Matthieu 26

Dzyèèsìbee mòdzin neè jɔɔndzin neè byɛ̀un à mà min niì ci Yesù yè vu

1 Ayìwà, Yesù nàu dò twɛy gooma reè sapɛ ra watsi riì bwèy, è dzin e re kàràndzin neè rà ci: 2 «Ye y'à tɔ̀ ci à dzyee tou bwèy fii, Geren n tsɛɛ̀ sɛr'là yè wɔ. È to nà Adamà dziàn wɔ mòdzin ì suun, è bà ni gban gɔɔ̀ rà, è vu.»

3 Tà doùn, saaka jɔɔndzin neè, ko Dzyèèsìbee mòdzin neè rè bɔɔ rèè yè e si ladzyeè saaka jɔɔndzin blaa rè gàne rɔ̀n, tɔ̀ niì tsoo Kàyifè. 4 Yè byɛ̀n à mà, ci ye yè Yesù kun sànbe ka, y'a vu. 5 È to yè dzin ci: «À na wù è fa sɛr'là mà waa, tà boshɔ̀ùn jàmaà nà màànkan fu.»

Tàan sɔn ɲinin kinin dziù koun Yesù kùùn min niì

6 Àyìwà, Yesù nàumaà Betani wɔ̀ rɔ̀n, à na ni Shimɔ̀n nè gànè rɔ̀n, è tɔ̀ niì kir'là byèèmà kpir'là. 7 À ni mɔn, tàan sɔn ye nà e kpɛrɛ̀ à ra ɲinin kinin dziù ka, nìi kpaxɔ, è bà ni bwèyn kpaàma doùn, nìi sa kpaxɔ fɔ è bè geren. Yesù ni ɲwɛɛ̀n nà, taàn yè ɲin'nèe kon à kùùn. 8 Àwà, Yesù rè kàràndzin neè tɔ̀ jàu min niì, à na byɛn è mà waa. È ci: Fee nèe baragoò rèe kùn ? 9 À na dzia gɔɔ kpàxɔù rà à ɲɛɛn yè sìn gbakɔɔn reè rà kɛ̀ !» 10 Yesù tɔ̀ ɲantɔu min niì, è dzin kàràndzin neè rà ci: «Nèe tàan rèe vunuun kɔn kùn ye re ? À yɛ nìi faɔ̀ mun ne, à goowùù rii. 11 Àwà, gbakɔɔn reè, twɛy ni tsuù ye ka kudɛyn, ŋà mun, mun fa bà ni tsuù ye ka kudɛyn waa. 12 À yɛ ɲinin kinin dziù rìi koun mun tsɛ nèe, à tɔ̀ fau nì, à y'à ka mun fùn wɔɔ màbyɛ̀n tsùù. 13 Sààben na, mun nì ci e ra, Kùnàgoo Dziɔ̀ nà dè dziɲan tsiɛ min o min, tàan rèe raa goo faumaà sa nà dè, è taa yeè to à re.»

Yudà Yesù jàànfaà jiu e duùn min niì

14 Àwà, Yesù rè kàràndzin teeŋ fiɛ̀ ɲàn, nìi tsoo Yudà Sikariyɔtsì, tɔ̀ yeè bè saaka jɔɔndzin neè kpɛyn. 15 È bè dzin è ra ci: «Min Yesù wɔ ye suun, ye nà fee sìn mun na ?» Twɛy yè siin, yè warifyɛ moò tsyeùn dan wɔ à suun. 16 È sen tɔ̀ watsia rà, Yudà nà watsi wuu riì tàrà è bà ni Yesù wɔ è suun, è maa è tɔ̀ gaa.

Yesù ko e re kàràndzin neè Geren n tsɛɛ̀ sɛr'là fau esire min niì

17 Àyìwà, Buru fu bɛɛ sɛr'là jisee jɔnaa sii sèè, Yesù rè kàràndzin neè yè e kpɛrɛ̀ à ra, y'à tey ci: «Wo sào ni mìn bè Geren n tsɛɛ̀ sɛr'là ɲwɛyn goo jaa bo wo re min ?» 18 È dzin è ra tɔ̀un ci: «Ye bè wɔ̀ɔ̀ doùn kpiri sɔn ne, ye dzin à ra ci kàrànfaà ci wò re watsia yè e kpɛrɛɔ̀, ci wò ko e re kàràndzin neè to nà Geren n tsɛɛ̀ sɛr'là fa wo rìì lè. 19 Àwà, kàràndzin neè y'à fa a ci Yesù y'à dèu è ra nìi tsuru, yè Geren n tsɛɛ̀ sɛr'là ɲwɛyn goo jaa bo. 20 Dzɔɔ̀n nàu tsì, Yesù ko e re kàràndzin teeŋ fiɛ̀ yè bè e tsuù ɲwɛɛ̀n nà. 21 È ni ɲwɛɛ̀n nà, è dzin è ra ci: «Sààben na, mun nì ci e ra, mòò sɔn nà mun jàànfa ye ɲan.» 22 Tɔ̀ goomaa yè è taama ŋununbe fɔ è bè geren. Tɔ̀un, yè e maa, yè Tsìfaà teè soo soo ci: «À mun nì gbɛ Tsìfaà ?» 23 Yesù ci: «Mòò riì yè e si wɔɔ mun ka ɲwɛyn geè doùn, tɔ̀ rii nà mun jàànfa. 24 Adamà Dziàn kpɛ̀yn nà san, a ci à sɛbɛɔ̀n à re goò tsɛ nìi tsuru. Ŋà, mòò riì nà bà à jàànfaà saabu, tɔ̀ tsìfa raà barau. À tsìfa mà bà na kereu fyeu, tɔ̀ na fyan à mà.» 25 Yudà rìi na nà à jàànfa, tɔ̀ y'a tey ci: «Kàrànfaà, à mun nì gbɛ ?» Yesù yè dzin à ra ci: «Wo rìì y'à dèu.»

26 È ni ɲwɛɛ̀n nà, Yesù yè buru sen, è baraka sìn Ŋaablà ra, à y'à tara tara, à y'à wɔ kàràndzin neè suun, è dzin ci: «Y'a tsi ɲɔn, à mun gɔɔ̀n rìì.» 27 Tà shɔ̀ùn, è yukuun ko e doùn mììnge sen. À re baraka sìunma shɔ̀ùn Ŋaablà ra, à sìn kàràndzin neè rà, è dzin ci: «E sapɛ y'a sɔn min. 28 Àwà, à mun tsìɛn nì, Ŋaablà ka dzyèèsìbee tsìɛn, nìi koun mòò giri kamà, è re gooɲaantsiɛ yè bà ni mɛɛy bo è vu ra. 29 Sààben na, mun nì ci e ra, è sen dòònun nà, mun fa ɛ̀rɛ̀nzhɛ̀n dzian yu mìn dɛ fyeu, fɔ jisee riì, mun nà à yeo mìn ye ka mun Fà Ŋaablà re Màsà gane rɔn» 30 Àwà, yè Ŋaabla makiri ye rèè swey cèè tɔ̀un, tà shɔ̀ùn, yè bo bè Oliviku rèè jèèn rà.

Yesù dziun min niì ci Piyɛrì nà dzin ci wò na wò tɔ̀ waa

31 Tà doùn, Yesù yè dzin e re kàràndzin neè rà ci: «Fen nèe ɲan, ye sapɛ nà vwɛ̀ɛ̀y yeè mun to. Tɔ nà fa, kàtsu à sɛbɛɔ̀n Ŋaablà re goomaa doùn ci:

Mun nà sàà kplàtsuubaà vu, sàà rèè sapɛ to nà jee.»

32 Yesù yè dzin kɔn ci: «Min na sèè kpunan bo saàn ɲàn watsi riì bwèy, mun nà bè ye shù Galile mar'lɔn.» 33 Piyɛrì yè goomaa sen tɔ̀un, è dzin à ra ci: «Dzyee rèè sapɛ kɛnsɛɛn ye vwɛɛ̀y yè wo to, mun na vwɛɛ min wo to byɛ.» 34 Yesù ci à ra ci: «Sààben na, mun nì ci a ra, she fen nèe ɲan, sani tsɛ̀keen yè ben, wo na bà à dè jaa zhììgi faɔ̀ ci wo na mun tɔ̀ waa.» 35 Piyɛrì yè dzin à ra ci: «Arì mun kɛ̀nsɛɛn ye ba nà san wo ka rìì, tɔ̀ pɛn fa à to min dzin ci mun na wo tɔ̀ byɛ.» Àwà, kàràndzìn dzyee reè sapɛ yeè tɔ̀ soo dè.

Yesù bèu Ŋaablà mafyɛ̀n min niì

36 Tà doùn, Yesù yè bè è ka gàne sɔn ɲan, nìi kir'là Gɛtsisemani. Awà è wɔumaà mɔn, Yesù yè dzin è ra ci: «Ye e tsuù mìin, min bè nuu, min bè Ŋaablà mafyɛ̀n.» 37 À bèkɔɔn, è Piyɛrì ko Zhebedè dzin kpiri fii rèè bà e tɛy. Tɔ̀un à taama yè nà e maa è ŋununbee, à duungoo yeè bà doò. 38 È dzin twɛy rà ci: «Taamaŋununbeè ni a ci à nà mun vu. Ye to tsùù n ka mìin, e maà cìi waa.» 39 Tà shɔ̀ùn è kpɛrɛ̀ be jɔɔn dɛyn, è bè e kunun gban, è kuu, è Ŋaablà mafyɛ̀n ci: «Mun Fà Ŋaablà, è ba dzia fa, byɛnbe riì nàkɔɔn yɛ mun tàrà, à dàn gbànbe n na. Tà ko e sa ra, mun naa sàɔ mà fa dɛ, wo raà rìì yè fa.» 40 À nàu dò watsi riì bwèy, è kpɛyn sèè na kàràndzin zhiigia kpà. A nàu wɔ, à y'à jà è sapɛ cìiŋ. Tɔ̀un è dzin Piyɛr'là ci: «Ye na dzi fààn tarà ye yè bà ni to e jaa ra watsi soo basɔùn tsu rii doùn mun ka waa. 41 Ye to e jaa ra, ye Ŋaablà mafyɛ̀n, sànko Sùtana mà nà dzi e dzuun, è dɔn fabɛy goo ɲan waa. Mòdzin gè niì, ŋɛ̀nɛ̀ɲan wuu ni à ɲan, ŋà à ŋɔ̀n nì fyɛn.» 42 E sèè be kɔn e jaa fiira ɲan, è bè Ŋaablà mafyɛ̀n ci: «Mun Fà Ŋaablà, byɛnbe ree jɔɔn ma ba dzia bo bou'n kuru pɛn fɔ è mun tàr'li, wo sàɔ yè fa.» 43 È kpɛyn sèè nau è kpà kɔn min niì, è nà à jà è ciɛ̀. Àwà ciɛ̀ na ni è ra fɔ è bè geren. 44 È bo è tɛyn kɔn, è bè Ŋaablà mafyɛ̀n e jaa zhiigira ɲan tɔ̀ fau'n kuru soo rà. 45 Tà shɔ̀ùn à sèè nau è kpà, è dzin è ra ci: «Ye ciɛ̀ rìì ŋe ye yè bà e ɲanwɔrà ɔ̀ ? Àwà Adamà dziàn yè wɔ gooɲaan fa reè suun, tɔ̀ watsi wɔu dòònun. 46 Ye fù, m'a wa ! Mun jàànfabaà yɛ e kpɛrɛɔ̀.»

È Yesù kuun min niì

47 Àyìwà, Yesù ni tɔ̀ goomaa nà ŋe, nìi Yudà, kàràndzin teeŋ fii rèè sɔn, tɔ̀ yeè nà e kungɔ bo jàma brìsi ka, kaa faa bàmunun ì ko kɔn ì kuɔn twɛy suun. Saaka jɔɔndzin neè ko Dzyèèsìbee mòdzin neè rè bɔɔ rèè rìì na è kaɔ. 48 Yudà, Yesù jàànfabaà, tɔ̀ na tàànmàshɛn kpadeò Yesù kunbaa rèè rà nòn. À na dziɔn è ra ci: «E ye na à jà min si ɲɛun mòò riì fyɛ tsɛ m'a tswà, à wò rii, y'a kun.» 49 Àwà è nàu dzi min niì, Yudà yè e kpɛrɛ̀ Yesù rà suu, è dzin ci: «Kàrànfaà a kɔfen !» È siin è si ɲɛn à fyɛ tsɛ. 50 Yesù yè dzin à ra ci: «N dzwɛynsi a na kuàn jaa bo». Tɔ̀un dzyee rèè yè e kpɛrɛ Yesù rà, y'à kun. 51 Tɔ fau min niì, Yesù kpɛyn dzin neè soo yeè e raa bàmun'nà shɔ̀, è saaka jɔɔndzin blaa rè faagoofadzian raa toro sɔɔ̀n sen bo mɔn cau. 52 Yesù yè dzin à ra tɔ̀un ci: «Bàmun'nà sèè wɔ e taàn doùn. Àwà, gè o ge kaà faa bàmun'nà ka, bàmun'nà nì nà twɛy sapɛ vu. 53 Wo y'à kɛ̀sɛɛ̀ dzùrù ? Wo na à tɔ̀ ci mun dzia n Fa Ŋaablà mafyɛ̀n dòonen ɲan è mɛ̀rɛ̀kɛ rèè kuru bla bla teeŋ fii ko e bonè bàji na mun ne yè nà wɔ mun na ɔ ? 54 À ma kun tɔ̀ tsuru, Ŋaablà re gooma niì dèu, tɔ nà bo e shi tsɛ dzùrù ? Tɔ̀ goomaa nì na dzin ci à nà fa tà tsuru ɔ ?» 55 Tà shɔ̀ùn, Yesù yè dzin jàmaà nà ci: «Mun gookoronfabaa rìì ye yè bà naɔ̀ mun kun bàmunun ì ko kɔn ì ka ɔ ? Mun na n tsuɔ Ŋaablà re gbà blàa fɔɔn doùn siì saa see min mòdzian kàr'na ɔ ? Fee y'à to ye na mun kun ? 56 Àwà, nèe sapɛ fau nì, sànko Ŋaablà re kɛɛra reè na gooma ge o ge deò Ŋaablà re goomaa doùn, tɔ̀ sapɛ yeè bo e shi tsɛ.» Tɔ̀un kàràndzin neè sapɛ yeè vwɛ̀ɛ̀y y'à to.

È beu Yesù ka saaka jɔɔndzin blaa rè min niì

57 Àyìwà Yesù kunbaa rèè yè bè à ka saaka jɔɔndzin blaa rè gàne rɔ̀n tɔ̀un, nìi Kàyifè. Sàrìyà kaamoo reè ko bɔɔ rèè na e ladzyèeŋnà mɔn. 58 È bèkɔɔn Yesù ka, Piyɛrì yè to jeenà è gban à kpɛyn, fɔ yè bè dɔ̀n saaka jɔɔndzin blaa rè gàne rɔ̀n. È bèu dɔ̀n mɔn, Piyɛrì sa yeè bè dɔ̀n è tsuù gànè kplatsuu reè ka, sànko à goo rèè nà e latan nìi tsuru, wò yeè tɔ̀ jà. 59 Saaka jɔɔndzin neè ko kitsi kunun kuru blàa mòdzian sapɛ na gooma ì nì gaa, è nà dzi nìi bà kùn, yè kitsi mɛɛy Yesù tsɛ, y'à vu. 60 Shɛɛrɛ doodebaa giri yè e kpɛrɛ̀ yè sɔn de, ŋà kùn na tarà tɔ̀ pɛn ɲan. À lataan, mòkun fii yè nà e kpɛrɛ̀. 61 Twɛy yè dzin ci: «À dziun ci wo dzia Ŋaablà re gbà blàa ci, wò y'a sèè ji bwèy zhììgi doùn.» 62 Saaka jɔɔndzin blaa yè fù tɔ̀un, è Yesù tey ci: «È yɛ nìi sapɛ deè wo re goò ɲàn, pɛn na ni wo re dèràma ɔn ?» 63 Yesù yè e mɛnshɛ̀n. Saaka jɔɔndzin blaa yè dzin à ra kɔn ci: «Ŋaablà jaamaa tsoò kamà, à dè mùn na wo rìì ye ba Ŋaablà Jaara Modzìàn, Ŋaablà Dzin Kpir'la.» 64 Yesù yè dzin à ra ci: «Wo rìì y'à dèu. Ŋà, mun nì ci e ra, nèe shɔ̀ùn, ye nà Adamà Dziàn tsùuŋma jà Dzitsi Ŋaablà sirama si jaa rè, tà shɔ̀ùn, y'a nàkɔɔn ja jìrànxɔ rɔ̀n mun'na tsɛ.» 65 Tɔ dèu min niì, è dɔ̀n saaka jɔɔndzin blaa kpɛyn fɔ è bè geren, è re mɛ̀yɛɛ vukɔrɔɔ vyɛ̀, è dzin ci: «À Ŋaablà tsoo barau ! Shɛɛrɛ ì gaa kun kɛ̀n kɔn ? E sapɛ na Ŋaablà tsoo bara goòmàà myɛ̀n à dzu dòònun ɔ̀n ? 66 Y'a jàa dzùrù ?» Mòdzian ci: «À wù è vu !» 67 Tɔ̀un, yè dzweeyuà fyɛɛ̀ à jaakɔɔ doùn, yè sikuɔ tèyn boò à tsɛ, y'à dɔr'là e taàkuùn. 68 Yè dziàn ci: «Ŋaablà Jaara Modzìàn, mòò riì wo baun, kɛɛrabee fa a tsìfa dè mùn na.»

Piyɛrì yè e sɔswɛrɔn min niì ci wò na Yesù tɔ̀ waa

69 Tɔ̀ sapɛ ɲan, Piyɛrì na tsùuŋnà fɔɔn doùn. Àwà faagoofadzin taan sɔn yeè nà e kpɛrɛ à ra, tɔ̀ yeè dzin ci: «Wo sa na ni Galileka kpiri Yesù ka.» 70 Piyɛrì yè e sɔswɛy è sapɛ jaa ra. À ci: «Wo yɛ nìi dèe mun na tɔ̀ tɔɔ̀ dɛ.» 71 Tà shɔ̀ùn, Piyɛrì yè e maa è bèe fɔɔn boma dziɛ kpàkèrè. Faagoofadzin taan kpɛrɛ y'à jà kɔn, tɔ̀ yeè dzin mòdzian nà mɔn ci: «Nèe sa na ni Nazarɛtsika kpiri Yesù ka.» 72 Piyɛrì yè e sɔswɛy tɔ̀un kɔn fɔ è kɛɛ̀y. À ci: «Mun na tɔ̀ kpir'la tɔ̀ waa.» 73 Dɛyn nà fa kɔn, nìì reè ni mɔn, twɛy yè e kpɛrɛ̀ Piyɛr'là, yè dzin à ra ci: «Sààben ci yè e de, wo sa yeè è sɔn, kàtsu wo goomau'n kur'la wo danmàà kpàdèe.» 74 Tɔ̀un kɔn, Piyɛrì yè e kɛɛ̀y fɔ è bè wɔ è dzii ɲaan kere e yɛr'la, è dzin ci: «Mun na tɔ̀ kpir'la tɔ̀ waa.» Tɔ̀ nɔ̀nkɔɔrɔn, tsɛ̀ken sɔn yeè ben. 75 Tɔ fau min niì, Piyɛrì taa yeè to Yesù rè gooma deumaà rè nìi yɛ ci: «Sani tsɛ̀keen yè ben, wo nà bà a dè jaa zhììgi faɔ̀, ci wo na mun tɔ̀ waa.» Piyɛrì yè bo bè da rɔn tɔ̀un, è bè gɛɛy cèreoma.