Luc 6

Yesù ci wò rii ɲànwɔ siɛ̀ kùntsiɛ̀

1 Ayìwà, sii sɔn see, Yesù ko e re kàràndzin neè na dɔ̀n boò dzù swey ɲàn. Tɔ̀ jisee ree na ɲànwɔ sii. È dɔ̀n bokɔɔn twɛy dzù rèè ɲàn, Yesù rè kàràndzin neè yè fù, yè twɛy dzù rèè shìmàn tan neè swey kɛɛ̀, yè è dzin nèè tsɛɛnmaa e sitaa doùn, y'à tàa.

2 Tɔ̀ y'a tàrà, Faridziɲɛn rèè swey na ni mɔn. Twɛy yè dzin è ra tɔ̀un ci: «Y'a tɔ̀ ci goo rìi na dàaŋnà è fa ɲànwɔ siɛ̀ mà, ɲe re sàrìyaa doùn, feera ye tɔ̀ faa ?»

3 Yesù yè goomaa sen tɔ̀un, è dzin è ra ci: «Dzuà màsà kpiri Dawudà ko e koòsi rèè kuun sii rìi sèè o, à nìi fau, ye na tɔ̀ kàràn gbɛ ?

4 Tɔ̀ sii sèè, à dɔ̀un Ŋaablà re gbàà fɔɔn doùn, buru niì reè tsùuŋnà ci twɛy siɔ̀n Ŋaablà ra saaka, è twɛy sen. A yè è seun, è sɔn ɲɔn, è sɔn sin e koòsi rèè sa ra. Tɔ̀ y'a tàrà sàrìyaa doùn, saaka jɔɔndzin neè boshɔ̀ùn, tɔ̀ bur'lee ɲɔɔ̀n shia na ni mòò kpɛrɛ suun waa.»

5 Tà shɔ̀ùn Yesù yè dzin è ra kɔn ci: «Adamà dziàn ye dzin goo o goo dzia fa ɲànwɔ siɛ̀ mà, tɔ̀ rii faa taki.»

6 Ayìwà, ɲànwɔ sii sɔn ma kɔn, Yesù yè bè dɔ̀n waajibi fa gbaà doùn è mòdzian kàràn. Kpiri sɔn na ni mɔn, tɔ̀ kpir'la raa sirama sia yè bà na saɔn.

7 Faridziɲɛn ì, ko sàrìyà kaamoo ì na ni mɔn, yè bà Yesù kaàwɔɔ̀, è ba nà mòò cɛrɛmabe ɲànwɔ siɛ̀ ma o ? Nìi na ni è duùn, yè dzi kùn tàrà, è nà Yesù màden nìi ka.

8 Ŋà, Yesù na è duungoo tɔ̀. E dzin kpiri si sɔn saunmaà nà tɔ̀un, ci: «Fù, a tsiì, mòdzian sapɛ yeè a ja.»

Yesù tà dèu min niì, kpir'la yè fù è tsiì.

9 Yesù yè dzin è ra tɔ̀un ci: «Min ye tey ɔ, ɲe re sàrìyaa fee rìì dèe nèe goo fii rèe ɲan: e goowùɔ fa ɲanwɔ siɛ̀ mà, tàmafa e gooɲaan fa, kɛ̀n ni dàaŋnà ? E mòò tsi saàn rà, tàmafa a tsìfa xɔn bo, kɛ̀n ni dàaŋnà ?»

10 Yesù tà dèu min niì, è sa siin siin bè, è kòmànà dzin kpir'la rà ci: «A sià foro !» Kpir'la tà fau, à sià yè cɛrɛmabe e shɔùn.

11 Faridziɲɛn rèè ko sàrìyà kaamoo reè tɔ̀ jà nìi fau, tɔ̀ yeè dɔ̀n twɛy kpɛyn fɔ è bè geren. Tɔ̀un, yè si tey tey bè, ci ye nà fee rìì fa Yesù rà ?

Yesù e jaa ra kɛɛradzin teeŋ fii bou min niì

12 Ayìwà, sii sɔn see, Yesù yè bè tèyn jèn sɔn tsɛ, è Ŋaablà mafyɛ̀n. E feèn ko e kur'la sapɛ fa tɔ̀ ra.

13 Jià nàu seey min niì, Yesù yè e re kàràndzin neè sapɛ kiri. È nàu wɔ, è jaa ra mokun teeŋ fii bo twɛy ɲàn, è twɛy mòkun teeŋ fiɛ̀ kiri ci kɛɛradzin neè.

14 À twɛy mòkun teeŋ fii nìì reè bou, twɛy rìì siin nèe: È jɔ̀naà na Shimɔ̀n, Yesù yè sɔn ba tɔ̀ raa tsoò tɛ̀y, ci Piyɛrì. Andère yeè gban tɔ̀ ra, nìi Piyɛrì laa tseèn. Yàkubà yè gban tɔ̀ ra. Yuxanà yè gban tɔ̀ ra. Fìlipù yè gban tɔ̀ ra. Batelemin yeè gban tɔ̀ ra.

15 Matsiyù yè gban tɔ̀ ra. Tomà yè gban tɔ̀ ra. Alifù raa dzin kpiri Yàkubà yè gban tɔ̀ ra. Shimɔn tsoo kpɛrɛ yè gban tɔ̀ ra, yè bà tɔ̀ kir'là ci Zhelɔtsì nìi dzuɔn ci, fàtsiɛ kùùn kààfabaà.

16 Yàkubà dzin kpiri Yudè yè gban tɔ̀ ra. Yudà, Sikariyɔsìka kpir'là yè kòmànà gban twɛy sapɛ dzyeèmaa nà, nìi nàu bà Yesù jàànfabaa.

Yesù rè jàma giri kàrànmaà è ɲìnìnkɔɔn reè cɛrɛmabe

17 Ayìwà, Yesù yè jàà bo jèèn tsɛ tɔ̀un, ko e re kɛɛradzin neè ka, è nà e tsiì gàne vɛ̀ɛ̀ sɔn ɲan. À re kàràndzin neè giri na ni mɔn, ko mòò giri kpɛrɛkuru ì. Twɛy mòdzin neè swey na boo Yerusalɛmùn, swey yè bo Yude mar'la gàne rèè swey ɲàn, swey yè bo kòòyù dziɛ tɛyn wɔ̀ rèè ɲàn, nìì reè kir'là ci Tsirì, ko Sidɔ̀n.

18 Twɛy mòdzin neè na naɔ̀ nì, yè nà e toro wɔ Yesù rè gooma reè rè, è ye re ɲìn'nèè janfa, ye yè cɛrɛmabe. Kwey rèè na ni nìì reè kpɛyn, twɛy sa yeè cɛrɛmabe.

19 Mòdzian sapɛ na à gaa ye yè e dzyɛn Yesù rà. Dzi na ni à ɲan. Tɔ̀ rii na à toò gè o ge ye ba na e dzyɛun à ra, tɔ̀ dzi ree na dɔ̀ɔn à tsìfa ɲan, à y'à cɛrɛmabe.

Taama dzibeè ko byɛnbee raa kàjaa

20 Tɔ̀ ɲan, Yesù yè e jaà ɲansen, è re kàràndzin neè siin, è dzin è ra ci:

«Ye nìì reè gbakɔɔn reè, ye raa wùbeu, kàtsu, ye nìn ni Ŋaablà re màsàbee ɲàn.

21 Dzuà ni ye nìì reè rà dòònun, ye raa wùbeu, kàtsu, ye na ɲwɛɛ̀n jà, y'a ɲɔn yeè cɛn.

Ye nìì reè ni gɛɛ rà dòònun, ye raa wùbeu, kàtsu, ye nà jiran.

22 Mòdzian ye ba ye kpɛynbee, yè e nɔn ye re, yè ye ɲɛ̀ɛn, yè ye tsoo ɲaan kir'là Adama dziàn tsoò kamà, ye raa wùbeu.

23 Twɛy goo rèè sapɛ ye ba faa ye ra watsi riì bwèy, ye e taama dzibe, ye tsɛn tsɛn, kàtsu, ye nà bàràji bla tarà Ŋaablà re. È fà rèè sa twɛy goo soo rìì fau Ŋaablà re kɛɛra reè rà.

24 Ye nìì reè to gètsi ì dòònun, byɛnbe ye nìn, kàtsu, ye yè e re xɛɛrɛɛ tàrau nòn.

25 Ye nìì reè cɛɔn dòònun, byɛnbe ye nìn, kàtsu dzuà nà ye kun sii sɔn see.

Ye nìì reè ni jirangoo rà dòònun, byɛnbe ye nìn, kàtsu, jisee ni jisee ra, ye taama nà bà ŋunun, ye yè gɛɛy jaayu she fiɛ̀ rà.

26 Mòdzian ye ba ye saan doò tsɛ, byɛnbe ye nìn, kàtsu twɛy fà rèè sa kɛɛra doo de reè saan tɔ̀ rii tsuru.»

Yesù ci ɲan rèè yè kɛ̀n

27 Tà shɔ̀ùn, Yesù yè dzin ci: «Ye nìì reè yɛ e toro wɔɔ mun ne, mun ci ye e ɲan rèè kɛ̀n. E goò xɔ nìì reè mà, ye goowùù fa twɛy rà.

28 Nìì reè gooɲaan ka ye kɛ̀ɛn, ye dzwɛ ji twɛy rà. Nìì reè sɔ̀n ɲaan wɔɔ̀ ye ra, ye Ŋaablà mafyɛ̀n twɛy rè.

29 Mòò ye sitaa zhɛ a taàkun soo ɲàn, e soo sa tsuù à re. Mòò y'a re mɛ̀yɛ blaa tsi a ra, dzuun na mɛ̀yɛ̀riɛ sa to à re.

30 Mòò o moò y'a fyɛn gè rà, a kɔ̀. Mòò to y'a suun ge sen, maà dzin à tsìfa ra, ci à y'à sèè sìn a ra waa.

31 Ye sào ni mòdzian yè bà nìi faa ye re, e sa yeè tɔ̀ faa mòdzian rè.

32 Ye goò dzi nìì reè rà, ye ye ba twɛy bàsɔùn nì goo dzibee e yɛr'la kɔn, ye nà kɛ̀n tsuru blàbe rii tàrà tɔ̀ doùn ? Arì Ŋaablà ɲan rèè sa ni tɔ̀ rii tsuru ! È goò dzi nìì reè rà, è sa twɛy rìì goo dzibee e yɛr'la.

33 Nìì reè goowùɔ faa ye ra, ye sa ye ba goowùɔ faa twɛy bàsɔùn nì nà ɔn, ye nà kɛ̀n tsuru blàbe rii tàrà tɔ̀ doùn kɔn ? Arì Ŋaablà ɲan rèè sa tɔ̀ goo soo rìì faa.

34 Y'a tɔ̀ ci nìì reè dzia tsiɛ̀ sàrà, ye ye ba tsìɛ̀ wɔɔ̀ twɛy bàsɔùn nì nà ɔn, ye nà kɛ̀n tsuru blàbe rii tàrà tɔ̀ doùn kɔn ? Arì Ŋaablà ɲan rèè, nìì reè dzia tsìɛ̀ sàrà è re, è sa tsìɛ̀ wɔɔ̀ twɛy rìì là.

35 È ba ye, ye e ɲan rèè goo dzibe e yɛr'la, ye goowùɔ fa. Ye tsìì wɔ mòò rà, e maà e ɲɛyn ji tsuù tɔ̀ tsɛ waa. E ye tɔ̀ fa, e na bàràji bla tarà. Tɔ nà à kpàdè mòdzian nà sa, ci Ŋaablà riì ni jiran nɔ̀n, ye tɔ̀ dzin ì. Wò rii wù mùn sapɛ dzyeèmaa ka, goowuu tɔ bɛy sen ɲɛn mòdzìn ɲan tsɛ.

36 Ye fà Ŋaabla màtsur'la nìi tsuru, e sa yeè màtsuru tà tsuru.»

Yesù ci mòo mà e yɛrɛ ba kitsikununbaa dzyee rèè tsɛ waa

37 Tà shɔ̀ùn, Yesù yè dzin kɔn ci: «E maà e yɛrɛ ba kitsikununbaa dzyee rèè tsɛ waa. Tɔ̀ ye fa, tɔ̀ fa e tsu tarà waa. E maà dzyee rèè kun e faadziɛ mà waa. Tɔ̀ ye fa e tsu fa kun e faadziɛ mà waa. Ye yɛrɛ to dzyee rèè rè, Ŋaablà sa nà e yɛrɛ to ye re.

38 Ye dzyee rèè kɔ̀, Ŋaablà sa nà ye kɔ̀. A nà ye kɔ̀, jàci moo mòò kɔ̀ɔ nìi tsuru giri shìman na. A y'à jia gèè doùn, à y'à yuuyuu, à y'à ɲinan ɲinan, à yè kòmànà sɔn ji à tsɛ kɔn, fɔ è bè koòn. Ye mòdziìn kɔ̀ɔ nìi tsuru, Ŋaablà sa nà ye kɔ̀ tɔ̀ kɔ̀ù'n kuru soo rìì là.»

39 Tà shɔ̀ùn, Yesù yè tàlen soo ban è re kɔn nèe tsuru ci: «Jaanaa sɔn dzia e jaana si kuru kun è jìì à ka ɔ ? Tɔ̀ ye fa, è fiɛ̀ sa fa mɛɛy kɔ̀ɔ̀ doùn fyeu ɔ̀ ?

40 Kàràndzian na dzia geren e karànfaà tsɛ waa. Ŋà, kàràndzin niì kàràùn'n kuru ye wube, tɔ nà bà jàci e karànfaà.

41 Fee bèe à to, ɲɔ̀ɔ̀nii nìi ni wo mòdzìn sia jaa tsɛ, wo jaa ni tɔ̀ ra, tɔ̀ to y'à tàrà gɔ̀ɔ blà riì ni wo yɛ̀r'la raà tsɛ, wo na tɔ̀ jàa waa.

42 Tɔ ni wo jaà tsɛ ɔ, wo dzia dzin a modzìn sia rà dzùrù tɔ̀un, ci à y'à to wo yè ɲɔ̀ɔ̀nii nèe bo à jaà tsɛ, wo jaa to na ni a jaa tsɛ raà rà waa ? Mòdzin duungoo fii tsi ! A raa gɔ̀ɔ blàa bo a jaà tsɛ ŋe. Tɔ̀ ye fa, wo jaa dzii nà san, wo yè dzi a modzìn sia raa ɲɔ̀ɔ̀niɛ̀n bo.»

Yesù ci gɔɔ̀ dziàn nì y'à toò mòò y'à tɔ̀

43 Ayìwà, Yesù yè dzin kɔn ci: «Gɔ̀ɔ wùù na dzin ɲaan wɔɔ̀ waa. Gɔɔ ɲaan to na dzin wùù wɔɔ̀ waa.

44 Gɔɔ̀ sapɛ tɔ̀ɔ e dziàn nì kpɛyn. Mòò na gɔ̀ɔ̀dzin ɲɔnàma boò daafyɛɛku ra waa. Mòò to na fòndzin boò daaku ra waa.

45 Mòdzin jaawuen rii goo jaawuen faa, kàtsu à duɔ̀n wù. Mòdzin ɲan yeè bà goo koron faa, kàtsu à duɔ̀n na wù waa. A y'a jà moo gooma ge o ge dèe e dziɛ̀ rà, à bà ni tsuù à tsìfa duùn nì.»

Yesù goomau gbà fiɛ̀ jiu'n kur'la tsɛ min niì

46 Tɔ̀un, Yesù yè dzin ci: «Fee kamà kudɛyn ye mun kir'là, ci Tsìfaà, mun to nìi dèe ye ra, ye na tɔ̀ faa waa ?»

47 Mòò riì nàa mun ne, è nà e toro wɔ mun ne goomaa rè, à y'à fa, jàci m'a dèu nìi tsuru, tɔ̀ tsìfa ko nìi dzia gɔ̀n, mun nà tɔ̀ dè ye ra.

48 Mùn dzia tɔ̀ tsìfa gɔ̀n ko nèe gbàjibaa kaatsi rèe rìì ka. È re gbà jimaà kɔ̀ɔ̀ ɲɛɛn fɔ, è bè wɔ kpaakpaa tsɛ. È re gbàà dzun ban tɔ̀ kpaakpaa tsɛ. Gbàà ji doumaà shɔ̀ùn, sii sɔn see, ŋaa brìsi yè nà, tɔ̀ yeè nà doòn tsyɛn kpan. Tɔ̀un, doòn yuà yè nà fur'lu, è nà gbàà jùrù, gbàà na bo e shɔùn waa. Fee y'à to gbàà na mɛɛy ? À jiu'n kur'la wùbeu, tɔ̀ rii y'à to à na mɛɛy waa.

49 Ŋà, mòò riì yè e toro wɔɔ̀ mun ne goomaa rè, à to na e tsiɛ à fa jàci mun y'à dèe nìi tsuru waa, tɔ̀ tsìfa ko mòò riì soo tɔ̀ rii siin: «Mòò riì yè e re gbà jiɔ̀ dzɔ̀nxɔɔmaà maanaa tsɛ, à mà bà à dzun baɔ̀n kpaakpaa tsɛ waa, ta tɔ̀ rii. Gbàà ji doumaà shɔ̀ùn, ŋaà yè nà nà. Tɔ̀un, yuà nàu gbàà jùrù min niì, gbàà yè mɛɛy fɔ è ɲaanbe.»