È byɛ̀un à mà min niì ci Yesù yè vu
27
1 Àyìwà ji nàu seey, gbishɛɛ̀mà muri, saaka jɔɔndzin neè, ko dzyèèsìbee mòdzin neè rè bɔɔ rèè yè e tsuù, yè byɛ̀n à mà ci Yesù yè vu.
2 Àwà yè Yesù shì tɔ̀un, yè b'a ka jàmààntsi Pilatsì rè, y'à wɔ tɔ̀ suun.
Yudà yè e yɛrɛ vuu min niì
3 Àyìwà Yudà rìi Yesù jàànfau, tɔ dziu à myɛ̀n min niì ci è byɛɔ̀n à mà ci Yesù yè vu, è jàà e yɛr'la fɔ è bè geren. È warifyɛ moò tsyeòn sen tɔ̀un, è kpɛyn sèè à ka saaka jɔɔndzin neè ko bɔɔ rèè rè.
4 À bèu wɔ, è dzin ci: «Mun gooɲaan fau. Mun mòò sìun san na jààma na ni nìi rà waa.» Twɛy yè dzin ci: «Tɔ̀ na ɲe re shi, à wo rìì kùùngoo.»
5 Àwà, tɔ dèu min niì, Yudà yè warifyɛɛ maa Ŋaablà re gbà blàa doùn, è bo è bè e vu dèyn.
6 Saaka jɔɔndzin neè yè warifyɛɛ tsɛ̀ tɔ̀un, yè dzin ci: «À na dàaŋnà nèe warifyɛ ree yè ji Ŋaablà re gbà blàa ɲɛɛn tsɛ waa, kàtsu à tsììn ni sɔ̀ɔ̀n.»
7 Tà doùn, yè byɛ̀n à mà, y'à ka tsyɛnmyɛnbaa sɔn ne dzù fì, yè tɔ̀ bà tɔn'leè rè fùnwɔma.
8 Tɔ̀ kamà, tɔ̀ dzùà yè bà kir'là arì she ci "tsììn dzuà".
9 Tɔ̀ faumaà yè kɛɛra Yeremi ne gooma de dɔ̀unma sɔn bo e shi tsɛ, nìi yɛ ci:
È warifyɛ moò tsyeòn seun. Isirayɛli dzin neè byɛ̀un dzii rìi mà ci è sàrà à re, à tɔ̀ rii.
10 Y'à seun y'à sìn tsyɛnmyɛnbaà rà e re dzùà sɔ̀ɔ̀n, a ci Tsìfaà na à deò mun na nìi tsuru.
È bèu Yesù ka Pilatsì rè min niì, kitsia yè mɛɛy à tsɛ
11 Àyìwà yè bè Yesù tsìì jàmààntsià jaaterema tɔ̀un, jàmààntsià y'à tey ci: «Wo rìì Dzyèèsìbee mòdzin neè rè màsà kpir'là ɔ̀ ?» Yesù ci: «Wo rìì y'à dèu.»
12 Saaka jɔɔndzin neè ko bɔɔ rèè goomau yè goo o goo sɔ̀n wɔ à ra, à na gèsɔn pɛn dè.
13 Pilatsì yè dzin à ra ci: «È yɛ nìi sapɛ deè wo tsɛ wo na à myɛ̀na ɔn ?»
14 Yesù na gooma à dzu kàjaa pɛn tsɛ. Tɔ̀ goò yè ji jàmààntsià dzii tsɛ fɔ è bè geren.
15 Àyìwà jii sapɛ, Geren n tsɛɛ̀ sɛr'là ye ba na wɔu, jàmààntsià na dɛ̀rɔɔn è kàsòdzian soo bo bàjia, nìi mòdzian sàò.
16 Tɔ̀ y'a tàrà, kàsòdzin soo na ni kàsoò rà, tɔ̀ tsoo Barabasì, à gooɲaan fa tsoo yè bà boo fɔ è bè geren.
17 Jàmaà ladzyeeŋmaà tɔ̀un, Pilatsì yè è tey ci: «Barabasì ko Yesù rìi kir'là Ŋaablà Jaara Modzìàn, twɛy fiɛ̀ ɲàn, ye sào ni min kɛ̀n ni bàji ?»
18 Àwà Pilatsì na à tɔ̀, ci Yesù jaaɲininbe ni è ra nìi fa, tɔ̀ rii kamà y'à wɔ wò suun.
19 Tà doùn, Pilatsì tsùuŋmaà kitsi kununma nɔ̀n, à re tààn yè nèe kɛɛrɛbe rèe ka à re, è dzin à ra ci: «Maà a san ji nèe mòdzin tereonma rèe re goò ɲàn dɛ ! Mun byɛn gereun feèn dzuun sìrààn ɲàn à kamà.»
20 Àwà, saaka jɔɔndzin neè ko bɔɔ rèè yè jàmaà duùn wɔ, ci yè dzin Barabasì yè bàji, Yesù yè vu.
21 Jàmààntsià yè è sèè tey kɔn ci: «Ye sào ni min tsì rii soo baji è fiɛ̀ ɲàn ?» È ci: «Barabasì rìì bàji !»
22 Pilatsì yè è tey ci: «Yesù rìi kir'là Ŋaablà Jaara Modzìàn, ye to ci min fee fa tɔ̀ ra ?» È sapɛ ci: «È gban gɔɔ̀ rà !»
23 À yè è tey kɔn ci: «À to gooɲaan kɛɛn nì soo faɔ̀ ?» Yè e vuà tèyn kɔn ci: «È gban gɔɔ̀ rà !»
24 Àwà Pilatsì nàu à jà wò fa gèsɔn pɛn wùbe à ɲan dɛ, màànkaan blàbe beè vu rìi mà à blàbe beè tɔ̀ vuà rìì mà, è yu sen è sira foò jàmaà jaa ra, è dzin è ra ci: «Nèe kpir'lee vua na n ne goo, à ye rìì lè goo.»
25 Jàmaà sapɛ yeè dzin ci: «Ɲe yè e tsiiŋ, à tsìɛn tsìì yè sàrà ɲe ɲan, è sàrà ɲe dzin nèè ɲàn.»
26 Tɔ̀un, Pilatsì yè Barabasì bàji. Ŋà Yesù, à y'à to yè tɔ̀ dɔrɔ sɛyn ka, tà shɔ̀ùn à y'à wɔ è suun, yè bà ni à gban gɔɔ̀ rà.
Kaadzin neè Yesù byɛun min niì
27 Àyìwà, jàmààntsià rè kaadzin neè yè bè Yesù ka jàmààntsì gbaà fɔɔn doùn kèrè, kaadzin kur'là sapɛ yeè bè e ladzyèè mɔn, y'à laguru.
28 Tà doùn y'à re vya rèè bo à mà, yè vya xe bla ji à vu ra.
29 Yè daà myɛ̀n a ci màsà baanfla, yè tɔ̀ kuu à kùùn, yè kɔ̀n wɔ à suun, tɔ̀ yeè bà kuɔn à sirama sia doùn. Yè e kunun gbaàn à bììn tɔ̀un, y'à ɲanŋmɛɛ̀n ci: «Dzyèèsìbee mòdzin neè rè màsà kpiri, tswɛ̀y yɛ a re !»
30 Yè dzweeyuà fyɛɛ̀ à tsɛ, yè kɔ̀ɔ̀n sen, yè tɔ̀ ka à baan e kuùn.
31 È nàu à ɲanŋmɛn dò watsi riì bwèy, yè vya xee bo à vu ra, y'à re vya rèè ji à mà, yè bo à ka, ci ye bèe à gban.
È bèu Yesù gban gɔɔ̀ rà min niì
32 Àwà, è bokɔɔn yè tsi kpiri sɔn ka, tɔ̀ tsoo Shimɔ̀n, è bà boò wɔ̀ sɔn ɲan ci Sirɛnì. È ci tɔ̀ yeè Yesù gbaàn gɔɔ̀ sen fàan nà.
33 Yè bè, yè bè dzi gàne sɔn ɲan, tɔ̀ tsoo Gɔligotà, nìi dzuɔn "Kùngɔ̀ xɔɔ̀ gàneè."
34 È bèu dzi mɔn yè mììnge sìn à ra, jan sɔn gbiimaɔ̀n tɔ̀ ɲan. Yesù tɔ̀ nèeŋ, à na e tsiì à y'à mìn waa.
35 Àyìwà, y'à gban gɔɔ̀ rà tɔ̀un, yè kaan ji, y'à re vya rèè tanan e si ra.
36 Tà shɔ̀ùn yè e tsuù, y'à kplatsuɔ.
37 À vuɔ kùn nìi nà, yè tɔ̀ sɛbɛn fa y'à gban à kùngɔɔ̀ jìran, nìi yɛ ci: «Nèe Yesù, Dzyèèsìbee mòdzin neè rè màsà kpir'là.»
38 Yè gookoronfabaa mòkun fii gban gɔɔ ì rà à tɛyn, soo ni à sirama re, soo yè bà ni à ɲɔ̀nma re.
39 Dɔnbobaa rèè y'à ɲɛ̀ɛn, yè e kuùn jia,
40 yè dziàn ci: «Wo rìi ci wo Ŋaablà re gbà blàa cià, wo y'à sèè ji bwèy zhììgi doùn, a yɛrɛ tsi sa kɛ̀. Wo rìì ye ba Ŋaablà Dzin Kpir'la, jàà bo gɔɔ̀ rà sa kɛ.»
41 Saaka jɔɔndzin neè, ko sàrìyà kaamoo reè, ko bɔɔ rèè sa y'à ɲanŋmɛɛ̀n, yè dziàn ci:
42 «N ci à to mòò kpɛrɛ ì tsiu ? À fa e yɛrɛ tsi ɔ ? È ba Isirayɛlì màsà kpir'là, è jàà bo gɔɔ̀ rà dòònun sa kɛ ! È dzi tɔ̀ fa, ɲe nà ɲɛn à ra.
43 À na e kɛɛ̀yfaɔ̀ Ŋaablà rii mà gbɛ ? À goo ye ba dzi tɔ̀ ra, tɔ̀ y'a tsi kɛ̀, kàtsu à dziun ci wò rii Ŋaablà Dzin Kpir'la.»
44 Gookoronfabaa nìì reè na gbaɔn à ka, twɛy sa y'a ɲɛ̀ɛn tɔ̀ ɲɛ̀ùn'n kuru soo rà.
Yesù yè e xɔn bou min niì
45 Àwà, bwèè ni sènfi watsi riì bwèy, tsitsiì brìsi yè wɔ jàmaàn sapɛ doùn. È to tɔ̀ tsuru, fɔ è bè suu fɔ ɲɛ̀rɛɛ̀rà dzu.
46 Ɲɛ̀rɛɛ̀rà wɔumaà, Yesù yè gɛyn vu blà bo. À ci: «Elì, Elì, lemà sabakitanì ?» È re kungoòmàà ɲàn, tɔ̀ dzuɔn ci: Mun ne Ŋaablà, mun ne Ŋaablà, fee y'à tou w'a bon wɔ mun na ?»
47 Nìì reè na tsìiŋnà mɔn, twɛy swey tɔ̀ myɛ̀un, yè dzin ci: À kɛɛra Aliì rìì kir'là.»
48 Tɔ̀ nɔ̀nkɔɔrɔn, è ɲan mòò sɔn yè vwɛ̀ɛ̀y è bè fu sɔn sen, à y'à mùù mììngè kùunma nɔ̀n, à y'à wɔ gɔ̀ɔ sɔn na, è nà à tsùù Yesù dzii ra, è bà ni à mìn.
49 Dzyee rèè ci: «À to mɔn, m'a siin, kɛɛra Aliì ye ba nà nà à tsi o.»
50 Yesù yè sèè è gɛɛy vu blà bo kɔn, è xɔn bo.
51 Tɔ fau min niì, Ŋaablà re gbà blàa shiɲaanfi kunun vyaa yè vyɛ̀ fii è sen jiran nɔ̀n, fɔ dzɔn nɔ̀n. Dzɔ̀nxɔɔ̀ yè kpìnìn tɔ̀un, faa rèè yè tara tara.
52 Fùnkɔɔ reè yè san ji, Ŋaablà re mòdzin saunma rèè giri yè sèè kpunan.
53 Yesù sèè kpunaunmaà shɔ̀ùn, yè bo kɔ̀ɔ̀ rèè doùn, yè bè dɔ̀n Yerusalɛmùn, Ŋaablà re wɔ̀ɔ̀ doùn, yè e yɛrɛ kpadè mòò gir'la.
54 Kaadzin jɛrɛ̀blàtsià ko kaadzin dzyee niì reè sapɛ na Yesù kplatsuɔ, twɛy tɔ̀ dzɔ̀nxɔ̀ɔ̀mà kpin'na ko goo dzyee fauma rèè jàu min niì, yè shi fɔ è bè geren. È ci: «Sààben na, nèe Ŋaablà Dzin Kpir'la rìì taki.»
55 Tàan giri na tsìiŋnà jeenà, yè bà siin faa. Twɛy tàan rèè rìì yè e gbaun Yesù kpɛyn è bo fɔ Galile mar'lɔn, yè faagoò faa à re.
56 Twɛy tàan rèè ɲàn, Mariyamùn, Màngàdàràkà taàn na ni, Yàkubà ko Yusufù na Mariyamùn ni, Zhebedè dzin kpiri fii rèè naà yè bà ni.
Yesù fùàn wɔu min niì
57 Àyìwà ɲɛ̀rɛɛ̀rà nàu dzi, kpiri getsi sɔn yeè nà, tɔ̀ tsoo Yusufù, è bà boò Arimate wɔ̀ rɔ̀n. Tɔ̀ sa na baɔ̀ Yesù rè kàràndzin.
58 Tɔ̀ yeè bè Pilatsì rè, è bè Yesù fùàn fyɛ̀n à re. Pilatsì to yè shi sin tɔ̀un, ci è sìn à ra.
59 Tà doùn Yusufù yè Yesù fùàn sen, è fùn wɔɔ vya ye wɔ à mà.
60 Tà shɔ̀ùn, è b'a wɔ fùnkɔ̀ɔ̀ ye sɔn ne, à na tɔ̀ niì ɲɛɛna faà ɲàn e yɛr'la raa. À dòu tɔ̀ ra, è kpàà brisi sɔn koròngoron tsùù kɔ̀ɔ̀ dzii ra, è kòmànà dɔ̀n be.
61 Tɔ̀ y'a tàrà, Mariyamùn Màngàdàràkà taàn, ko Mariyamun tsoo soo ree na tsùuŋnà kɔ̀ɔ̀ jaaterema.
62 Àyìwà, ɲànwɔ siɛ̀ jɔɔn wɔɔ jisee la gbee rɔn, saaka jɔɔndzin neè, ko Faridziɲɛn rèè yè dzyèè, yè bè Pilatsì rè.
63 Yè bè dzin à ra ci: «Kùntsiɛ̀, nèe mòdzìn sànfiribaa rèe jaamakɔɔn nà, à gooma sɔn deu, ɲe taa too nìi rè. À dziun wò saunmaà shɔ̀ùn, bwèy zhììgìraa sii sèè, wo nà sèè kpunan.
64 Tɔ̀ kamà, à dè kaadzin neè rà, yè kɔ̀ɔ̀ kplatsuù fɔ bwèy zhììgia dzii yè bè tsyɛn. Tɔ̀ ma fa fyeu, à re kàràndzin neè dzia bè à fùàn shɔn sen, tà shɔ̀ùn yè dzin mòdzian nà, ci à sèè kpunan bou fùn nèè fi. Tɔ̀ sànfir'la nà xɔbe kɔn, è geren jɔ̀naà tsɛ.»
65 Pilatsì yè dzin è ra tɔ̀un ci: «Kaadzin neè swey yɛ e re, ye b'a kààwɔɔ̀, a ci à dzi e ra nìi tsuru.»
66 Tɔ̀un, yè dɔ̀n be kɔ̀ɔ̀ kplatsuuma nɔ̀n. È bèu dzi, kpàà niì ka kɔ̀ɔ̀ tsyeeŋna, yè tàànmàshɛn ji tɔ̀ tsɛ, kaadzin neè yè tsùù twɛy y'à kplatsuɔ.