Marc 3

Yesù kpiri si sɔn saunma sɔn cɛrɛmabeu min niì

1 Àyìwà Yesù yè nà sèè be dɔ̀n Ŋaa blabe gbaà doùn kɔn. Tɔ̀ y'a tàrà kpiri sɔn ni mɔn, tɔ̀ raa si sɔɔ̀n saɔn.

2 Nìì reè na ni mɔn, twɛy na à kààwɔɔ̀, è ba nà tɔ̀ kpir'la cɛrɛmabe ɲànwɔ siɛ̀ mà o. Tà tsuru, y'è jààma jà à ra.

3 Àwà, Yesù yè dzin kpiri si sɔn saunmaà nà tɔ̀un ci: «Fù a tsii mòdzian fi.»

4 Tà shɔ̀ùn Yesù yè è tey ci: «Ɲanwɔ siɛ̀ mà, à dàaŋnà e goowùù rii fa raà, tàà à dàaŋnà e gooɲaan ni fa ? À dàaŋnà e mòò xɔn ni tsi ràà, tàà à dàaŋnà e mòò vu rii ?» Yè e mɛnshɛ̀n.

5 Yesù vunun tauma yè e jaara gaa, è siin siin bè tɔ̀un. È re dùsùkùnxɔ̀beè kamà, à taama na ŋunun fɔ è bè geren. Tà doùn è dzin kpir'la rà ci: «A sià foro !» Kpir'la yè e sià forou tɔ̀un, è cɛrɛmabe.

6 Tɔ̀ nɔ̀nkɔɔrɔn Faridziɲɛn rèè yè bo, è ko màsà kpiri Erodzì kpɛyn dzin neè yè bè e si jà, yè bà ni jaa gaa, yè Yesù dɔ̀unma tàrà dzii ra.

Yesù mòò giri cɛrɛmabeu min niì

7 Àyìwà Yesù ko e re kàràndzin neè, yè bo tɔ̀un, yè dɔ̀n be Galile yu blàa dzii ra. Jàmaà yè bo naà gàne rèè ɲàn giri giri tɔ̀un, yè nà e gbaàn Yesù kpɛyn. Swey boò Galile mar'la ɲàn, swey yè bà daàn Yude mar'la ɲàn.

8 Swey boò Yerusalɛmùn, swey boò gàne sɔn ɲan ci Idume, swey boò Yuridɛn baa kɛ̀yn, swey yè bà boò Tsiirì ko Sidɔ̀n wɔ̀ rèè wòòɲaan ɲàn. Tɔ̀ jàma brìsià na nàa à re, kàtsu à na nìi sapɛ faa, è na tɔ̀ myɛɔ̀n.

9 Tɔ̀un Yesù yè dzin e re kàràndzin neè rà, ci yè konkoroniɛn sɔn mabyɛ̀n tsùù wò re, jàmaà mà nà wò ŋòò geren waa.

10 Àwà, à na ɲìnìnkɔɔn giri cɛrɛmabeo nìi fa, tɔ̀ kamà, gɔɔnta na ni gè o ge ra, twɛy sapɛ na vwɛ̀ɛ à kpɛyn, ye yè bà ni e dzyɛn à ra.

11 Nìì reè to kweykɔɔn twɛy ye ba na à jàu, è na e kunun gban jia à bììn, yè sɛ̀ɛ ci: «Wo Ŋaablà Dzin Kpir'la rìì.»

12 Ŋà, Yesù na e cer'la è tsɛ, sànko è mà nà wò kpàdè waa.

Yesù yè e re kàràndzin teeŋ fii rèè bou min niì

13 Tà shɔ̀ùn, Yesù yè tèyn jèèn tsɛ, nìì reè y'à sàòrà modzìn ì, è twɛy kiri. Yè bè à ra.

14 Tɔ̀ tsuru è mòkun teeŋ fii ɲankɛrɛn, è twɛy kiri kɛɛradzin neè, nìì reè nà bà ni tsuù à ka, tà ko à yè è ka bèe, yè bè Kùnàgoo Dziɔ̀ dè.

15 È fààn sin è ra, nìi dzia à to yè kwey rèè kaa bo kweykɔɔn reè kpɛyn.

16 À mòkun teeŋ fii nìì reè bou, twɛy rìì siin: È jɔ̀naà tsoo na Shimɔ̀n, Yesù yè sɔn ba tɔ̀ raa tsoò tɛ̀y ci Piyɛrì.

17 Yàkubà ko e raa keresi Yùxanà yè ɲɛn Piyɛrì tsɛ, Zhebedè dzin kpiri fii rèè. Yesù yè twɛy tsoo wɔ ci Bɔrinɛzhɛsì, nìi dzuɔn yɛ, è ni a ci ŋaa kpìn'na.

18 Andère ye ɲɛn è tsɛ, ko Filipù, ko Batelemin, ko Matsiyù, ko Tomà, ko Alifù raa dzin kpiri Yàkubà, ko Tadè, ko Kanaaninka kpiri Shimɔ̀n,

19 ko Yudà Sikariyɔtsì, nìi nàu bà Yesù jàànfabaà.

Yesù dziun min niì ci wò na kwey rèè kaà Sùtana baraka ɲan waa.

20 Tà shɔ̀ùn, Yesù yè e kpɛyn sèè na tsii rɔ̀n. Àwà, jàmaà yè bè e ladzyèè mɔn kɔn giri, fɔ è bè wɔ Yesù ko e re kàràndzin neè fa dzi ɲwɛɛ̀n tsu ɲɔn.

21 À re mòò rèè twɛy goo rèè myɛ̀un min niì, yè nà ci ye nàa à kun, ci à kùngɔ fuɔ̀.

22 Sàrìyà kaamoo niì reè na daɔn yè bo Yerusalɛmùn, twɛy na dzian ci: «Kwey rèè kùntsii blà riì tsoo Baalizhebulì, tɔ̀ rii ni à ɲan. A y'a jà à dzia kwey rèè kaa bo mòdzian kpɛyn à tɔ̀ tsoò baraka rɔ̀n nì.»

23 Àwà, tà goomaa shɔ̀ùn, Yesù yè è kiri kpɛ̀rɛ̀ e ra, è gooma è ka gooma bɔɔ ɲan. A ci: «Sùtana bàa dzùrù è sùtana kaa bo ?

24 Màsàbee gè o ge ye dzi fu e yɛrɛ kpɛyn nòn è jee, tɔ barau nì.

25 Gbà soo mòdzin neè to ye dzi fu e si kpɛyn nòn yè jee, tɔ̀ gbàà barau nì.

26 Àwà, Sùtana to ye fu e yɛrɛ kpɛyn è jee ɔ, à fa bara à raa goò yè dò fyeu ɔ ?

27 Mòò pɛn na dzia bè dɔ̀n mòdzin faàntsià rè gbàà doùn, à y'à suun ge reè tsɛ̀, à mà bà à kun shiɔ̀ waa. À y'à kun shìa rìì ŋe, è kòmànà à re gbà dòùn ge reè tsɛ̀.

28 Sààben na, mun nì ci e ra, Adamà dzin mòdzin neè nà gooɲaan ge o ge fa, è to nà Ŋaablà tsoo bara dzii o dzii, Ŋaabla dzia tɔ̀ tsìɛ̀ mɛɛy bo è vu ra.

29 Ŋà, mòò riì nà Ŋaablà re Dzi Fɛnɛɛ tsoo bara, Ŋaablà fa tɔ̀ tsìɛ̀ mɛɛy jà waa. Tɔ̀ gooɲaantsìɛ̀ ni tsuù à tsìfa vu ra kudɛyn.»

30 Yesù twɛy gooma reè dèu, kàtsu è na dziàn ci kwey ni à kpɛyn.

31 Tà shɔ̀ùn, Yesù naà ko à tseyn nèè yè nà nà. Twɛy yè to da rɔ̀n yè mòò ka, ci y'à kiri ye kɔ̀.

32 Tɔ̀ y'a tàrà, jàmaà na tsùuŋnà, yè Yesù laguru. Yè dzin à ra ci: «Wo naà ko wo tseyn nèè yɛ nèe da rɔ̀n, è wo gaa.»

33 Yesù yè dzin è ra ci: «Tsì rii mun na, tsi ì yeè bà mun tseyn ì ?»

34 Nìì reè tsùuŋnà y'à laguru, è jaara gaa be twɛy tsɛ tɔ̀un, è dzin ci: «Mun naà ko mun tseyn nèè rìì yɛ nèe rèè.

35 Mòò riì Ŋaablà saɔ faa, tɔ̀ rii mun tseyn kpiri, tɔ̀ rii mun tseyn taan, è bà mun na.»