Ŋaablà re Dzia jàaŋ kàràndzin neè tsɛ min niì
2
1 Àwà, dzyèèsìbee mòdzin neè rè jòòn jaa sɛr'lìi na kir'là, ci Pantekɔtsì, tɔ̀ jisee wɔu, Yesù rè kàràndzin neè sapɛ yeè bè e ladzyèè e ladzyèèma bɔrɔɔ rɔn.
2 Tɔ̀un, màànkan bla sɔn yeè nà bàràma bo ŋaablaxɔɔ̀ rà, a ci fyɛn bla maànkan. È ni tɔ̀ gbà nìi doùn, màànkaan yè nà tɔ̀ tsyɛn.
3 Tɔ̀ watsi soo ɲàn, yè sàden ì jà, twɛy ni a ci nɛyn. Twɛy nɛyn tsuru sàden nèè yè e tanan tanan tɔ̀un, yè e tsuu tsùù bè è soo sookɔɔn sapɛ tsɛ.
4 Tɔ fau min niì, Ŋaablà re Dzi Fɛnɛɛ baraka rɔ̀n, è sa yeè e maa, yè goomaa kun kpɛrɛ goòmàà ì ɲàn, è naà nìi reè tɔ̀ bɔrɔɔ waa.
5 Tɔ̀ y'a tàrà Ŋaabla goo ni dzyèèsìbee mòdzin niì reè vunun tsɛ, è ni dziɲantsiɛ min o min, twɛy giri na ni tɔ̀ bwèy fii rɔ̀n Yerusalɛmùn wɔ̀ɔ̀ doùn.
6 Àwà, tɔ̀ màànkan blaa bou min niì, twɛy mòdzin neè giri yè vwɛ̀ɛ̀y be mɔn, yè bè e ladzyèè jàma brìsi. È bèu wɔ mɔn, y'à jà kàràndzin neè goomaa è soo sookɔɔn sa re kungoòmà ì ɲàn. Àwà, tɔ̀ goò yè è duungoo do fɔ è bè geren.
7 È duungoo dòumaà tɔ̀ tsuru, è na tɔ̀ niì myɛ̀ɛn e tor'la, è naà ɲɛɔ̀n à ra waa. Yè dziàn e si ra ci: «Mòdzin niì reè goomakɔɔn yɛ nèe, è sapɛ na Galileka ì rìì gbɛ ?
8 Fee to y'à to ɲe yè bà è gooma vu myɛ̀ɛn e soo sookɔɔn sa re kungoòmà ì ɲàn.»
9 Twɛy mòdzin neè ɲàn, Paritsika ì na ni, Mɛdzika ì na ni, Elamuka ì na ni. Swey boò Mezopotami, swey boò Yudè mar'la ɲàn, swey boò Kapadɔsì, swey boò Pontsì, swey boò Azhi jaaman ɲàn.
10 Swey boò Firizhi, swey boò Panfili, swey boò Misiran jamaan ɲàn, Libi jamaan gàne nìi reè ni Sirɛnì wɔ̀ɔ̀ tɛyn, swey boò mɔn, swey yè bà boò Ɔ̀rɔ̀mùn jamaan nɔn.
11 Dzyèèsìbee mòdzin ì na ni è ɲan, swey yè bà ni, twɛy dɔɔ̀n dzyèèsìbee mòdzin neè rè dzinɛɛ ɲàn. Kɛrɛtsika ì na ni ko Arabu ì. Twɛy mòdzin neè ci: «À baɔ̀ dzùrù nèe mòdzin nee reè yè bà dzia Ŋaablà re kabagoo goo fauma rèè dèe ɲe re kungoòmà rèè ɲàn.»
12 È duungoo do ɲaanfaa suun tà goò rè, è naà dèràma tsu rii tɔɔ̀ dɛ waa. Tɔ̀un, yè e maa yè e si teè ci: «Nèe dzuɔn to fee ?»
13 Swey y'à bà jirangoo kàràndzin neè mà, yè dziàn ci: «Dɔ̀ɔ̀ rìì nèe rèè kuɔn.»
Piyɛrì mòdzian waajibiu min niì
14 Àwà, Piyɛrì yè fù tɔ̀ rii ɲàn, à ko kɛɛradzin neè dzyee teeŋ sɔɔn, è dzin jàmaà nà fààn na ci: «Ye dzyèèsìbee mòdzin neè, ko nìì reè sapɛ yɛ Yerusalɛmùn mìin, ye e toro wɔu'n kuru wube n ne goomaa rè, y'a myɛ̀n cɛyn.
15 E maà à siin ci nèe mòdzin nee reè dɔ̀ɔ̀kùnkɔɔn ì, jàci ye y'à kɛ̀sɛɛ̀ nìi tsuru dɛ ! À na tɔ̀ tsuru waa. Mòò na dzia dɔ̀ɔ̀ mìn nèe gbishɛɛ̀mà rèe ɲan, fɔ è bè wɔ à kunmà dɛ !
16 Ŋaablà na nìi deò dan, è bo à re kɛɛra Yòwɛlì dzu, tɔ̀ rii bokɔɔn yɛ e shi tsɛ. À na deò ci:
17 Goo nìi reè nà fa dziɲaan dò bwey, twɛy rìì siin:
Mun Ŋaabla nà n ne Dzia jàà dziɲantsiɛ doùn mòdzian sapɛ tsɛ.
Tɔ̀un, ye dzin kpir'leè ko ye dzin taan reè nà mun ne kɛɛrabee fa.
Ye re dzunwɛyn neè nà bà jɛ̀y faa,
ye re mòòbɔɔ rèè yè bà sìràn nèè faa,
yè goo rèè jàa twɛy doùn.
18 Tɔ̀ jisee kamà, kpiri niì reè ko tàan nìi reè
mun Ŋaablà re kɛɛrabee faa, mun nà n ne Dzia jàà è tsɛ.
19 Mun nà kabagoo goo reè swey fa kpadè ŋaablaxɔɔ̀ rà jìran nɔ̀n,
min tàànmàshɛn neè swey kpàdè dzɔn nɔ̀n.
Tsìɛn nà bà ni, sàà ni, sàtsuru yeè bà ni, a ci ŋaamunun.
20 Bwèè nà kuu, è tsitsii wɔ, kuɔ̀ yè xè, a ci tsììn.
Tɔ̀ rii sapɛ shɔùn, mùn Tsìfa Ŋaablà raa jisee yè kòmànà wɔ,
tɔ̀ riì jisee bla, à nɔrɔ yè bà wù.
21 Tɔ̀ sii sèè, wo mòo o moò nà Tsìfaà tsoo kiri, wo nà tsi.»
22 Piyɛrì yè geren goomaa ka kɔn. À ci: «Ye Isirayɛlì mòdzin neè, ye e toro wɔu'n kuru wube, ye n devuà myɛ̀n: Àwà, Nazarɛtsika kpiri Yesù na mòò riì kuru, Ŋaabla tɔ̀ kpàdèu ye ra. Tɔ̀ doùn, è Yesù to ye fi, Ŋaablà y'a ka e re dzibaabe goo niì reè, ko e re kabagoo goo niì reè, ko e re tàànmàshɛn kabagooma nii reè fa kpadèu ye ra, ye na fìriɔ̀ tɔ̀ mà waa.
23 Mòdzian y'à wɔ nìi fau ye suun, Ŋaablà na tɔ̀ tɔ̀ bɔrɔɔ è kòrò ɲan twɛ̀ɛ ka, è bà na e tsiìŋnà à faa rà. Àwà, ye rìì to bàu à wɔbaa rèè mòdzin ì suun, nìì reè na Ŋaablà tɔ waa, twɛy y'à gban gɔɔ ra, y'à vu.
24 Ŋà, Ŋaablà y'a fau è sèè kpunan, è bo saàn byɛnbee ɲàn. Tɔ fau, kàtsu saàn fa ni dzi à mà ɲinan to e raa dzia doùn waa.
25 Tà doùn, màsà kpiri Dawudà na wò rii gooma deò dan e re Kìtaabuà doùn nèe tsuru ci:
Kudɛyn, mun jaa na ni mùn Tsìfaà rà n biìn.
À ni mun tɛyn, è bà wɔɔ̀ mun na, sànko
ge mà mun bo n shɔùn waa.
26 Tɔ̀ rii y'à to, mun taama dzi,
mun goomakɔɔn sapɛ yeè bà taamadzibe vu bokɔɔn.
Mun ɲɛɔ̀n à ra, ci arì mun saàn shɔ̀ùn,
mun màà nà bà ni jaancin na.
27 Mun ɲɛɔ̀n tɔ̀ ra, kàtsu,
wo na naà mun to fùn nèè fi waa.
Ɔ̀ɔɔn, wo na naà à to wo re mòdzìn fɛnɛɛ
yè fyee kɔ̀ɔ̀ doùn waa.
28 Àwà, shi niì bèe jaamabee rà, wo tɔ̀ kpàdèu mun na.
Wo nà bà ni mun ka nìi fa,
tɔ nà mun ɲantsyɛn taamadzibeè rà.»
29 Tà shɔ̀ùn, Piyɛrì yè sɔn ba e re goomaa tɛ̀y kɔn ci: «N neema ì, y'a to min gooma soo de fyɛ e ra. Nìi ɲe re bɔɔ màsà kpiri Dawudà, tɔ saun, à fun yè wɔ. Arì she, à kɔ̀ɔ̀ sa ni mùn ne mìin ŋe.
30 Màsà kpiri Dawudà bàu Ŋaablà re kɛɛra. À na à tɔ̀ sa, ci Ŋaabla làyiri seòn wò re nìi doùn à ci, sii sɔn see, wo nà à tsua dziàn sɔn tsuù à shɔ̀ùn, à re màsà gbaaniɛn tsɛ.
31 Sani Ŋaablà Jaa ra Modzìàn yè san, è kòmànà sèè kpunan, Ŋaablà baraka rɔ̀n, màsà kpiri Dawudà na tɔ̀ tɔ tsùuŋnà nòn. Tɔ̀ rii y'à to, è bà na à deò nèe tsuru ci, Ŋaablà fa à to, è to fùn nèè fi waa. Tà ko, à fa à to è fyee kɔ̀ɔ̀ doùn mɔn waa.
32 Nìi Yesù, Ŋaablà y'a sèè kpunan bou saàn ɲàn, mùn sapɛ tɔ̀ goò jàu e jaadzin fiɛ̀ ka.
33 È sèè è blà wɔ à ɲan, à y'à tsùù e sirama si jaa rè. Yesù na Dzi Fɛnɛɛ riì làyiri seòn ɲe re, à fà Ŋaabla tɔ̀ sìun à ra. Àwà, à sa tɔ̀ Dzia rìì jàaŋnà ɲe tsɛ. Ye jaa yɛ nìi rà, ye yè bà à myɛ̀ɛn, tɔ tɔ̀ Dzia tàànmàshɛɛn nì.
34 Nìi màsà kpiri Dawudà yɛ̀r'la, à na teyn be ŋaablaxɔɔ̀ doùn dɛ, ŋà, à dziun nèe tsuru ci:
Mùn Tsìfa Ŋaabla dziun mun Tsìfaà rà ci:
Nà a tsuù n sirama si jaa rè,
35 fɔ min b'a ɲan rèè sapɛ wɔ a san dzuun.»
36 Piyɛrì yè geren goomaa ka kɔn ci: «Tà doùn, ye dzyèèsìbee mòdzin neè sapɛ wù y'a tɔ̀, ye yè ɲɛn à ra cɛyn, ci ye tɔ̀ Yesù nìi gbaun gɔɔ̀ rà, Ŋaablà wò rii bou e Jaara Modzìn, à y'à bà Tsìfaà.»
37 Àwà, nìì reè na ni mɔn, tɔ̀ goomaa myɛ̀unmaà twɛy rè, è dɔ̀n è ɲàn fɔ è bè geren. Yè Piyɛrì ko kɛɛradzin dzyee reè tey tɔ̀un ci: «Mùn neema ì, ɲe nà fee rìì fa sa ?»
38 Piyɛrì yè dzin è ra ci: «Ye sèè bo e re gooɲaan neè kpɛyn, ye e re jaamabee fau'n kur'la lakere, y'a to yè e jaara foò Ŋaablà re shia goo rèè rà Ŋaablà Jaara Moo Yesù tsoò ka, e re gooɲaan tsìɛ̀ yè mɛɛy bo e ma. Tɔ̀ ye fa, Ŋaablà re Dzi Fɛnɛɛ nà jàà ye tsɛ,
39 kàtsu Ŋaabla tɔ̀ Dzia làyiri seun ye ko e re dziin nèè sa rii laa. À y'à seun sa gànè dàn gbààn dzian sapɛ re, mùn Tsìfa Ŋaabla nà twɛy nìi reè sapɛ kir'na e yɛr'la.»
40 Àwà, Piyɛrì yè gooma giri kpɛ̀rɛ̀kuru ì dè è ra, à nà dzi è dzuun nìi reè ka, è màxɔ̀n. Tà doùn, à ci: «Ye e san bo she raa mòdzin ɲan reè sààn, sànko ye tsi.»
41 Nìì reè na ni mɔn, twɛy giri yè e tsiì Piyɛrì rè goomaa nà, y'à to yè ye jaara foò Ŋaablà re shia goo rèè rà ko yuà ka. Tɔ̀ sii sèè, mòkun gbaa zhììgi rii yè e bau Yesù rè kàràndzin neè tɛ̀y.
Kàràndzin neè rè dzyèè
42 È sen tɔ̀ jisee rà, twɛy yè e jaa tsùù kɛɛradzin neè rè kàr'nà rè. Yè dzyèè, yè e re jaamabee faa esire, a ci tseyn ko tsìnà tsuru. È bur'la tan'nà e ko e si fi, a ci Yesù y'à dèu nìi tsuru, yè bà Ŋaablà mafyɛ̀ɛn esire.
43 Mòdzian sapɛ ɲɛyn na shɛɔn Ŋaablà jɔɔn, kàtsu kɛɛradzin neè na kabagoo goo giri ko goo blà bla giri faa Ŋaablà baraka rɔ̀n.
44 Yesù rè kàràndzin neè sapɛ na byɛɔ̀n soo ma, yè e suun ge reè bà e si raa, y'à tan'nà e si fi.
45 È sa na e suun ge reè seen, à bàu gè o ge rìì, y'à gɔɔ, y'à ɲɛɛn tanan e si ra, è sa ŋoòma tsyeè raa.
46 È sapɛ na byɛɔ̀n à mà, yè e si ladzyee sii sa see Ŋaablà re gbà blàa rà. È na bèe e si re tsii, bur'la yè tɔ̀ tanan e si ra, a ci Yesù y'à deò nìi tsuru, yè ɲwɛyn fa e si re taamadzibe ko duun fyɛ ka.
47 Kudɛyn, è na tsoo dzi ɲɛɛn Ŋaablà tsɛ, è goo to na dzi mòdzian sapɛ ra. Sii sa see, Tsìfaà na mòdzin tsiuma rèè bàa è kur'la tɛ̀y.