Luc 9

Yesù yè e re kàràndzin neè kau min niì, ci yè bè mòdzian waajibi

1 Twɛy goo rèè sapɛ shɔùn, Yesù yè e re kàràndzin teeŋ fii rèè sapɛ dzyeèmaa kiri. Tɔ̀un, è dzi ko fààn sin è ra, nìi dzia à to yè kwey rèè kaa bo kweykɔɔn reè kpɛyn, yè bà dzia ɲìnìnkɔɔn reè sa cɛrɛmabe.

2 Tà shɔ̀ùn, à yè è ka, ci yè bè mòdzian waajibi, yè Ŋaablà re màsàbee kùnàgoo Dziɔ̀ dè, yè ɲìnìnkɔɔn reè sa cɛrɛmabe.

3 E dzin è ra ci:

«Jìɛ̀ doùn, e maà gèsɔn pɛn sen e suun waa. E maà kɔ̀n sen, e maà bɔ̀tɛ sen, e maà ɲwɛynmage sen, e maà ɲɛyn sen, mɛ̀yɛ̀ dzin fii fii to mà bà ni e soo sookɔɔn pɛn ne waa.

4 Awà, ye be, ye wɔ wɔ̀ o wɔ ɲàn, ye be jàà fɔɔn niì rè, ye to tɔ̀ fɔɔn soo rè, fɔ e bo jisee yè bè wɔ wɔ̀ɔ̀ doùn.

5 E to ye be gàne rìi ɲàn, twɛy mòdzin neè yè bè e nɔn, ci e fa e jaà ye re, e bokɔɔn è re gàne rɔ̀n, ye e san nà kpankpaàn ban ji to mɔn. Tɔ nà bà tàànmàshɛn, à y'à kpàdè tɔ̀ gànè dzin neè rà, ci è ɲaan fau.»

6 Ayìwà, kàràndzin neè yè fù, yè shia sen, yè bèe wɔ̀ rèè ɲàn. Yè Kùnàgoo Dziɔ̀ dè beè mòdzian nà, yè ɲìnìnkɔɔn reè cɛrɛmabe bèe min niì sapɛ.

Yesù goojaa màsà kpiri Erodzì cìimà sàu min niì

7 Ayìwà, goo nìi sapɛ ni sààn, màsà kpiri Erodzì yè nà tɔ̀ myɛ̀n. A naà à tɔ̀ wo nà goo nìi soo fa dɛ, kàtsu, mòdzian na gooma giri dèe Yesù tsɛ. Swey dziàn ci à Mòdzìn Jààràfoobaa Yùxanà rìì sèè kpunan nauma.

8 Swey ci à Ŋaablà re kɛɛra Aliì rìì sèè nauma. Swey yè bà dziàn kɔn, ci à Ŋaablà re dan kɛɛra re sɔn ni sèè kpunan nauma.

9 Màsà kpiri Erodzì yè dzin ci: «Mun yɛ̀r'la rìì y'à tou, yè Mòdzìn Jààràfoobaa Yùxanà kùngɔɔ̀ kùnùn. Tsì rii soo to yè bà nèe kpir'lee kɔn, yè bà nèe sapɛ deè tɔ̀ tsɛ ?»

A na à gaa tɔ̀un, wò yɛ̀r'la jaadzin yeè ɲɛn Yesù ma.

Yesù ɲwɛɛ̀n sìun jàmaà nà min niì

10 Ayìwà, kàràndzin neè sèè nau watsi riì bwèy, yè bo jìɛ̀ rà, è goo o goo fau jìɛ̀ doùn, yè nà tɔ̀ sapɛ lakɛ̀ɛ̀y Yesù rà. Tɔ̀un, Yesù yè fù è ka, è bo è ka mòdzian tɛyn, yè bè fɔ wɔ̀ sɔn kpakèrè ci Betsisayidà.

11 Mòdzian nàu è bèma tɔ̀ min niì, yè bè è kpɛyn mɔn. Tɔ̀un, è nàu wɔ Yesù tsɛ, à yè è kuun'n kuru wuu fa. È Ŋaablà re màsàbee gooma de è ra. Ɲìnìnkɔɔn niì reè to na à gaa à re, ci è ye cɛrɛmabe, è twɛy sa cɛrɛmabe.

12 Tɔ̀un, bwèè dò naà watsi riì bwèy, Yesù rè kàràndzin teeŋ fiɛ̀ yè e kpɛrɛ̀ à ra, yè dzin à ra ci: «Ɲe yɛ gàne rìi ɲàn mìin, à jènjàà kor'nì. À to mòdzian yè bè mùn dzii re wɔ reè, ko ten dzii re rà, yè bè ɲwɛyn gaa ɲɔn, yè ɲɛnmagoo jaa bo !»

13 Yesù yè dzin è ra tɔ̀un ci: «Ye yɛ̀r'leè yè ɲwɛyn sìn è ra y'à ɲɔn !»

Yè dzin Yesù rà ci: «Ɲwɛyn nìi ni ɲe re, à na gereon buru kaan nun ko ji dzin fii bàsɔùn tsɛ waa. Fɔ wo ye ba ni à re, mùn yeè bè ɲwɛyn nì fì na sìn nèe jàma brìsi rèe sapɛ ra boshɔ̀ùn.»

14 Awà, jàma nìi na ni mɔn, è na kpiri gbaa nùn boò. Yesù yè dzin e re kàràndzin neè rà ci: «Y'a to yè e tsuù tsùù bè mòkun dzyeè tsye tsyeù tsuru.»

15 Awà, kàràndzin neè yè Yesù rè goomaa bo e shi tsɛ, y'à fa mòdzian sapɛ yeè e tsuù tà tsuru.

16 Yesù yè twɛy buru kaan nun nèè, ko ji dzin fiɛ̀ sen. A yè è seun, è jaà ɲansen jìran kèrè, è Ŋaablà tswa twɛy ɲwɛyn nèè goò rà. Tà shɔ̀ùn, à yè è kɛɛy kɛɛy, à yè è wɔ e re kàràndzin neè suun, ci y'à tanan jàmaà nà.

17 Tɔ̀ùn, è sapɛ yeè ɲwɛɛ̀n ɲɔn, yè cɛn kpan. A dzyee nìi tou è shɔ̀ùn, è sèè teeŋ fii rìì tsyɛun tɔ̀ ra.

Piyɛrì ci Yesù Ŋaablà Jaa ra Modzìn

18 Sii sɔn see, Yesù na Ŋaablà mafyɛ̀ɛn gàne sɔn ɲan e soone. A nàu dò watsi riì bwèy, à re kàràndzin neè yè e kpɛrɛ̀ à ra. A yè è tey ci: «Mòdzian ye ba goomaa mun tsɛ, è dziàn ci mun tsì rii ?»

19 Twɛy yè dzin à ra ci: «Swey dziàn, ci wo Mòdzìn Jààràfoobaa Yùxanà. Swey ci wo Ŋaablà re kɛɛra Aliì. Swey yè bà dziàn kɔn, ci wo Ŋaablà re dan kɛɛraa sɔn ni sèè kpunan nauma.»

20 Yesù yè è tey kɔn ci: «Ye do, ye ci mun tsì rii ?»

Piyɛrì yè dzin à ra ci: «Ŋaabla Jaara Mòdzìn nìi goo dèu, à wo rìì !»

21 Tɔ̀ ɲan, Yesù y'à dèmà xɔbe è ra, ci è mà à goomaa dè mòò pɛn jaa ra waa.

22 E dzin è ra kɔn ci fɔ Adamà dzian yè byɛn cɛyn. Bɔɔ rèè, ko saaka jɔɔndzin neè, ko sàrìyà kaamoo reè yè e nɔn à re, y'à kun y'à vu. A saunmaà bwèy zhììgiraa sii sèè, è sèè kpunan.

23 Tà shɔ̀ùn, è dzin è sapɛ ra ci: «Mòò o moo, e ba ni à re a gban mun kpɛyn, à wù a ɲɛyn bo a yɛrɛ tsɛ. Màan ji o ji sereon, a tsiì byɛnbee kaatsià sapɛ ra, jàci, à dzia mun tàrà nìi tsuru, arì è kɛ̀nsɛɛn ye ba a vua rìì.

24 A jà min tɔ̀ dè, mòò riì y'à gaa, mìin dzɔ̀nxɔɔ̀ tsɛ raa jaamabee dànmaùn nì yè dzibe wò ra, tɔ̀ tsìfa nà fɔ gbee raa jaamabe dziɔ̀ ɲàn. Mòò riì to ye e tsiì e mɛɛy mìin dzɔ̀nxɔɔ̀ tsɛ raa jaamabee ɲàn mun kamà, tɔ̀ tsìfa nà tsi gbee.

25 Awà, mòò riì kɛ̀nsɛɛn ye dziɲan sapɛ tarà bà e raa mìin, è nà bè fɔn e xɔn nɔn, à raa yè bara gbee, dziɲan sapɛ taraumaà to fee wùbeu tɔ̀ tsìfa mà sa ?

26 Tɔ̀ rii kamà, wo mòò riì ci wo seè, wo yè mun gooma de dzyee rèè rà, ci wo seè wo yè mun dzugoomaa shi jiì goo rìi nà wo tàrà, tɔ̀ rii siin: Adamà dziàn sa ye na nà e blabee doùn sii riì sèè, è nà e fa Ŋaablà blabee doùn ko mɛ̀rɛ̀kɛ̀ fɛnɛ reè raà doùn, à tsu fa e tsiì è tɔ̀ tsìfa tɔ̀ tɔ sii sèè waa.

27 Sààben na, mun nì ci e ra, ci ye nìì reè yɛ nèe mìin, swey fa san ye ɲan fyeu, ni è na Ŋaablà re màsàbee jà.»

28 Ayìwà, twɛy gooma reè dèumaà bwèy ŋaalòn tsuru, Yesù yè Piyɛrì, ko Yùxanà, ko Yàkubà kiri gban e ra. Tɔ̀un, yè bè jèn sɔn tsɛ, Yesù yè bè Ŋaablà mafyɛ̀n.

29 E Yesù to Ŋaablà mafyɛ̀ɛ̀n nà, Yesù jaakɔrɔɔ̀n yè e lakere. A mà vya reè yè siin, twɛy yè fyɛ tɛrɛ, tɛrɛ, tɛrɛ fɔ yè bè den deèn.

30 Tà nɔ̀nkɔɔ rɔn, kpiri fii yè jà Yesù tɛyn, twɛy yè e maa yè goomaa à ka. Twɛy kpiri fiɛ̀ na Ŋaablà re dan kɛɛra reè swey. A na Musà, ko Aliì.

31 Twɛy ci e ye nà bo, vyevyee brìsi na è laguruɔ̀ nìi boo Ŋaablà ɲan. Yesù na nà e na kuan bo e shi tsɛ nìi tsuru, fɔ è nà bè wɔ è san Yerusalɛmùn wɔ̀ɔ̀ doùn, è na tɔ rii gooma deè à ka.

32 Twɛy goo rèè faa watsi riì bwèy, tɔ̀ y'a tàrà Piyɛrì, ko e koòsi rèè na cìi gbànmaɔ̀ nòn. E nàu kpunan, yè Yesù blàbee jà, ko nèe kpiri fii ree, yè bà tsìiŋnà à ka.

33 Twɛy kpiri fii rèè ci e ye bo Yesù tɛyn watsi riì bwèy, yè bè, Piyɛrì yè dzin Yesù rà ci: «Kàrànfaà, ɲe nàumaà wùbeu mìin. Ɲe nà ten zhììgi kun. Wo raa soo, Ŋaablà re kɛɛra Musà raa soo, ko Ŋaablà re kɛɛra Aliì raa soo.»

Piyɛrì kpɛ̀yn na goomaa nì, ŋà, à naà à tɔ̀ ci wo gè niì dèe waa.

34 È Piyɛrì to goomaa nà tà tsuru, ŋaamunun sɔn yeè nà è tsyee. Piyɛrì ko e koòsi rèè y'à jàu min niì ci tɔ̀ ŋaamun'na nàu è tsyee, yè shi.

35 Tɔ̀un, vu sɔn yeè bo ŋaamun'na ɲàn mɔn, tɔ̀ yeè dzin ci: «Nè mun Dzin Kpir'la rìì yɛ. Mun wò rii boo n jaa ra. Ye e toro wɔ à re.»

36 Ta goomaa dè dòumaà shɔ̀ùn vu rèe re, Yesù soo boshɔ̀ùn, Piyɛrì ko e koòsi rèè na mòò kpɛrɛ jà dɛ. Twɛy sa yeè e mɛshɛ̀n tà goò tsɛ. E na dzin mòò rà tɔ̀ watsi rɔn, ci ye nèe goo rèe ko nèe goo rèe rìì jàu waa.

Yesù kpiri sɔn ne dziin kweykɔɔn cɛrɛmabeu min niì

37 Tɔ̀ ra gbee, yè jàà bo jèèn tsɛ. E jàaŋ watsi riì bwèy, yè bo jèèn tsɛ, jàma brìsi yè nà è kùùntsi.

38 Tɔ̀un, kpiri sɔn yeè to jàmaà ɲàn mɔn, è nèe gooma ree dèe fààn na ci: «Mùn kàrànfaà, mun wo màfyɛ̀ɛn nì, a yɛrɛ to e n dzin kpir'la siin n ne. A soo den ni ni mun ne.

39 Kwey sɔn ni ni à kpɛyn. Tɔ̀ y'a kun nìi tsuru, è maa è gɛɛ boò. Kwey rèe y'à toò è soron sor'nà, dzweeyuà yè kànkan boò à dzu. A na à bàjia tabe waa. È na à bàji watsi riì bwèy, à maa ji toò mɔn nì.

40 Mun wo re kàràndzin neè màfyɛ̀un, ci yè kwey rèe kaa bo à kpɛyn, è to na dzi waa.»

41 Yesù yè dzin tɔ̀un ci: «Ye mòdzìn ɲan ree reè, e na ɲɛɛn Ŋaablà ra ! Mun nà to ye ka fɔ watsi kɛn tà tsuru ? Mun nà ye re goo rè kun n ɲan, è bè wɔ fɔ watsi kɛn kɔn ?» Tà shɔ̀ùn, è dzin kpir'la rà ci: «Nà ko a dzin kpir'la ka mìin.»

42 E bèkɔɔn dziɛ̀n ka, è ci e ye bè tsyɛnbe Yesù rà, kwey rèe yè dziɛ̀n sen mɛɛy dzɔ̀n nɔ̀n, à y'à to è soron sor'nà. Tɔ̀un, Yesù yè e cerè kwey rèe tsɛ, ci è bo dziɛ̀n kpɛyn. Kweè yè bo dziɛ̀n kpɛyn, è cɛrɛmabe. Tɔ̀un, Yesù y'à wɔ e faà suun. È dzin ci: «Kpiri, a dziàn yɛ !»

43 Nìì reè na ni mɔn, à goò yè ji è sapɛ dzii tsɛ. E sa ci Ŋaabla dzia taki.

Yesù rè goo fakɔɔn reè na mòdzian sa ɲɛyn seòn, è bà è duungoo doò. È dzin e re kàràndzin neè rà tɔ̀un, ci:

44 «Ye e toro wɔ, ye nèe gooma ree myɛ̀ùn'n kuru wube: Mòo nà Adamà dzian wɔ mòdzin ì suun.»

45 Yesù tà gooma niì dèu, kàràndzin neè na tɔ̀ fàànmun waa. Tɔ̀ gooma ree sa to na deò rìì, à dzuɔn yè mɛnɛn è mà, sànko, è mà dzi à fàànmun waa. È sa to yè shi, è na Yesù tey à dzuɔn mà waa.

46 Ayìwà, sɔ̀swɛy sɔn yeè nà fù kàràndzin neè ko e si fi. Tɔ̀ sɔ̀swɛɛ̀ doùn, è na n'a re y'à tɔ̀ ye ɲan, mòò riì ni jɔɔn.

47 Nìi ni è duùn, Yesù tà tɔ̀ nìi fa, è dziinii sɔn kun e si ra, è nà tɔ̀ tsìì e tɛyn.

48 Tɔ̀un, è dzin kàràndzin neè rà ci: «Mòò o moò yè e tsiɛ è nèe dziin nèe tsuru kuun'n kuru wube mun kamà, à bàu jàci tɔ̀ tsìfa mun yɛ̀r'la rìì kuun tà tsuru. Mòò o moò rìì to mun kuun'n kuru wubee, nìi mun sa ka naɔ, à ni jàci tɔ̀ tsìfa tɔ̀ rii kuun'n kuru wubeò. Awà, ye sapɛ ɲan, mòò riì ci wò dzyɛ̀n, tɔ̀ rii ni ye jɔɔn.»

49 Yesù rè kàràndzin Yùxanà yè goomaa sen tɔ̀un, è dzin ci: «Kàrànfaà, ɲe kpiri sɔn jau, à sa kwey rèè kaa boò mòdzian kpɛyn wo tsoò baraka rɔ̀n. Ɲe sàò na ni à re, ɲe y'à kaa à tsɛ, kàtsu, à dzii na ni ɲe ka waa.»

50 Yesù yè dzin à ra tɔ̀un ci: «E maà à kaa tɔ̀ faa tsɛ waa ! Mòò riì ma ba ye ɲan, tɔ̀ ye wùù rii.»

51 Ayìwà, Yesù nà bo dziɲan tsiɛ doùn watsi riì bwèy, è bè Ŋaablà re, tɔ̀ watsi na wɔ naɔ nìi fa, Yesù y'à ji e duùn, ci à kɛ̀nsɛɛn ye ba dzii o dzii, fɔ wò yeè bè Yerusalɛmùn.

52 Awà, à ci e ye shia kun, è kɛɛra ì ka bè e jɔɔn ŋe. Twɛy yè bè, yè bè wɔ Samari mar'la wɔ̀ sɔn ɲan. E bèu wɔ mɔn, yè dɔ̀n tɔ̀ wɔ̀ rɔ̀n, ci ye nà tɔɔnsibema goo jaa bo tsùù Yesù rè.

53 Tɔ̀un, tɔ̀ wɔ̀ dòùn dzin neè yè bè e nɔn, ci Yesù fa e jaà ye re waa, kàtsu à bèe Yerusalɛmùn kèr'lì.

54 Kɛɛra reè nàu sèè na Yesù kpà watsi riì bwèy, y'à jaa dè à ra. Tɔ̀un, tɔ̀ goò yè dɔ̀n kàràndzin Yàkubà ko Yùxanà kpɛyn fɔ è bè geren. Yè dzin Yesù rà ci: «Mùn Tsìfaà, a fa à to, mùn y'a fa sàà yè bo jìrànxɔ rɔ̀n, è nà è dzu, è ko shià sa ba soo kɛ ɔ ?»

55 E tɔ̀ goomaa dèu min niì, Yesù yè e jaa kere è kpɛyn, è gooma ɲaan de è ra cɛyn.

56 Tà shɔ̀ùn, yè dɔ̀n be wɔ̀ kpɛrɛ ɲan.

Mòò yè e gbaàn Yesù kpɛyn nìi tsuru

57 Awà, è bèkɔɔn Yerusalɛmùn shia rè, sɔn yeè dzin Yesù rà ci: «Mùn Tsìfaà, wo ye ba bèe min o min, mun nà n gban wo kpɛyn.»

58 Yesù yè dzin à ra ci: «Kɔ̀ɔ̀ rìì ni tsɛ̀ kùn kpar'nèè rè yè bà dɔ̀ɔn mɔn. Kɛ̀yn neè, tàn yè bà ni twɛy rè, yè e ɲɛɛn min niì. Gàne to na ni Adamà dziàn tsoo ra, à nà dzi e ɲɛn min niì, è ɲɔɔ̀nkinin waa.»

59 Tà shɔ̀ùn, Yesù yè dzin kpɛr'la ci: «Wo nìi yɛ nèe, a gban n na.»

Tɔ̀ yeè dzin Yesù rà ci: «Mùn Tsìfaà, à to min n faà fùn wɔ ŋe.»

60 Yesù sa yeè dzin à ra ci: «À to fùn nèè yè e re fùn nèè wɔ. Nìi wo, fùn nèè wɔɔ̀ na wo re faagoo waa, tɔ̀ to e fabaa rèè mà. Bè mòdzian toro kɔ̀ Ŋaablà re Màsàbee Kùnàgoo rà.»

61 Mòò kpɛrɛkuru yeè dzin Yesù rà kɔn ci: «Mùn Tsìfaà, mun kpɛ̀yn nà n gban wo ra, ŋà, à to min bè n beè dè n ne tsii dzin neè rà ŋe.»

62 Yesù yè dzin à ra ci: «Nìì fɛɛfabaa rìi yè e jaa ker'la e bonè, è siin fa, moo rii ni tɔ̀ tsuru, tɔ̀ tsìfa fa dzi Ŋaablà re Màsàbee faagoò wùbe waa.»