Yesù sèè kpunaun min niì
28
1 Àyìwà, ɲànwɔ siɛ̀ la gbee gbishɛɛ̀mà nɔ̀n, shikuan jisee jɔnaa, Mariyamùn Màngàdàràkà taàn, ko Mariyamun tsoo soo ree yè bè, ci ye bèe kɔ̀ɔ̀ siin.
2 È wɔumaà tɔ̀un, dzɔ̀nxɔ̀ɔ̀mà kpinin brisi sɔn yeè bàràma fu jaa soo. Tɔ fau min niì, Tsìfaà rè mɛ̀rɛ̀kɛ sɔn yeè jàà bo na jìrànxɔ rɔ̀n, è nà kpàà brisià kòròngoron bo kɔ̀ɔ̀ dzii ra, è tsuù à tsɛ.
3 Tɔ̀ mɛ̀rɛ̀kɛɛ̀ min niì sapɛ na den deèn a ci ŋaa myɛ̀ɛ̀nkɔɔn, à mà vya reè yè bà fyɛɛ̀ tɛrɛ tɛrɛ, a ci kpaantsɔ.
4 Nìì reè na kɔ̀ɔ̀ kplatsuɔ, twɛy shi ɲaanfaa suun à jɔɔn, fɔ è màsɔ̀ɔ̀nkɔɔn yeè bè cìrì, yè bà a ci fun ì.
5 Mɛ̀rɛ̀kɛɛ̀ yè dzin tàan rèè rà tɔ̀un ci: «E maà shi waa. Yesù rìi gbaun gɔɔ̀ rà, m'a tɔ̀ ye tɔ̀ rii gaa.
6 À na ni mìin dɛ waa. À sèè kpunaun, a ci à y'à deu nìi tsuru. Ye nà à ɲɛnmaa siin.
7 Ye e tabe ye b'a dè à re kàràndzin neè rà, ci à sèè kpunan bou fùn nèè fi. Y'a dè è ra, ci è maa beu è jɔɔn Galile mar'lɔn, ci è nà bè à jà mɔn. Tɔ̀ rii na ni, m'a dè ye ra.»
8 Tàan rèè yè e tabe bo kɔ̀ɔ̀ dziɛ rà tɔ̀un, yè dɔ̀n be. È na shiunà, ŋà è taama sa na dzi fɔ è bè geren. Yè vwɛ̀ɛ̀y be, yè bè kàràndzin neè toro kɔ̀ à goomaa nà.
9 È bèkɔɔn, Yesù yè bàràma è kùùntsi, è dzin è ra ci: «Tswɛ̀y yɛ e re !» Tàan rèè yè e kpɛrɛ̀ à ra tɔ̀un, y'à kun e san nèè rà, yè e kuu à bììn, y'à blàbe.
10 Tà doùn, Yesù yè dzin è ra ci: «E maà shi waa. Ye bè à dè n neema reè rà, ci yè bè Galile mar'lɔn, è nà mun jà mɔn.»
E kɔ̀ɔ̀ kààwɔbaa kaadzin neè duùn wɔu min niì
11 Àyìwà è tàan rèè to shia tsɛ, kɔ̀ɔ̀ kààwɔbaa kaadzin neè swey yè fù, yè bè wɔ̀ɔ̀ doùn, goo o goo fau, yè tɔ̀ sapɛ lakɛ̀ɛ̀y saaka jɔɔndzin neè rà.
12 Tɔ̀un, saaka jɔɔndzin neè ko bɔɔ rèè yè e si ladzyeè. Yè e tsuù, yè byɛ̀n à mà, yè ɲɛyn giri sìn kaadzin neè rà.
13 Yè dzin è ra ci: «Y'a dè ci è ye to ciɛ̀ rà, à re kàràndzin neè nàu fene rɔn, yè nà à fùàn shɔn sen.
14 Jàmààntsià y'a goomaa myɛ̀n, ɲe nà e maxɔbe ɲe yè dzi à dzuun, ye raa yè bo à ɲan.»
15 Kaadzin neè yè ɲɛɛn tsi, y'à shi jiì, a ci à dèu è ra nìi tsuru. Tɔ̀ goomaa yè jee ji Dzyèèsìbee mòdzin neè fi, è bè suu fɔ she dzu.
Yesù kɛɛrɛbe rìi wɔu kàràndzin neè suun
16 Àyìwà kàràndzin teeŋ sɔɔn yè bè tɔ̀un Galile mar'lɔn. Yesù jèn nìi goo dèu è ra, yè bè mɔn.
17 È wɔumaà mɔn, è Yesù jàu min niì, yè e kuu, y'à blàbe. Ŋà, è swey yè e ciri.
18 Yesù yè e kpɛrɛ̀ tɔ̀un, è gooma è ka. À ci: «Dzia sapɛ dzyeèma sìun mun na, jìrànxɔɔ̀ doùn ko dzɔ̀nxɔɔ̀ tsɛ.
19 Tà doùn, ye bè dziɲan tsiɛ kun neè sapɛ re, ye è bà mun ne kàràndzin. Ye è jaara foò Ŋaablà re shia goo rèè rà, Fà Ŋaablà, ko à Dzin Kpir'la, ko à re Dzi Fɛnɛɛ tsoo ra.
20 N goo o goo dèu e ra, ye tɔ̀ sapɛ karàn è ra, y'à màrà. Àwà fɔ dziɲan yeè bè dò, màan ji o ji seron, mun ni ye ka.»