Tàan nìì reè na ni Yesù ko e re kàràndzin neè ka
8
1 Twɛy goo rèè sapɛ shɔ̀ùn, Yesù yè dɔ̀n beè wɔ̀ blà bla reè ko wɛ̀ɛ̀rìì reè ɲàn, è mòdzian waajibi beè, è Ŋaablà re Màsàbee Kùnàgoo Dziɔ̀ dè beè è ra, è bèe. A re kàràndzin teeŋ fii rèè na ni ko à ka.
2 A tàan nìì reè cɛrɛmabeu, è bà swey raa kwey kaa boo twɛy kpɛyn, twɛy tàan rèè swey sa na ni ko à ka. Sɔn tsoo na ci Mariyamùn, yè tɔ̀ tsoo wɔ, ci Mariyamùn Màngàdàràkà taàn. Yesù na kwey ɲɛ̀ɛ̀nun nì kaa boo tɔ̀ kpɛyn.
3 Sɔn tsoo na ci Yàxanà. Tɔ̀ na màsà kpiri Erodzì rè faagoo fa reè jɔɔndzin sɔn ne tààn, tɔ̀ kpir'la yè bà kir'là ci Suzà. Soo kpɛrɛ sa na ni nìi kir'là ci Sùzanà, tàan giri kpɛ̀rɛ̀kuru ì sa yeè bà na ni. Twɛy tàan rèè sapɛ na e suun ge reè seen, y'à ka Yesù ko e re kàràndzin neè dzwɛ̀ma.
Yesù tàlen soo baun shìmàndzian tsɛ min niì
4 Mòdzian na boò wɔ̀ rèè sapɛ ɲan, yè nà e ladzyèe Yesù re. Jàmaà nàu blàbe Yesù tɛyn sii sɔn see, è nèe tàlen nèe ban è re ci:
5 «Fɛɛfabaa sɔn bou, ci wo nà e re shìman sɛn. A re shìmaan sɛ̀nkɔɔn e re dzù rɔ̀n, shìmàndzin neè swey yè tɔrɔn tɔrɔn shi dziɛ rè. Shia tsɛ dɔ̀n bobaa rèè yè è tɔ̀rɔ̀ tɔ̀rɔ̀, tà shɔ̀ùn, kɛ̀yn neè yè nà è fɔn.
6 Shìmàndzin neè swey tɔrɔnmà yè bè kòrò faa gane ka. Twɛy shìmàndzin neè xeu min niì, à na cin waa yè gɔ̀rɔ̀, kàtsu dzɔ̀n cin naà ni mɔn waa.
7 Shìmàndzin neè swey tɔrɔnmà yè bè kòrò daaku gane ì ka. Daaku rèè ko shìmànku rèè sa yeè xe esire, yè shìmànku rèè kun.
8 Shìmàndzin neè swey tɔrɔnmà yè bè kòrò dzù wùù gane ka. Twɛy shìmàndzin neè xeu, yè shìmàn tan bla bla ì wɔ, yè bà dziɔn. Dzin càànmoò mòò yè jà tan soo soo sapɛ ra.»
Tà shɔ̀ùn, Yesù yè sɛ̀ɛ̀y è dzin mòdzian nà ci: «Toro ì kpɛ̀ynto ye ba ni mòò riì rè, yè bà è ka myɛ̀yn faa, è toro wɔu'n kuru wube dɛ !»
9 Yesù rè kàràndzin neè y'à tey tɔ̀ tàleèn dzuun ma.
10 E dzin è ra ci: «Ye nìì reè mun lamyɛɛ̀n, e Ŋaablà re Màsàbee gòndoo tɔ̀, tɔ̀ twɛ̀ɛ sìun ye rìì là. Nìì kpɛ̀yn dzyee rèè, twɛy y'à gooma reè myɛ̀ɛn tàlen nèè rìì ɲàn. Tɔ̀ rii y'à to
E siin faa, ŋà, è na gèsɔn pɛn jàa waa.
Yè bà myɛ̀yn faa, ŋà, è na gèsɔn pɛn fàànmuan waa.
11 Awà, tɔ̀ tàleèn dzuɔn nì yɛ nèe tsuru ci: Shìmàndzian, tɔ̀ Ŋaablà re Goomaa nì.
12 Shìmàndzin neè tɔrɔun shi dzii niì rè, mòdzin neè swey ni tɔ̀ shi dziɛ rìì tsuru. Yè e toro wɔɔ̀ Ŋaablà re Goomaa rè, ŋà, Sutana nàa è màniin, à bo è vunun tsɛ, sànko è mà ɲɛn Ŋaablà re goomaa nà yè tsi waa.
13 Shìmàndzin neè tɔrɔnmàà bèu kòrò faa gane riì ka, mòdzin neè swey ni tɔ̀ faa ganee rìì tsuru. Yè e toro wɔɔ̀ Ŋaablà re Goomaa rè yè e tsiì à ra ko taamadzibe ka. Tɔ̀ to y'à tàrà à na dɔ̀ɔn è ɲan cɛyn waa. E dzia ɲɛn Ŋaablà ra tà tsuru watsi dɛɛnin bàsɔùn doùn. Ŋà, kùùngoo ye è ji nìi tsuru, tɔ̀ yeè è sèè bouma Ŋaablà kpɛyn.
14 Shìmàndzin neè tɔrɔnmàà bèu kòrò daa gane riì ka, mòdzin neè swey ni tɔ̀ daa ganee rìì tsuru. Yè e toro wɔɔ̀ Ŋaablà re Goomaa rè, ŋà, è na wɔ watsia sɔn ma, è vyɛ̀ɛ̀y rà goo reè, ko nàfòrò goo reè, ko dziɲan kpɛyn màànkaan goo reè nàa dɔ̀n geren è ɲan. Tɔ̀ yeè è kùnàn ban bo Ŋaablà kpɛyn. Tɔ̀ faa jàci shìmànku rìi gɔ̀r'la è dziàn bɔɔ bɛɛ to.
15 Ayìwà, shìmàndzin neè tɔrɔnmàà bèu kòrò dzù wùù gane riì ka, mòdzin neè swey ni tɔ̀ dzù wùù ganee rìì tsuru. Yè e toro wɔɔ̀ Ŋaablà re Goomaa rè, y'à to e duùn ko duun fyɛ ka, è na boò à tsɛ waa. Twɛy mòdzin neè rìì yè e maxɔbee yè Ŋaablà sao faa kudɛyn.»
16 Yesù yè dzin è ra kɔn ci: «Mòò pɛn na fìtsina dzu wɔɔ̀, è gèè sɔn kuu à tsɛ waa. Mòò to na fìtsina dzu wɔɔ̀ è sèè à sen wɔ ɲaangee dzuun waa. Y'à dzu wɔɔ̀ rìì, y'à tsùù fìtsinà tsuuma nɔ̀n, sànko gbàà doùn dɔ̀nbaa rèè y'à vyeè jà.
17 Ayìwà, gè o ge mɛnɛɔn, è sapɛ nà bo ji vyeevyeè rà. Goo gè o ge na tɔ ŋe, è sapɛ nà bo ji vyeevyeè rà sii sɔn see.
18 Ye e myɛyn fàù'n kur'la kààwɔ ! Kàtsu nìi ni a re, sɔn ni nà bà tɔ̀ tɛ̀y a re. Ŋà, pɛn to ma ba ni a re, wo taa ni nìi mà, ci tɔ ni wo re, wo nà fɔn tɔ̀ sa ɲan.»
Yesù ci nìì reè wò na ko wò re tsii dzin ì
19 Tà shɔ̀ùn, Yesù naà ko à tseyn kpir'lèè yè nà à kpɛyn. Ŋà, jàmaà blàbe ɲaanfaa suun, è na dzi dɔ̀nma jà, yè bà ni e kpɛrɛ̀ à ra waa.
20 Tɔ̀un, mòdzian yè è goo dè Yesù rà nèe tsuru ci: «Wo naà ko wo tseyn nèè tsìiŋnà dziɛ rà da rɔ̀n. È ni à re ye yè e si jà.»
21 Yesù yè dzin mòdzian nà tɔ̀un ci: «Nìì reè yè e toro wɔɔ̀ Ŋaablà re goomaa rè, y'à fa jàci à deò nìi tsuru, twɛy rìì mun naà ko mun tseyn nèè.»
Yesù fyɛn bla sɔn bokɔɔn tsiiŋ yu blàa tsɛ min niì
22 Sii sɔn see, Yesù ko e re kàràndzin neè yè nà dɔ̀n konkoron bla sɔn doùn. È dzin è ra ci y'à wa yu blàa kɛ̀yn. Tɔ̀un, yè dɔ̀n be.
23 E bèkɔɔn, Yesù yè cìi. Tà doùn, fyɛn bla sɔn yeè nà bàràma fu jaa soo yu blàa tsɛ. Tɔ̀ fyɛn blaa yuà pàngò pangoo nìi fa, yuà yè sɛrɛ sɛrɛ jia konkor'na doùn. Yuà yè na giribe konkor'na doùn, fɔ à gaa jàà be yuà dzuun.
24 Tɔ̀un, kàràndzin nèè swey yè e kpɛrɛ̀ Yesù rà y'à kpunan. Yè dzin ci: «Kàrànfaà, kàrànfaà, fù, yuà nàkɔɔn yɛ mùn ɲɔn !»
Tɔ̀un, Yesù yè fù, è cerè fyɛɛn ko yuà pàngò pangokɔɔn tsɛ. A tɔ̀ fau, fyɛɛn ko yuà sa yeè e maɲɛn, màànkaan sapɛ yeè dò.
25 Tà shɔ̀ùn, Yesù yè dzin kàràndzin neè rà ci: «Ye ɲɛunmaà nì yɛ mun na nèe tsuru ɔ ?»
Kàràndzin neè yè shi, à goò yè ji è dzii tsɛ. Yè dziàn esira tɔ̀un ci: «Ee ! Nèe kpiri kɛn tà tsuru ? Arì fyɛɛn ko yuà sa y'a re dèumaà myɛ̀ɛn y'à bo e shi tsɛ.»
Yesù kwey rèè kaa bou kpiri sɔn kpɛyn min niì Gerasa mar'la ɲàn
26 Yu blàa fuu dòumaà shɔ̀ùn, Yesù ko e re kàràndzin neè yè bè wɔ yu blàa kɛ̀yn Gerasaka reè rè màr'là ɲàn. Tɔ̀ màr'là ko Galile mar'la jaa jiɔ̀ e si ra.
27 È bèu wɔ mɔn, Yesù jàà bokɔɔn konkor'na doùn, tɔ̀ wɔ̀ɔ̀ doùn kpiri sɔn yeè bo, è nà à kùùntsi. Kwey rèè na ni tɔ̀ kpir'la kpɛyn. Fɔ watsi gbaàn, à naà vya wɔɔ̀ dɛ, à na boo wɔ̀ɔ̀ doùn, è bè e tsuù kabur'lèè rà.
28 A dziu Yesù jà min niì, è gɛɛy vu jaa soo bo, è nà e maa ji à sàn dzuun, è sɛ̀ɛ̀y fààn na ci: «Jìran nɔ̀n Ŋaablàa Dzin Kpiri Yesù, fee rìì ni mùn fi ? Mun wo màfyɛ̀ɛn nì, ma byɛnbe ka n na waa !»
29 A na tà dèe, kàtsu, Yesù na dziɔn kweè rà, ci è bo à kpɛyn. Kwey rèe na bà à kun jaa giri faa. Tɔ̀ ye ba na fau watsi o watsi, è na à kuàn y'à si rèè ko sàn nèè sa wɔ jòòroon rà. E na tɔ̀ faa, sànko à ma dzi bo e shɔùn waa. Tà ko e sa ra, kpir'lee na jòòroon nee shɛn shɛɛ̀n, kweè yè geren à ka fɔ jènjàà kor'nà doùn.
30 Tɔ̀un, Yesù y'à tey ci: «Wo tsoo ci fee ?»
E dzin ci: «Mun tsoò rìì ci jàma blà.» A tà dèu, kàtsu kwey gir'lì na ni à kpɛyn.
31 Twɛy kwey rèè yè Yesù mafyɛ̀ɛn ci à mà ye bàji be byɛnbe gane ɲan waa.
32 Tɔ̀ y'a tàrà, bɛ̀y kuru brìsi sɔn na ni jèèn tsɛ mɔn, twɛy yè bà ni ɲwɛyn ɲɔɔn nà. Kwey rèè yè Yesù mafyɛ̀n, ci à y'à to ye yè bè dɔ̀n bɛy rèè ɲàn. Yesù yè tɔ̀ shia sìn è ra.
33 Tɔ̀un, kwey rèè yè bo kpir'la ɲàn, yè bè dɔ̀n bɛ̀y rèè ɲàn. Ta fau min niì, bɛy rèè sapɛ yeè soso jaà bo jèèn tsɛ, yè nà e tsɛn kpìnìn yu rɔ̀n. Yuà yè è sapɛ ɲɔn.
34 Bɛ̀y kplàtsuu reè dziu tà goò jà min niì, yè vwɛ̀ɛ̀y, yè b'a lakɛɛ̀y wɔ̀ɔ̀ doùn, ko ten dzii re sa rà.
35 Mòdzian yè bo, ci ye bèe à goò lafyɛ. E bèu, yè bè wɔ Yesù tsɛ. Tɔ̀un, Yesù kwey rèè kaa bou kpir'liì kpɛyn, yè tɔ̀ tsùuŋma jà Yesù tɛyn, mɛ̀yɛɛ ni à vu ra, à jaamà yè bà tsìiŋnà. Yè shi.
36 Tɔ̀un, à goò sapɛ fau nìì reè jaa ra, à bàu nìi tsuru Yesù yè kwey rèè kaa bo kpir'la kpɛyn, twɛy yè bo à mà, y'à lakɛɛ̀y dzyee rèè rà.
37 Gerasa mar'la mòdzin neè y'à goò myɛ̀un tà tsuru min niì, è ɲɛyn yè shɛn, fɔ è bè geren. Yè dzin Yesù rà, ci è bè, è bo ye re gàne rɔ̀n. Yesù ko e re kàràndzin neè yè dɔ̀n konkor'na doùn tɔ̀un, yè sèè e kpɛyn.
38 Yesù bèkɔɔn, à kwey rèè kaa bou kpir'liì kpɛyn, tɔ̀ y'a màfyɛ̀ɛn ci à y'à to wò sa yeè bè ko à ka. Yesù na e tsiì waa, à to yè dzin à ra ci:
39 «Sèè be a re mòò rèè kpà, Ŋaablà goo blà niì fau wo re, e bè tɔ̀ lakɛɛ̀y è ra.» Tɔ̀un, kpir'la yè bè. A bèu wɔ, Yesù goo o goo rìì fau à re, è tɔ̀ lakɛɛ̀y wɔ̀ɔ̀ min niì sapɛ.
Yayirusì Yesù màfyɛ̀un min niì, ci è wò dzin taan cɛrɛmabe
40 Yesù ko e re kàràndzin neè sèè nau watsi riì bwèy, è bo yu blàa kɛ̀yn nɔn, jàma brìsi yè è kùùntsi. Twɛy sapɛ na Yesù màshua.
41 Kpiri sɔn na ni mɔn, tɔ̀ tsoo yè bà ci Yayirusì. Tɔ̀ kpir'la rìì na tɔ̀ gàneè waajibi fa gbaà kùntsiɛ̀. Tɔ̀ yeè nà Yesù kpɛyn, è nà e kunun gban à bììn, à màfyɛ̀n ci è yɛrɛ to è bè wò re tsii.
42 Dzin taan soo den ni na ni à re, tɔ̀ yeè bà na wɔɔ jii teeŋ fii. Tɔ̀ dziɛ̀n na ɲìniɔ̀n fɔ à gaa san. Tɔ̀un, Yesù yè Yayirusì rè tsii shià sen. A bèkɔɔn, jàmaà blàbe ɲaanfaa suun, fɔ yè b'a ŋòò tsùù e shiɲaanfi.
43 Awà, tàan sɔn na ni jàmaà fi, tsììnàban yeè bà ni tɔ̀ ra. Tɔ̀ ɲìn'nèe na ni à ra, tɔ̀ na à jii teeŋ fii. A na e suun gee sapɛ dɔɔ̀n tɔ̀ ɲìn'nèe ɲan jangoo fa reè rè, ŋà, mòò pɛn to naà dziɔ̀ à cɛrɛmabe waa.
44 Tɔ̀un, è kpɛrɛ̀ Yesù rà e bonè, è bè e dzyɛn à re mɛ̀yɛɛ dziɛ̀ rà. A tɔ̀ fau min niì, tɔ̀ gàne rɔ̀n ko e sa, à re tsììnàbaan yè dò.
45 Tɔ̀un, Yesù yè tey fa ci: «Tsì rii yè e dzyɛun mun na ?»
Mòdzian sapɛ yeè dzin ci, à na ye waa. Tɔ̀ ɲan, Piyɛrì yè dzin ci: «Kàrànfaà wo na à jàa mòdzian wo laguruɔ̀ nìi tsuru ɔ ? Twɛy rìì wo tèn tèen.»
46 Yesù yè dzin ci: «Mòò yè e dzyɛun mun na, kàtsu m'a tɔ̀u n yɛr'la, ci dzia sɔn boo mun ɲan.»
47 Taàn y'à jà, ci wo tɔ̀u nòn. Tɔ̀un, à mà sɔɔnkɔɔn yè nà e kunun gban Yesù bììn. Goo nìi y'à tou wò yeè e dzyɛn à re mɛ̀yɛɛ dziɛ̀ rà, ko à bàu nìi tsuru wò yeè cɛrɛmabe tà nɔ̀nkɔɔ rɔn, taàn yè tɔ̀ sapɛ lakɛɛ̀y Yesù rà, mòdzian jaa ra.
48 Yesù yè dzin à ra ci: «Tàan, wo ɲɛn niì fau mun na, tɔ̀ wo cɛrɛmabeu. Bèe, Ŋaa yè b'à ko xɛɛrɛ tsi.»
49 E Yesù to goomaa nà tà tsuru, kpiri sɔn yeè bo waajibi fa gbaà kùntsii Yayirusì rè tsii rɔ̀n, è nà dzin Yayirusì rà ci: «Wo dzin taan saun nòn, maà byɛnbe kpɛrɛkuru ji mùn kàrànfaà ra dɛ.»
50 Yesù tɔ̀ myɛ̀n nìi fau, è dzin Yayirusì rà ci: «Maà goo kpɛ̀rɛ̀ ji a duùn waa, ɲɛn mun na dànmaùn, wo dzin taan nà fù.»
51 Tɔ̀un, yè bè. E bèu wɔ Yayirusì rè fɔɔn dɔ̀nmà dziɛ rà, Piyɛrì, ko Yùxanà, ko Yàkubà, ko dziɛ̀n naà ko à fàa boshɔ̀ùn, Yesù na e tsiì mòò pɛn yè dɔ̀n wò ka gbàà doùn waa.
52 Dziɛ̀n saunmaà kamà, gè o ge na ni fɔɔn rè, è sa bèu gɛɛ, yè màtsùrù goo reè faa nèe tsuru. Yesù yè dzin tɔ̀un ci: «E maà gɛɛy waa. A na saɔn waa, à ciɛ̀ rìì.»
53 Yesù tà dèu min niì jirangoo na mòdzian to à mà dɛ. E sapɛ na à tɔ̀ ci dziɛ̀n saɔn taki rii.
54 Tɔ̀un, Yesù yè dziɛ̀n kun e si ra, è dzin ko baraka ka ci: «Dziin kòòmɛ̀yn, fù !»