Actes 26

Pɔlì sèeŋ e re goò goomaa tsɛ min niì

1 Àyìwà, màsà kpiri Agiripà yè dzin Pɔlì rà tɔ̀un ci: «Goomaa ni wo re. Nìi ni wo re, wo y'à dè a re goò ɲàn, a dzia tɔ̀ dè.»

Pɔlì yè e sià fù tɔ̀un, è dzin e re goò ɲàn nèe tsuru ci:

2 «Màsà kpiri Agiripà, Dzyèèsìbee mòdzin neè jàaŋnà mun na goo nìì reè sapɛ ra, mun taama dzi she, min sɔn de wo sa jaa ra n ne goò ɲàn, twɛy goo rèè tsɛ.

3 Wo Dzyèèsìbee mòdzin neè rè làndà shi rèè sapɛ tɔ cɛyn, goo o goo to sɔ̀swɛ̀y rà goo è re, wo tɔ̀ sapɛ tɔ. Tà doùn, mun y'à gaa wo re, w'a yɛrɛ to, w'a toro wɔ mun ne vunun macin ka.

4 Àwà, è sen fɔ mun dzunwɛynkɔɔn nà, min ne goo rèè shi jiiŋ nìi tsuru, è mun to n ne mòò rèè fi, tà ko Yerusalɛmùn, Dzyèèsìbee mòdzin neè sapɛ tɔ̀ tɔ̀.

5 Ɲe re mòò rèè rè dzinɛɛ doùn, shi niì xɔ shi dzyee reè sapɛ ma, tɔ̀ yeè bà Faridziɲɛn rèè raà, mun sa na ni tɔ̀ rii ɲàn. Dzyèèsìbee mòdzin neè ma e nɔn fyeu, è dzia tɔ̀ sààben de. Tà doùn, fɔ watsi gbaan, è mun tɔ̀.

6 Ŋaablà layiri nìi seun ɲe fàbɔɔ rèè rè, mun si xɔ tɔ̀ tsɛ nìi fa, a y'a jà mun kitsia dòònun, à tɔ̀ rii.

7 Ɲe re mòò rèè kun teeŋ fii rèè sapɛ ɲɛɔ̀n à ra, ci tɔ̀ làyir'là nà bo e shi tsɛ. Tɔ̀ rii kamà, yè bà e ɲanshiɔ̀ yè Ŋaablà blabee feèn ko bwèè sa. Mun ɲɛn niì faɔ̀ tà goò rà dɛ màsà kpiri Agiripà, Dzyèèsìbee mòdzin neè jàaŋnà mun na, è ɲɛn tɔ̀ rii tsɛ !

8 Ye Dzyèèsìbee mòdzin neè, fee y'à to, ye na ɲɛɔ̀n à ra, ci Ŋaabla dzia fùn nèè sèè kpunan bo saàn ɲàn do ?

9 Mun yɛ̀r'la sa na à jaɔ̀ jɔ̀na, ci à wù, min goò ko e kur'la sapɛ fa, min Nazarɛtsika kpiri Yesù tsoò kpaa bo mɔn.

10 Mun tɔ̀ rii fau Yerusalɛmùn. Nìì reè ɲɛɔ̀n Yesù rà, mun twɛy giri kun jiu kàsoò doùn, kàtsu saaka jɔndzin neè na à shi wɔɔ mun suun. Yesù rè kàràndzin neè vua goomaa ye ba na dèu, mun tsu naà n nɔɔn tɔ̀ mà waa.

11 Watsi giri, mun na bèe waajibi fa gba rèè doùn, min bè byɛnbe ji è tsɛ, min dziàn è ra sa, ci è ɲɛn niì faɔ̀ Yesù rà, ci yè tɔ̀ dzii bà fàan nà. Mun vunun ta ɲaanfaa suun è kpɛyn, mun na bèe è kpɛyn fɔ wɔ̀ kpɛrɛ ì ɲàn.

12 Àwà, saaka jɔndzin neè nàu à shi wɔ mun suun tɔ̀ rii tsuru sii sɔn see, ci mun yè bè Dàmasì wɔ̀ rɔ̀n, twɛy goo rèè kamà.

13 Màsà kpiri Agiripà, è mun to Dàmasì wɔ̀ùn shià tsɛ, bwèytaarun fà xe rɔ̀n, mun ci n ye fee jà, vyevyee sɔn den bou jìran nɔ̀n, tɔ̀ vyevyeè blà bwèè vyevyeè sa ma. Vyevyee rèe yè mun ko n jiìfàsi rèè sa laguru.

14 Ɲe sapɛ yeè bo mɛɛy dzɔn nɔ̀n. Min goomaa vu sɔn myɛn, tɔ dziàn mun na ɲe re kungoòmà ɲàn ci: <Sɔlì, Sɔlì, feera, wo yè bà mun byɛɛn ? Fɛɛ fa niɛ̀ ye e maban, è fɛɛfabaà rè kɔ̀ɔ̀n sɛ̀n, tɔ̀ dzii xɔ fɛɛ fa niɛ̀ rìì là.>

15 Min tey fa ci: <Wo tsì rii, Tsìfaà ?>

Tsìfaà yè dzin ci: <Mun Yesù rìì, wo to mun nì byɛɛn.

16 Ŋà fù, a tsiì. Min yɛrɛ kpadèu wo ra rii, sànko min wo bà n ne faagoofadzin. Wo yè bà mun shɛɛrɛ, wo mun jàu nìi tsuru she, wo yè tɔ̀ gooma de mòdzian nà. Mun to nà nìi kpàdè wo ra bònè, wo yè mòdzian toro kɔ̀ tɔ̀ sa ra.

17 Mun nà wo ka bè Dzyèèsìbee mòdzin neè, ko kun kpɛrɛ mòdzìn dzyee reè sapɛ re. Twɛy nà byɛnbe ge o ge shì wo ra, mun wo tsi bou tɔ̀ sapɛ ɲan nòn.

18 Mun wo ka bèe è re, sànko wo yè bè è jaa dzii san, yè bo tsitsiì rɔ̀n, yè nà vyevyeè ɲàn. Sùtana fààn niì ɲinaɔn è mà, yè bo tɔ̀ ɲan, yè nà Ŋaablà ra, sànko yè ɲɛn mun na, è re gooɲaan tsìɛ̀ yè mɛɛy bo è mà. Nìì reè to Ŋaablà raa, tɔ shɛn nìi kuru, è sa yeè tɔ̀ tàrà, nìi yɛ, yè bà Ŋaablà raa.>»

19 Pɔlì twɛy gooma reè dè dòu min niì, è dzin màsà kpir'là rà ci: «Aa, màsà kpiri Agiripà, mun twɛy goo nìì reè myɛ̀un ko mun yè è jà è bo jìrànxɔ rɔ̀n, min si kuùn twɛy rà.

20 Mun Dàmasì wɔ̀ɔ̀ndzin neè rìì kɔ̀nma toro kɔ̀u à goomaa nà ŋe. Tà shɔ̀ùn, min Yerusalɛmunka reè toro kɔ̀, min Yude mar'la mòdzian sapɛ toro kɔ̀, min kòmànà kun kpɛrɛ mòdzin neè toro kɔ̀. Mun na dziàn è ra, ci yè e re jaamabee fau'n kur'la lakere, yè e tsiì Ŋaablà ra. Yè goo ì fa, nìì y'à kpàdèe, ci è re jaamabee fau'n kur'la lakereu n dzi.

21 Tɔ̀ goò rìì kamà, Dzyèèsìbee mòdzin neè yè mun kun, min bà na ni Ŋaablà re gbà blàa fɔɔn doùn, è sàò to na n'a re yè mun vu.

22 Ŋà, Ŋaabla mun màrau, è bè suu fɔ she dzu. Tɔ̀ kamà, arì she min bà ni, m'a shɛɛrɛbe faa mòdzian sapɛ re, mòdzin kiɲaanin sen ɲɛn mòdzin bla tsɛ. Kɛɛra dzyee reè ko Ŋaablà re kɛɛra Musà goo nìì reè dèu ci è nà fa, mun yɛ tɔ̀ rii dèe.

23 È dziun ci Ŋaablà Jaara Moò nà byɛn. Ci wò rii jɔ̀na nà kpunan bo saàn ɲàn, è vyevyeè, tà ko moo dzia tsi nìi tsuru, è tɔ̀ gooma de Dzyèèsìbee mòdzin neè rà, ko kun kpɛrɛ mòdzin neè sa.»

24 È Pɔlì dzii to tɔ̀ goomaa nà e re goò doùn, Fɛsitusì yè sɛ̀ɛ̀y ci: «Fa jiɔ̀ wo ɲan Pɔlì ! Wo kàràn gereunmaà wo kùngɔ fùu !»

25 Pɔlì yè dzin ci: «Jàmààntsi wùù Fɛsitusì, mun kùngɔ na fuɔ̀ waa. Mun akiri dzii tsyɛunma nì gooma ree reè dèe, è to sààbèn goòmà ì nì.

26 Arì màsà kpiri Agiripà, à twɛy goo rèè jaa tɔ̀. Tɔ̀ rii y'à to min bà è jaa dèe à ra akiri tsuu doùn. Mun ɲɛɔ̀n à ra, ci twɛy goo rèè pɛn na à fìrìmà goo, kàtsu à pɛn na fa mɛnɛn doùn waa.»

27 Pɔlì yè màsà kpiri Agiripà tey ci: «Màsà kpiri Agiripà, wo ɲɛɔ̀n kɛɛra reè rè goomaa nà ɔ̀n ? Mun kpɛ̀ynto y'à tɔ̀, wo ɲɛɔ̀n à ra !»

28 Agiripà yè dzin Pɔlì rà tɔ̀un ci: «Kiɲaanin bàsɔùn wo na nàkɔɔn yɛ mun bà Yesù rè kàràndzin ni nèe tsuru.»

29 Pɔlì yè dzin ci: «À bàu dòònun goo ò, à to bàu watsi gbaan goo ò, mun Ŋaablà mafyɛ̀ɛn, à mà dàn wo soo ma waa, arì nìì reè sapɛ yɛ mun lamyɛɛ̀n she, e sapɛ dzyeèmaa yè bà mun tsuru, ŋà, jɔ̀rɔ̀kɔ niì reè yɛ mun na, twɛy rìì dànmaun mà bà ni e ra waa !»

30 Tɔ̀un, màsà kpiri Agiripà yè fù, Fɛsitusì yè fù, Berenisì yè fù, ko gè o ge na tsùuŋnà è ka, twɛy sapɛ yeè fù.

31 Yè bo, yè dziàn e si ra nèe tsuru ci: «Nèe kpir'lee na gèsɔn faɔ̀, nìi y'à vu kun boò, tàmafa, è ji kàso doùn waa.»

32 Agiripà yè dzin Fɛsitusì rà ci: «À mà bà na dziun ci wò re goò jaa yè bè bo Ɔ̀rɔmùn màsà kpiri blàa rè fyeu, à na dzia bàji.»