Luc 3

Mòdzìn jààràfoobaa Yùxanà rè waajibia gooma reè

1 Ayìwà, màsa bla riì nàu tsùù Ɔ̀rɔ̀mùn jamaan kùùn tà shɔ̀ùn, è bà ni jàmaan giri kùùn, tɔ̀ màsaa tsoo na ci Tsibɛrì. Tsibɛrì raa màsàbee jii teeŋ nunaa nà, kpir'liì na Yude mar'la raa jàmààntsià, tɔ̀ tsoo na ci Pɔɔnsi Pilatsì, è ba ɔ̀rɔ̀mùka. Nìi Galile mar'la, tɔ̀ jàmààntsià tsoo na ci Erodzì. Màrà fii sɔn na ni, ci Ituri ko Tarakonitsì. Twɛy raa jàmààntsià tsoo na ci Fìlipù, è bà Erodzì raa tsìnà kpiri. Màr'lìi tsoo na ci Abilɛnì, tɔ̀ jàmààntsià tsoo na ci Lizaniyasì.

2 Nìì reè na saaka jɔɔndzin bla reè tɔ̀ bwèy, tɔ̀ na Anì, ko Kàyifè.

Awà, è Jakàrìya dzin kpiri Yùxanà to jènjàà kor'nà doùn, Ŋaablà re goomaa yè dzi à tsɛ.

3 Tɔ̀un, gàne nìì reè sapɛ ni Yuridɛn ba dziɛ wòòɲaan ɲàn, Yùxanà yè fù, è dɔ̀n beè twɛy ɲàn, è dzin bèe nèe tsuru ci: «Ye re jaamabee fau'n kur'la lakere, y'a to yè e jaara foò Ŋaablà re shia goo rèè rà, tɔ̀ ɲan Ŋaablà nà e re gooɲaantsiɛ mɛɛy bo e vu ra.»

4 Tɔ̀ tsuru Ŋaablà re kɛɛra Esayì na nìi sɛbɛɔ̀n e re kìtaabuà doùn, tɔ̀ yeè bo e shi tsɛ. A na à sɛbɛɔ̀n nèe tsuru ci:

«Mòdzin sɔn sɛɛ̀y vu boò jènjàà kor'nà doùn ci:

"Ye shia lamɔnɔ̀n tsùù mùn Tsìfa Ŋaablà re !

Ye shi ì lamɔnɔ̀n tsùù à re, yè bà tereòn cɛyn !

5 Kɔ̀ɔ̀jàà ganee sapɛ dzii mà yè sɛ̀rɛ̀nbe.

Jèn nèè ko tenteynii neè sapɛ yeè sara kòrò.

Shia nwɛynmà rèè sapɛ yeè teren.

Shi nɔɔ̀dzìì ɲaan neè sapɛ yeè lamɔnɔ̀n wùbe.

6 Tɔ̀un, Ŋaabla mùn tsià nìi tsur'li,

mòdzian sapɛ dzyeèma nà tɔ̀ jà."»

7 Tɔ̀un, mòdzian na nàa Yùxanà kpɛyn jàma brìsi brìsi, ci è ye jaara foò Ŋaablà re shia goo rèè rà. Yùxanà yè dziàn è ra ci:

«E fɔnfwɛyn kuru ì ! Tsì rii dziun ye ra, ci ye nà dzi e tsi Ŋaablà re vunun ta nàkɔɔn nà ?

8 Ye goo rìì fa, nìi nà à kpàdè, ci ye yè e re jaamabee fau'n kur'la lakereò. E maà à ji e duùn ye dzin, ci ye rìì Ibraximà tsua dzin jaawuen neè dɛ ! Awà, mun nì ci e ra, è ba tsu goo rìì, arì nèe kpàà ree reè, Ŋaabla dzia è lakere ba Ibraximà tsua dzin ì.

9 Nìi kpɛ̀yn flàa, tɔ̀ ɲansen ji tsuuŋmaà nì ni nòn, gɔ̀ɔ rèè jèè boò kamà fɔ e jiɛ̀ rà. Gɔ̀ɔ o gɔ̀ɔ na dzin wùù wɔɔ̀, è sapɛ nà jèè bo, yè maa sa rɔ̀n.»

10 Jàmaà yè Yùxanà tey tɔ̀ ɲan ci: «A to wù ɲe yè fee rìì fa sa ?»

11 E dzin è ra ci: «Mɛ̀yɛ̀ dzin fii ni wo mòò riì rè, pɛn na ni nìi rè, soo sìn tɔ̀ ra. Nwɛyn ɲɔnàma to ni wo mòò riì rè, pɛn na ni nìi rè, sɔn sin tɔ̀ ra.»

12 Tɔ̀ ɲan, kɔnsɔɔn tsi reè swey sa yeè nà, ci ye sa jaara yeè foò Ŋaablà re shia goo rèè rà. Yè Yùxanà tey ci: «Mùn kàrànfaà, ɲe wù ɲe yè fee rìì fa ?»

13 E dzin è ra ci: «Sàrìyaa ɲɛyn xɛkɛ rìi kpàdeò ci è tsia mòdzian nà, e maà à tsi ger'nà tɔ̀ tsɛ waa.»

14 Kaadzin neè swey sa y'a tey ci: «Ɲe do, ɲe wù ɲe yè fee fa ?»

E dzin twɛy rà ci: «E maà mòò pɛn ne gè tsi à ra fààn na. E to mà doò wɔ mòò rà, y'a re gè tsi à ra. Ye dàn e re sàr'là bàsɔùn mà.»

15 Awà, mòdzian sa kpɛyn na màshui rìì faa sa, y'à siin nìi nà fa. E sa na e yɛrɛ teè, ci Ŋaablà Jaara Modzìn nìi goo na deò, tɔ̀ rii yè bà Yùxanà gbɛ.

16 Yùxanà yè dzin è sapɛ ra tɔ̀un ci:

«Mun, mun kpɛ̀yn ye jaara foo Ŋaablà re shia goo rèè rà ko yu rìì ka, ŋà, mòo nà nà, dzi ni nìi ɲàn è geren mun tsɛ. Arì, mun yè bà ni à re seereyn fɛɛ̀ foro, mun na wù tà tsu ka cɛyn waa. Tɔ nà Ŋaablà re Dzi Fɛnɛɛ ko sàà rìì ka ye jaara foò Ŋaablà re shia goo rèè rà.

17 A ni, a ci mòò riì rè shìmàn fyɛɛ kòkor'la kuɔn à suun, à nà tɔ̀ ka shìmaan ɲààn fyɛ bo dziàn ɲàn. A fyɛ doumaà shɔ̀ùn, è shìmàndzian tsɛ̀ na ji bòndoo doùn. Ɲàànà, è tɔ̀ fla bo kpèndee doùn, è bè tɔ̀ dzu sà ka, sà rìi na dzia waa.»

18 Awà, Yùxanà yè mòdzian màxɔ̀n ko gooma giri kpɛ̀rɛ̀kuru ì ka, è toro kɔ̀ Ŋaablà re màsàbee Kùnàgoo Dziɔ̀ rà.

19 Ayìwà, jàmààntsi Erodzì na e fa'ùnkèrèsi sɔn ne tàan tsiɔ à ra, tɔ̀ taàn tsoo yè bà ci Erodziyadzì. Sii sɔn see, Yùxanà dzii yè nà wɔ tɔ̀ taàn seunmaà gooma tsɛ, è Erodzì jaara de tɔ̀ ra. Awà, è Erodzì jaara de goo giri kpɛ̀rɛ̀kuru ɲaan fauma sa ra.

20 Erodzì ci e ye nà nìi fa kɔn, tɔ̀ yeè bà à re gooɲaan neè tɛ̀y, à y'à to yè Yùxanà kun ji kàsoò doùn.

Yesù jaara fòoŋ min niì

21 Jàma nìi na ni, twɛy mòdzin neè sapɛ jaara foò doumaà shɔ̀ùn Ŋaablà re shia goo rèè rà, Yesù sa jaara yeè fòò. Awà, Yesù jaara fòoŋ, è Ŋaablà mafyɛ̀n. A ni Ŋaabla mafyɛ̀ɛ̀n nà, jìrànxɔɔ̀ dzii yè san.

22 Tɔ̀un, Ŋaablà re Dzi Fɛnɛɛ yè bo na mɔn jàci màsàkere, tɔ̀ yeè nà e jaà à tsɛ. Tɔ fau min niì, vu sɔn yeè bo Ŋaablaxɔɔ̀ doùn mɔn, tɔ̀ yeè dzin nèe tsuru ci:

«Min Dzin Kpir'liì kɛ̀niɔ̀n, à wo rii. Wo goò dzi mun na fɔ è bè geren.»

Yesù fà'ùnker'la tsua mòdzin neè

23 Ayìwà, Yesù ci e ye e re faagoò dzii kun Ŋaablà re watsi riì bwèy, tɔ̀ y'à tàrà à sìà na wɔɔ jii moò tsyeùn tsuru. Mòdzian na Yesù jàtsi kuàn Yusufù rìì dzin.

Yusufù yɛ̀r'la raa fàà na Eli.

24 Eli raa fàà na Matatsì.

Matatsì raa fàà na Lɛvì.

Lɛvì raa fàà na Mɛlɛkì.

Mɛlɛkì raa fàà na Yànayì.

Yànayì raa fàà sa na Yusufu tsoo sɔn.

25 Tɔ̀ Yusufu tsoo raa fàà na Matatsiyasì.

Matatsiyasì raa fàà na Amɔshì.

Amɔshì raa fàà na Naxumù.

Naxumù naa fàà na Ɛsilì.

Ɛsilì raa fàà na Nagayì.

26 Nagayì raa fàà na Maatsì.

Maatsì raa fàà na Matatsiyasì tsoo kpɛrɛ.

Tɔ̀ Matatsiyasì tsoo raa fàà na Shemìn.

Shemìn naa fàà na Yosɛshì.

Yosɛshì raa fàà na Yodà.

27 Yodà raa fàà na Yùxanà.

Yùxanà raa fàà na Resà.

Resà raa fàà na Zhorobabɛlì.

Zhorobabɛlì raa fàà na Shelatsiyɛlì.

Shelatsiyɛlì laa fàà na Nɛɛrì.

28 Nɛɛrì raa fàà sa na Mɛlɛkì tsoo sɔn.

Tɔ̀ Mɛlɛkì tsoo raa fàà na Adzì.

Adzì raa fàà na Kosamù.

Kosamù naa fàà na Elimadamù.

Elimadamù raa fàà na Ɛrì.

29 Ɛrì raa fàà na Yesu tsoo sɔn.

Tɔ̀ Yesu tsoo raa fàà na Eliyezhɛrì.

Eliyezhɛrì raa fàà na Yòrimù.

Yòrimù naa fàà sa na Matatsi tsoo sɔn.

Tɔ̀ Matatsi tsoo sa raa fàà na Lɛvi tsoo kpɛrɛ.

30 Tɔ̀ Lɛvi tsoo raa fàà na Simeyɔ̀n.

Simeyɔ̀n naa fàà na Yudà.

Yudà raa fàà sa na Yusufu tsoo kpɛrɛ.

Tɔ̀ Yusufu tsoo raa fàà na Yònamù.

Yònamù naa fàà na Eliyakimù.

31 Eliyakimù raa fàà na Meleyà.

Meleyà raa fàà na Mɛnà.

Mɛnà raa fàà na Matatà.

Matatà raa fàà na Natàn.

Natàn naa fàà na Dawudà.

32 Dawudà raa fàà na Yesè.

Yesè raa fàà na Obɛdzì.

Obɛdzì raa fàà na Bùwazhì.

Bùwazhì raa fàà na Shelimɔ̀n.

Shelimɔ̀n naa fàà na Nàasùn.

33 Nàasùn naa fàà na Aminadabù.

Aminadabù raa fàà na Adzimìn.

Adzimìn naa fàà na Arinì.

Arinì naa fàà na Esiromù.

Esiromù naa fàà na Pɛrɛtsì.

Pɛrɛtsì raa fàà sa tsoo na Yuda tsoo sɔn.

34 Tɔ̀ Yuda tsoo raa fàà na Yàkubà.

Yàkubà raa fàà na Ishakà.

Ishakà raa fàà na Ibraximà.

Ibraximà raa fàà na Tera.

Tera raa fàà na Nakɔrì.

35 Nakɔrì raa fàà na Serukì.

Serukì raa fàà na Ràgawù.

Ràgawù raa fàà na Pɛlɛkì.

Pɛlɛkì raa fàà na Ebɛrì.

Ebɛrì raa fàà na Shelà.

36 Shelà raa fàà na Kayinamù.

Kayinamù raa fàà na Aripazadzì.

Aripazadzì raa fàà na Semù.

Semù naa fàà na Nuùn.

Nuùn naa fàà na Lamɛkì.

37 Lamɛkì raa fàà na Mɛtusalà.

Mɛtusalà raa fàà na Enɔkì.

Enɔkì raa fàà na Yarɛdzì.

Yarɛdzì raa fàà na Maalelɛlì.

Maalelɛlì raa fàà na Kayinàn.

38 Kayinàn raa fàà na Enɔsì.

Enɔsì raa fàà na Sɛtsì.

Sɛtsì raa fàà, tɔ̀ yeè bà na Adamà.

Adamà, Ŋaablà rii tɔ̀ ɲɛun.