Marc 2

Yesù mùrùkù kpiri sɔn cɛrɛmabeu min niì

1 Àyìwà bwèy dànman tà shɔ̀ùn, Yesù yè e kpɛyn sèè Kapɛrinaxumùn wɔ̀ rɔ̀n. Mòdzian yè nà à myɛ̀n, ci à ni gbàà doùn.

2 Tɔ̀un jàmaà yè bè e ladzyèè mɔn giri, fɔ è bè wɔ tsììma tsu na ni dɛ waa, arì dziɛ̀ rà da rɔ̀n. Àwà, Yesù yè è toro kɔ̀ɔ Ŋaablà re goomaa nà.

3 À ni tɔ̀ ra, mòkun naàlen yè mùrùkù kpiri sɔn sen na à re.

4 Jàmaà kamà, è fa ni dzi wɔ à ka Yesù tsɛ nìi fa waa, à ni gbà nìi doùn, yè tèyn tɔ̀ jiran nɔ̀n. Tɔ̀un yè kɔ̀ɔ̀ bo mɔn. Tɔ̀ faumaà shɔ̀ùn, kpir'la ɲɛɔ̀n ɲaange niì tsɛ, y'à jàà mɔn ko tɔ̀ ka.

5 Àwà Yesù y'à jàu ci twɛy mòdzin neè ɲɛun wò ra min niì, è dzin mùrùkù kpir'là rà ci: «N dzin kpiri wo re gooɲaantsiɛ mɛɛy bou wo vu ra.»

6 Tɔ̀ y'a tàrà, Sàrìyà kaamoo reè swey na tsùuŋnà mɔn, twɛy yè bà dziàn e duùn ci:

7 «Feera nèe yè bà goomaa nèe tsuru ? À Ŋaablà tsoo bar'la. Ŋaablà soo boshɔ̀ùn, tsì rii soo dzia gooɲaantsiɛ mɛɛy bo mòò vu ra ?»

8 È nìi kɛ̀sɛɛ̀ e duùn, tɔ̀ nɔ̀nkɔɔrɔn, Yesù yè tɔ̀ tɔ̀ e yɛrɛma. Tɔ̀un, è dzin è ra ci: «Fee y'à to ye bà e kɛsɛɛ̀ nèe tsuru e duùn ?

9 E dzin mùrùkua rà ci: "wo re gooɲaan tsiɛ mɛɛy bou wo vu ra", tà ko "a re ɲaangee sen e jìì", kɛ̀n ni de dzi twɛy fiɛ̀ ɲàn ?

10 Àwà, ye nà à tɔ̀ she, ci à dzi ni Adamà dziàn nà, è gooɲaantsiɛ mɛɛy bo mòò vu ra dzɔ̀nxɔɔ̀ tsɛ.» Tɔ̀un, Yesù yè dzin mùrùkù kpir'là rà ci:

11 «Mun ci e fù, a re ɲaangee sen, a wa a re tsii !»

12 Tɔ̀ nɔ̀nkɔɔrɔn kpir'la yè fù tsìì e san tsɛ, è re ɲaangee sen, è bo mòdzian sapɛ jaa ra. À goò yè ji mòdzian sapɛ dzii tsɛ, fɔ è bè wɔ yè tsoo dzi ɲɛɛn Ŋaablà tsɛ, yè dziàn ci: «Mùn na nèe tsuru jà jà ŋe fyeu.»

Yesù Lɛvì kiriu min niì à y'à bà e re kàràndzin

13 Àyìwà twɛy goo rèè shɔ̀ùn, Yesù yè sèè bo kɔn, è bè Galile yu blàa dzii ra. Jàmaà yè bèe à kpɛyn mɔn giri, à yè è kàr'na.

14 À dɔ̀n bokɔɔn tɔ̀un, è kɔnsɔɔntsibaa sɔn ja e raa kɔnsɔɔntsi gbaà doùn, tɔ̀ tsoo Lɛvì, à fàà tsoo yè bà Alifù. È dzin tɔ̀ ra ci: «A gban n kpɛyn.» Tɔ̀ sa yeè fù, è gban à kpɛyn.

15 Tà shɔ̀ùn, Yesù yè nà bè ɲwɛyn ɲɔn Lɛvì rè tsii. Tɔ̀ ɲwɛɛ̀n koùn, kɔnsɔɔntsibaa giri, ko mòdzin faadzii ɲaan neè giri na ni à ko e re kàràndzin neè ka. Àwà twɛy mòdzin neè giri na e gbaɔn à kpɛyn.

16 Faridziɲɛn rèè raa sàrìyà kaamoo reè y'à jàu min niì ci à ko mòdzin faadzii ɲaan neè, ko kɔnsɔɔntsi reè ɲwɛɛ̀n ɲɔɔ̀n esire, y'à re kàràndzin neè tey ci: «Feera è bà ɲwɛɛ̀n ɲɔɔ̀n kɔnsɔɔntsi reè ko mòdzin faadzii ɲaan neè ka ?»

17 Yesù tɔ̀ myɛ̀un, è dzin è ra ci: «Cɛrɛma reè màgoo na ni dɔ̀ɔ̀tɔr'là rà waa, ɲìnìnkɔɔn reè rìì màgoo ni à ra. Nìì reè y'à jàa ye tereòn, mun nà kuàn na twɛy waa. Ŋà nìì reè y'à jàa ci ye mòdzin faadzii ɲaan ì mun nà kuàn twɛy rìì.»

È Yesù teron min niì sun goo mà

18 Àyìwà Yùxanà rè kàràndzin neè ko Faridziɲɛn rèè rè kàràndzin neè na suàn wɔɔ̀. Sii sɔn see, è to suàn nà, swey yè Yesù tey ci: «Feera Yùxanà rè kàràndzin neè, ko Faridziɲɛn rèè rè kàràndzin neè suàn wɔɔ̀, wo raa rèè to na wɔɔ̀ waa ?»

19 Yesù ci è ra ci: «Nìì reè kiriɔ kɔnɲɔn goo rè, twɛy dzia sun wɔ è kɔnɲɔn kpir'là to è ka ɔ ? Kɔnɲɔn kpir'là nà watsi niì sapɛ fa è ka, è fa dzi sun wɔ dɛ.

20 Ŋà jisee nàa, nìi doùn kɔnɲɔn kpir'là nà sen bo è fi. Tɔ̀ sii sèè, è nà sun wɔ.»

21 Yesù yè dzin kɔn ci: «Mòò pɛn na vya ye ka vya bɔrɔɔ tsyɛɛ̀rɛɛ waa. Tɔ̀ ye fa, vya yee vya bɔrɔɔ sɔ̀ɔ̀n vyɛ̀ɛ kpɛrɛ, à vyɛ̀maà si yè tsi.

22 Mòò pɛn to na dɔ̀ɔ̀ yɛy jia yu vɔrɔ bɔrɔɔ ì doùn waa. Tɔ̀ ye fa, dɔ̀ɔ̀ yɛɛ̀ nà nà yu vɔrɔ bɔr'leè jee, è kon, vɔ̀r'leè sa yeè bara. Tà doùn, dɔ̀ɔ̀ yɛɛ̀ wù, è ji vɔ̀rɔ̀ ye ì rìì doùn.»

Yesù ci wò rii ɲanwɔ siɛ̀ tsìfa

23 Àyìwà, ɲànwɔ sii sɔn ma, Yesù ko e re kàràndzin neè na dɔ̀n boò shìman dzu swey ɲàn. Tɔ̀un, kàràndzin neè yè e maa yè shìmàn tan neè swey kɛɛ̀.

24 Faridziɲɛn rèè yè dzin à ra ci: «Nìì na dàaŋnà è fa ɲanwɔ siɛ̀ mà, feera wo re kàràndzin neè tɔ̀ faa ?»

25 À ci è ra ci: «Dzuà màsà kpiri Dawudà ko e dzyeèsi rèè kuun sii rìi sèè o, ɲwɛyn to naà ni è re waa, Dawudà nìi fau ye na tɔ̀ kàràn jà ŋe dɛ ?

26 Saaka jɔɔndzin niì tsoo na Abiyatarì, à na dɔn tɔ̀ raa watsi rɔn Ŋaablà re gbà blàa doùn, buru niì reè na tsùuŋnà Ŋaablà jaa dzuun, è twɛy sen ɲɔn, è dzyeèsi rèè sa kɔ ɔ̀ ? Tɔ̀ to y'à tàrà, saaka goojaa bo reè boshɔ̀ùn, à na dàaŋnà mòò pɛn yè twɛy bur'leè ɲɔn waa.»

27 Tà shɔ̀ùn, è dzin è ra ci: «Ɲànwɔ siɛ̀ ni mòdzian nàfaà rìì kamà, mòdzian na ɲɛɔ̀n ɲanwɔ siɛ̀ rè jòn dɛ !

28 Tɔ̀ kamà, Adamà dziàn sa ɲànwɔ siɛ̀ Tsìfa.»