Matthieu 25

Yesù gooma bɔɔ nìi ka tàlen baun canguru tsyeòn tsɛ

1 Ayìwà, Yesù yè nèe gooma bɔɔ rèe ka tàlen ban è re kɔn. À ci: «Ŋaablà re Màsàbee goo rèè nà bà a ci canguru mokun tsyeùn nèe raa goò kaatsi. Yè e re fìtsina rèè seun fene rɔn, yè bo ci ye bèe kɔɲɔn kpiri kuuntsima nɔ̀n.

2 Nùn na ni è ɲan, akiri na ni twɛy rè waa. Ŋà dzyee nùàn, akiri ni twɛy rè.

3 Àwà akiri bɛy reè yè e raa fìtsina rèè seun, è na ɲinin sen e suun waa.

4 Ŋà akiritsi rèè yè e raa rèè seun, twɛy yè ɲinin sa sen e suun ge ì doùn.

5 Tà doùn, kɔɲɔn kpir'là yè cin, à na na waa. Cìi yè cangur'leè sapɛ kun, yè cìi.

6 Feèn nàu wɔ e tar'la mà watsi riì bwèy, vu sɔn yeè bo fààna ci: "Kɔɲɔn kpir'là yɛ nèe, ye bo y'a kùùntsi !"

7 Tɔ̀un canguru mokun tsyeùn nèe sapɛ yeè kpunan. E kpunaun, yè e re fìtsina rèè dzu bo.

8 Akiri bɛy reè, twɛy yè dzin akiritsi rèè rà ci: "Ye e re ɲin'nèè sɔn sin mùn na, ɲe re fìtsina rèè gaa dzi."

9 Akiritsi rèè ci: "À fa dzi fa. Ɲe suun naà fa ye ko ɲe sa bo waa. Nìi fyan, ye bè ɲinin gɔɔ reè rè, ye sɔn fi.

10 Àwà, è dɔ̀n beumaà ɲinin fima nɔ̀n, kɔɲɔn kpir'là yè nà è shɔ̀ùn. Tɔ̀un, nìi reè mabyɛuna, à ko twɛy yè dɔ̀n kɔɲɔn gbaà doùn, dziɛ̀ yè sòò.

11 Tà shɔ̀ùn, è sa yeè bo ɲinin fima nɔ̀n yè nà. Dziɛ̀ sòoŋmaà tɔ̀un, è ci: "Tsìfaà, Tsìfaà, dziɛ̀ san mùn ne."

12 Tɔ̀ yeè dzin è ra ci: "Sààben na, mun nì ci e ra, mun na ye tɔ̀ waa."»

13 Yesù yè dzin e re kàràndzin neè rà tɔ̀un ci: «Ye to tsùù e jaa ra, kàtsu ye na à jisee tɔ̀, ye to na à watsi tɔ.»

Faagoofadzin neè rè sɛn'na kuun'n kur'la goomaa

14 Àyìwà, è dzin tà shɔ̀ùn kɔn ci: «Ŋaablà re Màsàbee nà bà nèe kpir'lee sa raa goò kaatsi: à bèkɔɔn wɔ̀'ùn, è re faagoofadzin neè kiri, è suun nafor'la goojaa wɔ to è suun.

15 À sɛnu kunun nun sìun soo rà, è fii sìn soo rà, zhììgìraa è soo sin tɔ̀ ra. È soo sookɔɔn sapɛ dzia nìi, è tɔ̀ sìn è ra, è dɔ̀n be jìɛ̀ rà.

16 Tɔ̀un, nìi sɛnu kunun nuàn tàrau, tɔ̀ yeè duru dzii kun suu è faagoo fa à ka, à y'à tsuru nùn tàrà.

17 Kunun fiitsià sa yeè tɔ̀ soo fa, tɔ̀ sa yeè e raà tsuru fii tàrà.

18 Ŋà nìi kunun soo tàrau, tɔ̀ yeè bè, è bè kɔ̀ɔ̀ ɲɛɛn dzù rɔ̀n, è tsifaà rè ɲɛɛn wɔ mɔn.

19 Àwà watsi gbaan tà shɔ̀ùn, è tsìfaà yè sèè na. È dzin è ra tɔ̀un, ci yè ɲɛɛn kpunan bo wò re.

20 Sɛnu kunun nuàn sìun nìi ra, tɔ̀ yeè e kpɛrɛ̀ e raà tsuru nùn kpɛrɛ ka, è dzin ci: «"Tsìfaà, wo kunun nun nì sìun mun na, ŋà m'a tsuru nùn kpɛrɛ tàrau, à yɛ nèe."»

21 À tsìfaà yè dzin à ra tɔ̀un ci: «"Tɔ wùbeu, wo faagoofadzin wuu, w'e bà tereòn. Wo tereun nèe goorii rèe faa doùn, mun nà wo tsùù blà kuùn. Nà a taama dzibe a tsifaà ka."»

22 Kunun fiɛ̀ sìun nìi rà, tɔ̀ sa yeè e kpɛrɛ, è dzin ci: «"Tsìfaà, wo kunun fii rìì sìun mun sa ra, ŋà, mun sa y'a tsuru fii kpɛrɛ tàrau, à yɛ nèe."»

23 À tsìfaà yè dzin à ra ci: «"À wùbeu, wo faagoofadzin wuu, w'e bà tereòn. Wo tereun nèe goorii rèe faa doùn, mun nà wo tsùù blà kuùn. Nà a taama dzibe a tsifaà ka."»

24 Sɛnu kunun soo sìun nìi rà, tɔ̀ sa yeè e kpɛrɛ̀, è dzin ci: «"Tsìfaà, m'a tɔ̀u ci wo mòdzin, nìi rè goò xɔ. Wo na gèdzin jiɔ̀ min niì, wo shìmàndzin gaa mɔn. Wo to na shìmàndzin sɛɔ̀n min niì, wo tɔ̀ shìmaan ladzyee.

25 Tà doùn, mun shiu, min bè wo re sɛnu kun'na mɛnɛn dzù rɔ̀n, à to yɛ nèe, à wo raa rìì."»

26 À tsìfaà yè dzin à ra tɔ̀un ci: «"A faagoofadzin ɲan, e bà sàànmaan. Wo na à tɔ̀ ci mun na gèdzin jiɔ̀ min niì, ci mun shìmàdzin gaa mɔn kɛ̀ ? Mun to na shìmàndzin sɛɔ̀n min niì, mun tɔ̀ shìmaan ladzyee kɛ̀ ?

27 Àwà wo ye ba na tɔ̀ tɔ̀, wo na bèe mun ne ɲɛɛn sìn nàfòrò mar'leè rà. Tɔ̀un mun sèè naumaà, mun na bèe à ko e tɔn'nà sen.

28 Nìi sɛnu kunun tsyeòn tàrau, y'a raa soo tsi, y'a sìn tɔ̀ ra".

29 Tà doùn, sɔn ni nìi rè, gè nà bà tɔ̀ raà tɛ̀y, giri yè bà ni à re. Ŋà pɛn na ni nìi rè, kiɲaanin nìi ni à re, tɔ̀ sa nà tsi à ra.

30 Àwà nèe faagoofadzin dɔntsɔ̀bɛy riì yɛ, y'a sen maa da rɔ̀n tsitsiɛ̀ rà, gɛɛy boo ko ɲiun taa nà bà ni min niì.

Mòdzian nà ɲankɛrɛn nìi tsuru tsìɛ̀ sii sèè

31 Yesù yè dzin kɔn ci: «Adamà dziàn ye na nà e blabee doùn watsi riì bwèy, à ko mɛ̀rɛ̀kɛ rèè sapɛ, à nà e tsuù e re màsà gbaniɛn tsɛ, blàbee màsà gbaaniɛn.

32 Tɔ̀un, jàmàan rèè sapɛ modzin nà nà e ladzyèè à bììn, è ɲankɛrɛn bo e si ɲan, a ci dzwɛka kplatsuubaa yè e re dzwɛkà rèè ɲankɛr'na nìi tsuru, è sàà rèè ko ba reè bo e si ɲan.

33 À nà sàà rèè ji e sirama re, è ba reè ji e ɲɔnma re.

34 Tà doùn, nìì reè ni màsà kpir'là sirama sia rè, à nà dzin twɛy rà ci: "Mun Fà Ŋaabla dzwɛ kuɔn ye nìì reè mà, ye nà. Màsà gane riì mabyɛ̀n tsùuŋnà ye re fɔ dziɲaan jɔ̀n bwey, ye nà dɔ̀n mɔn, y'a bà e re shɛn.

35 Àwà dzu na ni mun na, ye to mun kɔ̀u ɲwɛyn, min ɲɔn. Mìnoo na ni mun na, ye to mun kɔ̀u yu, min n min. Mun na tɔnɔn, ye to mun kuun'n kuru wuu fau.

36 Mun na ni n ma xɔ ra, ye to vya jiu mun mà. Mun ɲìniun, ye to bèu mun siin. Mun na ni kàsoò rà, ye to nàu mun kpà."

37 Twɛy mòdzin tereonma rèè nà dzin tɔ̀un ci: "Tsìfaà, ɲe wo dzukɔɔn jau watsi kɛn, ɲe yè wo kɔ̀ ɲwɛyn ? Ɲe wo mìnòòkɔɔn jau watsi kɛn, ɲe yè wo kɔ̀ yu ?

38 Ɲe wo tɔnɔnkɔɔn jau watsi kɛn, ɲe yè wo kuun'n kuru wuu fa ? Ɲe wo màxɔ̀ɔ̀ma jau watsi kɛn, ɲe yè vya ji wo mà ?

39 Ɲe to wo ɲìnìnkɔɔn jau watsi kɛn, tàmafa kàsoò rà, ɲe yè bè wo siin ?"

40 Màsà kpir'là nà dzin è ra tɔ̀un ci: "Sààben na, mun nì ci e ra, ye twɛy tsuru fau mun neema kiɲaanin nèe rèè mòò sɔn ne min niì, ye y'à fau mun nì nè."

41 Tà shɔ̀ùn, nìì reè ni Màsà kpir'là ɲɔ̀nmà sì jaa rè, à nà dzin twɛy rà ci: "Ye dangauma rèè, ye bo n tɛyn, ye bè jeenà. Sà dzi bɛy riì màbyɛ̀n tsùuŋnà sùtana ko e re mɛ̀rɛ̀kɛ rèè rè, ye bè mɔn.

42 Àwà, dzu na ni mun na, ye to na ɲwɛyn sìn mun na min ɲɔn waa. Mìnoo na ni mun na, ye to na mun kɔ̀ yu min n min waa.

43 Mun na tɔnɔn, ye to na mun kuun'n kuru wuu fa waa. Mun na ni n ma xɔ ra, ye to na vya ji mun mà waa. Mun na ɲìnìnkɔɔn, min bà na ni kàsoò doùn, ye to na be mun siin waa."

44 Twɛy sa nà dzin tɔ̀un ci: "Tsìfaà, ɲe wo dzukɔɔn jau watsi kɛn, ɲe wo mìnòòkɔɔn jau watsi kɛn, ɲe wo tɔnɔnkɔɔn jau watsi kɛn, ɲe wo màxɔ̀ɔ̀ma jau watsi kɛn, ɲe wo ɲìnìnkɔɔn jau watsi kɛn, ɲe to wo jàu kàsoò rà watsi kɛn, ɲe na goo fa wo re ?

45 Màsà kpir'là sa to nà dzin è ra tɔ̀un ci: "Sààben na, mun nì ci e ra, ye na twɛy tsuru fa mun neema kiɲaanin nèe rèè mòò sɔn ne min niì waa, ye na à fa mun nì nè waa.

46 Àwà twɛy mòdzin neè nà bè byɛnbe do bɛɛ ɲàn tɔ̀un. Mòdzin tereonma rèè, twɛy yè bè jaamabe dziù dò bɛɛ ɲàn."»