛrɛ mòdzin neè dziu tsi, tɔ̀ jaaɲininbe yè bà ni è kun. 12 Tà doùn, è re fìr'là ye ba bàu saabu tɔ̀ yeè nàfa blà wɔ dziɲaan tsɛ, è re mɛɛ̀ yè bà saabu tɔ̀ yeè nàfa blà wɔ kun kpɛrɛ mòdzin neè tsɛ, tɔ̀ na à kpàdèe ci è dzii tsyɛunmaà fa à to goo blà yeè fa è geren tɔ̀ sapɛ tsɛ ɔ ?
13 Àyìwà dòònun, ye nìì reè kun kpɛrɛ mòdzin neè, mun goomaa ye rìì là. Mun goomaa ye rìì là, è ɲɛn à tsɛ mun kun kpɛrɛ mòdzin neè raa kɛɛradzian, mun to blà wɔɔ̀ n ne faagoò ɲàn. 14 Mun tɔ̀ faa gè riì ni à to min jaaɲininbe ɲanfu n kunsi reè rè, è swey yè bà ni tsiuma tàrà. 15 Àwà è màboumaà Ŋaablà ra, tɔ̀ ye ba bàu saabu è Ŋaablà ko dziɲan fia lamɔnɔ̀n, è mà sèè dɔ̀unma Ŋaablà ɲan kpɛrɛ, tɔ̀ fa bà fùn nèè sèè bàuma jaama fyeu ɔ ? 16 Shìmaan kùngɔ̀ jɔna reè ye dzi sin Ŋaa ra nòn, à dzyeè sa bàu à raa. Gɔɔ̀ jiɛ̀ to ye dzi sin Ŋaa ra nòn, à sààn neè sa bàu à raa.
17 Tà doùn, oliviku takia sààn neè swey jèè boumaà, wo jòon olivikuà sààn sɔn yeè tsyɛ na shì tɔ̀ sààn dzyee touma rèè fi, wo sa yeè bà ni à jiɛ̀ yuà nàfaà tàrà, 18 wo na wù w'a yɛrɛ blabe twɛy sààn neè mà waa. Wo kpɛ̀yn dzia a yɛrɛ blabe, ŋà wo rìì na jiɛ̀ seòn dɛ, jiɛ̀ rìì wo seòn. 19 Sɔn na, wo nà dzin ci twɛy sààn neè jèè bou mɔn, wo yè shì è tsɔ̀saan ɲàn. 20 À kpɛ̀yn sààben ! È jèè bou mɔn, è re ɲɛynabɛybeè yè bà saabu, ŋà wo yè bà shiɔ̀ mɔn, tɔ ɲɛynaà nì saabu. Tà doùn, maà a yɛrɛ blabe waa, ŋà shi rii. 21 È ɲɛn à tsɛ, Ŋaablà ma ba sààn taki taki reè tou fyeu, ɲɛn à ra ci à fa wo tsu to waa. 22 Tà doùn, a taa to ci Ŋaablà wù è bà ɲan sa. Nìì reè mɛrɔɔn, à re ɲanbee ni twɛy kàjaa tsɛ, wo kàjaa tsɛ, à re wùbee yè bà ni ŋà fɔ wo ye ba too tɔ̀ wùbee tsɛ, tà boshɔ̀ùn, wo sa nà kùnùn bo mɔn nì. 23 Nìi Dzyèèsìbee mòdzin neè sa, è ma to e re ɲɛynabɛybeè tsɛ fyeu, è sa nà sèè shì e shɔùn, kàtsu yè sèè shì yeu, tɔ̀ dzi ni Ŋaablà ra. 24 Wo rìi na jòon nɔ̀n olivikua sɔn, wo ye ba kùnùn bou tɔ̀ ra wo yè nà shì oliviku takia rà, tɔ̀ niì na wo kun waa, nìì reè y'à kun, twɛy yè bà ni shi e yɛr'la kuan nà, gooma na ni twɛy raà mà waa !
25 Àwà neema ì, mun sàò na ni ye to nèe gòndo ree tɔ̀ bɛy tɔ̀ yeè nà bà saabu ye yè e yɛrɛ ja akiritsi ì waa. Tɔ̀ rii yɛ, ci Isirayɛlìdzin neè swey dùsùkuan nà xɔbe to, fɔ nìì reè na Dzyèèsìbee mòdzin ì waa, twɛy tsibaa rèè sapɛ dzyeèmaa yè bè tsi dò. 26 Tɔ̀ rii tsuru, Isirayɛlì sapɛ dzyeèma nà tsi, a ci à yɛ sɛbɛɔ̀n nìi tsuru Ŋaablà re Goomaa doùn ci: «Tsibaa nà nà è bo Tsiɲɔ̀n. À nà Yàkubà tsua dzin nèè bo e re Ŋaablà jɔɔn shiɲaanbɛybeè ɲàn». 27 Ŋaablà ci: «Min na è vu ra gooɲaantsiɛ mɛɛy bo watsi riì bwèy, tɔ̀ rii nà bà mun ne dzyèèsìbe wɔuma è ka.» 28 Kùnàgoo Dziɔ̀ kàjaa tsɛ, a y'a siin, è Ŋaablà ɲan ì, ye kamà. Ŋà Ŋaablà yeè è bo nìi fau e jaara, a y'a siin tɔ̀ kàjaa tsɛ, à yè kɛ̀niunà, è fàbɔɔ rèè kamà. 29 È ɲɛn à tsɛ, Ŋaablà re kɔ̀ì ge rèè ko à re kir'là, twɛy tsìngààlɔn na à kun jàa waa. 30 À ni a ci ye sa na e nɔɔ̀n Ŋaablà dzugoomaa shi jiɛ̀ mà nìi tsuru dan. Ŋà dòònun, à màtsuruu ye ra, è re Ŋaablà dzugoomaa shi jiìbɛ̀ybeè yè bà saabu. 31 Àwà è re Ŋaablà dzugoomaa shi jiìbɛ̀ybeè ye ba bàu saabu dòònun, Ŋaablà ye màtsuru ye ra, tɔ̀ soo tsuru, Ŋaabla nà màtsuru è sa ra dòònun. 32 È ɲɛn à tsɛ, Ŋaabla mòdzian sapɛ dzii tsyeeŋ e dzugoomaa shi jiìbɛ̀ybeè gè doùn, gè riì ni à to è bà ni matsuru è sapɛ ra.
Ŋaablà blabee nìi boò
33 Aa, Ŋaablà re gètsìbee, à re akiriblabee ko a re twɛ̀ɛ doùn to yè bà tsun sa ! À re kitsi goo reè gɔ̀ngɔn na dzia tɔ̀, à re shi reè doùn to na tɔ ! 34 Àwà tsì rii dziu Tsìfaà akir'laa tɔ̀ ? Tsì rii to ni, ci wo dziu à latsi ? 35 Tàà tsì rii ni ci wò rii jɔna y'a kɔ̀u gè, è bà ni à tsìfa sèè kɔ̀ ? 36 È ɲɛn à tsɛ, gè sapɛ boo wò rii ɲàn, gè sapɛ ni wò rii baraka ɲan, gè sapɛ to wò rii laa. Nɔɔrɔ yè ɲɛn à tsɛ watsi sen ɲɛn watsi tsɛ. Àmiinà !