Ŋaablà blabèù'n kuru dziitsyɛunmaà
12
1 Tà doùn, n neema ì, è ɲɛn Ŋaablà re màtsuru'la tsɛ, mun ye màxɔ̀ɔn, ci ye e yɛrɛ sin Ŋaablà ra saaka jaama, nìi fɛnɛɔ̀, è bà dzi Ŋaablà ra. Tɔ̀ rii nà bà Ŋaablà blabèù'n kuru taki ye re. 2 E maà e raa goo fau'n kur'la ko nèe dziɲan ree raà bà soo waa, ŋà y'a to làkere ye dɔ̀n e re jaamabee doùn akiri ye ka, ye bà ni Ŋaablà saɔ tɔ̀: nìi wù, à dzi à ra, à dzii yè bà tsyɛɔ̀n.3 È ɲɛn Ŋaa ɲanwùɔ tsɛ mun kàjaa tsɛ, mun nìi dèe e soo sookɔɔn sapɛ ra, tɔ̀ rii yɛ ci mòo mà bà geren ci wò tsuru na ni waa. Ŋà, ye akir'lì tàrà, è kòrò e soo sookɔɔn sapɛ re ɲɛynaà bɛ̀r'la ka, Ŋaablà nìi siɔ̀n, ye e bɛrɛ tɔ. 4 Àwà mùn gɔɔ̀n soo pe rii, ŋà à kàjaa giri, è bà kàjaa soo soo sapɛ ko e raa faadzii. 5 Tɔ̀ soo tsuru, ɲe sa giri, ŋà Kirisà ɲàn mùn gɔnkungɔ soo rii, mùn soo sookɔɔn sapɛ yeè bà e si gɔɔ̀n gàneè sɔn. 6 È kòrò ko Ŋaablà ɲanwùɔ ka, mùn kɔ̀ì ge ì tàraɔ̀ nìì reè yè e si e si ra. È ba kɛɛrabe rii fakɔɔn è bo Ŋaablà re, è fa è kòrò ɲɛynaà ka. 7 Nìi raà faagoo, tɔ̀ yeè tɔ̀ fa. Nìi raà mòdzìn karan, tɔ̀ yeè mòdzian kàr'na. 8 Nìi raà mòdzìn màxɔn, tɔ̀ yeè mòdzian màxɔ̀ɔn. Nìi raà kɔ̀ì fa, tɔ̀ yeè kɔ̀ɛ faa, à mà e bonè siin waa. Nìi raà jɔɔndzinbe, tɔ̀ yeè tɔ̀ fa ko sɔ̀bɛ̀nbe ka. Mòò riì màtsur'la, tɔ̀ yeè tɔ̀ fa ko taamadzibe ka.
Jaamabee fau'n kuru wuɔ
9 Ye kɛ̀nbààbee fa ko duun fyɛ ka. Ye ɲaan xɔbe e ma, ye e shi wùɔ rà. 10 Ye e si kɛ̀n, a ci neema ì wù yè e si kɛ̀n nìi tsuru. Ye e si dàn blàbee kàjaa tsɛ. 11 Ye ɲanshì, e maà bà sàànman ì waa. Ye faagoò fa Tsìfaà rè ko gɔ'un ta ka. 12 E si xɔ nìi tsɛ, ye taama dzibe tɔ̀ ra. Byɛnbee doùn ye e mɔɲɔn, ye e maxɔ̀n màfyɛɛ̀n na. 13 Ŋaablà re mòdzin neè màgoo ni nìi rà, ye è dzwɛ̀ma tɔ̀ ka, ye bà ni tɔnɔn ladɔɔn ɲan tsuù ɲàn. 14 Nìi reè yè e byɛɛn, ye dzwɛ ji twɛy rà. Ye dzwɛ rìì ji, e maà danga fa waa. 15 Ye e taamadzibe, taamadzibekɔɔn reè ka, ye gɛɛy ko gɛɛybaa rèè kà. 16 Ye byɛ̀n soo ma. Nìi blà e maà tɔ̀ gaa waa, ŋà nìi majaaŋnà, ye tɔ̀ rii gaa. E maà ba akiritsi ì e yɛrɛ jaa ra waa. 17 E maà mòò pɛn ne ɲaan tsiì sàrà ko ɲaan ka, y'a gaa ye wùɔ rìì fa mòdzian sapɛ jaa ra. 18 È be dàn e ma, y'a to jaancin yè bà ni e ko mòdzian sapɛ fi, è ba dzia fa. 19 Mun ne kɛ̀niunma rèè, e maà e yɛrɛ wɛyn bo waa, ŋà ye gàne to Ŋaablà re vununtaà rè, kàtsu, Tsìfaà y'à deò e re Goomaa doùn ci: «Wɛyn boo mun nì naa, mun nì nà tsìì sar'la fa. 20 Ŋà nìi fa, tɔ̀ rii yɛ, dzu ye ba ni a ɲaàn nà, ɲwɛyn sìn à ra, à y'à ɲɔn. Mìnoo to ye ba ni à ra, yu sìn à ra è min. Tà tsuru à nà bà a ci wo sàtsììn taa rii tsùuŋnà à kùùn.» 21 Maà à to ɲaan yè dzi tarà a tsɛ waa, ŋà wo rìì yè dzi tarà ɲaan tsɛ, ko wùɔ ka.