Luc 1

Kùnàgoo Dziɔ̀,

Lukì raa lakɛrɔ̀ùn'n kur'la mà

Lukì rè kìtaabuà sɛbɛn kuàn

1-3 Mòdzìn sɔbɛn Tèwofilì, Ŋaabla goo niì reè fau ɲe re mìin, à goo rèè fau mòò giri jaa ra, è sen fɔ à dzun jɔn bwey rɔ̀n. Nìì reè bàu à goo rèè shɛɛrɛ, Ŋaablà re goomaa jaa dèè yè bà ni twɛy suun, twɛy y'à lakɛrɔun mùn na. Y'à lakɛrɔun mùn na nìi tsuru, mòò giri sɛbɛn faunà à tsɛ tà tsuru nòn. Tɔ̀ rii y'à to, twɛy goo nìì reè fau, è sen fɔ à dzun jɔn bwey rɔ̀n, mun sa twɛy jaa taki takì gaaŋnà. Mun to y'à jaɔ̀, ci à wù, mun y'à jaa dè wo ra mòdzìn sɔbɛn Tèwofilì, è bà sɛbɛn gbaɔn e si ra.

4 A jà mun tɔ̀ faa, mun sào ni à re, wo y'à tɔ̀, ci twɛy goo nìì reè kàraun wo ra, ci à sààben taki rii.

Mɛ̀rɛ̀kɛɛ̀ mòdzìn jààràfoobaa Yùxanà kere goo dèu min niì

5 A goo rèè dzii kuàn watsi riì bwèy, Erodzì rìì na ni Yude mar'la màsàbee tsɛ. Tà watsi rɔn, saaka goojaabobaa sɔn na ni, ci Jakàrìya. À na Arunà raa tsua mòdzian sɔn, nìi saaka goojaa bo reè kùntsii blàa. A na saaka goojaa bo kur'lìi mòdzin, tɔ̀ na kir'là Abiyà raa kur'la. A re tààn tsoo na ci Elizabɛtsì. Elizabɛtsì, tɔ̀ yeè bà na Arunà raa tsua mòdzian sɔn.

6 Jakàrìya, ko e re tààn Elizabɛtsì, è fiɛ̀ sa na tereòn Ŋaablà jaa ra. E na mùn Tsìfaà dzugooma xɔu rèè ko à ree shi kpadèunma rèè sapɛ shi jiɛ, arì jààma kiɲaanin naà ni è ra waa.

7 Dzin naà ni è re waa, kàtsu Elizabɛtsì naà dzin ker'là waa. Tɔ̀ nìn yè bo à ra, à ko e re kpir'la sa na bɔrɔɔ nòn.

8 Sii sɔn see, Jakàrìya na ni e re faagoò rà Ŋaablà re, nìi saaka goojaaboo. A na ni tɔ̀ ra, kàtsu faagoò dzii na suuŋnà à ko e raa saaka goojaa bo kur'là rìì là.

9 E bè saaka goojaa bo reè rè làndà shia tsɛ, wò rii na boo, ci è dɔ̀n Ŋaablà re gbà blàa doùn, è bè wushunaà wɔ gàne fɛnɛɛ doùn.

10 Jakàrìya ni wushuna wɔɔ rà watsi riì bwèy, tɔ̀ y'a tàrà, jàmaà sapɛ tsìiŋnà da rɔ̀n, yè bà Ŋaablà mafyɛ̀ɛn.

11 Tɔ̀un, Jakàrìya ni mɔn, mùn Tsìfaà rè mɛ̀rɛ̀kɛ sɔn yeè nà e yɛrɛ kpadè à ra. Wushunaà wɔɔ̀ gè nìi tsɛ, mɛ̀rɛ̀kɛɛ̀ na tsìiŋnà tɔ̀ sirama si jaa rìì lè.

12 Jakàrìya mɛ̀rɛ̀kɛɛ̀ jàu min niì, à akir'là na tsuù waa, shiɲaanbe y'à kun.

13 Tɔ̀ ɲan, mɛ̀rɛ̀kɛɛ̀ yè dzin à ra ci:

«Maà shi waa, Jakàrìya. Ŋaablà wo re màfyɛɛ̀n myɛ̀un. Wo re tààn Elizabɛtsì nà dzin kpiri soo kere wo re. A naà à tsoo wɔ ci Yùxanà.

14 Dziin nèe goò nà bà taama dzibe brìsi rìì wo re, mòò giri sa taama to nà dzibe à kere goo rà.

15 A nà bà mùn Tsìfaà rè mòdzin bla rii. À fa bà dɔ̀ɔ̀ mìan kuraa, yè nà dzin mììn ge ɲaùn kpɛrɛ. Ŋaablà re Dzi Fɛnɛɛ nà dɔ̀n ji à ɲan, fɔ à kere bwèy rɔ̀n.

16 A nà à fa Isirayɛlì mòdzin neè giri yè sèè na e Tsifa Ŋaablà kpɛyn.

17 A nà nà, è nà Ŋaablà jɔɔn lamɔ̀nɔ̀n tsùù. Ŋaablà re Dzia fàan yè bà ni à ɲan, jàci Ŋaablà re kɛɛra Aliì raà tsuru, è dzin ko fà kpɛ̀rɛ̀ e si ra. Nìì reè yè e nɔɔ̀n Ŋaablà re, è twɛy sa duungoo lakere, yè akiri tàrà mòdzin tereonma rèè tsuru. Tà tsuru, à nà mòdzin ì màbyɛ̀n tsùù mùn Tsìfaà jɔɔn.»

18 Awà, mɛ̀rɛ̀kɛɛ̀ tà goomaa dè dòu min niì, Jakàrìya y'a tey ci: «Mun to nà à tɔ̀ fee rìì là, ci à sààben ? Mun bɔrɔɔ nòn, mun ne tààn sìà sa to wɔɔ sɔn ma.»

19 Mɛ̀rɛ̀kɛɛ̀ yè dzin Jakàrìya ra ci: «Mun nì Jìbirì. Mun nì ni Ŋaablà tɛyn, min bà à re goo rèè shi jiɛ. Wò rii mun ka naɔ̀, ci min nà gooma wo ka, min nèe kùnàgoo dziu rèe dè wo ra.

20 Wo to na ɲɛn niì fa mun dzugoomaa nà waa, wo nà bà bobo. Wo fa dzi gooma dɛ, fɔ jisee riì, mun yɛ nìi dèu wo ra dòònen ɲan tɔ̀ nà bo e shi tsɛ. A goo rèè to fa e fa watsia to waa.»

21 Tɔ̀ sapɛ ɲan, jàmaà tsìiŋnà da rɔn, è Jakàrìya mashua. Jakàrìya na ciɔ̀n nìi fa Ŋaablà re gbà blàa doùn, tɔ̀ na è duungoo doonà.

22 Jakàrìya nàu bo watsi riì bwèy, à na dzi gooma è ka waa. Awà, twɛy sa y'a tɔ̀ tɔ̀un, ci à goò sɔn ni jaɔ̀ gbà blàa doùn mɔn. A na e duùn naà dèe è ra ko e si rèè rìì ka sa, à bàu bobo.

23 Watsi riì na ni Jakàrìya re, à y'à fa faagoò rà Ŋaablà re gbà blàa doùn, tɔ nàu tsyɛn, è kpɛyn sèè e re tsii.

24 Ayìwà, twɛy goo rèè shɔ̀ùn, à na cin waa, à re tààn Elizabɛtsì yè bà fwɛynma. A yè e san nà kpɛ̀rɛ̀ tɔ̀un è bè tàrà fɔ kuu nùn. A ci:

25 «Nèe mùn Tsìfaà rìì lè faagoo. Dzin kere bɛybee see na nìi boò mun tsɛ mòdzian jaa ra, à yɛ tɔ̀ rii jaɔ̀ nèe dòònun, è fɛɛ wɔ à ra.»

Mɛ̀rɛ̀kɛɛ̀ Yesù kere goo dèu min niì

26 Ayìwà, Elizabɛtsì doòn kuu tsùnmɛ̀naa, Ŋaablà yeè mɛ̀rɛ̀kɛ Jìbirì ka bè Galile mar'la wɔ̀ sɔn ɲan, ci Nazarɛtsì.

27 Ci è bè canguru sɔn ne, nìi ma kuɔn kpiri sɔn ne, ci Yusufù. Yusufù, tɔ̀ yeè bà na màsà kpiri Dawudà raa tsua mòdzian sɔn. Cangur'la tsoo na Mariyamùn.

28 Tɔ̀un, mɛ̀rɛ̀kɛɛ̀ bèu wɔ Mariyamùn tsɛ, è dzin à ra ci: «Mariyamùn, a ko à taama dzibe. Mùn Tsìfa Ŋaabla ni wo re. A re dzwɛ ni wo kpɛyn, fɔ è bè geren.»

29 Mariyamùn, twɛy gooma reè myɛ̀un mɛ̀rɛ̀kɛɛ̀ dzu min niì, à akiri na tsuù kuraa. E yɛrɛ tey tɔ̀ rii ɲàn, ci nèe tswɛ̀y ree dzuɔn to yè bà fee ?

30 Tɔ̀un, mɛ̀rɛ̀kɛɛ̀ yè dzin à ra ci: «Mariyamùn, maà shi waa ! Ŋaabla wo kɛ̀niɔ̀n kɛ̀n'n kur'la nìi na ni à ci dzyee rèè waa.

31 Wo nà don sen, wo yè dzin kpiri soo kere. È kere, a tsoo wɔ, ci Yesù.

32 A tsoò nà blàbe, è bà kir'là Jìran nɔ̀n Ŋaablàa Dzin Kpir'la. Mùn Tsìfa Ŋaablà nà Dziin nèe bà màsa, jàci, à fàbɔɔ Dawudà na ni nìi tsuru.

33 A nà màsàbee fa Yàkubà tsua dzin nèè tsɛ kudɛyn. Dò fa bà ni à re màsàbee mà waa.»

34 Mariyamùn yè mɛ̀rɛ̀kɛɛ̀ tey ci: «Tɔ nà fa dzùrù ? Mun na kpiri goo tɔ jà ŋe waa.»

35 Mɛ̀rɛ̀kɛɛ̀ ci: «Jìran nɔ̀n Ŋaablàa rè Dzi Fɛnɛɛ nà nà jàà wo tsɛ, Dzi ree yè wo kuu jàci cin. Tɔ̀ rii y'à to, wo nà tɔ̀ dzin nìi kere, à nà bà mòdzin fɛnɛ, è bà kir'là, ci Ŋaablà Dzin Kpir'la.

36 Awà, nìi wo neema taan Elizabɛtsì, à bɔrɔumaà ko e raà sa, don ni tɔ̀ sa ɲan, nìi nà bà dzin kpiri. E na dziàn, ci à na naà dzi dzin kere waa. Dòònun, à doòn kuu tsunmɛna ni yɛ nèe.

37 Ŋaablà na gbaa goo sɔn pɛn na waa.»

38 Mariyamùn yè dzin tɔ̀ ɲan ci: «Mun ni Tsìfaà rè goo rèè rìì ɲan tsuù ɲàn. Ŋaa y'à fa n ne, jàci wo yɛ à dèu mun na nìi tsuru.» Tà shɔ̀ùn, mɛ̀rɛ̀kɛɛ̀ yè bo Mariyamùn tɛyn, è dɔ̀n be.

Mariyamùn bèu bo Elizabɛtsì kpà min niì

39 Ayìwà, tɔ̀ bwèy fii rɔ̀n ko e sa, Mariyamùn yè fù, è shia kun è tabe be Yude mar'la jèn gane reè wɔ̀ sɔn ɲan.

40 A bèu wɔ mɔn, è bè dɔ̀n Jakàrìya re gbàà doùn, è neema taan Elizabɛtsì tswà.

41 Awà, Elizabɛtsì Mariyamùn tswɛ̀y fà vuà myɛ̀un nìi tsuru, Elizabɛtsì dziàn yè e ɲankwey à duùn. Ŋaablà re Dzi Fɛnɛɛ yè nà jàà Elizabɛtsì tsɛ.

42 Tɔ̀un, è vu bo fààn na ci:

«Ŋaablà dzwɛ kuun wo mà, è geren tààn dzyee reè sapɛ tsɛ. Wo to nà dzin nìi kere, à re dzwɛ ni tɔ̀ sa kpɛyn !

43 Mun tsì rii tɔ̀ tsuru sa, mun Tsìfaà yɛ̀r'la naà yè bà naɔ̀ bo mun kpà ?

44 Wo na jarà ɔ̀, fɔ mun dziu wo tswɛ̀y fa vuà myɛ̀n min niì, mun ne dziɛ̀n taama dzibekɔɔn yeè e ɲankwey mun duùn.

45 Mariyamùn, dzwɛ ni wo kpɛyn. Dzwɛ ni wo kpɛyn, kàtsu Tsìfa Ŋaablà re gooma niì nàu dè wo ra, wo ɲɛun à ra, ci tɔ nà bo e shi tsɛ !»

Mariyamùn tsoo dzi ɲɛun Ŋaablà tsɛ ye niì ka

46 Ayìwà, Mariyamù yè dzin tɔ̀ rii ɲàn ci:

«Mùn Tsìfa Ŋaablà blabee nìi boò,

mun tsoo dzi ɲɛɛn à tsɛ, è ɲɛn tɔ̀ tsɛ.

47 Mun duùnà dzibeuma brìsi rìì to ni,

à saabuà yè bà mun tsibaa Ŋaablà.

48 A bàu à sào è re jòn taan mà jàaŋmaà siin e jaa dzuun,

nìi yɛ a ci mun.

Awà, è sen dòònun nà, watsia sapɛ modzin nà dziàn,

ci Ŋaabla dzwɛ kuun mun mà.

49 Tɔ nà dè, kàtsu, Dzitsi Ŋaabla goo blà bla ì fau mun ne.

A fɛnɛɔ̀.

50 Watsia sapɛ doùn, nìì reè rè blàbe ni Ŋaablà tsɛ,

à màtsur'la twɛy rà.

51 A dzi ra goo ì fau ko e faan sapɛ ka.

Nìì reè kɛ̀sɛmàà beò yɛ̀rɛ̀ blàbeè tsɛ, è twɛy jee.

52 A màsa ì jàà bou e re màsà gbaaniin neè tsɛ,

è mòdzin ma jàaŋma rèè ɲansen.

53 A gè wùù giri sìun dzukɔɔn reè rà,

fɔ twɛy jaa yè bè cɛn.

Gètsi rèè, è twɛy si xɔma baji be.

54-55 A wɔu Isirayɛlì mòdzin neè rà,

nìì reè goo faa à re.

A na e taa myɛn à kpàdè kuraa, ci wo màtsur'la Ibraximà,

ko e tsua dzin nèè rà kudɛyn,

jàci à y'à làyiri seun ɲe fàbɔɔ bɔɔ rèè rè nìi tsuru.»

56 Mariyamùn yè to Elizabɛtsì kpà mɔn, è bè tàrà fɔ kuu zhììgi tsuru, è kòmànà sèè be e re tsii.

Mòdzìn jààràfoobaa Yùxanà kere goo

57 Ayìwà, Elizabɛtsì kere watsi nàu wɔ, dziɛ̀n yè bà dzin kpiri.

58 Tà goo blàa y'à kpàdèu Elizabɛtsì rà, ci mùn Tsìfa Ŋaabla wù à ka. Tɔ̀un, Elizabɛtsì tsùùsi rèè, ko à nèèma reè dziu tɔ̀ myɛ̀n min niì, yè e ba à tɛ̀y y'à taama dzibe fa.

59 Dziɛ̀n kereomaà nàu bwèy ŋaalòn tsyɛn watsi riì bwèy, yè nà, ci ye nàa à shɛn. E sàò na ni y'à tsoò wɔ, è bà e faà tsooma, ci Jakàrìya.

60 A naà yè dzin tɔ̀ rii ɲàn ci: «Ɔ̀ɔɔn, mùn nà à tsoo wɔ, ci Yùxanà.»

61 Yè dzin à ra ci: «Mòò pɛn to na ni wo re mòdzìnbee ɲàn, tà tsoò ni nìi rà do !»

62 Yè fàmaa tey tɔ̀un bobo goòmàà ɲàn, ci à sàò ni y'à dziàn tsoo wɔ dzùrù.

63 Awà, Jakàrìya yeè dzin è ra bobo goòmàà ɲàn, ci yè nà sɛbɛn faa wàla ka wò kɔ̀. E nàu wàlaà ka, Jakàrìya y'a sɛbɛn à tsɛ nèe tsuru ci: «A tsoo rìì ci Yùxanà.» E ji è sapɛ dzii tsɛ.

64 Tà nɔ̀nkɔɔrɔn ko e sa, Jakàrìya dziɛ̀ yè foro, è dzi gooma e shɔùn. Tɔ̀un, è maa è tsoo dzi ɲɛɛn Ŋaablà tsɛ.

65 Tà goò faumaà yè è tsùùsi rèè sapɛ shi. Tɔ̀un, mòdzian y'à goò lakɛɛy beè e si ra Yude mar'la jèn gàne reè sapɛ ɲan.

66 Mòò o moò toro ye ji à goomaa ɲàn, tɔ̀ yeè e maa à kɛ̀sɛɛ̀, è dziàn e duùn ci: «Nèe dziin nèe yè bà nà bà fee ?» Awà, è sapɛ jaa na ni à ra, ci mùn Tsìfa Ŋaablà rii tsìiŋnà à ka.

67 Ayìwà, Ŋaablà re Dzi Fɛnɛɛ yè nà jàà dziɛ̀n fà Jakàrìya tsɛ. Tɔ̀un, Ŋaablà yeè e re gooma ì wɔ Jakàrìya dzu ci:

68 «Tsoo dzi wù è ɲɛn mùn Tsìfa Ŋaablà tsɛ,

nìi Isirayɛlì Ŋaablà.

A wù tɔ̀ yeè fa, kàtsu à nàu wɔ e re mòò rèè rà, è tsi.

69 A ɲe kɔ̀u e tsibaa barakama na,

nìi Ŋaablà re faagoofadzin màsà kpiri Dawudà raa tsua mòdzian sɔn.

70 Fɔ jisee gbaan, à na tɔ̀ rii dèunà,

è bo à re kɛɛra fɛnɛ reè dzu.

71 A na à làyiri seunà, è bo twɛy kɛɛra reè dzu,

ci wo nà ɲe tsi bo e ɲan rèè suun.

Ɲe goo to xɔ nìì reè mà, è ɲe tsi twɛy raa fàan sa ra.

72 A y'à kpàdèu ɲe fàbɔɔ bɔɔ rèè rà,

ci wo màtsur'la è ra, à to na e taa myɛn à re waa,

ci wo tsììn min tsuru dzyèèsìbe wɔɔ è ka.

73 A na tà goò kɛ̀ɛ̀ rìì faɔ̀ ɲe fàbɔɔ Ibraximà rè.

74 À ci wo nà ɲe tsi bo e ɲan rèè suun.

Tà tsuru, ɲe nà dzi goo fa wò Ŋaablà re, ɲe fa bà shiɔ̀ waa.

75 Tà doùn, ɲe re sii sa see jaamabee doùn,

ɲe nà bà fɛnɛunà, ɲe yè bà tereonà à jaa ra.»

76 Tà shɔ̀ùn, Jakàrìya ci kɔn:

«Nìi to wo, mun dzin kpir'la, wo nà kiri,

ci Jìran nɔ̀n Ŋaablàa rè kɛɛraa.

Tɔ nà fa, kàtsu wo nà a ji mùn Tsìfa Ŋaablà jɔɔn,

wo y'à dɔ̀n shià lamɔnɔ̀n tsùù.

77 Tà tsuru à re mòò rèè n'à tɔ̀, ci à nà ye tsi,

è ye re gooɲaan tsiɛ̀ mɛɛy bo ye mà.

78 Awà, ɲe re Ŋaabla ni nìi tsuru,

à màtsur'la, wùù yeè bà ni à ɲan, fɔ è bè geren.

Tɔ̀ rii kamà, à nà vyevyee sìn ɲe ra, è bo jiran nɔ̀n,

à ci gbishɛɛ̀mà nɔ̀n bwèè boò nìi tsuru.

79 Tɔ nà fa, sànko nìì reè ni tsitsii rɔ̀n,

ko nìì reè ni saàn shiɲaanbeè ɲàn, twɛy yè dzi jɛ̀y fa.

A nà ɲe jaa ji jaancian shia rà.»

80 Awà, dziɛ̀n yè bɔɔbèe tɔ̀un, à akir'là yè blàbe beè. Fur'lu, è nà bè to jènjàà kor'nà doùn, fɔ jisee riì à nàu e yɛrɛ kpadè Isirayɛlì mòdzin neè rà.