Actes 22

Pɔlì gooma niì reè dèu jàmaà nà

1 Pɔlì ci: «N neema ì, ko n fa ì, nìi ni mun ne, mun y'à dè ye ra n ne goò tsɛ, e sao Ŋaa sàò, ye e toro wɔ tɔ̀ re.»

2 È dziu Pɔlì goomakɔɔn ja è re kungoòmàà ɲàn min niì, yè e ŋɔn nìn kɔn kpɛrɛ. Pɔlì yè geren goomaa rè kɔn ci:

3 «Mun Dzyèèsìbee mòdzin ni. Mun kereu Tarisì wɔ̀ rɔ̀n nì, Silisi jamaan ɲàn. Ŋà, mun lamɔ̀nɔun mìin nì Yerusalɛmùn. Mòò riì na mun kàrànfaà, tɔ̀ na Gamaliyɛl'lì. Wò rii mun kàraun ɲe fàbɔɔ rèè rè sàrìya reè jaa taki taki ra. Mun na Ŋaablà raa goò jiɔ̀ n ɲiun, a ci ye sa yɛ nìi tsuru she.

4 Nìì reè na gbaɔn Tsìfa Yesù raa shia kpɛyn, mun y'à fau byɛnbe yeè ɲɛn twɛy tsɛ, fɔ è bè wɔ vui ma. Kpir'leè ko tàan rèè sa, mun na à toò yè kun, yè tsyee kàsoò doùn.

5 Min ba doò rìì dèe o, saaka jɔndzin blaa ko bɔɔ rèè rè dzyèè kur'là mòdzin neè dzia à jaa dè. Ye rìì sɛbɛn ì wɔu mun suun, ci min b'a sìn Dàmasì wɔ̀ɔ̀ Dzyèèsìbee mòdzin neè rà. Tɔ̀ tsuru, ci mòò o moò ni mɔn, yè bà gbaɔn Yesù raa shia kpɛyn, mun dzia à to yè kun, yè shì na mìin Yerusaslɛmùn, byɛnbe yeè ɲɛn è tsɛ.

6 Mun bèkɔɔn nà shia rè, mun bèu tsyɛnbe Dàmasì wɔ̀ɔ̀ rà, bwèytaarun fà xe rɔ̀n, vyevyee sɔn yeè den bo jaa soo jìran nɔ̀n, è nà mun laguru.

7 Min bo mɛɛy dzɔn nɔ̀n, m'a myɛ̀n, vu sɔn dziàn mun na ci: <Sɔlì, Sɔlì, feera, wo mun byɛɛn nèe tsuru ?>

8 Min tey fa ci: <Wo tsì rii, Tsìfaà ?>

Tɔ̀un, vuà yè dzin mun na ci: <Mun Nazarɛtsì Yesù rìì, wo mòò riì byɛɛn, à mun nì ?>

9 Nìì reè na ni mun ka, twɛy kpɛ̀yn vyevyeè jàu, ŋà, vu rìi na goomaa mun ka, è na tɔ̀ myɛ̀n waa.

10 Tɔ̀un, min tey fa ci: <À to wù, min fee rìì fa Tsìfaà ?>

Tsìfaà yè dzin mun na ci: <Fù, a wa Dàmasì, wo wù, wo yè nìi sapɛ fa, è nà tɔ̀ dè wo ra mɔn.>

11 Vyevyee brìsi rèe kamà, min bà jaana. Tɔ̀un, mun jììfàsi rèè yè mun si kun, min kòmànà dzi wɔ Dàmasì wɔ̀ rɔ̀n.

12 Àwà, kpiri sɔn na ni mɔn, ci Ananiyasì. Tɔ̀ kpir'la na shiɔ̀ Ŋaablà ra, è bà Musà rè sàrìyaa goo rèè shi jiɛ e jiu'n kur'la. Dàmasì wɔ̀ɔ̀ Dzyèèsìbee mòdzin neè sapɛ na à tsoo dzi kir'là.

13 Ananiyasì yè nà mun kpɛyn, è nà e tsiì mun tɛyn, è dzin mun na ci: <N neema kpiri Sɔlì, a jaa rèè ka jɛ̀y fa e shɔùn !>

Tɔ̀ nɔ̀nkɔɔrɔn ko e sa, mun jaa dzii yè san, m'a jà.

14 È dzin mun na kɔn ci: <Ɲe fàbɔɔ rèè rè Ŋaablà na wo bo tsùuŋnà e jaa ra, sànko, nìi y'à sàɔ, wo yè tɔ̀ tɔ̀. Mòò sɔn nìi tereòn tɔ̀ yeè bà Yesù, wo yè tɔ̀ jà, tà ko wo y'à vu myɛ̀n.

15 À tɔ̀ fau, kàtsu wo nà bà à shɛɛrɛ mòdzian sapɛ re, wo nìi sapɛ jau, ko wo nìi sapɛ myɛun, wo yè è toro kɔ̀ tɔ̀ ra.

16 Àwà dòònun, maà dzin ci wo gèsɔn màshua dɛ waa. Fù, a to a jaara yeè fòò Ŋaablà re shia goo rèè rà, a re gooɲaan tsìɛ̀ yè mɛɛy bo a ma Tsìfa Yesù tsoò baraka rɔ̀n.>

17 Twɛy goo rèè shɔ̀ùn, min kpɛyn sèè Yerusalɛmùn. Sii sɔn see, mun ni Ŋaabla mafyɛɛ̀n nà gbà blàa doùn, min jɛ̀y fa goo sɔn tsɛ.

18 Min Tsìfaà jà. À to yè dzin mun na ci: <A tabe bo Yerusalɛmùn, kàtsu, wo nà goo o goo dè mun ne goò ɲàn, Yerusalɛmunka reè na naà e tsiì à ra waa.>

19 Mun yè dzin à ra ci: <Tsìfaà, y'à tɔ̀, ci mun na bèe waajibi fa gba rèè doùn, nìì reè ɲɛɔ̀n wo ra, mun na à toò yè kun, yè bè tsyee kàsoò doùn, tà ko yè dɔrɔ sɛyn ka.

20 Etsiyɛnì nìi na wo shɛɛrɛ, è na tɔ̀ vua watsi riì bwèy, mun sa na ni. Mun sa yeè n tsiiŋ Etsiyɛnì vua rà. À vubaa rèè, mun nì twɛy rèè vya rèè kuun è re.>

21 Tsìfaà yè dzin mun na tɔ̀un ci: <Bo wɔ̀ rèe doùn, a wa, mun nà wo ka bè jeenà kun kpɛrɛ mòdzin ì nì nè.>»

À tɔ̀u min niì, ci sàrìyaa Pɔlì kpàdeò Ɔ̀rɔ̀mùnka

22 Àwà, nèe sapɛ ɲan, jàmaà na e toro wɔɔ Pɔlì rè, y'à re goomaa lamyɛɛ̀n. Ŋà, Pɔlì dziu kun kpɛrɛ mòdzin nèe goomaa bo e dzu min niì, jàmaà yè fù ji màànkaan ka kɔn, yè sɛ̀ɛ fààn na ci: «È vu, è vu ! Nèe mòdzìn kaatsi rèe wù, è bo dzɔ̀nxɔɔ̀ tsɛ rìì ! À to kùn na ni e jaa ra waa !»

23 Màànkaan tèyn beè vu rìi mà, à teyn beè tɔ̀ vuà rìì mà. È vunun tauma yè e re mɛ̀yɛ reè bo, yè twɛy firi fir'la, tà ko yè kpankpaàn fù jia jiran nɔ̀n.

24 Kaadzin kuntsii blaa yè dzin tɔ̀un, ci yè dɔ̀n Pɔlì ka kaadzin tsiɛ doùn. Ci y'à ɲan kun mɔn, sànko, Dzyèèsìbee mòdzin neè màànkaan boò à kpɛyn kùn nìi nà, è tɔ̀ dè.

25 Kaadzin neè yè dɔ̀n Pɔlì ka tɔ̀un, y'à shì, ci ye nà à dɔrɔ sɛyn ka. È ci e y'a dɔrɔ, kaadzin jɛrɛ̀blàtsi rìi na tsìiŋnà mɔn, Pɔlì yè tɔ̀ tey ci: «Àwà, sàrìyaa mòò riì baɔ̀ Ɔ̀rɔ̀mùnka, à dàaŋnà sàrìyaa doùn, ye y'à tsìfa ban, kitsi mà bà kùnuɔ̀n à tsɛ ɔn ?»

26 Kaadzin jɛrɛ̀blàtsià tɔ̀ goomaa myɛ̀un min niì, è vwɛ̀ɛ̀y be, è bè e sarà kaadzin kuntsii blaa rà ci: «Wo na nà nìi fa, wo y'à tɔ̀ ? Sàrìyaa nèe kpir'lee kpàdeò Ɔ̀rɔ̀mùnka.»

27 Kaadzin kuntsii blaa yè dɔ̀n be Pɔlì kpɛyn suu, è b'a tey ci: «À dè n na, sàrìyaa wo kpàdeò Ɔ̀rɔ̀mùka rii sààben na ɔn ?» Pɔlì ci ɔ̀ɔn.

28 Kaadzin kuntsii blaa yè dzin ci: «Nìi mun, mun ɲɛyn bla rii bou, sàrìyaa yè kòmànà mun kpàdè Ɔ̀rɔ̀mùnka.»

Pɔlì yè dzin kɔn ci: «Mun kpɛ̀yn, mun kereu n naà doùn.»

29 Pɔlì dziu tɔ̀ dè min niì, nìì reè na nà à ban, è bà ni gooma fàan nà, twɛy sapɛ yeè bo à tɛyn tɔ̀ nɔ̀nkɔɔrɔn. Kaadzin kuntsii blaa dziu à tɔ̀ min niì, ci wo mòò shiɔ̀ sàrìyaa nìi kpàdeò ci à Ɔ̀rɔ̀mùnka, è shi.

Nìi fau, è Pɔlì to kitsikunun kur'là mòdzin neè jaaterema

30 Kaadzin kuntsii blaa sàò na ni wò y'a tɔ̀, goo rìi Dzyèèsìbee mòdzin neè jàà kun taki taki Pɔlì rà. Tɔ̀ kamà, tɔ̀ raa gbee rɔn, è saaka jɔndzin neè, ko Dzyèèsìbee mòdzin neè rè kitsikunun kur'là mòdzin neè kiri è ladzyeè. À tɔ̀ fau, à to yè bè Pɔlì foro, yè b'a ka, yè b'a tsìì twɛy jaaterema.