Luc 5

Kàràndzin neè ji giri kuun Yesù baraka rɔ̀n min niì

1 Ayìwà, sii sɔn see, Yesù na tsìiŋnà Genɛzarɛtsì yu blàa dzii ra. Jàmaà na tsìiŋnà min niì sapɛ y'à laguru, yè bà Ŋaablà re goomaa lamyɛɛ̀n Yesù dzu.

2 È Yesù to Ŋaablà re goomaa jaa dèè rà, è konkoron bla fii jà yu blàa dzii ra. Ji kun neè na boo twɛy konkor'neè doùn, yè bà e re yɔ̀ rèè fòo.

3 Twɛy konkoron bla fii rèe ɲan, soo na kpiri sɔn naa nìi tsoo Shimɔ̀n. Tɔ̀un, Yesù yè bè dɔ̀n è tsuù tà doùn. Tà shɔ̀ùn, Yesù yè Shimɔ̀n kiri è dzin à ra ci:

«Shimɔ̀n, nà konkor'na ka yuà doùn kèrè dɛ̀ɛnin, è bo yu dziɛ rà.»

Shimɔ̀n konkor'na bònbou yu dziɛ rà min niì, Yesù tsùuŋmaà yè to è maa è mòdzian kàr'na.

4 Ayiwà, Yesù nàu gooma do watsi riì bwèy, è dzin Shimɔ̀n nà ci: «Shimɔ̀n bè konkor'na ka yuà tsunbema nɔ̀n, a ko a koòsi rèè, ye e re yɔ̀ rèè maa yu rɔ̀n, ye jia kun.»

5 Shimɔ̀n yè dzin Yesù rà tɔ̀un ci: «Mùn kàrànfaà, ɲe feen ko e kur'la sapɛ fau ji kuan nà, ɲe to na gèsɔn pɛn tàrà waa. Wo to y'à gaaŋ mun ne nòn, tɔ̀ kamà mùn nà yɔ̀ rèè maa kɔn.»

6 Tɔ̀ ɲan, Shimɔ̀n ko e koòsi rèè, yè e re yɔ̀ rèè sen, yè è maa. E yɔ̀ rèè maaŋ min niì, è sa yeè ji giri kun, fɔ è bè bà jàci yɔ̀ rèè sa ni shɛn.

7 E kòòsi nìì reè na ni konkoron bla soo ka, yè e si ŋààn twɛy rà, ci yè nà wɔ ye ra. Twɛy sa yeè nà ko e re konkor'na ka. E nàu wɔ min niì do, yè konkoron bla fiɛ̀ sa tsyɛ ji rèè rà, fɔ konkor'neè gaa jàà bè yuà dzuun.

8 Shimɔ̀n Piyɛrì tɔ̀ jà nìi fau, è nà e kunun gban Yesù bììn, è dzin à ra ci: «Mùn Tsìfaà, a bònbo n na, kàtsu, mun mòdzin gooɲaan tsiɛ ni nìi vu ra !»

9 È tɔ̀ ji kun tsu nìi fau, tɔ̀ goò na Shimɔ̀n ko e koòsi rèè sapɛ ɲɛyn shɛɔn.

10 Mòkun fii nìì reè na ni ko Piyɛrì ka, tɔ̀ na Zhebede tsoo sɔn na dzin kpiri fii. Twɛy tsoo na ci, Yàkubà ko Yùxanà. Twɛy sa ɲɛyn na shɛɔn tà tsuru. Tɔ̀un, Yesù yè dzin Shimɔ̀n nà ci: «Maà shi waa ! È sen she ra, wo nà bà mòdzin nì gaa, yè bà Ŋaablà re mòdzin ì jàci wo na ji rèè kuàn nìi tsuru.»

11 È sapɛ dzyeèmaa nàu wɔ ko konkor'neè ka yu dziɛ rè nìi tsuru, yè konkor'neè ko gè rèè sapɛ bato mɔn, yè e gban Yesù rà.

Yesù byèèmà kpiri sɔn cɛrɛmabeu min niì

12 Tà shɔ̀ùn, è Yesù to sii sɔn see, Galile mar'la wɔ̀ sɔn ɲan, è tsi ko byèèmà kpiri sɔn ka. Tɔ̀ kpir'la raa byèèmà ɲìn'nà na ɲan, fɔ è bè geren. A dziu Yesù jà min niì, è nà e kunun gban, è mɛɲɛn, è jaà kuu dzùà tsɛ, à y'à màfyɛ̀n ci: «Mùn Tsìfaà, wo y'a tsiì, wo dzia mun cɛrɛmabe, min bà mòdzìn fɛnɛ.»

13 Yesù yè e sià tsùù kpir'la tsɛ, è dzin à ra ci: «Min tsiiŋ, wo yè cɛrɛmabe.»

Tà gàne rɔ̀n ko e sa, kpir'la rè byèèmà ɲin'nà yè dò, è cɛrɛmabe.

14 Yesù yè dzin kpir'la rà tà shɔ̀ùn ci: «Maà à lakɛɛ̀y mòò rà dɛ ! Bè saaka goojaabobaà rìì lè, tɔ̀ yeè b'à siin. Ŋaablà saaka borama nìi dèu kɛɛra Musà rà sàrìyaa doùn, e tɔ̀ bo a fɛnɛbeumaà kamà. Tɔ̀ nà à kpàdè mòdzian sapɛ ra, ci wo cɛrɛmabeu.»

15 Yesù dziunmaà ko e sa ci kpir'la mà à dè mòò rà, tɔ̀ pɛn na à to Yesù tsoò yè to bo bɛy waa. Mòò giri na nàa, yè nà e toro wɔ à re goomaa rè. Ɲìnìnkɔɔn niì reè ni, twɛy yè bà na à gaa ye yè cɛrɛmabe.

16 Kudɛyn, Yesù na bèe jènjàà kor'nà doùn, è bè Ŋaablà mafyɛ̀n.

Yesù mùrùku sɔn cɛrɛmabeu min niì

17 Kààmoo swey na ni Dzyèèsìbee mòdzin neè ɲàn, yè bà na twɛy kir'là ci Faridziɲɛn rèè. Sii sɔn see, è Yesù to kàr'nà nà, tɔ̀ y'a tàrà, twɛy Faridziɲɛn rèè swey ko sàrìyà kaamoo reè swey sa na tsùuŋnà mòdzian ɲàn, yè bà e toro wɔɔ à re. Twɛy Faridziɲɛn rèè, ko twɛy sàrìyà kaamoo reè swey na boo Galile mar'la wɔ̀ rèè sapɛ, ko Yude mar'la wɔ̀ rèè sapɛ, ko Yerusalɛmùn wɔ̀ rɔ̀n, yè nà. Mùn Tsìfa Ŋaablà re Dzia na ni Yesù ɲàn, è bà dzia ɲìnìnkɔɔn reè cɛrɛmabeè.

18 Ayìwà, è Yesù to mòdzian kàr'nà nà, mòdzin swey yè nà ko kpiri murùkuuma sɔn ka, ɲìnìnkɔɔn seen gèè tsɛ. E sàò na ni à re, yè dɔ̀n à ka gbàà doùn, yè bè à tsùù Yesù jaaterema. Ŋà, jàmaà blàbe ɲaanfaa suun, è nà à bà nìi tsuru yè dzi dɔunma tàrà yè tɔ̀ jaa gaa gban kosokoro.

19 E na dɔ̀nma jà nìi fa waa, yè tèyn gbàà tsɛ ko e re ɲìnìnkɔɔn ka. E bèu wɔ mɔn, gbàà gbàma nìi fa, yè kɔ̀ɔ̀ bo, yè tɔ̀ bà dɔ̀nma. Tɔ̀un, yè fɛɛdzin neè shì ɲìnìnkɔɔn seen gèè rà. Tɔ fau, yè twɛy kun, yè e re ɲìnìnkɔɔn jàà jàmaà shiɲaanfi payi, è bè tsùù Yesù bììn.

20 Yesù y'à jàu ci twɛy mòdzin neè ɲɛun wò ra min niì, è dzin mùrùkua rà ci: «N dzunwɛynsi, wo re gooɲaan tsiɛ mɛɛy bou wo vu ra.»

21 Sàrìyà kaamoo reè ko Faridziɲɛn nìì reè na ni mɔn, twɛy yè e maa yè dziàn e duùn ci: «Nèe kpir'lee tsì rii nèe tsuru, è bà e gɔɔ̀n Ŋaabla ka ? A ma ba Ŋaablà soo boshɔ̀ùn, tsì rii soo dzia dzin mòò rà, ci wo re gooɲaan tsiɛ mɛɛy bou wo vu ra ?»

22 Nìi na ni twɛy mòdzin neè duùn, Yesù na tà tɔ̀. E dzin è ra ci: «Feera nèe goo kaatsi rèe yè bà ni ye duùn ?

23 Min ye tey ɔ, e dzin mùrùkua rà, ci à re gooɲaan tsiɛ mɛɛy bou à vu ra, tàmafa e dzin à ra ci è fù è jìì, ye re o, kɛ̀n ni dè dzi twɛy fiɛ̀ ɲàn ?

24 Awà, ye nà à tɔ̀ she, ci à dzi ni Adamà Dziàn nà, è gooɲaan tsiɛ mɛɛy bo mòò vu ra dziɲan tsiɛ doùn.»

Tɔ̀un, è dzin mùrùkua rà ci: «Mun ci e fù, a re ɲìnìnkɔɔn seen gèè sen, e b'à re tsii !»

25 Tà nɔ̀nkɔɔ rɔn, kpir'la yè fù mòdzian sapɛ jaa ra, è re ɲìnìnkɔɔn seen gèè sen, è dɔ̀n be e re tsii. A bèkɔɔn, è tsoo dzi ɲɛn beè Ŋaablà tsɛ.

26 Tà goò fau gè o ge jaa ra, è ji twɛy sapɛ dzii tsɛ. È yè e maa yè tsoo dzi ɲɛɛn Ŋaablà tsɛ, è ɲɛyn shɛunma yè dziàn e si ra ci: «Xan ! Ɲe kabagoo goo ì jàu she, ɲe na dɛɛ̀y ɲe yè nìi tsuru jà ŋe waa.»

Yesù Lɛvì kiriu min niì, à y'à bà e re kàràndzian sɔn

27 Ayìwà twɛy goo rèè sapɛ shɔùn, Yesù yè bo mɔn, è dɔ̀n be. A dɔ̀n bokɔɔn, è kɔnsɔɔntsibaa sɔn ja, tɔ tsùuŋnà e raa kɔnsɔɔn tsi gbaà doùn. Tɔ̀ kpir'la tsoo na ci Lɛvì. Tɔ̀un, Yesù yè dzin Lɛvì rà ci: «Fù a gban mun kpɛyn, e bà mun ne kàràndzian sɔn.»

28 Lɛvì yè e raa faagoò sapɛ dzii bà, è fù, è gban à kpɛyn.

29 Awà, Lɛvì yè nà tɛy blà fa Yesù tsoo ra e re tsii rɔ̀n. Mòò giri na ni Yesù ko e re kàràndzin neè ka tà ɲwɛyn ɲɔnma nɔ̀n. Kɔnsɔɔntsibaa giri na ni, mòò kpɛrɛ ì sa yeè bà na ni.

30 Faridziɲɛn rèè swey, ko twɛy rè sàrìyà kaamoo reè sa na nàɔ siin fa. Twɛy mòdzin neè tɔ̀ jà nìi fau, tɔ̀ na dzibe twɛy rà waa.

Yè Yesù rè kàràndzin neè tey ci: «Fee y'à to, ye yè bà ɲwɛɛ̀n ɲɔɔ̀n kɔnsɔɔn tsi reè, ko mòdzin faadzii ɲaan neè ka ?»

31 Yesù yè è re goomaa latsi, è dzin è ra ci: «Mòdzin niì reè cɛrɛma, twɛy màgoo na ni janfabaà rà waa. Ɲìnìnkɔɔn reè rìì màgoo ni à ra.

32 Mòdzin niì reè y'à jàa ci ye tereòn, mun na naɔ̀ twɛy kamà dziɲan tsiɛ doùn waa. Gooɲaan tsiɛ ni nìì reè vu ra, mun naɔ̀ n vu bo twɛy rìì là, yè e re jaamabee fau'n kur'la lakere, yè tsi.»

Yesù ci goo bɔrɔɔ ko goo yee na dzia bà soo waa

33 Tɔ̀un, swey yè dzin Yesù rà jàmaà ɲàn ci: «Yùxanà raa kàràndzin neè, ko Faridziɲɛn rèè raa kàràndzin neè suàn wɔɔ̀, yè Ŋaablà mafyɛ̀ɛn watsi giri. Wo raa rèè to na twɛy watsi reè pɛn toò ni è na ɲwɛyn ɲɔn, yè mììn fa waa.»

34 Tà goomaa dèu min niì, Yesù yè siin è tàlen soo ban è re ci: «Ye duungoo ma ɔn, kɔɲɔn goo sii sèè o, ye ni dzi kɔɲɔn kpir'là ko e dzyeèsi rèè to esire, ci kɔɲɔn kpir'là dzyèèsi rèè yè sun karaba wɔ ɔ ? Tɔ̀ na dzia fa waa !

35 Ŋà, yè na kɔnɲɔn kpir'là sen bo è ɲan sii rìi sèè, tɔ̀ maanaa nà à to, yè sun wɔ tɔ̀ sii sèè.»

36 Tà shɔ̀ùn, Yesù yè tàlen soo kpɛrɛ ban è re kɔn ci: «Mòò pɛn na sɔn vyɛ boò e re vya ye ra, à ka vya bɔrɔɔ tsyɛ̀ɛ̀rɛ waa. E tɔ fa, a vya yee rìì barau. Wo yeu riì bɛ̀rɔɔ̀ bɔrɔɔ rà, twɛy fiɛ̀ tsu fa e si sen waa.

37 Tà faun'n kuru soo rà, mììn ge rìi ni dɔ̀ɔ̀ tsuru, mòò pɛn na tɔ̀ yɛy jia yu seen vɔ̀rɔ̀ bɔrɔɔ doùn waa. E tɔ̀ fa, è na fuu, è kànkan, à tɔ̀ yu vɔrɔ bɔrɔɔ jeè, è kon. Tɔ vɔ̀r'la sa bar'la.

38 Tɔ̀ kamà, à wù tà tsuru dɔ̀ɔ̀ yɛɛ̀ yè bà jia vɔ̀rɔ̀ ye reè doùn.

39 M'a tɔ̀ sa, ci mòò pɛn na dɔ̀ɔ̀ bɔɔ̀ mìan, è sɔ̀ɔ̀n dɔ̀ɔ̀ yɛɛ̀ kpɛyn dɛ, kàtsu, à y'à jàa ci dɔ̀ɔ̀ bɔɔ̀ rìì dzi.»