Luc 2

Yesù keremàà

1 Ayìwà, tɔ̀ watsi rɔn, màsa bla sɔn na ni Ɔ̀rɔ̀mùn jamaan ɲàn, è bà tsùuŋnà jàmàan giri kùùn. Tɔ̀ màsaa tsoo na ci Ogisì. Tɔ̀un, Ogisì yè dzin jàmaàn mòdzian sapɛ tsoo yè sɛbɛn, è dzii yè tɔ̀. 2 Tɔ̀ na tà goò fa jaa jɔ̀na nì. A goò faa watsi riì bwèy, tɔ̀ y'a tàrà Siiri jàmààntsià tsoo ci Kirinisì. 3 Tà tsoo sɛbɛɛn doùn, à na deò ci mòdzian sapɛ yeè bè e raa fa e fatsii doùn.

4 Tɔ̀ ɲan, Yusufù sa yeè bo Nazarɛtsì nìi Galile mar'la wɔ̀ɔ̀ sɔn, è bè Bɛtsilɛmùn, Yude mar'la ɲàn. Màsà kpiri Dawudà kereu tà wɔ̀ɔ̀ rìì ɲàn. Yusufù bèu mɔn, kàtsu à sa na Dawudà raa tsua mòdzian sɔn ni. 5 A bèkɔɔn, à ko e re mà kùn taan Mariyamùn yè bè e si re, yè bè e tsoò sɛbɛn. Tɔ̀ y'a tàrà doòn na ni Mariyamùn ɲàn. 6-7 E bèu wɔ mɔn Bɛtsilɛmùn, yè b'a jà ci tɔn'leè yè e jaa gbà nìi doùn, tɔ̀ gbàà ŋòoŋnà. Tɔ̀un, dzwɛkà rèè raa gàne rìi ni, yè bè mɔn. E bèu mɔn, Mariyamùn kere watsi yeè nà wɔ. Tɔ̀un, Mariyamùn yè e dzin jɔnaa kere, dzin kpiri. A kereu, è vya don sɔn minin minin à mà. Tɔ̀ y'a tàrà, shùkondo sɔn na ni tɔ̀ gàne rɔ̀n, è dzwɛkà rèè rè vun ɲɔnàmaà jia nìi doùn. Tɔ̀un, yè dziɛ̀n sen, yè bè à ɲɛn tɔ̀ shùkondoò doùn.

8 Ayìwà, sàà kplàtsuubaa swey na ni Bɛtsilɛmùn wɔ̀ɔ̀ joon nèè ɲàn, twɛy yè bà feèn faa mɔn, e re sàà rèè tɛyn, yè è kààwɔɔ̀. 9 Awà, tɔ̀ fen nɔ̀n, sàà kplàtsuu reè ni e re sàà rèè tɛyn, Ŋaablà re mɛ̀rɛ̀kɛ sɔn yeè e yɛrɛ kpadè è ra. Mùn Tsìfa Ŋaablà blabee yè è laguru ko vyevyee ka. Yè shi tɔ̀un, fɔ è bè geren.

10 Tɔ̀un, mɛ̀rɛ̀kɛɛ̀ yè dzin è ra ci: «E maà shi waa. Mun naɔ̀ kùnàgoo dziu rìì dè ye ra, nìi nà bà dzyèèsìbee mòdzian sapɛ taama dzibe goo. 11 Fen nèe ɲan, mòo kereo màsà kpiri Dawudà tà rɔ̀n, nìi ye tsibaà. Ŋaabla wò rii boo e jaara, è bà Tsìfaà. 12 Ye ye be tàànmàshɛn niì nà à to y'a tɔ̀, tɔ̀ rii siin: Dzwɛkà rèè rè vun ɲɔnàmaà jia gè riì doùn, ye nà bè dzinyɛy sɔn ɲɛunma jà tà doùn vya don sɔn minin miniɔ̀n à mà.»

13 Tɔ̀ nɔ̀nkɔɔ rɔn, mɛ̀rɛ̀kɛ rèè kuru brisi yè bo jìran nɔ̀n, yè nà e ba tɔ̀ mɛ̀rɛ̀kɛ soo tɛ̀y, yè e maa yè tsoo dzi ɲɛɛn Ŋaablà tsɛ nèe tsuru ci:

14 «Blàbee Ŋaablà rii laa, fɔ Ŋaablaxɔɔ̀ jìraàn doùn mɔn.

Nìì reè to ni dzɔ̀nxɔɔmaà tsɛ, twɛy yè bà à sàò rà modzìn ì,

à re jaancin yè bà ni twɛy tsɛ.»

15 Ayìwà, mɛ̀rɛ̀kɛ rèè tà goomaa dè dòu min niì, yè sèè e kpɛyn jìrànxɔɔ̀ doùn. Tɔ̀un, sàà kplàtsuu reè yè dzin e si ra ci: «Y'a to mùn y'a wa Bɛtsilɛmùn. Goo nìi faɔ̀, mùn Tsìfa Ŋaablà yeè bà à too ɲe y'à tɔ̀, è bo mɛ̀rɛ̀kɛɛ̀ ɲàn, fɔ ɲe yè tɔ̀ jà.» 16 Yè e tabe be tɔ̀un.

E bèu wɔ, yè Mariyamùn, ko Yusufù ko dzinyɛɛ̀ jà, dziɛ̀n ɲɛɔ̀n shùkondoò doùn. 17 Awà, sàà kplàtsuu rèè dzinyɛɛ̀ jàu min niì, mɛ̀rɛ̀kɛɛ̀ nìi dèu è ra à re goò ɲàn, yè e ji yè tɔ̀ lakɛɛ. 18 Gè o ge tà goomaa myɛ̀un sàà kplàtsuu reè dzu, à jiu è sapɛ dzii tsɛ. 19 Twɛy goo rèè pɛn naà boò Mariyamù duùn waa. Watsi giri à na e kɛsɛɛ̀ è ra. 20 Ayìwà, tà shɔ̀ùn sàà kplàtsuu reè yè e kpɛyn sèè. E bèkɔɔn, è nìi sapɛ myɛun, ko è nìi sapɛ jau, yè blàbe ko tsoo dzi ɲɛn beè Ŋaablà tsɛ twɛy goo rèè rà. E na tɔ̀ faa, kàtsu mɛ̀rɛ̀kɛɛ̀ y'à dèu è ra nìi tsuru, à sapɛ kuun tɔ̀ rii tsuru taki.

Yesù bèu kɛ̀ɛ̀yfa min niì Ŋaablà ma gbà blàa rà

21 Dziɛ̀n kereomaà nàu bwèy ŋaalòn tsyɛn, y'à shɛn. Tɔ̀un, y'à tsoo wɔ Yesù. Sani Mariyamùn yè doòn sen, mɛ̀rɛ̀kɛɛ̀ na tà tsoò rìì kpàdeò.

22 Awà, kɛɛra Musà rè sàrìyaa nìi kpàdeò, ci taàn kereomaà shɔ̀ùn à wù è watsi niì fa ker'lakɔɔn gbaà doùn, è kòmànà fɛnɛbe, Yusufù, ko Mariyamùn y'à to fɔ tɔ̀ watsia yè bè tsyɛn. Tɔ tsyɛun, yè kòmànà dziɛ̀n sen, yè dɔ̀n be à ka Yerusalɛmùn, yè b'a kɛ̀ɛ̀yfa mùn Tsìfa Ŋaablà mà, 23 kàtsu à sɛbɛɔn tɔ̀ re sàrìyaa doùn nèe tsuru ci:

«Dzin jɔna ge o ge, è ba dzin kpiri, tɔ wù è to Ŋaablà re e si.»

24 Awà, mùn Tsìfa Ŋaablà re sàrìyaa to y'à gaa ci nìi yè bo saaka, yè tɔ̀ sa bo, nìi yɛ: kerenaantsi fii, tàmafa màsàkèrè dzin fii.

25 Ayìwà, kpiri sɔn na ni Yerusalɛmùn yè bà à kir'là ci Simeyɔn. Tɔ̀ kpir'la na tereòn, è bà shia Ŋaablà jɔɔn. Ŋaablà na à làyiri seòn, ci wò Jaara Moo rìi nà Isirayɛlì mòdzin neè tsi, Simeyɔn na tɔ̀ rii màshua. Ŋaablà re Dzi Fɛnɛɛ na ni à ɲan. 26 Tɔ̀ Dzi Fɛnɛ ree rìì na à kpàdeò à ra, ci mùn Tsìfa Ŋaablà nà e Jaara Modzìn nìi ka na, ci à fa san fyeu, à mà bà tɔ̀ jaɔ̀ e jaa ra. 27 Awà, Ŋaablà re Dzia yè Simeyɔn jaa ji Ŋaablà re gbà blàa rà, è bè dɔ̀n à fɔɔn doùn. Sàrìyaa nìi kpàdeò, ci è fa, Yesù naà, ko à fàà yè nà dɔ̀n à ka Ŋaablà re gbà blàa fɔɔn doùn, ci ye nà tà shi jii à re. 28 E nàu dɔ̀n à ka min niì, Simeyɔn yeè Yesù tsi, à y'à kun e suun. Tɔ̀un, è tsoo dzi ɲɛn Ŋaablà tsɛ nèe tsuru ci:

29 «Ayìwà, mùn Tsìfaà, wo na làyir'lìi seòn,

dòònun à bou e shi tsɛ.

A dzia a re jòn kpir'là rè kɛ̀ɛ̀yfaa tsi dòònun,

à y'à waa xɛɛrɛ ra.

30 Wo ci nìi nà mòdzian tsi,

mun yɛ̀r'la jaadzin fiɛ̀ tɔ̀ jàu she.

31 Wo wò rii ka dziɲan mòdzian sapɛ jɔɔn wɔ tsùuŋnà.

32 À vyevyee rìì, nìi nà à to dziɲan tsiɛ mòdzian sapɛ yeè wo tɔ̀.

À baraka rɔ̀n, wo re mòò rèè nà tsoo dzi tarà nìi Isirayɛlì mòdzin neè.»

33 Simeyɔn na nìi sapɛ deè Yesù rè goò ɲàn, tɔ̀ na jiɔ̀ à fàà, ko à naà sa dzii tsɛ. 34 Tɔ̀un, Simeyɔn yeè dzwɛ ji è ra. Nìi Mariyamùn Yesù naà, è dzin tɔ̀ ra ci:

«Nèe dzin nìi yɛ nèe, Ŋaablà y'a boo, è bà saabu mòò giri yè mɛɛy, tà ko mòò giri yè fù Isirayɛlì mòdzian ɲàn. À nà bà Ŋaablà re tàànmàshɛn kpadeòma mòdzian nà, è fa e tsiì nìi rà waa. 35 Tɔ̀ tsuru mòò giri duungoo dzuun nà bo ji vyevyeè rà. Nìi wo Mariyamùn goò sɔn ɲiɲìnbe nà dɔ̀n wo ɲan, a ci kaa faa mùnùn gbaan ni ka wo vɔɔ̀.»

36 Awà, Ŋaablà re kɛɛra taan sɔn sa na ni mɔn, yè bà na tɔ̀ kir'là ci Anì. Awà, Anì naa fàà tsoo na ci Fanuyɛlì, nìi Asɛr'laa tsua mòdzian sɔn. Anì sìà na wɔɔ sɔn ma. Kpir'liì y'à cangurukɔɔn màgoo fau, à jii ɲɛɛ̀nun nì fau ko tɔ̀ ka. 37 Tà shɔ̀ùn, tɔ̀ kpir'la yè dò, à y'à to. Tɔ̀un, Anì yè to e soone, à sìà yè bè wɔ fɔ jii cɛɛ̀n ko dzin nààlen. Kudɛyn, à na ni Ŋaablà re gbà blàa fɔɔn doùn. Feèn ko bwèè sa, à na goo faa Ŋaablà re, nìi yɛ, à suàn wɔɔ̀, è bà Ŋaablà mafyɛ̀ɛn. 38 Awà, è Yusufù, ko Mariyamù, ko Yesù to Ŋaablà re gbà blàa doùn mɔn, tà watsi soo ɲàn, Anì sa yeè wɔ mɔn. A wɔu mɔn, è tswɛ̀y sin Ŋaablà ra. Tɔ̀un, nìì reè sapɛ taa na ni à mà, ci Ŋaabla nà Yerusalɛmunka reè tsi, è dziɛ̀n gooma de twɛy sapɛ ra.

39 Ayìwà, mùn Tsìfaà rè sàràyaa na nìi gaa ci è fa, Yesù ker'làgè rèè nàu tɔ̀ goo rèè shi jii do watsi riì bwèy, yè e kpɛyn sèè na e re Nazarɛtsì, Galile mar'la ɲàn. 40 Awà, dziɛ̀n yè bɔɔ bèe, à akir'là sa yeè bɔɔ bèe. Akiriblabe na ni à ɲàn, Ŋaablà taa yeè bà na ni tsuù à mà kudɛyn.

Yesù jii teeŋ fii, yè b'a ka Ŋaablà re gbà blàa doùn Yerusalɛmùn

41 Jii sapɛ è re sɛr'lìi na kir'là ci Geren n tsɛ, tɔ̀ watsi ye ba na wɔu, Yesù ker'là gè rèè na bèe à fa Yerusalɛmùn. 42 Yesù sìà nàu jii teeŋ fii tsyɛn jii riì rà, sɛr'là làndà shià jììŋ'n kùrù bɔrɔɔ tsɛ, à ker'làgè rèè yè fù, yè dɔ̀n be à ka Yerusalɛmùn.

43 Sɛr'là goo rèè nàu dò min niì, Yusufù, ko Mariyamùn yè fù, yè e re tsii shià kun. Jàa, Yesù tou è shɔ̀ùn Yerusalɛmùn, è na ɲan tɔ waa. 44 Ayìwà, y'à siɛ̀n, ci Yesù nà bà ni ye jìì fa si rèè ka nìi fa, yè geren jìɛ̀ rè tà tsuru, fɔ bwèy sɔn. Tɔ̀un, yè nà e maa, y'à gaa beè e neema reè, ko e tɔ si rèè fi. 45 È tɔ̀ sapɛ fau, è na à jà. À na na wùbe, yè e kpɛyn sèè, y'à gaa na, fɔ Yerusalɛmùn wɔ̀ɔ̀ doùn e shɔùn.

46 À gaakɔɔn bwèy zhììgìraa sii sèè, yè bè à jà Ŋaablà re gbà blàa fɔɔn doùn. À na tsuùŋnà sàrìyà kaamoo reè ka, è bà e toro wɔɔ̀ twɛy rè, è teè sa. 47 Gè o ge na ni mɔn yè bà e toro wɔɔ̀ à re, Yesù rè akiriblabeè, ko à re goomaa latsiu'n kur'la na jiɔ̀ twɛy sapɛ dzii tsɛ. 48 A ker'làgè rèè y'à jàu min niì, à goò yè ji twɛy sa dzii tsɛ. Namaa yè dzin à ra ci: «Mun dziàn, wo nèe fau ɲe ka feera  ? Mun ko wo fàà sa duungoo dooma nì na wo gaa beè.»

49 Yesù yè dzin è ra ci: «Feera, ye yè bà na mun gaa  ? Ye naà à tɔ̀ ci à wù min bà ni n faà rè goo rèè rìì là gbɛ  ?»

50 Awà, Yesù tɔ̀ dèu, è na dzi tɔ̀ dzuun taki tɔ à re waa. 51 Yesù yè fù è ka tɔ̀un, yè dɔ̀n na Nazarɛtsì. A re blàbe na ni è tsɛ. Twɛy goo rèè gè o ge na faa, à sapɛ na toò à naà duùn. 52 Awà, Yesù yè bɔɔ bèe, à akir'là yè blàbe beè, à goò dzi Ŋaablà ra, à goo yè bà dzi mòdzian nà.