Luc 7

Yesù kaadzin jɛrɛ̀blàtsi sɔn ne jòn kpiri cɛrɛmabeu min nii

1 Ayìwà, Yesù nàu twɛy gooma reè sapɛ de dò mòdzian nà watsi riì bwèy, è fù, è dɔ̀n be Kapɛrinaxumùn wɔ̀ɔ̀ doùn.

2 Kaadzin jɛrɛ̀blàtsi sɔn na ni tɔ̀ wɔ̀ɔ̀ doùn, tɔ̀ yeè bà na ɔ̀rɔ̀mùnka. Jòn kpiri soo na ni à re. Tɔ̀ jòn kpir'là goojaa yè bà na xɔ à re, fɔ è bè geren. Yesù dɔ̀un wɔ̀ɔ̀ doùn, tɔ̀ y'a tàrà, jòn kpir'là na ɲìniɔ̀n jàci à ni san.

3 Tɔ̀un, Kaadzin jɛrɛ̀blàtsià Yesù goofa myɛun nìi fa, è dzyèèsìbee mòdzin neè bɔɔ rèè swey ka Yesù rè, ci twɛy yè bè à màfyɛ̀n, è nà wò re jòn kpir'là cɛrɛmabe.

4 Twɛy bɔɔ rèè yè bè. E bèu wɔ Yesù tsɛ min niì, yè e maa y'à màfyɛ̀ɛn cèreoma, yè dzin ci: «Wo ye nèe kpir'lee dzwɛ̀ma, tɔ wù à ka.

5 Dzyèèsìbee mòdzin neè goò dzi geren à ra. Wò rii y'à tou wɔ̀ rèe doùn waajibi fa gbaà yè ji.»

6 Bɔɔ rèè rè goomaa shɔ̀ùn, Yesù yè e tsiì è bè ko è ka. E bèu tsyɛnbe kaadzin jɛrɛ̀blàtsià rè gbàà rà, tɔ̀ yeè to mɔn, è dzunwɛynsi reè swey ka Yesù rè, twɛy yè bè dzin à ra ci: «Mùn Tsìfaà, ma dzin ci a byɛnbe kpɛrɛkuru jia a yɛrɛ jɔɔn waa. Wo yè bà ni dɔn mun tsur'le tsii, tɔ̀ na farama waa.

7 Tɔ̀ rii y'à to, mun y'à jà ci mun ne blàbee na wɔɔ min wɔ wo tsɛ mɔn waa. Mun ne, wo kɛ̀nsɛɛn ye gooma soo rii dè, tɔ̀ goomaa baraka rɔ̀n, mun ne jòn kpir'là dzia cɛrɛmabe.»

8 E sèè è dzin kɔn ci: «Jɔɔndzin ì ni mun jɔɔn, nìi reè dzia mun ji e jaa ra shi rè. Mun sa yeè bà ni kaadzin neè swey jɔɔn, mun dzia nìì reè ji n jaa ra shi rè. Mun ye sɔn ka, tɔ bèe. Mun to ye kpɛrɛ kiri, tɔ̀ nàa. Mun ye goo o goo rìì dè n ne jòn kpir'là rà, tɔ tɔ̀ rii faa. Tɔ̀ rii kamà, min bà ci wo re gooma dzin soo dzia mun ne jòn kpir'là cɛrɛmabe.»

9 Yesù tà goomaa myɛ̀un min nìi, kaadzin jɛrɛ̀blàtsià rè goo rèè y'à kun e fi'un, fɔ è bè geren. Jàma nìi na gbaɔn Yesù kpɛyn tà bwèy, è jaà lakere twɛy rà, è dzin è ra ci: «Arì Dzyèèsìbee Mòdzin neè ɲàn, mun na mòò jà nìi ɲɛɔ̀n mun na nèe ɲɛun'n kur'lee ra, è nèe kpir'lee bo waa.»

10 Yesù tà dè dòu min niì, kɛɛra reè yè sèè be kaadzin jɛrɛ̀blàtsià kpà. E bèu wɔ mɔn, y'à jà, ci jòn kpir'là cɛrɛmabeu.

Yesù dzunwɛyn sɔn fun kpunau min niì

11 Tɔ̀ raa gbee, Yesù ko e re kàràndzin neè yè fù, ci ye bèe wɔ̀ sɔn ɲan, ci Naxinì. Jàma brìsi na gbaɔn è kpɛyn.

12 E bèu wɔ wɔ̀ɔ̀ dɔ̀nmà dziɛ rà, yè mòdzin swey bokɔɔn ja wɔ̀ɔ̀ doùn ko dzunwɛyn sɔn fun ka. E na bèe à ka fùn wɔma nɔ̀n. Tɔ̀ dzunwɛɛn soo den ni na ni e naà rè. Tɔ̀ taàn sa re kpir'la na saɔn nòn. Wɔ̀ɔ̀ndzin neè na boo giri, yè bà bèe taàn ka e dziàn fùn wɔma nɔ̀n.

13 Tsìfa Yesù tɔ̀ taàn gɛɛykɔɔn jau, à màtsuru y'a kun. E dzin à ra ci: «A mɛshɛ̀n, maà gɛɛy waa.»

14 Tɔ̀un, Yesù yè e kpɛrɛ̀ fùn sen neè rà, è bè e dzyɛn fùn seen gèè rà. Fùn sen neè yè e tsiì. Twɛy yè e tsiiŋ, è gooma fùàn tsɛ ci: «Dzunwɛyn, mun ci e fù.»

15 Yesù ta goomaa dèu min nìi, dzunwɛɛn yè kpunan, è fù è tsuù è maa è goomaa. Tɔ̀un, Yesù yè dzin dzunwɛɛn naà nà ci: «Tàan, a dzin kpir'la yɛ.»

16 Mòdzian gè o ge na ni mɔn, à goò yè è sapɛ shi, è ji è dzii tsɛ. Yè e maa, yè tsoo dzi ɲɛɛn Ŋaablà tsɛ, yè dziàn ci: «Ŋaablà re kɛɛra blaa sɔn ni ni ɲe fi !» Yè dziàn kɔn ci: «Ŋaablà naɔ̀ wɔ e re mòò rèè rà.»

17 E gooma ge o ge dèe Yesù rè goò ɲàn, tɔ̀ yeè wɔ Yudè mar'là ko e lagur'la gàne rèè sapɛ ɲan.

Yesù ko Yùxanà raa goo rèè

18 Ayìwà, è Yùxanà to kàsò gbaà doùn, Yesù na goo nìì reè sapɛ faɔ, Yùxanà re kàràndzin neè yè bè tɔ̀ sapɛ jaa dè à ra mɔn. Yùxanà tɔ̀ myɛ̀un min niì, à yè e re kàràndzin neè fii kiri,

19 è twɛy ka bè mùn Tsìfa Yesù rè. À nìi dèu ci è bè dè Yesù rà tɔ̀ rii siin: «Mòò riì goo na deò ci à nà nà, à wo rìì ɔ ? A ma ba wo, mòò kpɛr'lì to shùa gbɛ ?»

20 Yùxanà rè kàràndzin fiɛ̀ yè fù dɔ̀n be Yesù kpà. E bèu wɔ Yesù tsɛ watsi riì bwèy, yè dzin à ra ci: «Tsìfaà, Mòdzìn Jààràfoobaa Yùxanà ɲe ka naɔ wo rìì lè. À ci ɲe yè nà wo tey, mòò riì goo na deò, ci à nà nà, à wo rìì ɔ̀ ? À ma ba wo, mòò kpɛr'lì to shùa gbɛ ?»

21 Tɔ̀ watsia yɛ̀r'la ɲàn, Yesù ɲìnìnkɔɔn giri cɛrɛmabeu. E ɲìnìnkɔ̀ɔ̀n ɲan giri cɛrɛmabe. E kweykɔɔn gir'le kwey kaa bo è kpɛyn. E jaana giri jaa dzii san.

22 Tà shɔ̀ùn, Yesù yè kòmànà Yùxanà rè kɛɛra fii rèè rè goomaa latsi ci: «Ye goo nìì reè jaɔ̀ ko ye nìì reè myɛɔ̀n ye bè twɛy lakɛɛ̀y Yùxanà nà ci: Jaana reè jɛ̀y faa, mòdzin sansɔn nèè yè jìɛ cèreoma, byèèma reè yè cɛrɛmabe, toro kper'neè yè myɛ̀yn fa, mòdzin saunma rèè yè sèè kpunan, Kùnàgoo Dziɔ̀ dèe gbakɔɔn reè rà.

23 Ayìwà, mòò riì ma to ɲɛn bɛy mun na, tɔ̀ tsìfa raa wùbeu !»

24 Ayìwà, Yùxanà rè kɛɛra fiɛ̀ nàu dɔ̀n be watsi riì bwèy, Yesù yè e maa è Yùxanà raa goo rèè dèe mòdzian nà. È dzin è ra ci: «Ye bèumaà nà jènjàà kor'nà doùn, ye bèu fee rìì jà ? Ye bèu vun maana ni jà fyɛɛn y'à flɛ̀flɛɛra ɔ ? Y'a tɔ̀ à na tɔ̀ dɛ !

25 Tà bwèy ye bèu fee rìì jà mɔn ? Ye na be kpiri sɔn ni jà mɔn, è bà vya wùu ì wɔuna ɔ ? Awà ye yɛ̀r'leè y'à tɔ̀, ci nìì reè tà vya wùù reè tsur'là wɔɔ̀, yè bà e saò rà goo reè faa, tà tsuru mòdzin neè jàa màsà gba rèè rìì doùn.

26 Awà, ye to bèu fee rìì jà jènjaà doùn ? A na Ŋaablà re kɛɛraa sɔn ɔn ? Ɔ̀ɔn, mun ni ci e ra, è bà gereon Ŋaablà re kɛɛra sa tsɛ.

27 Ŋaablà re goomaa doùn, à re kɛɛra sɔn na kùnàgoo sɔn sɛbɛɔ̀n kpiri sɔn tsɛ nèe tsuru ci:

<Mun Ŋaablà nà n ne kɛɛraa sɔn baji be wo jɔɔn,

è bè wo jɔɔn lamɔnɔ̀n tsùù>.

Tɔ̀ kɛɛraa rìì yɛ Yùxanà.»

28 Yesù yè dzin kɔn ci: «Mun ni ci e ra, tàan pɛn na dzin kere ŋe, nìi blà Yùxanà mà waa. Tɔ̀ to y'à tàrà mòò riì dzyɛ̀n mòdzian sapɛ ma Ŋaablà re màsàbee doùn, tɔ̀ sa blà à mà.»

29 Yesù yè sèè è dzin kɔn ci: «Mòdzian gè o ge yè e toro wɔu Yùxanà rè, arì kɔnsɔɔn tsi reè sa, y'à tou Yùxanà yè ye jaara foo Ŋaablà re shià goo rèè rà. Twɛy sapɛ y'a jàu ci Ŋaablà tereòn.

30 Ŋà, nìi Faridziɲɛn rèè, ko sàrìyà kaamoo reè, Ŋaablà na nìi gaaŋnà twɛy rè, yè e nɔun tɔ̀ mà. È to na e tsiì Yùxanà yè ye jaaraa fòò waa.»

31 Yesù yè dzin kɔn ci: «Mùn yɛ watsi riì ɲàn ci she, mun nà tɔ̀ watsia mòdzian ko fee rìì gɔ̀n ? E boò fee rìì lè ?

32 E boo dziin kòòmɛ̀yn ì nì nè. È tsùuŋnà siikpaà ɲàn, yè bà e vu boò e si ra nèe tsuru ci:

<Ɲe Gwɛ̀ɛn ka ye dziu ì cèeŋ ye re,

ye to na ɲɔɔn ji waa !

Ɲe yè shì ye ì cèè ye re,

ye to na gɛɛy waa !>

33 Awà, Mòdzìn Jààràfoobaa Yùxanà nàuma yɛ, à na ɲwɛyn cèreoma ɲɔɔ̀n waa, à to na mììnge ɲaùn mìan waa. Ye dziàn ci: <A kweykɔɔn !>

34 Awà, Adamà dzin nìi to nàuma yɛ, à ɲwɛɛ̀n ɲɔɔ̀n, è mìɛn faa. Ye dziàn ci: <Y'a jàa, ci nèe kpir'lee nwɛ̀ɛ̀n ɲan, à na ɲuun faa ɲwɛyn goo ka, à to na ɲuun faa mììngè goo ka. A kɔnsɔɔn tsi reè dzunwɛynsi, è bà mòdzin faadzii ɲaan neè dzunwɛynsi !>

35 Awà, Ŋaablà ci shi niì yè jìì, nìì reè tɔ̀ jìɛ, à tɔ̀ɔ twɛy rà, ci Ŋaablà akir'là blà.»

Tàan sɔn làtsìkɔrɔ yɛu Yesù sàn nà min niì

36 Faridziɲɛn kpiri sɔn na ni, tɔ̀ tsoò yè bà na ci Shimɔ̀n. Sii sɔn see, tɔ̀ kpir'la yè nà Yesù kiri, ci è bè ɲwɛyn ɲɔn wò re tsii. Yesù yè bè. A bèu wɔ kpir'la rè tsii rɔ̀n, yè e maa yè ɲwɛɛ̀n ɲɔɔ̀n.

37 È to ɲwɛɛ̀n nà, tàan sɔn yeè nà dɔ̀n mɔn. Wɔ̀ doùn dzin neè na dziàn ci tɔ̀ taàn faadziɛ nooŋnà. Taàn y'à myɛ̀un nìi fa, ci Yesù ni Faridziɲɛn kpir'là rè tsii rɔ̀n, à nàkɔɔn è nà ko làtsìkɔrɔ kinin dziù sɔn ka e suun. Tɔ̀ làtsìkɔr'la na ni bwèyn sɔn doùn niì sɔɔn xɔ fɔ è bè geren.

38 Taàn nàu wɔ, è dɔ̀n Yesù bonè, è bè e kunun gban à sàn nèè tɛyn, è maa è gɛɛ. E gɛɛy fɔ à jaayuà yè bè Yesù san nèè fyee. Tà shɔ̀ùn, è kungwɛ̀ɛn ka à sàn nèè tsùsa, è mà nùù nùù. Tɔ̀un, è làtsìkɔr'la kon à sàn nèè tsɛ.

39 Faridziɲɛn kpiri nìi na Yesù kiri naɔ e re tsii rɔ̀n, tɔ tɔ̀ jàu min nìi, è dzin e duùn ci: «Nèe kpir'lee na Ŋaablà re kɛɛraa sɔn dɛ ! E ba na Ŋaablà re kɛɛra taki, tàan nìi yɛ e dzyɛɛn à sàn nà, à na nà à tɔ̀, à mòò riì kuru. A na nà à tɔ̀, ci à tàan faadzii nooŋma.»

40 Yesù yè dzin Faridziɲɛn kpir'là rà tɔ̀un ci: «Shimɔ̀n, gooma ni mun ne, mun y'à dè wo ra.»

Shimɔ̀n sa yeè dzin à ra ci: «Ayìwà, gooma n karanfaà.»

41 Yesù ci tɔ̀un: «Kpiri sɔn na tsìì wɔɔ kpiri fii ra. Tsìì tsi mòò sɔɔn raà na gbaa càànmoò nùn, soo raà yè bà na gbaa dzyèè tsyeù.

42 Kpir'la nàu à jà tsìì tsi rèè pɛn fa dzi wò re tsìɛ̀ sàrà nìi fa waa, è dzin, ci wò yàfau à shɔ̀ùn. Wo re o, twɛy tsìì tsi fiɛ̀ ɲàn, kpir'la goo nà dzibe geren tsì rii là ?»

43 Shimɔ̀n yè dzin tɔ̀un ci: «Mun jaa ra, nìi raa tsìì na giri, kpir'la goo nà dzibe geren tɔ̀ rii là.»

Yesù ci: «Wo sààben deu.»

44 Tà shɔ̀ùn, è jaa kere taàn nà, è dzin Shimɔ̀n nà ci: «Wo tàan rèe jàa kɛ̀ ? Mun nàu wo kpà, wo na yu pɛn sìn, è ka mun san nèè fòò waa. À to yè e jaayuà ka mun sàn nèè fòoŋ è tsùsa e kungwɛ̀yn neè ka.

45 Mun nàu dɔ̀n wo re mìin, wo na mun kùùntsi blàbe doùn waa. Fɔ mun to yè dɔ̀n mìin nɔn, tàan reè ko blàbe rii mun sàn nèè mà nùù nùɔ.

46 Wo na ɲinin yɛ mun kùùn waa, à to nàu làtsìkɔrɔ kinin dziù kon mun sàn nèe tsɛ.

47 Tà doùn, mun nì ci a ra, ci à mun kɛ̀n nìi fau nèe tsuru cèreoma, tɔ̀ y'a kpàdèe ci à re gooɲaan tsìɛ̀ sapɛ mɛɛy bou à vu ra. Gooɲaan giri tsìì ma mɛɛy bo mòò riì vu ra, tà tsìfa ɲan kɛ̀ɛ̀n bà dzyɛ̀n.»

48 Yesù yeè dzin taàn nà tɔ̀un ci: «Wo re gooɲaan tsìɛ̀ mɛɛy bou wo vu ra.»

49 A ko nìì reè na ni ɲwɛɛ̀n nà esire, twɛy yè e maa yè dziàn e duùn ci: «Ee ! Nèe tsì rii tà tsuru, è bà gooɲaan tsìɛ̀ mɛɛy boò mòdzian vu ra ?»

50 Tà ko e sa ra, Yesù yè dzin taàn nà ci: «Wo ɲɛn niì fau mun na, tà wo tsiu. Bèe ! Ŋaa yè b'à ko xɛɛrɛ tsi !»