Yesù kàràndzin muey ko tsyeùn kau min niì
10
1 Tà shɔ̀ùn, Yesù yè kàràndzin muey ko tsyeùn bo. Twɛy boumaà shɔ̀ùn, à yɛ̀r'la nà wɔ wɔ̀ o wɔ ɲàn, à to nà wɔ gàne o gàne rìì ɲàn, à yè twɛy kàràndzin neè dzyèè dzyèè be fii fii, è ka bè e jɔɔn twɛy gàne rèè sapɛ ɲan.
2 Tɔ̀un, è dzin è ra ci:
«Shìmaan gaa watsi wɔu. A gaaramaà giri. Nìì reè to wù y'à faagoò fa, twɛy na bɛrɛ waa. Ye dzùtsià màfyɛ̀n ɔn, ci è sɔn gaa ba faagoo fa reè tɛ̀y, y'à re shìmaan faagoò fa, è dɔ̀n tsii.
3 Ayìwà, dòònun y'a wa, mun ye ka bèe, a ci sààdzìnii ì bèuma dɔ̀n kparan ì fi.
4 E maà ɲɛyn ji be e kuùn, e maà bè ko bɔ̀tɛ ka, e maà seereyn kpɛrɛkuru ì sen, e to mà to tswɛ̀ɛ rà shia rè.
5 Jìɛ̀ doùn, ye be dɔ̀n fɔɔn o fɔɔn re, ye dzwɛ ji twɛy fɔɔn re dzin neè rà ŋe, ci Ŋaa re jaancin yè bà ni è tsɛ.
6 Jaancin modzìn ye ba ni tà fɔɔn doùn, tà bwèy, ye re dzwɛɛ̀ na kun tà tsìfa mà. Tà tsuru mòdzin to ma ba ni mɔn, ye re dzwɛ rèe nà to e shɔùn ye re.
7 Fɔɔn re dzin niì reè ye e tsiì ye jaà ye re, ye to tà fɔɔn doùn. È ye ɲwɛyn nìi sìn e ra, ye tɔ̀ ɲɔn. Yè yu rìi sìn e ra, ye tɔ̀ mìn, kàtsu, faagoofadzian wù e re sàr'là ka. E maà e tɔɔnsi tsiɛ lakere kere beè waa.
8 Ye dɔn wɔ̀ o wɔ doùn, tɔ̀ wɔ̀ dòùn dzin neè ye e tsiì, ye e jaà ye re, è ye ɲwɛyn gè o ge sìn e ra, ye tɔ̀ ɲɔn.
9 Ɲìnìnkɔɔn niì reè ni tɔ̀ wɔ̀ɔ̀ doùn, ye twɛy cɛrɛmabe. Tà shɔ̀ùn, ye dzin à wɔ̀ dòùn dzin neè rà, ci Ŋaablà re màsàbee tsyɛnbe naɔ è ra.
10 E to ye be dɔ̀n wɔ̀ o wɔ ɲàn, tɔ̀ wɔ̀ dòùn dzin neè yè e nɔn, ci e fa e jaà yè re, ye bo, ye bè e tsiì shia tsɛ, ye dzin è ra ci:
11 <Arì, ye re wɔ̀ɔ̀ kpankpan nìi taki dzwɛ̀ù ɲe sàn nà, tɔ̀ sa ban ji touma yɛ e re. Ne faumaà ko e sa, ye e taa to à re, ci Ŋaablà re Màsàbee tsyɛnbe naɔ ye ra.>»
12 Tà shɔ̀ùn, Yesù yè dzin è ra kɔn ci: «Xàà ! Mun nì ci e ra, gooɲaan kaatsi rìi Sodomùn wɔ̀ɔ̀ tàrau jɔ̀na jɔ̀na, tsìɛ̀ sii sèè, tɔ̀ sa nà fyanbe tɔ̀ wɔ̀ɔ̀ raà mà.»
13 Tà shɔ̀ùn, Yesù yè dzin kɔn ci: «Nìi Korazɛnka reè, gooɲaan nà twɛy tàrà ! Bɛtsisayidaka reè, gooɲaan nà twɛy sa tarà ! Kabagoo goo niì reè fau è re she, twɛy ye ba na fau Tsirì wɔ̀ɔ̀, ko Sidɔ̀n wɔ̀ɔ̀ rìì doùn jɔ̀na jɔ̀na, è na bɔ̀tɛ sen jiu e ma nòn, yè e tsuù shi rɔ̀n, tɔ̀ y'a kpàdè, ci è re gooɲaan faumaà tsìngààlɔn ni è ra. E na nà e re jaamabee fau'n kur'la lakere.
14 Tɔ̀ rii y'à to, tsìɛ̀ sii sèè, Tsirika reè, ko Sidɔnka reè raa goo rèè nà fyanbe, è geren nèe wɔ̀ fii rèe raà tsɛ.
15 Nìi Kapɛrinaxumunka reè, twɛy yè bà jaa ra, ci ye re wɔ̀ɔ̀ nà blàbe, è bè suu fɔ Ŋaablàxɔɔ̀ rà gbɛ ? Kuraa, è nà jàà rìì fɔ jààndamaa doùn.»
16 Tà shɔ̀ùn, Yesù yè dzin e re kàràndzin neè rà kɔn ci: «Mòò riì ye e toro wɔ ye re, tɔ̀ yeè e toro wɔu mun nì nè. Mòò riì ye ye maa, tɔ mun nì maaŋ. Mòò riì to ye mun maa, nìi mun sa ka naɔ, tɔ̀ tsìfa tɔ̀ rii maaŋ.»
Kàràndzin neè yè e kpɛyn sèè nau Yesù kpa min niì
17 Tɔ̀ùn, kàràndzin muey ko tsyeòn yè dɔ̀n be jìɛ̀ rà. E nàu bè watsi fa mɔn, è taama dzibeuma blà yeè e kpɛyn sèè na. E nàu wɔ, yè dzin Yesù rà ci: «Tsìfaà, wo tsoò baraka rɔ̀n, arì kwey rèè sa shiu ɲe jɔɔn. Ɲe ye ba na nìi jiu è jɔɔn, è na tɔ̀ rii faa.»
18 Yesù yè dzin è ra ci: «Taki ! Mun na Sùtana bokɔɔn jaà jìran nɔ̀n, è nà mɛɛ̀ a ci ŋaà myɛ̀ɛn nìi tsuru.
19 À sààben, mun kpɛ̀yn dzi siun ye ra, nìi dzia à to, ye yè jìì myɛn reè, ko ɲaalon neè tsɛ. Sùtan'lìi mùn ɲaàn, ye yè e san ɲinan tɔ̀ raa dzia tsɛ. Awà, goo teren bɛy pɛn fa dzi ye tàrà waa.
20 Ye re fààn ɲinaunmaà ko e sa kwey rèè mà, e maà tɔ̀ bà e taama dzibee goo waa. Ye tsoo nìi sɛbɛunma ni arìjinɛ doùn Ŋaablà re, ye e taamadzibe tɔ̀ rii là.»
Yesù taama dzibeu min niì
21 Tà watsi soo ɲàn, Ŋaablà re Dzi Fɛnɛɛ yè Yesù taama dzibe cɛyn. Tɔ̀un, Yesù yè tsoo dzi ɲɛn Ŋaablà tsɛ nèe tsuru ci: «Aa, mun fà Ŋaablà, dzɔ̀nxɔɔ̀, ko Ŋaablàxɔɔ̀ sa tsifaà, n ne tswɛ̀y ni a re. N ne tswɛ̀y n'a re, kàtsu, wo nèe goo rèe rèè mɛnɛun Akiribla reè, ko Akiri dzi reè mà, wo yè è kpàdè dziin kòòmɛyn neè rà. Sààben na, mun fà Ŋaablà, mun tsoo dzi ɲɛɛn wo tsɛ, kàtsu, a y'a goò jà tɔ̀ tsuru, tɔ̀ rii bàu wo sàò.»
22 Yesù yè dzin mòdzian nà kɔn ci: «Mun fàà gè sapɛ wɔu mun suun. Mun fà Ŋaablà boshɔ̀ùn, mòò pɛn na à tɔ̀, mun mòò riì waa. Mun soo riì boo Ŋaablà ɲan boshɔ̀ùn, mòò pɛn tsu na à tɔ̀ mun fà Ŋaabla mòò riì waa. Mun to ye dzin ci mun y'à kpàdèe nìì reè rà, twɛy rìì sa y'a tɔ̀ɔ.»
23 Tà shɔ̀ùn, Yesù yè e jaa kere e re kàràndzin neè rà, è dzin twɛy rà e si, ci: «Ye jaa ni nìi rà, mòò o moò ye tɔ̀ jà, tɔ̀ tsìfa dààmuun.
24 Ye nìi jàa, Ŋaablà re kɛɛra giri ko màsa giri sàò na ni à re, ye y'à jà, è to na à jà waa. Ye nìi myɛ̀ɛn, è sàò na ni à re, ye yè tɔ̀ myɛ̀n, è to na à myɛ̀n waa.»
Tsì rii a modzìn sia
25 Twɛy goo rèè sapɛ shɔ̀ùn, sàrìyà kaamoo reè mòò sɔn yè nà goomaa sen, è Yesù tey. A na ni à re, wò yeè myɛ̀ɛ̀n nì ɲɛn Yesù jɔɔn tà goomaa ka. A ci tɔ̀un ci: «Mùn kàrànfaà, mun wù, mun yè fee rìì fa, min dzi jaamabe dò bɛɛ tàrà gbee ?»
26 Yesù yè dzin à ra ci: «Fee rìì sɛbɛɔ̀n Ŋaablà re sàrìyaa kìtaabuà doùn. Wo y'à kàr'na w'a myɛ̀ɛn dzùrù.»
27 E dzin Yesù rà ci: «Awà, sàrìyaa doùn, à sɛbɛɔ̀n nèe tsuru ci:
A wù, e mùn Tsìfa Ŋaablà kɛn,
kɛ̀n'n kur'la sapɛ ra.
A to, à goò yè bà ni à vunun tsɛ,
è bà ni a xɔɔn tsɛ.
A goò kun a faàn sapɛ ka,
a kɛsɛmàà sapɛ yeè bà ni à tsɛ.
Tà shɔ̀ùn, a moò sia kɛ̀n jàci a yɛr'la.»
28 À tà dè dòu min nìi, Yesù yè dzin à ra ci: «Wo nìi dèu, tɔ sààben. Wo ye tɔ̀ shi jiì, wo nà tsi.»
29 Tà dèumaà ko e sa ra, kpir'la naà n'a re, è tsiì Yesù rè goomaa nà waa. E Yesù tey ci: «Tsì rii soo to mun mòdzìnsia ?»
30 Tɔ̀un, Yesù y'à re goomaa latsi ko gooma bɔɔ soo ka nèe tsuru ci: «Kpiri sɔn ni na boo Yerusalɛmùn wɔ̀ɔ̀ doùn, è bà jàà beè Yerikò wɔ̀ rɔ̀n. À bèkɔɔnà shia rè, gookoronfabaa rèè swey yè bè e mɛɛy à tsɛ. Y'à suun ge reè sapɛ tsi à ra, y'à ban, fɔ yè b'a mɛ̀ɲɛ̀n. Yè e bon wɔ à ra, y'à maa jiumaà to mɔn fùn tsuru.
31 Saaka goojaabobaa sɔn nàu bà nàa tɔ̀ shia rè, tɔ̀ yeè nà bo kpir'la mɛ̀ɲɛ̀unmaà tsɛ. Tɔ̀ nàu à jà tɔ̀ tsuru min niì, è bonbo à ra, è geren.
32 Tɔ̀ fau'n kuru soo rà, kpiri sɔn yeè nà tɔ̀ shi soo sen kɔn, tɔ̀ na Ŋaablà re gbà blàa doùn faagoofabaà sɔn. A sa yeè siin, è bonbo à ra, è geren.
33 Twɛy kpiri fiɛ̀ dɔ̀n boumaà shɔ̀ùn, Samarika kpiri sɔn sa bekɔɔn wɔ̀'ùn, tɔ̀ sa na nàa tɔ̀ shi sɔɔ̀n tsɛ. A nàu wɔ à gàne rɔ̀n, è kpir'la jà. À dziu kpir'la jà tà tsuru min niì, à màtsuru y'a kun fɔ è bè geren.
34 Tɔ̀un, è kpɛrɛ̀ à ra. E kpɛrɛu à ra, à y'à mà ɲuun neè fòò jan ka, è ɲinin wɔ è ra, è shì. Tà shɔ̀ùn, à y'à sen tsuù e re shùkwɛ̀ɛn bòòn, è b'à ka tɔnɔn jaa gba sɔn doùn, è b'à ji mɔn. À bèu à ji mɔn, è to à tɛyn, à lamɔnɔ̀ùn'n kuru wuu fa.
35 Jià nàu seey, è gbà sar'la bo sìn gbàtsià rà, è dzin à ra, ci è taa tou'n kuru wube kpir'lee re, fɔ wò yeè bè sèè na. E dzin, ci ɲɛyn goo ge o ge ye na jà à ɲan wò shɔ̀ùn, wò ye na sèè na, wò nà tɔ̀ sìn à ra.»
36 Yesù twɛy gooma reè dè dou min niì, è kpir'la tey ci: «Wo re o, nèe kpiri zhiigi ree ɲan, tsì rii bàu kpiri mɛɲɛunmaà mòdzìnsia ?»
37 Tɔ̀un, sàrìyà kaamoo yè dzin Yesù rà ci: «Nìì wùbeu à mà, tɔ̀ rii y'à mòdzìnsia.»
Yesù sa yeè dzin à ra ci: «Cɔ, à wù wo sa yeè tɔ̀ soo rìì fa.»
Yesù bèu Mariyamùn ko Maritsì kpà min niì
38 Ayìwà, twɛy gooma rèè shɔùn, è Yesù ko e re kàràndzin neè to Yerusalɛmùn wɔ̀'ùn shià tsɛ, yè bè wɔ wɔ̀ sɔn ɲan. Tàan sɔn na ni ta wɔ̀ɔ̀ doùn, nìi kir'là ci Maritsì. Maritsì yè bè Yesù ko e re kàràndzin neè tɔɔnsibema bo e re.
39 Maritsì tseyn taan sɔn na ni, nìi kir'là ci Mariyamùn. Tɔ̀un, Mariyamùn yè bè e tsuù Tsìfa Yesù tɛyn, à re gooma reè lamyɛɛ̀n.
40 Tɔ̀ to y'a tàrà, Maritsì soo jaàn taɔ faagoò rà gbàà doùn. È nà e kpɛrɛ̀ Tsìfa Yesù rà, è dzin à ra ci: «Mùn Tsìfaà, mun tseyn taan yè mun soo pe to faagoò rà nèe tsuru, wo re, tɔ̀ wù ɔ̀ ? A dè à ra, ci è nà wɔ n na.»