Actes 23

1 Pɔlì yè e jaà gban to kitsikunun kuru blàa mòdzin neè sapɛ ra tɔ̀un, è kòmànà dzin ci: «Awà n neema ì, è bè suu she dzu, min ne jaamabee shi jiiŋ, a ci Ŋaablà ci è fa nìi tsuru, mun na jààma jà n yɛr'la waa.»

2 Tɔ̀un, saaka jɔndzin bla riì ni, ci Ananiyasì, tɔ̀ yeè dzin Pɔlì tɛyn dzin neè rà, ci y'à ban e dzii ra.

3 Pɔlì yè dzin à ra tɔ̀un ci: «Mòdzin duungoofiitsi, a ci gbàkuru ma fyɛuma, Ŋaablà yɛr'la rìì nà wo ban ! Wo tsùuŋnà mìin, wo yè mun kitsi sàrìyaa rìì tsɛ, wo to yɛ sàrìyaa fi shɛun, kàtsu wo ci yè mun ban.»

4 Gè o ge na ni mɔn, è sapɛ yeè kaba ci: «Ee, wo Ŋaablà re saaka jɔɔndzin blaa takia rìì ɲɛ̀na ɔn !»

5 Pɔlì yè dzin è ra ci: «N neema ì, mun naà à tɔ̀, ci à saaka jɔɔndzin blaa rìì waa. Tà boshɔ̀ùn, m'a tɔ̀ ci à sɛbɛɔ̀n Ŋaablà re Goomaa doùn nèe tsuru ci:

A kun dzin neè kùntsiɛ̀, maà à ɲɛ̀n waa.»

6 Pɔlì na à tɔ̀, ci kitsikunun kur'là mòdzin neè ɲàn, Sadusiɲɛn ì nì, Faridziɲɛn rèè yè bà ni. Tɔ̀ kamà, è dzin è jaa ra fààn na ci: «N neema ì, mun Faridziɲɛn, min bà Faridziɲɛn dzin. Mun ɲɛn niì faɔ̀ à ra, ci fùn nèè nà sèè kpunan, è jàaŋnà mun na, è ɲɛn tɔ̀ rii tsɛ.»

7 Tɔ̀ goomaa dèu min niì, tɔ̀ yeè goomaa giribe Faridziɲɛn rèè ko Sadusiɲɛn rèè fi. Jàmaà yè tara kuru fii.

8 Sadusiɲɛn rèè ci fùn nèè fa sèè kpunan gbee waa, ci mɛ̀rɛ̀kɛ na ni waa, kwey tsu to na ni waa. Faridziɲɛn rèè, twɛy ci tɔ̀ sapɛ ni.

9 È bà màànkan brisi è re. Sàrìyà kaamoo swey na ni, twɛy yè bà na Faridziɲɛn rèè raa kur'la mòdzin ì. Tɔ̀un, twɛy yè fù, yè e san gban. È ci: «Sààben fyan, ɲe na jààma pɛn jaɔ̀ kpir'lee ra waa. Tɔ̀ nìn yè bo à ra, kwey rìì goomaɔ̀ à ka ò, mɛ̀rɛ̀kɛ rìì to goomaɔ̀ à ka ò, tsi tɔ̀ ?»

10 Sɔ̀swɛɛ̀ yè xɔbe è xɔbe, fɔ kaadzin kuntsii blaa yè shi, ci è nà Pɔlì vyɛ̀ vyɛ̀ e si ra. Tɔ̀un, kaadzin kuntsii blaa yè e vu bo kaadzin neè swey rà, ci twɛy yè jàà be kitsikununma nɔ̀n, yè bè Pɔlì bo è fi, yè sèè b'a ka kaadzin tsiɛ doùn.

Nìi na ni è duùn y'à fa Pɔlì rà

11 Tɔ̀ fen nɔ̀n, Tsìfaà yè e yɛrɛ kpadè Pɔlì rà, è dzin à ra ci: «A kuùn xɔbe ! Wo mun shɛɛrɛbe fau Yerusalɛmùn mìin nìi tsuru, fɔ wo yè b'a fa tɔ̀ tsuru kɔn Ɔ̀rɔmùn.»

12 Àwà, tɔ̀ raa gbee gbishɛɛ̀mà nɔ̀n, dzɔ̀n vì dziɛ rè, dzyèèsìbee mòdzin neè swey yè gòndo shi Pɔlì sàn dzuun. Yè e kɛɛ̀y e si ra, ci ye fa ɲwɛyn ɲɔn, ye to fa gesɔn pɛn mìn, ye mà bà Pɔlì vuɔ̀ waa.

13 Dzyèèsìbee mòdzin niì reè na tɔ̀ goo kɛ̀ɛ̀ faɔ̀, è na giri kpiri dzyeè mà.

14 Yè bè saaka jɔɔndzin neè ko bɔɔ rèè rè, yè bè dzin è ra ci: «Ɲe yè e kɛɛ̀y xɔbeò, ci ɲe fa ɲwɛyn ɲɔn, ɲe to fa yu mìn, ɲe mà bà Pɔlì vuɔ̀ waa.

15 Tɔ̀ doùn, e ko kitsikunun kur'là mòdzìn dzyee reè, e sapɛ yeè byɛ̀n soo ma, è bè gaa kaadzin kuntsii blaa rè, ci è Pɔlì sìn ye ra, ci ye sào ni, y'a re goò ɲan siin cɛyn. Nìi kpɛ̀yn ɲe, ɲe yè e mabyɛɔ̀n, ɲe nà à shù shia rè, sani è wɔ ye tsɛ mìin, ɲe nà à vu.»

16 È tɔ̀ myɛ̀ɛ̀n nìi ɲɛn goòmà dèu Pɔlì jɔɔn, Pɔlì raa geedzin sɔn na ni mɔn, tɔ̀ toro yè ji à goomaa ɲàn. Tɔ̀un, tɔ̀ yeè geren bè kaadzin tsiɛ rà, è bè dɔ̀n, è Pɔlì toro kɔ̀ tsùù à goomaa nà.

17 Àwà, kaadzin jɛrɛ̀blàtsi nìi na ni faagoò rà, Pɔlì yè tɔ̀ kiri, è dzin tɔ̀ ra ci: «A Yɛrɛ to, e bè kpirimɛyn nee ka kaadzin kuntsii blaa rè, gooma n'a re, à y'à d'à ra.»

18 Kaadzin jɛrɛ̀blàtsià yè bè kpirimɛɛn ka kaadzin kuntsii blaa rè, è bè dzin à ra ci: «Kàsòdzin Pɔlì mun kiriu à y'à gaa mun ne, ci mun yè nà ko kpirimɛyn nee ka wo re, ci gooma n'a re, à y'à dè wo ra.»

19 Kaadzin kuntsii blaa sa yeè kpirimɛɛn kun e si ra tɔ̀un, à yè e kanma à ka, à y'à tey ci: «Fee rìì ni wo re, w'a dè mun na ?»

20 Àwà, Pɔlì geedziɛ̀n yè bo goò jaa mà, à y'à lakɛɛ̀y à ra. À ci: «Dzyèèsìbee mòdzin neè byɛɔ̀n à mà, ci ye nà à gaa wo re, ci gbee, wo yè bè Pɔlì ka kitsikunun kuru blàa mòdzin neè rè. È ci ye sào ni, y'a re goò ɲan siin cɛyn.

21 Maà a tsiì tɔ̀ ra kuraa ! È re mòkun dzyeè ko e bonè rìì yè e mabyɛɔ̀n, ci ye nà Pɔlì shù shia rè y'a vu. Yè e kɛrɔɔ̀n, ci ye fa ɲwɛyn ɲɔn, ye to fa gesɔn pɛn mìn, ye mà bà à vuɔ̀ waa. Byɛ̀n fau à sapɛ tsɛ nòn, è wo raa dèràmaà nì shuɔ̀ sa.»

22 Tà shɔ̀ùn, kaadzin kuntsii blaa yè shi sin kpirimɛɛn nà, ci à y'à wa. Ŋà, à y'à dè màxɔbe à ra, ci: «Maà à dè mòò pɛn na, ci wo sɔn deò mun na à goò tsɛ dɛ !» Kpirimɛɛn yè bo tɔ̀un, à y'à waa.

Pɔlì bèu'n kur'la Sezare wɔ̀ rɔ̀n

23 Tà shɔ̀ùn, kaadzin kuntsii blaa yè e re kaadzin jɛrɛ̀blàtsi fii kiri suu, è dzin è ra ci: «Ye kaadzin caànmoò ladzyeè, shùtsi mùeyn ko tsyeun, ko kpiri caànmoò fii tànman reè yè bà ni è re. E sapɛ yeè e mabyɛ̀n, fen nèe ɲan, e naà bè Sezare wɔ̀ rɔ̀n.

24 Ye shu ì sa mabyɛ̀n, Pɔlì nà tèyn sɔn tsɛ, gè riì ni à to, ye wɔ à wùù ka jàmààntsià tsɛ, nìi tsoo Fèlisì.»

25 Tɔ̀un, è sɛbɛn fa, è tɔ̀ wɔ è suun, ci è bè sìn jàmààntsi Fèlisì rà.

26 Tɔ̀ sɛbɛɛn doùn, à ci:

Mun Kloodzì Lisiyasì rìì nèe sɛbɛn nee kaà wo jàmààntsì sɔbɛn Fèlisì rè. M'a tswaà.

27 Mun yɛ kpir'liì bàji beè wo re, dzyèèsìbee mòdzin neè na à kuɔn, ci ye nà à vu. Mun y'à myɛ̀un ci sàrìyaa y'à kpàdeò ci à Ɔ̀rɔ̀mùnka, mun yè kaadzin neè swey bo, ɲe yè b'a tsi bo è suun.

28 Dzyèèsìbee mòdzin neè jàaŋnà à ra kùn nìi nà, mun sàò na ni mun yè tɔ̀ tɔ̀ nìi fa, tɔ̀ kamà, min b'a ka è re kitsikunun kuru blàa mòdzin neè rè.

29 Ŋà, mun y'à jàu ci è jàaŋnà à ra è yɛ̀r'leè raa sàrìyaa goo ì rìì là. Mun kpɛ̀yn na kùn pɛn jà, nìi dzia bà à vu kun, tàmafa è ji kàso doùn waa.

30 Mun to y'à myɛɔ̀n sa, ci dzyèèsìbee mòdzin neè gòndo shiɔ̀ à sàn dzuun, ci ye nà à vu. Tɔ̀ kamà, mun y'à bàji be wo re suu. Nìì reè to jàaŋnà à ra, mun dziɔn twɛy rà, ci è jàaŋnà à ra kùn nìi nà, è dzia bè tɔ̀ jaa dè wo ra.

31 Àwà, à dèu kaadzin neè rà nìi tsuru, y'à shi jiì tɔ̀ tsuru. Yè fù tɔ̀ fen nɔ̀n Pɔlì ka, yè b'a ka fɔ wɔ̀ sɔn ɲan, ci Antsipatsirisì.

32 Tɔ̀ raa gbee rɔn, kaadzin neè yè e kpɛyn sèè mɔn, yè nà kaadzin tsiɛ rà, shùtsi rèè, twɛy yè geren jìɛ̀ rè ko Pɔlì ka.

33 Àyìwà, è bèu wɔ Sezare watsi riì bwèy, shùtsi rèè yè sɛbɛɛn bo sìn jàmààntsià rà, yè Pɔlì sìn à ra.

34 Jàmààntsià yè sɛbɛɛn kàràn tɔ̀un, è Pɔlì tey, ci à gàne kɛ̀n modzin. Pɔlì yè dzin à ra, ci wo boò Silisi jamaan ɲàn.

35 Jàmààntsià yè dzin à ra ci: «Nìì reè jàaŋnà wo ra, twɛy ye na wɔ mìin watsi riì bwɛ̀y, mun nà wo tey tɔ̀ bwèy.»

Àwà, màsà kpiri bɔrɔɔ Erodzì na màsà gba sɔn jiɔ̀. Jàmààntsià yè dzin ci yè bè Pɔlì ji mɔn, y'à kààwɔɔ̀.