Actes 27

Pɔli ì bèmaà Itali jamaan nɔn

1 Àyìwà, byɛ̀n yè fa à tsɛ tɔ̀un, ci mùn nà dɔ̀n konkoron blaa doùn, mìn bè Itali jamaan nɔn. Byɛ̀n fau à tsɛ, yè Pɔlì ko kàsòdzin neè swey goojaa wɔ kaadzin kuntsii sɔn suun, tɔ̀ tsoo ci Yuliyusì. À na kaadzin kur'lìi kaadzin kuntsiɛ sɔn, tɔ̀ na kir'là, ci màsà kpiri blàa raa kaadzin kur'là.

2 Àwà, mìn dɔ̀n tɔ̀un konkoron bla sɔn doùn, tɔ̀ lamɔ̀nɔɔ̀n vya rèè yè bà n'a kùùn, è bà na daɔn wɔ̀ sɔn ɲan, ci Adaramitsì. A na bèe Azhi jamaan kpàkèrè. Awà, mùn yeè dɔ̀n be. Tesalonikì Arisitakì na ni ɲe ka, nìi Maseduwani jamaan mòdzian.

3 Tɔ̀ raa gbee, mìn bè wɔ Sidɔ̀n wɔ̀ rɔ̀n. Mùn wɔu mɔn, Yuliyusì ɲanwùɔ doùn ko Pɔlì ka, à y'à to è bè bo e dzunwɛynsi reè kpà, sànko à màgoo ni goo nìi reè rà, twɛy yè tɔ̀ fa à re.

4 Mùn fùu mɔn tà shɔ̀ùn, m'a jà fyɛɛn mùn kùùntsià. Tà goò y'à to, mùn yeè dɔ̀n Shipuru jamaan bònè kèrè, fyɛɛn na byɛnbe faa min niì kèrè waa.

5 Tà shɔ̀ùn, mùn yeè Silisi jamaan ko Panfili jamaan kòòyua fi shɛn dɔ̀n, mìn bè wɔ wɔ̀ sɔn ɲan, ci Mirè, tɔ ni jàmàan sɔn ɲan, ci Lisì.

6 Mùn wɔu mɔn, kaadzin kuntsiɛ yè konkoron bla ja mɔn, tɔ daɔn Alɛkisandziri, à nà bè Itali jamaan kpàkèrè. È ɲe dɔ̀n tɔ̀ konkoron blaa doùn.

7 È bè tàrà jisee giri, mùn ni yuà tsɛ, mìn bèe dɛyn dɛyn. Mìn byɛn cɛyn, mìn kòmànà bè wɔ wɔ̀ sɔn ka sɛ̀rɛ̀n, ci Kinidzì. Ŋà, m'a jà fyɛɛn na e tsiiŋnà, mìn bè tɔ̀ jaateremaà ka waa. Tɔ̀un, ɲe yè e caànan be ɲe yè bè dɔ̀n gàne sɔn taàkuùn ci Salimonɛ̀, tɔ kòòyua ɲàn dzɔ̀nxɔ gane sɔn dzii gɔngwɛyn, è bà ni jàmaan sɔn ɲan, ci Kɛrɛtsì. Fyɛɛn naà byɛnbe faa mɔn kèrè waa.

8 Ɲe ko byɛnbe giri yè tɔ̀ gàneè dzii kpɛɛ̀n tɔn ɲɛn be fur'lu, ɲe yè kòmànà bè wɔ gàne sɔn ɲan, tɔ̀ kir'là ci "Konkoron tsiima wùù reè", è bà ni wɔ̀ sɔn tɛyn, ci Lasè.

Pɔli ì rè jìɛ̀ doùn baragoò nìi yè è tàrau konkor'na ka

9 Tɔ̀un, watsi giri yè dɔ̀n ɲe mà jìɛ̀ doùn. Mìn bà ni geren jìɛ̀ rè, tɔ̀ na fààtsì goo, kàtsu Dzyèèsìbee mòdzin neè rè suàn watsi riì y'à kpàdèe ci mùnkɛɛ̀ tsyɛn wɔmà, tɔ̀ na dɔ̀n boo nòn. Tà doùn, Pɔlì yè tabe è dzin tsùù è ra ci:

10 «N dzunwɛynsi ì, mun jaa n'a na, ci baragoò brìsi nà mùn tàrà jìɛ̀ doùn. Konkor'na ko e doùn seen sapɛ nà to à ɲan. Ɲe sa to dzia to à ɲan.»

11 Ŋà, kaadzin kuntsiɛ na e toro wɔ Pɔlì raa goomaa rè waa. Nìì konkor'na vwɛ̀ɛ̀ybaà ko konkor'na tsìfaà, è si kuun twɛy raa goomaa nì nà.

12 Tɔ̀ konkoron tsiimaà naà wù mùnkɛɛ̀ watsi rɔn waa. Tɔ̀ doùn, mòdzian fàan yè byɛ̀n à mà, ci mìn bo mɔn, mìn Kɛrɛtsi jamaan wɔ̀ sɔn naa konkoron tsiima màkaa ci Fenikisi, mùn nà bè mùnkɛɛ̀ watsia fa min niì. Tà konkoron tsiima rèe kàjaa sɔn jaa jiɔ̀ jàmaàn kòòdùù tɔɔn ko bwɛ̀ydoo fia kpàkèrè, kàjaa sɔn jaa yè bà jiɔ̀ wòròdùù tɔɔn ko bwèydoo fia kpàkèrè.

13 Fyɛn tswɛyrii sɔn yeè nà e maa, tɔ̀ yeè bo naà wòròdùù tɔɔn kpàkèrè. È na à siɛ̀n, ci tɔ na dzia à to mìn tɔ̀ gàneè kaa kun n dzi. Myɛ̀ɛ̀n kunun gbanàkàntàn nìi konkor'na tsìɛ, yè tɔ̀ bo. Tɔ̀ bou, konkor'na yè e maa è bèe Kɛrɛtsi jamaan tenteèn dzii kpɛyn.

14 Ŋà, dɛyn nà fa fyɛn brisi yè fù, è tɔ̀ kir'là, ci "Erakilɔn".

15 Tɔ̀ fyɛɛn ɲin màxɔbe gereonmaà yè konkor'na càànan bo e bemaà mà. À fa gbaun, mìn yɛrɛ to fyɛɛn suun.

16 È bè mùn ka tɔ̀un, fɔ kòòyua ɲàn dzɔ̀nxɔ kiɲaanin sɔn woròdùù tɔɔn tsɛ, ci Kodà. Tɔ̀ gàneè na fyɛɛn jɔɔn shuɔ̀ mùn tsɛ dɛyn nìi fa, mìn maxɔbe tɔ̀un, mìn dzi konkor'niɛ bo yuà tsɛ, m'à ji blàa doùn. Tɔ̀ faa ɲanbeu fɔ è bè geren.

17 M'à sen dɔun min niì, konkor'na faagoo fa reè yè konkor'na lagur'la min niì sapɛ shi ko fɛɛdzian ka, sànko à mà bara waa. È na shiɔ̀ ci konkor'na mà nà bè e tsiì to Libi jamaan cɛncɛn kon nèè sɔn tsɛ nìi fa waa, tɔ̀un, vya nìì reè bàa saabu konkor'na yè bà ni fyɛn jaa rè, yè twɛy mà jàà. Tɔ̀ fau, mìn yɛrɛ to fyɛɛn suun è bèe mùn ka.

18 Tɔ̀ raa gbee, y'à jàu fyɛɛn ɲin màxɔbe gereon konkor'na mà nìi fa, y'à doùn seen sɔn maa yu rɔ̀n.

19 À bwèy zhììgìraa sii sèè, konkor'na faagoo fa reè yɛ̀r'leè yè konkor'na gè rèè swey bo maa yu rɔ̀n.

20 È bè tàrà jisee giri, ɲe na bwèè jàa dɛ, ɲe to na swɛyn nèè jàa dɛ. Fyɛɛn kpɛ̀yn boò nìi tsuru, à boò tɔ̀ rii tsuru, fɔ mìn b'a jà, ci mùn wùù yeè bà ni bo nèe goo ree ɲan, à nà xɔbe.

21 Àwà, mùn na ciɔ̀n mìn ɲwɛyn wɔ e dzu. Tɔ̀un, Pɔlì yè fù è tsiì mòdzian fi, è dzin ci: «N dzunwɛynsi ì, ye nau ba mun vu kuun, ye mà bo Kɛrɛtsi jamaan ɲàn waa. Ye yè bà na e toro wɔu mun ne, baragoò nìi sapɛ yɛ fau, tà ko gè nìì reè sapɛ yɛ fìriu, tɔ̀ fa ni fa waa.

22 Ŋà dòònun, m'a gaa e re, e sapɛ yeè e kuùn xɔbe, kàtsu mòò pɛn xɔn fa to à ɲan waa, konkor'na bàsɔùn nì nà to à ɲan.

23 Àwà, mun Ŋaablà riì raa, min bà faagoò faa à re, tɔ̀ re mɛ̀rɛ̀kɛ sɔn nàu e yɛrɛ kpadè mun na fen nɔ̀n.

24 À dziun mun na ci: <Pɔlì, maà shi waa, fɔ wo re kitsia yè bè kùnùn Ɔ̀rɔmùn màsà kpiri blàa rè. Ŋaablà ɲanwùɔ doùn wo ka, wo ko gè o ge ni konkoron blaa doùn, wo kamà è sapɛ nà tsi.>

25 N dzunwɛynsi ì, ye e kuùn xɔbe, mun ɲɛɔ̀n Ŋaablà ra. Ɔ̀ɔn, à nìi dèu mun na, tɔ nà fa.

26 Konkor'na nà bè bara, è ɲe maa ji be kòòyua fi jàmaàn sɔn ɲan mɔn.»

27 Àwà, tɔ̀ feèn na ɲe fen teeŋ naalenaa nì kòòyua tsɛ, fyɛɛn ɲe fìfaa. Tɔ̀ kòòyua kir'là, Adziriyatsikì. Tɔ̀ feèn tar'la watsia ɲàn, konkor'na doùn faagoo fa reè y'à jà jàci mùn tsyɛnbe beè dzɔ̀nxɔ rìì là.

28 Tɔ̀un, gè riì ka yuà tsunbee gɔ̀ɔ, yè tɔ̀ ji yu rɔ̀n. Y'à jà, ci tɔ̀ gàneè yuà tsunbee kòn jaa teeŋ ŋaalòn ko tara. Mùn gbànmaun dɛyn kɔn, y'à ji, y'à jà mɔn tɔ̀ gàneè tsunbee kon jaa teeŋ naàlen.

29 È na shiɔ̀, ci konkor'na mà nà bè zhɛ jènkpaa reè swey rà yuà dzuun waa. Tà doùn, myɛ̀ɛ̀n kunun gbanàkàntàn nìi konkor'na tsìɛ, yè tɔ̀ nààlen maa konkor'na bònè kèrè, è kɔɔtɔuma blà yeè jià seè shùa.

30 Àwà, à ni konkor'na doùn faagoo fa reè duùn ye yè e vwɛɛy bo konkor'na doùn nìi fa, yè konkor'niɛ bo ji yuà tsɛ. Yè e yɛrɛ ba tɔ̀un, jàci ye nà konkor'na tsìɛ myɛ̀ɛ̀n kunun gbanàkàntàn rèè swey rìì ji konkoron blaa jɔɔn.

31 Ŋà, Pɔlì yè dzin kaadzin kuntsiɛ ko kaadzin dzyee reè rà ci: «Nèe rèe ma to konkor'na doùn fyeu, e na naà dzi tsi saàn rà dɛ.»

32 Fɛɛdzin niì reè konkor'niɛ shiɔ̀ konkoron blaa rà, kaadzin neè yè twɛy kùnùn, y'à to konkor'niɛ yè bèe kòòyua tsɛ.

33 Àwà, sani jià yè seey, Pɔlì yè mòdzian sapɛ maxɔ̀n, ci yè ɲwɛyn ɲɔn. À ci è ra ci: «À bwèy teeŋ naàlen nì yɛ nèe she, ye duungoo douma ni, ye to na gèsɔn pɛn ɲɔɔn waa.

34 M'a gaa e re, ye e maxɔbe, ye ɲwɛyn ɲɔn, kàtsu ye màgoo ni tɔ̀ ra, ye yè bà ni tsi. Ye ɲɛn n na, arì mòò sɔn kùngwɛ̀yn ye ɲan, à fa to nèe ɲan waa.»

35 Pɔlì twɛy gooma reè dè dòu watsi riì bwèy, è bur'la sen, è baraka sìn Ŋaablà ra è sapɛ jaa ra. Tà shɔ̀ùn, à y'à kɛɛy kɛɛy, è maa, à y'à ɲɔɔ̀n.

36 Dzyee rèè tɔ̀ jàu, è sa ma yè xɔbe, yè e maa, yè ɲwɛyn ɲɔɔ̀n.

37 Àwà, ɲe mòkùn dzii riì na ni konkor'na doùn, ɲe dzyèèmaa na mòkun caànmoò fii ko mùeyn ko teeŋ tsunmɛn.

38 È sapɛ cɛun watsi riì bwèy, shìmàndzin niì ni konkor'na doùn, yè tɔ̀ bo maa yu rɔ̀n, sànko è fyɛnbe.

Konkor'na bara tou min niì

39 Àwà, jià nàu seey min niì, mùn na ni gàne rìi ɲàn, konkor'na doùn faagoo fa reè na dzi jaa soo tɔ tɔ̀ gàneè rà waa. Ŋà, è yu shi sɔn ni jàu, cɛncɛɛn ni tɔ̀ dzii kpɛyn. È ci ye nà bè siin konkor'na ka mɔn, yè b'a tsìì.

40 Tɔ̀un, myɛ̀ɛ̀n kunun gbanàkàntàn nìì reè konkor'na tsìɛ, yè twɛy fɛɛ reè foro jàà yu rɔ̀n. Yè konkor'na vwɛ̀ɛ gèè fɛɛ reè sa foro suu. Tɔ̀un, vya nìì reè konkor'na jaa jia fyɛn jaa rè, yè tɔ̀ soo jaà konkor'na jɔɔn, sànko fyɛɛn yè è tèn be yu dziɛ rè.

41 Ŋà, è bèkɔɔn, konkor'na yè bè suu to cɛncɛn kon sɔn na yu shi fii fi, è tsiì to mɔn. Konkor'na jɔɔn yè nìn cɛncɛɛn ɲàn. Tɔ̀un, kòòyua ku reè fàan vùnbe ɲaanfaa suun, twɛy yè nà konkor'na bònèè baan, y'à warakaa.

42 À na ni kaadzin neè duùn, ye yè kàsòdzin neè vu, kàtsu è na shiɔ̀, è mà nà e myɛɛnɛn yuà tsɛ, yè e vwɛɛy tsi waa.

43 Ŋà, kaadzin kuntsiɛ na n'a re è Pɔlì tsi nìi fa, tɔ̀ kamà, kaadzin neè n'a re yè nìi fa, è kaa tɔ̀ tsɛ. Nìì reè yuà tɔ̀, è shi sin, ci twɛy jɔ̀na yeè e tsyɛn ji yu rɔ̀n, yè kpee kaa.

44 Dzyee rèè, ci twɛy yè e bɛɛy konkor'na gɔ̀ɔ pàpàr'lèè ko konkor'na gɔ̀ɔ̀ fɛr'nèè swey mà, yè e gban jɔ̀nà dzin neè kpɛyn. Mòdzian sapɛ kpee kaa kuun tɔ̀ rii tsuru, è sapɛ wuu yeè bo.