Luc 4

Sùtana Yesù dzuun bo gbau min niì

1 Awà, Yesù ɲan tsyɛunmaà Ŋaablà re Dzi Fɛnɛɛ rà, è bo Yuridɛn baa dzii ra. Tɔ̀un, Dzi ree y'à jaa ji be jènjàà kor'nà doùn.

2 A bèu wɔ mɔn, Sùtana y'à dzuun siin bwèy dzyèè doùn. Tɔ bwèè dzyèè doùn, Yesù na ɲwɛyn pɛn ɲɔn waa. Tɔ̀ dɔ̀n boumaà nì shɔ̀ùn, dzu yè kòmànà à kun.

3 Sùtana yè dzin à ra tɔ̀un ci: «Wo rìì ye ba Jìran nɔ̀n Ŋaablàa Dzin Kpir'la taki, dzin nèe kpàà ree ra, ci è lakere ba buru.»

4 Yesù yè dzin à ra ci: «A sɛbɛɔ̀n Ŋaablà re Goomaa doùn nèe tsuru ci:

A na ni a ci mòdzian rèè jaamabee ni ɲwɛyn goo bàsɔùn ni suun waa.»

5 Yesù tà goomaa dèu tɔ̀ tsuru min niì, Sùtana yè b'a ka gàne sɔn ɲan, nìi ni jìran. E bèu wɔ mɔn, è siin, è dziɲaan jàmaàn rèè sapɛ kpadè à ra jaa soo.

6 Tɔ̀un, Sùtana yè dzin à ra ci: «Nèe jàmaàn rèe rèè sapɛ faan ko à blàbee sapɛ siɔ̀n mun ni nà. Mòò riì ye mun dzibe mun dzia à sìn tɔ̀ tsìfa ra.

7 Tà doùn, wo y'a tsiì wo y'à kunun gban mun bììn, wo yè mun blàbe, mun nà tɔ̀ sapɛ sin wo ra, è bà wo raa.»

8 Yesù yè dzin à ra ci: «A sɛbɛɔ̀n Ŋaablà re Goomaa doùn nèe tsuru ci:

Mùn Tsìfa Ŋaablà blabe,

e goo fa tà soore pe rii lè.»

9 Ayìwà, tà shɔ̀ùn Sùtana yè Yesù jaa ji be Yerusalɛmùn. E bèu wɔ mɔn, Sùtana yè b'a ka Ŋaablà re gbà blàa sènfi. Tɔ̀un, è dzin Yesù rà ci: «Wo rìì ye ba Ŋaablà Dzin Kpir'la taki, a tsyɛn ji dzɔ̀n nɔ̀n,

10 kàtsu à sɛbɛɔ̀n Ŋaablà re Goomaa doùn nèe tsuru ci:

Ŋaabla nà dzin e re mɛ̀rɛ̀kɛ rèè rà, ci yè wo kààwɔ.

11 Tà ko:

E nà wo sen e suun, wo sàn mà nà to zhɛ kpàa sɔn na.»

12 Yesù yè dzin à ra ci: «A sɛbɛɔ̀n Ŋaablà re Goomaa doùn nèe tsuru ci:

Ma dzin ci a mùn Tsìfa Ŋaablà dzuun boò waa.»

13 Ayìwà, Sùtana nàu Yesù dzuun bo gba tà tsuru kosokoro watsi riì bwèy, è ma bo à ra, ci wo nà watsi kpɛrɛ shù.

Yesù rè faagoò dzii kunmàà Galile mar'la ɲàn

14 Tà sapɛ shɔùn, Yesù yè sèè na Galile mar'la ɲàn, Ŋaablà re Dzia fàan yè bà ni à ɲan. À tsoò na boo tɔ̀ gàneè màr'là min niì sapɛ.

15 Tɔ̀ gàne rɔ̀n, à na mòdzian kàr'na è re waajibi fa gba rè doùn. È sapɛ na à blàbee min niì sapɛ.

Nazarɛtsika reè nɔnmaà Yesù rè

16 Awà, Yesù yè nà bè Nazarɛtsì, y'à lamɔnɔun wɔ̀ nìi ɲàn. Tɔ̀un, Dzyèèsìbee mòdzin neè rè ɲànwɔ siɛ̀ wɔu, è bè waajibi fa gbaà doùn, jàci à dɛ̀rɔɔ̀ à y'à faa nìi tsuru bɔrɔɔ. È na tɔ̀ ɲànwɔ siɛ̀ kir'là ci Sàba. Yesù nàu fù, ci wo nà kàr'nà fa watsi riì bwèy,

17 yè Ŋaablà re kɛɛra Esayì raa kìtaabuà sen sin à ra. À sàò na ni à re wò yeè sɛbɛɛn kàjaa riì kàràn, à y'à dzii san, è bè wɔ tɔ̀ kàjaa tsɛ. À na sɛbɛɔ̀n tɔ̀ gàne rɔ̀n nèe tsuru ci:

18 «Mùn Tsìfa Ŋaablà re Dzia ni mun ɲan.

Tɔ̀ rii y'à to è mun bo,

ci mun yè na gbakɔɔn reè toro kɔ̀ Kùnàgoo Dziɔ̀ rà.

A mun ka naɔ, ci min nà byɛnkɔɔn reè laba goòmà dè è ra,

min jaana reè jaa dzii san goòmà dè twɛy rà,

nìì reè xɔn biiŋnà, min twɛy bo vi ra.

19 Watsi riì ni Ŋaablà re, è bà mòdzian tsià dzì rà,

à mun ka naɔ, min nà tɔ̀ kùnàgoo de.»

20 A Kìtaabuà kàràn dòun min niì, à y'à dzii tsyee à wɔ waajibi fa gbaà doùn faagoofabaà suun, è kòmànà tàrà è tsuù. Nìì reè na ni waajibi fa gbaà doùn, è sapɛ yeè e jaa rèè gban tsùù à ra, y'à siɛ̀n.

21 Yesù yè dzin tɔ̀un ci:

«Ye nèe gooma niì myɛɔ̀n è bo Ŋaablà re Kìtaabuà doùn, tɔ Ŋaablà re dan gooma deuma nì, nìi boo e shi tsɛ she.»

22 Yesù tà dè dòu min niì, è sapɛ yeè e maa y'à mà wùù deè. A na gooma wuu niì reè dèe, tɔ̀ yeè ji è dzii tsɛ. Yè dzin tɔ̀un ci: «Nèe na Yusufù dzin kpir'la rìì ɔ̀ ?»

23 Yesù yè dzin è ra ci: «M'a tɔ̀, ci ye nà tààlen nìi ban mun ne. Tɔ̀ dèù'n kur'la rìì yɛ nèe tsuru ci: "E ba janfabaa, à wù, a yɛr'la rìì cɛrɛmabe ŋe." Ye nà dzin mun na sa ci: "Wo goo o goo fau Kapɛrinaxumùn wɔ̀ɔ̀ doùn, ɲe twɛy myɛ̀un. È tsuru fa a yɛr'la tà rɔ̀n mìin nɔn sa."»

24 È dzin è ra kɔn ci: «M'a dè e saàbèn shi tsɛ, Ŋaablà re kɛɛra pɛn kuun'n kuru na wubee e yɛr'la tàdzin neè rè waa.»

25 È dzin kɔn ci: «Sààben fyan, mun nà à dè ye ra, ci Ŋaablà re kɛɛra Aliì raa watsi rɔn, ŋaa na na Isirayɛli jamaan doùn waa, è bè tàrà fɔ jii zhiigi ko kuu tsùnmɛn. Tɔ̀ goò yè dzuà ji jàmaàn min niì sapɛ. Tà watsi rɔn, fùnshɔ̀ùntaan reè na giri Isirayɛli jamaan doùn.

26 Tà ko e sa ra, Ŋaablà na e re kɛɛra Aliì bàji be twɛy pɛn ne, è bè wɔ è ra waa. Aliì bèu fùnshɔ̀ùntaan sɔn ni nè jàmaan kpɛrɛ. Tɔ̀ taàn na tsùuŋnà Sarɛpita wɔ̀ɔ̀ rìì doùn, Sidɔn mar'la ɲàn.»

27 E dzin kɔn ci: «Ŋaablà re kɛɛra Elizhì raa watsi rɔn, byèèma giri sa na ni Isirayɛli jamaan doùn. Elizhì to na twɛy byèèma reè pɛn cɛrɛmabe waa. A Siiriɲɛ kpiri sɔn ni cɛrɛmabeu nìi tsoo ci Naamàn.»

28 Fɔ Yesù dziu tà gooma reè dè min niì, gè o ge na ni waajibi fa gbaà doùn, è sapɛ vunun yè ta à kpɛyn.

29 Tɔ̀un, è sapɛ yeè fù, yè Yesù kun, y'à sɔ̀ɔ̀n yè bo à ka wɔ̀ɔ̀ doùn. Wɔ̀ɔ̀ na tsuuŋnà jèn nì tsɛ. Yè b'à ka fɔ tɔ̀ jèèn sènfi. Yè dzin, ci ye nà à tèn bo mɔn, è nà mɛɛy jèèn ku dzuun.

30 Ŋà, Yesù yeè dɔ̀n bo è fi, è geren.

Yesù kwey rè kaa bou kpiri sɔn kpɛyn min niì

31 Tɔ̀un, Yesù yè dɔ̀n be Kapɛrinaxumùn, nìi Galile mar'la wɔ̀ɔ̀ sɔn. È yè e ɲanwɔɔ̀ jisee riì mà, è bè mòdzian kàràn waajibi fa gbaà doùn tɔ̀ sii sèè kɔn.

32 À re kàr'nà fau'n kur'la na mòdzian duungoo doò, kàtsu, baraka na ni à re goomaa ɲàn. Awà, kpiri soo na ni waajibi fa gbaà doùn mɔn, kwey rèè yè bà na ni tɔ̀ kpɛyn.

33 Yesù rè kàr'nà fakɔɔn doùn, tɔ̀ kpiri kweykɔɔn yè nà sɛ̀ɛ̀y jaa soo fààn na ci:

34 «E ! Nazarɛtsika kpiri Yesù, fee rìì ni mùn fi ? Wo naɔ̀ ɲe barama nɔ̀n nì gbɛ ? Wo mòò riì kuru, mun y'à tɔ̀. Wo Ŋaablà re Mòdzìn fɛnɛ ka naumaà nì.»

35 Kwey nìi gbaɔn kpir'lee kpɛyn, Yesù sa yeè e cerè tɔ̀ tsɛ kɔn, è dzin ci: «A dziɛ̀ tsyee, e bo kpir'la kpɛyn !»

Yesù tà dèu min niì, kwey rèe yè kpir'la sen mɛɛy dzɔn nɔ̀n è sapɛ jaa ra, è bo à kpɛyn. Ŋà, gèsɔn na fa à ra waa.

36 Tɔ̀ goò yè ji mòdzin nee rèe sapɛ dzii tsɛ.

Yè e maa y'à dè beè e si ra ci: «Nèe kɛ̀n tsuru gooma ni ? Kpir'lee re goomaa fàan vùn kwey rèè tsɛ, à to goomaa è ra dzi ka. A dziàn è ra ci yè bo mòdzian kpɛyn, twɛy sa yeè bo n dzi.»

37 Mòdzian yè e maa yè Yesù rè goò lakɛɛ tɔ̀ gàneè mar'là min niì sapɛ.

Yesù ɲìnìnkɔɔn giri cɛrɛmabeu min niì

38 Awà, Yesù nàu bo waajibi fa gbaà doùn, è bè kpiri sɔn ne tsii, tɔ̀ tsoo yè bà na ci Shimɔ̀n. Tɔ̀ y'a tàrà Shimɔ̀n blantaàn na ɲìnìɔn fɔ è bè xɔbe. Mà taà na ni à ra. Y'à gooma de Yesù rà.

39 Tɔ̀un, Yesù yè e kpɛrɛ̀ taàn nà, è bè e tsiì à kùùn. E tsiiŋ à kùùn, è cerè, ci mà taà yè taàn bàji. Tà nɔ̀nkɔɔ rɔn, ɲìn'nà yè taàn bàji. E fù, è ɲwɛyn goo jaa bo è re.

40 Ayìwà, bwèy tɔrɔn bwey rɔ̀n, ɲìnìnkɔɔn na ni gè o ge rè, a ci à ɲìnìn kun o kun ni, è sapɛ yeè nà twɛy ɲìnìnkɔɔn reè ka Yesù rè. E sià tsùù tsùù be è sapɛ soo sookɔɔn tsɛ, è sapɛ yeè cɛrɛmabe.

41 Kwey rèè na boò kweykɔɔn reè giri kpɛyn ko gɛɛy bo rii ka. Tɔ̀ gɛɛy bokɔɔn doùn, è na dziàn Yesù rà ci: «Wo rìì Ŋaablà Dzin Kpir'la.» Kwey rèè na tà dèe Yesù rà, kàtsu, è na à tɔ̀, ci wò rii Ŋaablà Jaara Modzìàn, nìi kir'là ci Kirisà. Ŋà, à na e jaa xe boò è ra, à dè màxɔbe è ra, ci wò ma tà myɛ̀n è dzu waa.

Yesù bemaà Yude mar'la ɲàn, è bè mòdzian kàran

42 Jia seron min niì, Yesù yè bo wɔ̀ɔ̀ doùn, è dɔ̀n be jènjaà kor'nà gàne sɔn ɲan. Tɔ̀un, mòdzian yè bo giri, yè e maa y'à gàne gaa beè. E nàu bè à jà min niì, è sàò naà ni à re è bo ye tɛyn dɛ.

43 Ŋà, Yesù yè dzin è ra ci: «Fɔ min bè Ŋaablà re Màsàbee Kùnàgoo Dziɔ̀ dè wɔ̀ kpɛrɛkuru ì sa ɲan, kàtsu, Ŋaablà mun ka naɔ tɔ̀ rii là.»

44 Tɔ̀un Yesù yè fù, è dɔ̀n be Yude mar'la ɲàn, è bè mòdzian karan waajibi fa gba rèè doùn.