Yesù yè e yɛrɛ kpadèu e re kàràndzin neè ɲɛ̀ɛ̀nun na min niì
21
1 Àyìwà tà shɔ̀ùn, Yesù yè nà e yɛrɛ kpadè kɔn e re kàràndzin neè ɲɛ̀ɛ̀nun na, Tsibɛriyadzì yu blàa dzii ra. È yɛrɛ kpadèu è ra nìi tsuru, tɔ̀ rii siin.
2 Shimɔn Piyɛrì tà ko Tomà, tɔ̀ niì kir'là fìrìkàmaa ko Natanayɛlì è bo Kanà wɔ̀ rɔ̀n, Galile mar'la ɲàn, ko Zhebede raa dzin kpir'leè ko kàràndzin fii kpɛ̀rɛ̀kuru ì twɛy sapɛ na ni esire.
3 Shimɔn Piyɛrì yè dzin è ra ci: «Mun bèe ji kunma.»
Yè dzin à ra ci: «Ɲe sa nà bè wo ka.»
Àwà, yè bo tɔ̀ rii ɲàn, yè bè dɔ̀n konkor'na doùn. Yè tɔ̀ feèn ko e kur'la sapɛ fa yɔ̀ maa rà, è na ji pɛn kun waa.
4 Àwà, jià seey naumaà, kàràndzin neè yè Yesù tsìiŋma jà yu blàa dzii ra, ŋà, è pɛn naà à tɔ̀, ci à wò rii waa.
5 Yesù yè e vu bo è ra, è dzin è ra tɔ̀un ci: «N dzunwɛynsi ì, jià sɔn kuunma ni ye re o ?»
Kàràndzin neè ci: «Ɔ̀ɔɔn.»
6 È dzin è ra tɔ̀un ci: «Ye yɔ̀ɔ̀ maa be konkor'na sirama sijaa rè kèrè, ye nà sɔn tarà mɔn.»
Àwà, yè yɔ̀ɔ̀ maa mɔn tɔ̀un. Yɔ̀ɔ̀ maaŋmaà mɔn, yè ji giri kun, fɔ yè bè yɔ̀ɔ̀ sɔ̀ɔ̀n bo gba tsuù yu rɔ̀n.
7 Tà doùn, kàràndzin niì goo na dzi Yesù rà, tɔ̀ yeè dzin Piyɛr'là ci: «Piyɛrì, à Tsìfaà rìì !»
Shimɔn Piyɛrì dziu à myɛ̀n min niì, ci à Tsìfaà rìì, à na e re mɛ̀yɛɛ bo jiɔ̀ nìi fa è to e ma xɔ ra, à y'à sen ji e ma, è ɲanshì. À tɔ̀ fau min niì, è tsyɛn ji yu rɔ̀n, è dɔ̀n be.
8 Kàràndzìn dzyee reè, twɛy yè nà konkor'na ka, yè bà yɔ̀ɔ̀ sɔ̀ɔ̀n naà, tɔ tsyɛɔ̀n jià rà. È ko kpee fia naà gbàn geren waa, à na kòn jaa dzyèè tsyeùn tsuru.
9 È bou kpee rà min niì, yè sàtsiin ja, ji ni tà tsɛ, yè buru sa tsuuŋma jà.
10 Yesù yè dzin è ra ci: «Ye yɛ ji nìì reè kuɔn, ye twɛy swey sen na.»
11 Shimɔn Piyɛrì yè bo tɔ̀un yu rɔ̀n, è yɔ̀ɔ̀ sɔ̀ɔ̀n bo ji kpee rà. À na tsyɛɔ̀n ji blà bla caànmoò ko dzyèè tsyeùn ko dzin zhììgi rii là. Ji rèè giribee ko e raà sa, yɔ̀ɔ̀ na vyɛ waa.
12 Yesù yè dzin è ra ci: «Ye nà ɲwɛɛ̀n ɲɔn.»
Kàràndzin neè sɔn yeè bà ni à tey, ci wo tsì rii, è pɛn na dzi tɔ̀ fa waa. È na à tɔ̀, ci à Tsìfaà rìì.
13 Yesù yè e kpɛrɛ̀ tɔ̀un, è bur'la sen, à tanan è ra, è tɔ̀ soo fa jià sa ka.
14 Yesù sèè kpunaumaà shɔ̀ùn è bo saàn ɲàn, è yɛrɛ kpadè e re kàràndzin neè rà, tɔ̀ na à jaa zhiigira rii.
Yesù Shimɔn Piyɛrì teron min niì fɔ jaa zhììgi, è ba wo kɛ̀niɔ̀n
15 Ayìwà, è nàu ɲwɛɛ̀n ɲɔn dò watsi riì bwèy, Yesù yè Shimɔn Piyɛrì tey ci: «Yùxanà dzin kpiri Shimɔ̀n, nèe rèè mun kɛ̀niɔ̀n nìi tsuru, wo mun kɛ̀niɔ̀n è geren tɔ̀ tsɛ ɔ ?»
Piyɛrì yè dzin à ra ci: «Ɔ̀ɔn kɛ̀ Tsìfaà, wo yɛ̀r'la y'à tɔ̀, ci wo goò dzi mun na.»
Yesù yè dzin à ra ci: «Ta doùn, n ne sààdzin neè kɔ̀ ɲwɛyn.»
16 Yesù y'à tey e jaa fiira ɲan kɔn ci: «Yùxanà dzin kpiri Shimɔ̀n, wo mun kɛ̀niunà ɔ̀n ?»
Piyɛrì yè dzin à ra ci: «Kɔsɔbɛ kɛ Tsìfaà, w'a tɔ̀ ci wo goò dzi mun na»
Yesù yè dzin à ra ci: «Tà doùn, bà n ne sàà rèè kààwɔbaa.»
17 Yesù y'à tey e jaa zhiigira ɲan kɔn ci: «Yùxanà dzin kpiri Shimɔ̀n, mun goò dzi wo ra ɔ ?»
Tɔ̀ goò yè Piyɛrì taama ŋununbe, kàtsu, tɔ̀ na à jaa zhiigiraa rìì, Yesù y'à teè ci: «Mun goò dzi wo ra ɔ ?»
Piyɛrì yè dzin à ra ci: «Tsìfaà, wo y'à sapɛ jaa tɔ̀. Wo y'à tɔ̀ cɔ, ci wo goò dzi mun na.»
Yesù yè dzin à ra ci: «Ta doùn, n ne sàà rèè kɔ̀ ɲwɛyn.
18 Sààben fyan, mun nì ci a ra, wo dzunwɛynkɔɔn nà, wo na a re ɲànshìàgee shìa a yɛrɛ, min niì ye wo dzibe, wo yè bè mɔn. Ŋà, wo ye na bɔɔ, wo nà a si rèè ɲansen, mòò kpɛrɛ yè wo re ɲànshìàgee shì wo re, è bè wo ka gàne ɲan, wo sàò na ni wo yè bè min niì waa.»
19 Piyɛrì na nà san saun'n kur'liì rà, tɔ̀ yeè blàbe ɲɛn Ŋaablà tsɛ, Yesù nèe gooma ree dèu, è ɲɛn tɔ̀ rii tsɛ. Tɔ̀ dèumaà shɔ̀ùn Yesù rè, è dzin Piyɛr'là ci: «A gban n kpɛyn !»
20 À yè è to tɔ̀ goomaa nà, kàràndzin niì goo na dzi Yesù rà, Piyɛrì yè e jaa kere, è tɔ̀ nàkɔɔn ja è kpɛyn. Tɔ̀ kàràndzian nì na e kanma beò Yesù ɲìɛ̀ kpàkèrè ɲwɛyn ɲɔnma nɔ̀n, à y'à tey ci: «Tsìfaà, tsì rii wo jàànfabaà ?»
21 Àwà, Piyɛrì y'à jàu tɔ̀un, è Yesù tey ci: «Tsìfaà, nèe do, fee nà tɔ̀ tàrà ?»
22 Yesù yè dzin à ra ci: «Min ba n'a re è to tsùù, è bè suu fɔ mun sèè naà dzu, wo re fee ni tɔ̀ ɲan ? Nìi kpɛ̀yn wo, a gban n kpɛyn.»
23 Tɔ̀ gooma nì kamà, kàràndzin neè yè dziàn e si ra ci tɔ̀ kàràndzian fa san waa. Tà to y'à tàrà, Yesù naà dziɔn Piyɛr'là ci tɔ̀ kàràndzian fa san dɛ, ŋà, à dziun ni ci: «Min ba n'a re è to tsùù, è bè suu fɔ mun sèè naà dzu, wo re fee ni tɔ̀ ɲan ?»
24 Tɔ̀ kàràndzin soo rìì twɛy goo rèè shɛɛrɛbe faa, wò rii to yè sɛbɛɔ̀n. Ɲe sa y'a tɔ̀, ci à re shɛɛrɛbee sààben.
25 Yesù goo giri kpɛ̀rɛ̀kuru ì sa fau. A sapɛ ye ba na lakɛɛ soo soo, sɛbɛn niì na nà fa à tsɛ, mun jaa ra, à fa dɔ̀n dziɲaan doùn waa.