Actes 24

Dzyèèsìbee mòdzin neè nìi dèu jàmààntsià rà, ci tɔ ye jàà kun Pɔlì rà

1 Àyìwà, bwèy nùn tà shɔ̀ùn, nìi Ananiyasì, saaka jɔɔndzin blaa, tɔ̀ ko Dzyèèsìbee bɔɔ rèè swey, ko kpiri goomatɔbaa sɔn, yè jàà Sezare wɔ̀ rɔ̀n. Tɔ̀ kpiri goomatɔbaà tsoo na Tɛritulusì. Yè wɔ jàmààntsi Fèlisì tsɛ tɔ̀un. È jàaŋnà Pɔlì rà kùn nìi nà, yè tɔ̀ kpàdè à ra.

2 Àwà, Pɔlì yè kiri na. Pɔlì nàu, è jàaŋnà à ra kùn nìi nà, Tɛritulusì yè goomaa sen, è tɔ̀ jaa dè nèe tsuru ci: «Jàmààntsi wùù Fèlisì, e mùn jà nèe jaacin brìsi rèe ɲan jàmaàn doùn she, à wo baraka rɔ̀n nì. Wo re faagoò fakɔɔn doùn akiriblabe ka, làkere giri dɔ̀un jàmaàn doùn.

3 Tɔ̀ jaancin nìi ni ɲe tsɛ watsi sapɛ, ko min niì sapɛ, mùn ne tswɛy n'a re tɔ̀ ra.

4 Ɲe re goomaa na gbàn waa, kàtsu, à na ɲe sàò, ɲe yè wo sàn nà kun to waa. A yɛrɛ to, a toro wɔ mùn ne watsi dɛɛnin bàsɔùn doùn.

5 Ɲe y'à jaɔ̀, ci nèe kpir'lee gooɲaan teeŋ fii mòdzian sàn dzuun. À Dzyèèsìbee mòdzin neè ɲanfu jiɔ̀ dziɲantsiɛ min niì sapɛ, yè e maban. Wò rii Nazarɛtsika reè rè dzinɛɛ jɔɔndzian.

6 À na n'a duùn, è Ŋaablà re gbà blàa yɛ̀r'la sa noo. Tɔ̀ rii ɲàn, ɲe y'à kun. [Ɲe sàò na n'a re, ɲe y'à kitsi, è bè ɲe re sàrìyaa shi tsɛ.

7 Ŋà, nìi Lisiyasì kaadzin kuntsii blaa, tɔ nàu, è nà à tsi ɲe ra fààn na.

8 À to yè dzin ɲe ra, ci ɲe jàaŋnà à ra kùn nìi nà, ci ɲe yè nà tɔ̀ dè wo ra.] Wo yɛ̀r'la y'à tey. Ɲe nìi sapɛ deu à tsɛ, wo nà à tɔ̀, ci tɔ sààben.»

9 Dzyèèsìbee mòdzin niì reè na ni mɔn, twɛy yè tabe yè Tɛritulusì rè goomaa màkun nèe tsuru ci: «Taki, à nìi sapɛ deu, à sapɛ sààben.»

Pɔlì nìi dèu jàmààntsià rà e re goò tsɛ

10 Àwà, jàmààntsià yè goomaa sìn Pɔlì rà tɔ̀un, ci è raà dè. Pɔlì ci: «Jàmààntsià, m'a tɔ̀ ci à jii gir'lì yɛ nèe, wo rìì nèe kun nee mòdzin neè rè kitsikununbaa. Tà doùn, nìi ni mun ne, mun y'à dè wo ra n ne goò ɲàn, tɔ̀ shiɲaanbe kuraa na ni mun ɲan waa.

11 À na gereon bwèy teeŋ fii tsɛ waa, mun wɔu Yerusalɛmùn, min bè Ŋaablà blabe mɔn. Tɔ̀ ma ba sààbèn goo, wo yɛ̀r'la dzia à lafyɛ.

12 Mòò pɛn na mun jà, mun gooma sɔɔn mòò ka Ŋaablà re gbà blàa fɔɔn doùn. Mòò pɛn to na mun jà, mun jàmaà ɲan fu jia waajibi fa gba rèè doùn, ko wɔ̀ɔ̀ gàneè sɔn ɲan.

13 Nèe rèè yɛ nìi sapɛ deè mun tsɛ nèe, è na dzia à kpàdè goo sɔn pɛn ka, ci à sààben waa.

14 Sààben fyan, mun kpɛ̀yn nìi tɔ̀, min bà dzia à dè wo ra, tɔ̀ rii yɛ, ci mun goo faa Ŋaablà rii lè, ɲe fà rèè rè Ŋaablàa, min bà Tsìfà Yesù raa shia jìɛ. Ye ci tɔ̀ shia na sààbèn goo waa, ŋà, nìi sapɛ sɛbɛɔ̀n sàrìyaa kìtaabuà doùn, ko kɛɛra reè rè kìtaabu rèè doùn, mun ɲɛɔ̀n tɔ̀ sapɛ ra.

15 Mun kpɛ̀yn ɲɛɔ̀n goo soo ra Ŋaablà re, ci tɔ nà fa, è sa to ɲɛɔ̀n tɔ̀ ra. Tɔ̀ rii yɛ, ci fùn nèè nà sèè kpunan sii sɔn see, mòdzin wuu sen ɲɛn mòdzìn ɲan tsɛ.

16 Tɔ̀ rii kamà, min bà n maxɔbeò min goo tereunma faa kudɛyn, sànko jààma mà jà mun na è bè Ŋaablà kajaa tsɛ, jààma to mà jà mun na è bè mòdzian kàjaa tsɛ.

17 Àwà, mun jii giri fau, mun na wɔ Yerusalɛmùn waa. Tɔ̀ rii shɔ̀ùn, mun sèè nau, min nà wɔ ɲe re kuan mòdzin neè rà ɲɛyn ka, min saaka sa bo Ŋaablà re.

18 Àwà, è nàu mun jà Ŋaablà re gbà blàa fɔɔn doùn mɔn nì, min bà na n ne fɛnɛbee goo rèè shi jiiŋnà. Jàma naà ni mun ka, màànkan tsu to naà ni.

19 Nìì reè mun jàu mɔn, à Azhi jamaan Dzyèèsìbee mòdzin ì nì. È jàaŋnà mun na kùn nìi nà, twɛy rìì na wù, yè nà tɔ̀ kpàdè wo ra.

20 Àwà, Dzyèèsìbee mòdzin neè rè kitsikunun kuru blàa mun kitsiu watsi riì bwèy, yè ba fìrìgoo nìi jàu mun na, nìì reè yɛ mìin, è dzia tɔ̀ dè m'a myɛ̀n.

21 È mun tsìiŋma to è shiɲaanfi, mun gooma dzii jaa soo riì dèu, fɔ tɔ̀ rii ye ba bàu è ɲìnìn goo yè jàà mun na dɛ. Mun kpɛ̀yn sɛ̀rɔn min dzin ci: <Mun ɲɛn niì faɔ̀ à ra, ci fùn nèè nà sèè kpunan sii sɔn see, ye jàaŋnà mun na, è ɲɛn tɔ̀ rii tsɛ.>»

Pɔlì rè kitsia tou min niì jisee kpɛrɛ

22 Àwà, Tsìfaà rè shia nìi, jàmààntsi Fèlisì na goo giri tɔ̀ tɔ̀ ɲan. È shi sin Dzyèèsìbee mòdzin neè rà, ci kitsia nà to jisee kpɛrɛ. À ci è ra tɔ̀un ci: «Nìi Lisiyasì, kaadzin kuntsii blaa, tɔ̀ ye na mìin watsi riì bwèy, ye re kitsia jaa nà bo tɔ̀ bwèy.»

23 Àwà, Pɔlì rè goo rèè na ni kaadzin jɛrɛ̀blàtsi nìi suun, Felisì yè dzin, ci tɔ̀ y'a kun bè ji kàsoò doùn, à y'à kplatsuɔ. Ci à y'à to à la yeè bà baɔ̀ dɛyn, à to mà à re mòò rèè, ko à dzunwɛynsi reè kaa goo fa tsɛ à re waa.

24 Bwèy dànman tà shɔ̀ùn, jàmààntsi Fèlisì ko e re tààn yè nà nà. Tàànmaa tsoo ci Durusiyì, è bà Dzyèèsìbee mòdzin. Tɔ̀un, è mòò ka Pɔlì kpɛyn, ci y'à kir'na. Pɔlì yè nà. Tɔ̀un, mòo ɲɛɛn Yesù Kirisà rà ɲɛun'n kur'liì rà, è bo tɔ̀ mà, à y'à dè è ra.

25 Ŋà, tɔ̀ goomaa doùn, mòo wù è re jaamabee fa fau'n kur'liì rà, è bà jaamabe wùù Ŋaablà re, mòo wù è dzi e yɛrɛ dzuun nìi tsuru, ko Ŋaabla nà kitsi riì kùnùn mòdzian sapɛ dzyeèma tsɛ sii sɔn see, Pɔlì dzii yè wɔ tɔ̀ sapɛ tsɛ. Àwà, Fèlisì dziu twɛy gooma reè myɛ̀n min niì, è shi, è dzin Pɔlì rà ci: «Ke raà wù nèe tsuru, a dzia a kpɛyn sèè. Min na watsi kpɛrɛ tàrà, mun nà wo kiri kɔn.»

26 Fèlisì akiri na ni nìi tsɛ, Pɔlì yè ɲɛyn sin wò ra. Tɔ̀ kamà, à na à kir'là watsi giri, è nà kaangoo jia à ka.

27 Jii fii tà shɔ̀ùn, Fèlisì yè bo mɔn, mòò kpɛrɛ yè tsùù jàmààntsìbee tsɛ. Tɔ̀ tsoo na Pɔrisiyusì Fɛsitusì. Fèlisì sàò na n'a re wò tsoo dzi yeè bà ni Dzyèèsìbee mòdzin neè dzu nìi fa, è Pɔlì to kàsoò doùn.