Goo nìì reè fau Malitsì
28
1 Àyìwà, mùn nàu tsi bo tɔ̀ gooɲaan ɲàn watsi riì bwèy, m'a myɛ̀n ci mùn ni kòòyua shiɲaanfi dzɔ̀nxɔ̀ gane riì ɲàn, tɔ̀ tsoo Malitsì.
2 Twɛy wɔ̀ɔ̀ndzin neè yè ɲe kuun'n kuru wube, fɔ è bè geren. Yè sà blà sɔn wɔ, ci mìn be e ma gɔ̀rɔ̀ mɔn, kàtsu ŋaà na e maaŋnà è nàa, mùnkɛɛ̀ yè bà boò.
3 Pɔlì yè gɔ̀ɔ̀ myɛɛn si jaa soo tsɛ tɔ̀un, ci wo nà à ji sa rɔ̀n. Sà ŋɔ̀ɔ̀n kamà, fɔnfwɛyn sɔn yeè bo gɔɔ̀ ɲàn, è doròn Pɔlì sià rà, à y'à cin.
4 Wɔ̀ɔ̀ndzin neè myɛɛn dòrounma jàu Pɔlì sià rà, yè dziàn e si ra ci: «A beè nèe kpir'lee jà mòdzìnvubaa rìì. À tsiumaà ko e raà sa kòòyua rà, sààbeen na e tsiì, è bà ni jaamabe fa waa.»
5 Tɔ̀un, Pɔlì yè e sià ɲan sɛrɛ, fɔnfwɛɛn yè mɛɛy sa rɔ̀n, Pɔlì na à tɔ̀ ci goo tsu faɔ̀ wò ra tsu.
6 È sapɛ kpɛyn na à fuɔ̀ rìì màshua sa, tàmafa è mɛɛy jaa soo è san. Ŋà, y'à màshu fur'lu, y'à jà gèsɔn pɛn na bo à re waa. Tɔ̀un, yè e dziɛ̀ lakere, yè dzin ci Pɔlì na mòdzin maana waa.
7 Malitsì gàneè jɔɔndzian tsoo na Pubiliyusì. Ɲe na ni min niì, gàne sɔn na ni tɔ̀ tɛyn, nìi tɔ̀ kpir'la raa. Pubiliyusì yè bè ɲe jàà e re gàne rɔ̀n, è ɲe kuun'n kuru wuu fa, è bè tàrà, fɔ bwèy zhììgi.
8 Tɔ̀ y'a tàrà, à fàà naà cɛrɛma waa. Tɔ̀ na ɲɛɔ̀n mà taà ko tɔ̀ɔ̀tɔ̀ɔ̀nian rè. Pɔlì yè b'a siin tɔ̀ rii ɲàn, è Ŋaablà mafyɛ̀n à re, è si rèè tsùù à tsɛ, è cɛrɛmabe.
9 Àwà, ɲìnìnkɔɔn ge o ge ni mɔn tɔ̀un, twɛy sapɛ yeè nàa Pɔlì rè, à yè è cɛrɛmabeè.
10 Tɔ̀ goò yè bà saabu, blàbe giri yè ɲɛn ɲe tsɛ mɔn fɔ è bè geren. Ɲe ci e ye bo mɔn watsi riì bwèy, ɲe yè bè, gè o ge màgoo ni ɲe ra e re jìɛ̀ doùn, yè tɔ̀ sapɛ sin ɲe ra.
Pɔli ì bomàà Malitsì
11 Àyìwà, kuu zhììgi rii dɔ̀un, ɲe yè kòmànà bo Malitsì. Ɲe bè sii sèè, ɲe yè dɔ̀n konkoron bla sɔn doùn, tɔ̀ Alɛkisandziri wɔ̀ɔ̀ konkoron. Tɔ̀ na naɔ̀ e tsiì Malitsì konkoron tsiimaà sɔn ɲan, è mùnkɛɛ̀ watsia fa mɔn. È na tɔ̀ konkor'na tsoo wɔɔ, ci "fìrìkàma reè", kàtsu tɔ̀ tàànmàshɛn ni na n'a tsɛ.
12 Àwà, mùn fùu mɔn, mìn bè wɔ wɔ̀ sɔn ɲan, ci Sirakusì. Mìn to mɔn, mìn bwèy zhììgi fa.
13 Mùn bou mɔn, mìn kòòyua dziikuan tɔn ɲɛn be fur'lu, fɔ mìn bè wɔ wɔ̀ sɔn ɲan, ci Reyò. Mùn fùu mɔn tɔ̀ raa gbee rɔn, Wòròdùù tɔɔn fyɛɛn yè e maa, è bo naà. Mùn bwèy fii tɔ̀un, mìn wɔ wɔ̀ sɔn ɲan, ci Pusɔlì.
14 Mùn wɔu tɔ̀ wɔ̀ rɔ̀n, mìn Yesù rè kàràndzin ì jà mɔn. Twɛy y'à gaa mùn ne, ci mìn shikun soo fa ye ka mɔn. Àwà, mùn bèu bèu'n kur'liì rà Ɔ̀rɔmùn, tɔ̀ rii siin.
Pɔli ì wɔumaà Ɔ̀rɔmùn, twɛy goo rèè
15 Yesù rè kàràndzin niì reè ni Ɔ̀rɔmùn, twɛy na à myɛɔ̀n ci ɲe nàa. Yè nà tɔ̀un, yè nà ɲe kùùntsi fɔ siikpaa sɔn ɲan, nìi kir'là Apiyusì. Swey yè bè ɲe kùùntsi gàne sɔn ɲan, tɔ kir'là tɔnɔn jaama zhììgia. Pɔlì dziu è jà min niì, è tswɛ̀y fa Ŋaablà re, à mà yè xɔbe kpɛrɛ.
16 Mùn bèu wɔ Ɔ̀rɔmùn watsi riì bwèy, y'à to Pɔlì soo yeè bè e tsoo ra gba sen, yè kaadzin soo ji tɔ̀ y'a kplatsuɔ.
17 Àyìwà, bwèy zhììgi tà shɔ̀ùn, Dzyèèsìbee mòdzin niì reè ni Ɔ̀rɔmùn, Pɔlì yè twɛy jɔɔndzin neè kiri e re. Twɛy nàu nà watsi riì bwèy, è dzin è ra ci: «N neema ì, mun na goo sɔn pɛn ɲaan fa ɲe re mòò rèè rà waa, mun to na goo sɔn pɛn ɲaan fa è bè ɲe fàbɔɔ rèè rè làndà shi rèè kàjaa tsɛ waa. Ŋà, è mun kuun Yerusalɛmùn, yè mun wɔ Ɔ̀rɔ̀mùnka reè rè fàan suun.
18 Mun tereonmaà shɔ̀ùn, twɛy sàò na n'a re, yè mun bàji, kàtsu è na gèsɔn pɛn jà mun ne goò ɲàn, nìi dzia bà mun vu kun waa.
19 Ŋà, Dzyèèsìbee mòdzin neè na e tsiì mun bàjia rà nìi fa waa, mun sa y'a jà tɔ̀un fɔ mun ne goo rèè jaa yè bo Ɔ̀rɔmùn màsà kpiri blàa rè. À na ni a ci mun tɔ̀ goò fau, min bà n'a re min kùngoo rii ka n kuan mòò rèè rà waa.
20 Tɔ̀ rii kamà, mun y'à gaa ye ko mun yè e si jà, min gooma ye ka. Àwà, e nèe jɔ̀rɔ̀kɔ ree reè jà mun na, Isirayɛli dzin neè si xɔ mòò riì tsɛ, tɔ̀ yeè bà Ŋaablà Jaa ra Modzìàn à tɔ̀ rii kamà !»
21 Twɛy yè dzin Pɔlì rà ci: «Nìi kpɛ̀yn ɲe, ɲe na sɛbɛn pɛn tàrà è dan Yude mar'la ɲàn wo re goò ɲàn waa. Ɲe neema reè pɛn to na dan mɔn, è nà wo goò kpunan bo ɲe ra, tàmafa yè wo mà ɲaan de ɲe ra waa.
22 Ŋà, nìi ni wo duùn, ɲe sào ni, wo yɛ̀r'la yè tɔ̀ dè ɲe y'à myɛ̀n. Ɲe y'à tɔ̀, ci wo yɛ dzinɛ niì ɲàn, min niì sapɛ, mòdzian yè e dzunwɔɔ à ra.»
23 Àwà, tɔ̀ goomaa shɔ̀ùn, yè jisee kpɛrɛ kpàdè Pɔlì rà, ci ye nà nà tɔ̀ sii sèè. È byɛ̀un jisee riì mà, tɔ̀ sii sèè wɔu, yè nà giri à re gàne rɔ̀n, è geren jɔ̀naà tsɛ. Pɔlì yè goomaa dzii kun è ka tɔ̀un, è sen gbishɛɛ̀mà nɔ̀n, è bè fɔ ɲɛ̀rɛɛ̀ rɔ̀n. À na è toro kɔ̀ɔ Ŋaablà re Màsàbee goomaa nà, è bà na à gaa gaa'n kur'la sapɛ ra, wò yeè dzi è dzuun Yesù rè goò goomaa ka. À na twɛy goo rèè kpàdèe kɛɛra Musà rè Sàrìyaa goomaa ko kɛɛra dzyee reè rè kìtaabu rèè doùn goomaa nì ka.
24 Pɔlì na gooma niì reè dèe, swey yè ɲɛn à ra, ŋà swey na e tsiì yè ɲɛn à ra waa.
25 È ci e ye bo Pɔlì tɛyn yè bè watsi riì bwèy, è naà byɛɔ̀n soo ma waa. Tà doùn, Pɔlì yè nèe gooma ree kpàdè è ra ci: «Ŋaablà re Dzi Fɛnɛɛ gooma niì reè wɔu Ŋaablà re kɛɛra Esayì dzu ci à y'à dè ye fàbɔɔ rèè rà, twɛy gooma reè sààbèn goòmà taki ì rìì.
26 Ŋaablà re Dzia dziun Esayì rà nèe tsuru ci:
Bè nèe kun nee mòdzin neè rè, e bè dzin è ra ci:
Ye nà myɛ̀yn fa cɛyn, ŋà, fàànmùnya fa fa waa.
Ye nà siin fa cɛyn, ŋà, jɛ̀y fa fa waa.
27 Tɔ nà fa, kàtsu kun nee mòdzin neè yè e tantaamà xɔbeu.
Yè e tor'lèè kpereun, yè e jaa rèè tsyee.
È sào ni ye jaa rèè mà jɛ̀y fa waa,
ye tor'lèè mà myɛ̀yn fa waa,
ye akir'là tsu to mà fàànmùnya tarà waa.
E tɔ̀ sapɛ fau, sànko è mà nà to e lakere,
yè e tsiì mun na, mun yè è tsi.»
28 Tɔ̀ goomaa shɔ̀ùn, Pɔlì yè dzin è ra kɔn ci: «Àwà, ye bà à tɔ̀, ci Ŋaabla mòò tsià nìi tsuru, tɔ̀ goomaa nà dè kun kpɛrɛ mòdzin neè rìì là sa ! Twɛy nà e toro wɔ à re.»
29 [Pɔlì rè goomaa shɔ̀ùn, dzyèèsìbee mòdzin neè bokɔɔn yè bè tsii, sɔ̀swɛy brìsi rìì fùu è ko e si fi.]
30 Pɔlì yè jii fii dzii tsyɛunma fa gbà sɔn doùn Ɔ̀rɔmùn, è bà na tɔ̀ sàr'la. Nìì reè sapɛ na bèe boò à kpà mɔn, à na twɛy sapɛ kuùntsiu'n kuru wubee.
31 À na mòdzian toro kɔ̀ɔ Ŋaablà re Màsàbee goomaa nà. Goo o goo to ni Ŋaablà Jaara Moo Tsìfa Yesù rè goò ɲàn, à akiri tsùuŋma na mòdzian kàr'na tɔ̀ ra e saoma.