Actes 25

Pɔlì ci wò re kitsia yè bè kùnùn Ɔ̀rɔmùn màsà kpiri blàa rè

1 Àyìwà, bwèy zhììgi Fɛsitusì wɔumaà shɔ̀ùn màr'là doùn, è bo Sezare wɔ̀ rɔ̀n, è bè Yerusalɛmùn.

2 Tɔ̀un, saaka goojaa bo reè kùntsii rèè, ko Dzyèèsìbee mòdzin neè jɔɔndzin neè, twɛy yè b'a re, yè bè dzin à ra, ci ye jàaŋnà Pɔlì rà.

3 Y'à gaa Fɛsitusì rè gaa'n kur'la sapɛ ra, ci è yɛrɛ to, è Pɔlì bàji na Yerusalɛmùn. È na tɔ̀ dèe, tɔ̀ y'a tàrà, è gòndo riì shiɔ̀ Pɔlì sàn dzuun, è dòo tɔ̀ sapɛ ra nòn. À na ni è duùn, mòdzin ì yè bè e mɛnɛn shia rè, yè Pɔlì shù, y'a vu.

4 Fɛsitusì to yè dzin è ra tɔ̀ rii ɲàn ci: «Pɔlì ni kàsoò rà Sezare, mun tsu to na naà cin dɛ, min sèè be mɔn.

5 Àwà, mun ko ye kùntsii rèè dzia bè esire Sezare. Pɔlì ye ba goo rìi baraɔ̀ ye re, e dzia bo tɔ̀ mà, y'a dè.»

6 Tɔ̀un, Fɛsitusì na geren bwèy ŋaalòn, bwèy tsyeùn tsuru tsɛ Yerusalɛmùn waa, è kpɛyn sèè Sezare. Tɔ̀ raa gbee rɔn, è bè e tsuù kitsikununma nɔ̀n, ci yè nà Pɔlì ka.

7 Pɔlì nàu dɔ̀n min niì, Dzyèèsìbee mòdzin niì reè na daɔn Yerusalɛmùn, twɛy y'à laguru min niì sapɛ. Tɔ̀un, yè goo xɔ xɔù giri sɔ̀n wɔ à ra, tà to y'à tàrà, è na dzia à kpàdè goo sɔn pɛn ka, ci twɛy sààben waa.

8 Ŋà, nìi Pɔlì, tɔ̀ yeè dzin e re goò ɲàn nèe tsuru ci: «Mun na fìrìgoo pɛn faɔ̀ waa. N na fìrìgoo pɛn faɔ̀ è bè Dzyèèsìbee mòdzin neè rè sàrìyaa kàjaa tsɛ, n na fìrìgoo faɔ̀ è bè Ŋaablà re gbà blàa kàjaa tsɛ, n to na fìrìgoo pɛn faɔ̀ è bè Sezarì tsu kajaa tsɛ, Ɔ̀rɔmùn màsà kpiri blàa.»

9 Ŋà, Fɛsitusì sàò na n'a re wò tsoo dzi yeè bà ni Dzyèèsìbee mòdzin neè dzu. Tà doùn, è Pɔlì tey ci: «Wo nà a tsiì, wo yè sèè be Yerusalɛmùn, wo re kitsia yè bè kùnùn mɔn mun jaa ra nèe goo rèe tsɛ ɔ ?»

10 Pɔlì yè dzin ci: «Mun tsìiŋma yɛ Ɔ̀rɔmùn màsà kpiri blàa raa kitsikunun kur'là mòdzin neè rìì bììn, twɛy rìì to wù, yè mun naa kitsia kùnùn. Mun na goo teren bɛy pɛn faɔ̀ Dzyèèsìbee mòdzin neè rà, wo yɛ̀r'la sa tɔ̀ tɔ̀ cɔ.

11 Mun kpɛ̀ynto ye ba na goo teren bɛy faɔ, min bà goo rìì faɔ̀ taki nìi mun vu kun boò, mun na n nɔn saàn mà waa. Ŋà, è yɛ nìi sapɛ deè mun tsɛ, sààben ma ba ni à sɔn doùn fyeu, à shi na ni mòò pɛn suun, è dzi mun wɔ è suun waa. Àwà, mun sào ni, mun naa kitsia yè bè kùnùn Ɔ̀rɔmùn màsà kpiri blàa rìì lè sa.»

12 Fɛsitusì ko e re làtsìì fa reè yè sija fa tɔ̀un, è kòmànà dzin Pɔlì rà ci: «Wo ci wo re kitsia yè bè kùnùn Ɔ̀rɔmùn màsà kpiri blàa rè nìi fa, wo nà bè mɔn.»

Fɛsitusì Pɔlì goo dèu màsà kpiri Agiripà rà min niì

13 Àyìwà, bwèy dànman tà shɔ̀ùn, màsà kpir'lìi kir'là, ci Agiripà, tà ko e raa tààn ci Berenisì, twɛy yè nà Sezare wɔ̀ rɔ̀n, ci ye nàa bo Fɛsitusì kpà.

14 Yè to mɔn, yè jisee giri fa. Tà doùn, Felisì yè bo Pɔlì rè goò goomaa mà, à y'à kpàdè màsà kpiri Agiripà rà. À ci à ra ci: «Kpiri sɔn ni mun ne mìin, Fèlisì bèu à y'à to kàsoò doùn.

15 Mun bèu Yerusalɛmùn watsi riì bwèy, saaka goojaa bo reè kùntsii rèè, ko Dzyèèsìbee mòdzin neè jɔɔndzin neè nàu mun ne, yè nà dzin mun na, ci ye jàaŋnà à ra, ci ye to y'à gaa mun ne, min kitsia mɛɛy à tsɛ.

16 Mun to yè dzin è ra, ci Ɔ̀rɔ̀mùnka reè na dɛ̀rɔɔ̀ yè mòò kuàn tɔ̀ kuùn'n kur'la rà fyeu, fɔ nìì reè jàaŋnà à tsìfa ra, à ko twɛy yè bà e si jaɔ̀, yè gooma e si jaa ra jàà kuàn tsɛ.

17 Tà doùn, è to yè nà mun ka mìin. Mun tsu na à goò ɲancinbe dɛ waa. Tɔ̀ raa gbee rɔn ko e sa, mun yè bè n tsuù kitsikununma nɔ̀n, m'a to yè nà kpir'la ka.

18 Àwà, nìì reè jàaŋnà à ra, twɛy sa yeè nà tɔ̀un. Mun na à siɛ̀n, ci è nà dzin ci à goo xɔ xɔù kaatsi nìì reè faɔ̀, mun na b'a jà tɔ̀ tsuru goo ì waa.

19 À naà goo kpɛrɛ waa, è dzii ra sɔswɛy taraɔ̀ e yɛr'la rè dzinɛ shia rìì kùùn, tà ko Yesù tsoo sɔn, nìi saɔn, Pɔlì yè bà ci à jaama.

20 À goò doùn, mun naà à tɔ̀ mun nà nìi soo fa dɛ. Tɔ̀ kamà, min Pɔlì tey, à sàò ye ba n'a re è bè Yerusalɛmùn, à re kitsia yè bè kùnùn mɔn o.

21 Ŋà, Pɔlì yè e nɔun tɔ̀ mà. À ci wo sào n'a re, Ɔ̀rɔmùn màsà kpiri blàa rìì yè wò re goò jaa bo. Mun ci y'à to kàsoò doùn, fɔ min nà à bàji be tɔ̀ re.»

22 Màsà kpiri Agiripà yè dzin Fɛsitusì rà tɔ̀un ci: «Mun sa sao n'a re, min tà kpir'la vu myɛ̀n.»

Fɛsitusì yè dzin à ra ci: «Gbee ko e sa, wo nà à vu myɛ̀n.»

È bèu Pɔlì ka Agiripà rè min niì

23 Tɔ̀ ji seron, Agiripà ko e re tààn Berenisì mòdzìnblàma ì yè nà dɔ̀n kitsikununma nɔ̀n, mòdzin kunma reè gbaɔn è kpɛyn, nìi kaadzin jɛrɛ̀blàtsi rèè, ko wɔ̀ɔ̀ jɔɔndzin neè. Tɔ̀un, Fɛsitusì yè dzin, ci yè nà ko Pɔlì ka.

24 Pɔlì nàu, Fɛsitusì yè goomaa sen, è dzin ci: «Àyìwà, màsà kpiri Agiripà, ko ye nìì reè sapɛ yɛ mìin, ye jaà yɛ kpir'liì rà nèe, mun bèumaà nà Yerusalɛmùn, Dzyèèsìbee mòdzin neè bèu mun ne yè b'a dè xɔbe mun na, ci à wù è vu. Yè nà mìin, yè nà tà soo dè kɔn.

25 Ŋà, nìi mun, mun na goo sɔn pɛn jà à re goò ɲàn, nìi mòò vu kun boò waa. À to ci wò re goò kitsi yeè bè kùnùn màsà kpiri blàa rè nòn, mun sa ci mun nà à bàji be tɔ̀ re.

26 Àwà, mun nà nìi soo sɛbɛn à re goò ɲàn, min tɔ̀ sìn be màsà kpiri blàa jɔɔn, mun na tɔ̀ tɔ̀ waa. Tɔ̀ rii kamà, min nà à ka ye re, sànko, wo màsà kpiri Agiripà yɛ̀r'la sa jaa ra, è tey, è bà ni dzi sɔn de, min sɛbɛnama jà à goò tsɛ.

27 Tà boshɔ̀ùn, e bà ni kàsòdzin baji be nèe tsuru kùn bɛy, màsà kpiri blàa rè Ɔ̀rɔmùn, tà goò na ni e shi tsɛ waa.»