Marc 1

Kùnàgoo Dziɔ̀

Marikì raa lakɛrɔ̀ùn'n kur'la mà

Mòdzìn Jààràfoobaa Yùxanà rè waajibia gooma reè

1 Yesù, Ŋaablà Jaara Moò, [Ŋaablà Dzin Kpir'la], tɔ̀ re Kùnàgoo Dziɔ̀ dziikuan nì siin.

2 Àyìwà à sɛbɛɔ̀n kɛɛra Esayì rè kìtaabuà doùn ci: «Mun Ŋaablà, mun nà n ne kɛɛradzian ka bè wo jɔɔn, è bè wo dɔ̀n shià lamɔnɔ̀n tsùù.

3 Mòdzin sɔn sɛɛ̀y vu boò jènjàà kor'nà doùn ci: "Ye shia lamɔnɔ̀n tsùù mùn Tsìfaà rè ! Ye shi ì sɔ̀nbyɛ̀n tsùù à re, yè bà tereòn cɛyn !"»

4 Àwà twɛy gooma reè dèu mòò riì tsɛ, tɔ̀ yeè bà mòdzìn Jààràfoobaa Yùxanà, tɔ̀ yeè e kungɔ bo jènjàà kor'nà doùn. À y'à gbangoo, ci mòdzian yè e re jaamabee fau'n kur'la lakere, y'à to è jaara yeè fòò Ŋaablà re shia goo rèè rà, è re gooɲaantsiɛ yè bà ni mɛɛy bo è vu ra.

5 Tà doùn, Yude mar'la mòdzian sapɛ, ko Yerusalɛmùn wɔ̀ùndzin neè sapɛ yeè bèe Yùxanà rè. È na e tsiɛ e re gooɲaan fauma rèè ra y'à dè. Y'à to Yùxanà yè è jaara foo Ŋaablà re shia goo rèè rà Yuridɛn ba rɔn.

6 Vya rìi na ni Yùxanà vu ra, tɔ̀ na faɔ̀ ɲɔ̀ɔ̀nmɛ̀n suu rìì ka, à re ɲànshìàgee yè bà na tsùn. Kɛ̀ynjàko reè, ko jòon nɔ̀n gaà rìì na à re ɲwɛyn.

7 À na gbango faa, è dziàn ci: «Mòo nàa mun shɔ̀ùn, fàan ni nìi ɲàn, è geren mun tsɛ. Arì à re seereyn fɛɛ rèè, min bà ni n mɛɲɛn min twɛy foro bo à sàn nà, mun na wù tɔ̀ tsu ka waa.

8 Mun kpɛ̀yn ye jaara foo Ŋaablà re shia goo rèè rà ko yu rìì ka. Ŋà, tɔ nà ye jaara foò ko Ŋaablà re Dzi Fɛnɛɛ rìì ka.»

Yesù jaara fòoŋ min niì

9 Àyìwà, tɔ̀ watsi rɔ̀n, Yesù sa yeè bo Nazarɛtsì, Galile mar'la wɔ̀ɔ̀ sɔn, è nà, Yùxanà y'à jaara foò Yuridɛn ba rɔn.

10 Yesù bokɔɔn yu rɔ̀n tɔ̀un, tɔ̀ nɔ̀nkɔɔrɔn, à y'à jà jìrànxɔɔ̀ dzii saun, Ŋaablà re Dzia yè jàà na à tsɛ a ci màsàkere.

11 Tɔ fau min niì, vu sɔn yeè bo ŋaablaxɔɔ̀ doùn, tɔ̀ yeè dzin ci: «Min Dzin Kpir'iì kɛ̀niɔ̀n, à wo rìì, wo goò dzi mun na fɔ è bè geren.»

Sùtana Yesù dzuun bo siin min niì

12 Tɔ̀ nɔ̀nkɔɔrɔn, Ŋaablà re Dzia yè Yesù jaa ji be jènjàà kor'nà doùn.

13 È to mɔn, è bè tàrà fɔ bwèy dzyèè. Tɔ̀ sapɛ ɲan, Sùtana y'à dzuun bo siɛ̀n. À na ni jòònshu reè fi mɔn, mɛ̀rɛ̀kɛ rèè yè bà ni faagoò rà à re.

Yesù yè e re faagoò dzii kuun min niì

14 Àyìwà Yùxanà kun jiumaà shɔ̀ùn kàsoò doùn, Yesù yè bè dɔ̀n Galile mar'lɔn, è Ŋaablà re Kùnàgoo Dziɔ̀ goomaa gbangoo.

15 À na dziàn ci: «Ŋaabla watsi niì kpàdèu, tɔ̀ dzii tsyɛun, à re màsàbee watsi to tsyɛnbeò. Ye e re jaamabee fau'n kur'la lakere, ye ɲɛn Kùnàgoo Dziɔ̀ rà».

Yesù yè e re kàràndzìn jɔna reè kiriu min niì

16 Àwà sii sɔn see, Yesù jìì bekɔɔn Galile yu blàa dzii kpɛyn, è jikunbaa fii jà, twɛy ni yɔ̀ maa rà. À na keresima fii rìì, soo tsoo Shimɔ̀n, soo tsoo yè bà Andère.

17 Yesù yè dzin è ra ci: «Ye gban mun kpɛyn. Mun nà ye bà mòdzìn gaabaa ì, a ci ye na ji rèè kuàn nìi tsuru.»

18 Tɔ̀ nɔ̀nkɔɔrɔn twɛy yè e raa yɔ̀ rèè to mɔn, yè gban à kpɛyn.

19 Yesù yè e kpɛrɛ̀ bèu jɔɔn dɛyn kɔn, è keresima fii jà, twɛy ni e raa konkor'na doùn, yè bà e re yɔ̀ rèè lamɔn'na. Soo tsoo Yàkubà, soo tsoo Yùxanà, è fàà tsoo yè bà Zhebedè.

20 Tɔ̀ nɔ̀nkɔɔrɔn, è twɛy sa kiri. Tɔ̀un, twɛy yè e faà ko faagoofadzin neè bàto konkor'na doùn, yè e gban Yesù kpɛyn, yè dɔ̀n be.

Yesù kpiri kweykɔɔn sɔn ne kwey kaa bou à kpɛyn min niì

21 Àwà, tà shɔ̀ùn, Yesù ko e re kàràndzin neè yè dɔ̀n be Kapɛrinaxumùn wɔ̀ rɔ̀n. Ɲànwɔ siɛ̀ nàu wɔ, è bè dɔ̀n waajibi fa gbaà doùn, è mòdzian kàr'na.

22 À re kàr'nà na jiɔ̀ mòdzian dzii tsɛ fɔ è bè geren. À ko sàrìyà kaamoo reè raa mòdzìn kàràùn'n kur'la naà soo waa, fààn na ni à raà ɲàn fɔ è bè geren.

23 Tɔ̀ y'a tàrà, kpiri sɔn na ni Ŋaa blabe gbaà doùn, tɔ kweykɔɔn. Tɔ̀ yeè nà sɛ̀ɛ̀y fààn na,

24 è dzin ci: «Nazarɛtsika kpiri Yesù, fee rìì ni mùn fi ? Wo naɔ̀ ɲe bar'li gbɛ ? Wo mòò riì kuru, mun y'à tɔ̀. Wo Ŋaablà Tsoora Mòdzìn ka naumaà nì.»

25 Yesù yè e cerè kweè tsɛ ci: «A dziɛ̀ tsyee e bo kpir'la kpɛyn !»

26 Kweè yè kpir'la yuuyuu tɔ̀un fààn na, è gɛɛy vu blà bo, è bo à kpɛyn.

27 A goò yè ji è sapɛ dzii tsɛ, fɔ è bè wɔ yè e si teè ci: «Nèe fee ? Nèe kàràn ye, ŋɔn ni nìi ɲàn dɛ ! Arì kwey rèè, à nìi jia twɛy jɔɔn, twɛy sa tɔ̀ shi jiɛ.»

28 Àwà, Yesù tsoò yè bo tɔ̀ nɔ̀nkɔɔrɔn Galile mar'la min niì sapɛ.

Yesù ɲìnìnkɔɔn giri cɛrɛmabeu min niì

29 Àyìwà, Yesù bou tɔ̀un Ŋaa blabe gbaà doùn, à ko kàràndzin neè yè dɔ̀n be Shimɔ̀n ko Andère re tsii, Yàkubà ko Yùxanà sa yeè bà ni è ka.

30 Tɔ̀ y'a tàrà, Shimɔ̀n blantaàn naà cɛrɛma waa, à na ɲɛɔ̀n màtaà rè. È bèu wɔ mɔn tɔ̀ nɔ̀nkɔɔrɔn y'à gooma de Yesù rà.

31 Yesù yè e kpɛrɛ̀ à ra tɔ̀un, à y'à kun e si ra, à y'à fù. Tɔ̀ yeè bà màtaà dòuma. Taàn yè fù è ɲwɛyn sìn è ra y'à ɲɔn.

32 Àyìwà, ɲɛ̀rɛɛ̀rà nàu wɔ, bwèè tɔrɔunma shɔ̀ùn, ɲìnìnkɔɔn ge o ge ni, ko kweykɔɔn ge o ge ni, yè bè twɛy sapɛ ka Yesù rè.

33 Wɔ̀ùndzian sapɛ na e ladzyèeŋnà tsiɛ̀ dɔ̀nmà dziɛ rà.

34 Tà doùn, Yesù yè ɲìnìnkɔɔn giri cɛrɛmabe, a ci à ɲìnìn kun ge o ge. È kwey giri kaa bo kweykɔɔn reè kpɛyn. À naà à toò kwey rèè yè gooma waa, kàtsu twɛy na à tɔ̀ à mòò riì.

Yesù bèu min niì Galile mar'la ɲàn, è bè Ŋaablà re goomaa gbango fa

35 Àwà tɔ̀ raa gbee rɔn, dzɔ̀n vì bɛɛ rà, Yesù yè swɛ̀ɛ̀y bo è bè jènjàà kor'nà gàne sɔn ɲan, è bè Ŋaablà mafyɛ̀n.

36 Tɔ̀un Shimɔ̀n ko e dzyeèsi rèè yè bo, ci ye bèe à gaa.

37 Yè b'a jà. Y'à jàu, yè dzin à ra ci: «Mòdzian sapɛ wo gaa.»

38 È dzin è ra ci: «Y'a wa mìn bo mìin, mìn bè dziire wɔ rèè sa ɲan, min bè Ŋaablà re goomaa gbango mɔn sa, kàtsu mun naɔ̀ tɔ̀ rii là.»

39 Yesù yè bèe tɔ̀un Galile mar'la min niì sapɛ, è Ŋaablà re goomaa gbango beè è re Ŋaa blabe gba rèè doùn, è kwey rèè kaa boò kweykɔɔn reè kpɛyn.

Yesù byèèmà kpiri sɔn cɛrɛmabeu min niì

40 Ayìwà byèèmà kpiri sɔn yeè bè Yesù kpɛyn tɔ̀un, è bè e kunun gban ji à bììn, à y'à màfyɛ̀n, è dzin à ra ci: «È wo dzibe wo dzia mun cɛrɛmabe.»

41 À màtsuru yeè Yesù kun fɔ è bè geren. Tɔ̀un è si foro, è dzyɛn à ra, è dzin à ra ci: «Min tsiiŋ wo yè cɛrɛmabe.»

42 Tɔ̀ nɔ̀nkɔɔrɔn kpir'la rè byèèmà ɲin'nà yè dò, è cɛrɛmabe.

43 Tà shɔ̀ùn, Yesù yè dzin à ra, ci à y'à waa, ŋà à y'à dè màxɔbe à ra ci:

44 «Maà gèsɔn dè mòò pɛn na. B'à yɛrɛ kpadè saaka goojaabobaà rìì là. Musà rè sàrìyaa ci nìi yè fa è kpàdè ci wo cɛrɛmabeu, e tɔ̀ shi jiì a fɛnɛbeumaà kamà. Tɔ nà bà shɛɛrɛbe è re.»

45 Àwà, kpir'la boumaà shɔ̀ùn, nìi fau à re, e maa e tɔ̀ gbango beè min niì sapɛ. À goò yè bè wɔ fɔ Yesù na dzia dɔ̀n wɔ̀ pɛn doùn mòò jaa ra dɛ. À na too jènjàà kor'nà nì doùn sa, mòdzian yè boò min niì sapɛ, yè bèe à kpɛyn mɔn.