Luc 11

Yesù ci Ŋaablà mafyɛɛ̀n niì tsuru

1 Sii sɔn see, Yesù na Ŋaablà mafyɛ̀ɛn gàne sɔn ɲan. A nàu dò watsi riì bwèy, à re kàràndzin neè soo yeè dzin à ra ci: «Tsìfaà, mùn jaa kpàdè Ŋaablà mafyɛ̀ùn'n kur'la rà, jàci, Yùxanà yè e re kàràndzin neè jaa kpàdèu à ra nìi tsuru.»

2 Yesù yè dzin è ra ci: «Ye ba nà Ŋaablà mafyɛ̀n, y'a dè nèe tsuru ci:

Mùn fà Ŋaablà,

wo tsoò fɛnɛbee nìi boò,

m'à gaa ci mòdzian sapɛ y'a blàbe.

M'à gaa wo re màsàbee yè jàà mùn tsɛ.

3 Mùn ne sii sa see dzii ra ɲwɛɛ̀n bɛ̀r'la sìan mùn na.

4 Mùn ne gooɲaan tsiɛ mɛɛy bo mùn vu ra.

Awà, nìì reè goo faa ɲe ra, ɲe sa e yɛrɛ toò twɛy tsìfa ì rè.

Maà à to Sùtana yè dzi mùn dzuun, à to mìn fa bɛy goo fa.»

5 Màfyɛɛ̀n fau'n kur'la kpàdèumaà shɔ̀ùn kàràndzin neè rà, è dzin è ra ci: «Ye sɔn yeè fù feèn tar'la bwèy tsuru, ye yè bè e dzunwɛynsia sɔn kpɛyn, ye yè bè à re dziɛ̀ mà ban, ye yè dzin à ra nèe tsuru ci: <N dzunwɛynsi, fù e buru kaan zhiigi sin n na.

6 Mun dzunwɛynsi sɔn daɔ̀n wɔ̀'ùn fen nèe ɲan, è nà jàà mun ne. Ɲwɛyn pɛn na ni mun ne, m'a sìn à ra, à y'à ɲɔn waa>.

7 È bà jàci dzunwɛynsima niì ni mɔn gbàà doùn, tɔ̀ sa yeè dzin nèe tsuru ci: <Aa, n to n saoma kpiri ! Mun yè n ne dziɛ̀ sòoŋ nòn, mun ko n ne dziin nè sapɛ to yè e ɲɛun nòn. Mun fa dzi fù, mun yè buru ì sìn wo ra dɛ.>

8 Awà, dzunwɛynsibe rìi ni ye fi, arì à kɛ̀nsɛɛn ma fu tɔ̀ kamà è bur'leè sen sin, à nà fù, kàtsu, wo y'à jaàn taɔ̀. Wo y'à jaàn taɔ nìi fa, wo màgoo ni gè o ge rà, à nà fù, è twɛy sapɛ sen sin wo ra.

9 Tɔ̀ doùn, mun nà à dè ye ra, ci e ye gè o ge fyɛ̀n, à nà à sìn e ra. E ye gè o ge gaa, e na à tàrà. A moo o moo to ye gbà mà ban, a dzii nà san à re.

10 A jà min tɔ̀ dè, a moo o moò ye Ŋaablà fyɛn, à nà a kɔ̀. A moo o moò ye gè gaa à re, a na à tàrà. A moo o moò to ye gbà mà ban, Ŋaablà nà à dzii san a re.

11 Min ye tey ɔ ? Ye sɔn yeè bà dzin fa, ye dziàn ye dzin ci wò gaa ji ra, ye ni e tsiì ye myɛn kun sìn à ra, ci tɔ̀ ji ɔ ?

12 Tàmafa ɔ, dziɛ̀n yè bà gaa tsɛ̀ dzuun na, ye ni ɲaanlon sin à ra, ci tà tsɛ̀ dzuun ɔn ?

13 Ayìwà, ye Adamà dzin nèè, ye ko e re ɲanbee sa, ye nà gè nìi sìn e dzin nèè rà, è bà wù, ye tɔ̀ tɔ̀. Ye ye ba dzia tɔ̀ fa, mùn fà Ŋaablà niì ni jìrànxɔ rɔ̀n, nìì reè tɔ̀ re Dzi Fɛnɛɛ gaa, ye na ɲɛn à ra fyeu, ci à sa y'a sìan twɛy rìì là ɔ̀ ?»

Yesù ci min niì, ci wò re dzia na boo Sùtana ɲan waa

14 Sii sɔn see, Yesù na kwey sɔn kaa boò kpiri sɔn kpɛyn. Tɔ̀ kweè na tɔ̀ kpir'la baɔ̀ bobo. Yesù kwey re kaa bou à kpɛyn min niì, kpir'la yè e maa è goomaa. Jàma nìi na ni tɔ̀ gàne rɔ̀n, à goò yè ji twɛy mòdzin neè dzii tsɛ fɔ è bè geren.

15 Tà goò fau, mòdzin neè swey yè dziàn jàmaà ɲàn, ci a y'a jà, Yesù yè bà dzia kwey rèè kaa boò mòdzian kpɛyn, à kwey rèè kùntsii blàa tsoò barakaà rìì kamà, nìi kir'là Baalizhebulì.

16 Swey sa na ni, twɛy yè bà na ni à re, y'à dzuun bo. Yè dzin à ra, ci è kabagoo goo sɔn fa ye jaa ra, nìi y'à kpàdèe, ci à re dzia boo Ŋaablà rii ɲàn.

17 Yesù na twɛy mòdzin neè duungoo tɔ̀. E dzin è ra tɔ̀un ci: «Mùn sapɛ y'a tɔ̀, ci nìì reè fàdzìn kuru soo, è tèrèkee ye jiri e si'un kaa ra, è nà e si dò, è re gàneè yè ci.

18 Awà, Sùtan'naa tandzin neè to ye ba kaa faa e si ka ɔ, Sùtan'naa taan to ni e latan ɔn ? W'a tɔ̀, ye ci mun kwey rèè kaa boò mòdzian kpɛyn kwey rèè kùntsiɛ̀ tsoò barakaà rìì kamà, nìi Baalizhebulì.

19 Ye ye dzin ci mun yè è kaà Baalizhebulì tsoò baraka rɔ̀n, ye yɛ̀r'leè raa mòdzin niì reè to yè è kaà do, tsì rii tɔ̀ dzia sìan twɛy rà. Twɛy nìi reè ye re mòdzin neè, twɛy yɛ̀r'leè y'à kpàdèe, ci ye raà na sààben waa.

20 Sààben ci yè e de, mun kwey rèè kaa boò mòdzian kpɛyn ko Ŋaablà tsoò barakaà rìì ka. Tɔ̀ y'a kpàdèe, ci Ŋaablà ni e re màsàbee rà ye fi nòn.

21 Fàan ni mòò riì ɲàn, à mà byɛn'n kur'la yè bà wù ko kaa faa gè rèè ka, tɔ̀ ye ba e re fɔɔn kplatsuɔ, mòò na dzia e kpɛrɛ̀ tɔ̀ suun ge reè rà waa.

22 Ŋà, mòò kpɛrɛkuru ye na, fàan ni nìi ɲàn è geren à tsɛ, tɔ̀ ye na e mɛɛy à tsɛ, è dzi à ra, à si ɲɛɔ̀n kaa faa gè nìì reè tsɛ, è twɛy tsi à ra, à nà à suun ge reè sapɛ sen, è tanan mòdzian nà.»

23 Tà shɔ̀ùn, Yesù yè dzin ci: «Awà, mòò riì na gaa mun na, tɔ̀ tsìfa mun ɲan nì. Mòò riì to na wɔɔ̀ mun na mìn goò lamɔnɔ̀n, tɔ̀ tsìfa y'à bar'la rìì.»

Kwey rèè sèè nau'n kur'la mòdzian kpɛyn

24 Yesù yè dzin ci: «Kweè ye bo mòdzian sɔn kpɛyn, tɔ̀ kweè bèe jènjàa kor'nà doùn, è bè e ɲantsyeeree mɔn, è gàne gaa, à nà dzi e ɲanwɔ min niì. A ma tɔ̀ gàne tàrà, à dziàn ci: <Mun na ni min niì, mun nà sèè be mɔn.>

25 Tɔ̀ kweè ye see na, à nàa à jà, wo bou mòò riì ɲàn, tɔ̀ tsìfa ni a ci gbà nìi flaɔ, à màbyɛ̀ùn'n kur'la yè bà wù.

26 È na à jà tɔ̀ tsuru, à bèe kwey ɲɛ̀ɛ̀nun kpɛr'lì kiri, nìì reè ɲan à yɛ̀r'la mà. Tɔ̀un, à ko twɛy yè sèè na, yè nà e gban kpir'la kpɛyn esire. Tɔ̀ rii y'à faa, tɔ̀ mòdzin kweykɔɔn rè goo rèè yè ɲanbe, è geren e danmaa tsɛ.»

Yesù ci nìì reè raa wùbeu

27 E Yesù to goomaa nà tɔ̀ tsuru, tàan sɔn yeè e vu bo jàmaà ɲàn, è dzin à ra ci: «Aa, taan nìi wo doòn seun, è nà wo kere, è cɛn sìn wo ra, tɔ̀ taàn raa kpɛ̀yn wùbeu Ŋaablà re !»

28 Yesù sa yeè dzin à ra tɔ̀un ci: «À kpɛ̀yn tɔ̀ tsuru, ŋà, nìì reè yè e toro wɔɔ̀ Ŋaablà re goomaa rè, y'à bo e shi tsɛ, twɛy rìì laa wùbeu Ŋaablà re è geren kɔn.»

Yesù ci wò fa kabagoo goo fa waa

29 Ayìwà, jàmaà nàu blàbe Yesù tɛyn, à re goomaa doùn, è dzin è ra ci: «Ɲe bwèy rèe mòdzian faadzii ɲaan. È ci fɔ goo sɔn tàànmàshɛn yeè kpàdè ye ra. Ŋà, Ŋaablà tàànmàshɛn niì kpàdèu e re kɛɛra Yònasì ka jɔ̀na jɔ̀na, à ma ba tɔ̀ fyeu, kpɛrɛ pɛn fa fa kpadè è ra waa.

30 Awà, Ŋaablà re kɛɛra Yònasì bàu tàànmàshɛn nìi tsuru Ninivuka reè rè, Adamà dziàn sa nà bà tà tsuru tàànmàshɛn ye, ɲe bwèy rèe ɲan mòdzian rè.

31 Mun nì ci e ra, jɔ̀na jɔ̀na màsà taan nìi bou Sàbà mar'la ɲan, è nà màsa Sɔ̀ɔ̀mɛyn kpà, laxaran tsìɛ̀ sii sèè, tɔ nà fù, è tsiì ye, ɲe bwèy rèe ɲan mòdzian jaaterema, à yè jàà ye ra. A nà jàà ye ra, kàtsu nìi y'à yɛ̀r'la, à bou fɔ dziɲaan dàn sɔɔ̀n rà, è nà e toro wɔ, màsa Sɔ̀ɔ̀mɛyn nè Akiriblatsi goòmà rèè rè. A nà jàà ye ra, kàtsu nìi ni mìin, tɔ vùn màsa Sɔ̀ɔ̀mɛyn naa goo rèè mà kɔn.

32 Laxaran tsìɛ̀ sii sèè, Ninivuka reè sa nà fù, yè e tsiì ye, ɲe bwèy rèe ɲan mòdzian jaaterema, yè jàà ye ra. E nà jàà ye ra, kàtsu è raa watsi rɔn, yè e toro wɔu Ŋaablà re kɛɛra Yònasì rè waajibia rè, yè e re jaamabee fau'n kur'la lakere, è ɲɛn tɔ̀ tsɛ. E nà jàà ye ra, kàtsu, nìi ni mìin, tɔ vùn Yònasì raa goo rèè mà.»

A deò min niì, ci jaadzian nì màà vyevyeè

33 Tà shɔ̀ùn, Yesù yè dzin kɔn ci: «Mòò pɛn na fìtsina dzu wɔɔ̀, a mɛnɛn, tàmafa e gèè sɔn kuu à tsɛ waa. A y'a den, à tsùɔ fìtsìnà tsuuma nɔ̀n nì, gè riì ni à to nìì reè dɔ̀ɔn gbàà doùn, twɛy yè dzi à vyeè jà.

34 À ni a ci mòdzian jaadzian nì y'à màà raa fìtsìnà vyevyeè. A jaadzin neè ye ba wù, wo màà sapɛ rii bàa ni vyevyeè ɲàn. Wo jaadzian to ma ba wù, wo màà sapɛ rii bàa ni tsitsiɛ̀ ɲàn.

35 Tà doùn, a yɛrɛ kun, a re vyevyeè mà nà bà tsitsii a ma waa.

36 A maà sapɛ ye ba viɔ̀, à gàne pɛn mà bà ni tsitsiɛ̀ ɲàn waa, gàneè sapɛ rii bàa viɔ̀ wo re. Tɔ ni jàci fìtsinaà dzu ye wɔ, à gàneè via wo mà nìi tsuru.»

Yesù Faridziɲɛn rèè ko sàrìyà kaamoo reè jààkiu min niì

37 Yesù nàu dò twɛy gooma reè rà watsi riì bwèy, Faridziɲɛn kpiri sɔn yeè Yesù kiri, ci è bè ɲwɛyn fa wò re tsii. Tɔ̀un, Yesù yè bè ko à ka. È bèu wɔ, yè e maa yè ɲwɛɛ̀n ɲɔɔ̀n.

38 È ci e ye ɲwɛɛ̀n dzii kun, Yesù na e si ra foò jàci dzyee rèè dɛ̀rɔɔ̀ y'à fòo nìi tsuru waa. Faridziɲɛn kpir'là tɔ̀ goò jà nìi fau, tɔ̀ yeè ji à dzii tsɛ.

39 Tsìfa Yesù y'à goò kààwɔu à ra tà tsuru min niì, è dzin à ra ci: «Ye Faridziɲɛn rèè, ye yukuun neè, ko ɲwɛyn ɲɔɔn kondo rèè bòòn nèè rìì fòò fyɛɛ̀, ye yè è doùn nooŋmaà to. Tɔ̀ rii yɛ, ci ye fyɛɔ e ma, ye duùn nèè yè bà tsyɛɔ̀n namara goo reè, ko ɲanbee rà.

40 È man'nèè jà ! Nìi ye màà ɲɛun, tɔ̀ soo rìì na ye duɔ̀n sa ɲɛn gbɛ ?

41 Y'a to Ŋaablà yeè e duɔ̀n fòò fyɛ. Tɔ nà goò sapɛ fyɛ ye re.

42 Ye Faridziɲɛn rèè, byɛnbe ye nìn. Ye yè e maxɔbee, ye yè e re nankɔɔ̀ ɲàn gè tsira soo soo sapɛ yaà boò. Tsira kinin dziu sen ɲɛn nan tsira tsɛ. Nìi to, a fyɛ a modzìnsia rà, e Ŋaablà kɛn, ye twɛy goo rèè boò e si bòn nè. Àwa, twɛy rìì na goo farama taki reè, dzyee rèè tsu to mà bà boò si bòn nè waa.

43 Faridziɲɛn rèè byɛnbe ye nìn ! A jà min tɔ̀ dè, ye ye dɔn waajibi fa gba gè o ge doùn, mòdzian jaa nà bà ni ye ra tsùùma nìì reè ɲàn, ye twɛy rìì gaa beè. Mòdzian yè bà ye blàbe tswa beè jàmà gane re ɲàn, tɔ̀ rii dzi ye ra.

44 Byɛnbe ye nìn ! Ye ni a ci mòò kɔ̀ɔ̀ bɔrɔɔ. Mòo nàa dɔ̀n bo à tsɛ, a na à tɔ̀ɔ ci à mòò kɔɔ waa. A dɔunmaà à tsɛ, tɔ̀ y'a noo.»

45 E Yesù to twɛy gooma reè rà, sàrìyà kaamoo sɔn yeè dzin à ra ci: «Kàrànfaà, wo na nèe gooma ree dèe Faridziɲɛn rèè bàsɔùn nà dɛ waa ! Wo ɲe sa ɲɛɛ̀n nì !»

46 Yesù yè dzin ci: «Ɔ̀ɔn ! Ye sàrìyà kaamoo reè kpɛ̀yn, byɛnbe ye sa nin ! A jà min tɔ̀ dè, ye seyn bla tsuɔ̀ mòdzian kùùn, seyn niì sen na dzi waa. A to na ni ye yɛ̀r'leè mà, ye yè e siiniɛn tsu dzyɛn à ra tsu, yè nà dzin ci ye yè wɔ è ra y'à sen.

47 Byɛnbe ye nìn, kàtsu, ye fà rèè Ŋaablà re kɛɛra niì reè vuu dan, ye twɛy rìì kɔ̀ɔ̀ lamɔnɔ̀n jia she.

48 Tɔ̀ y'a kpàdèe, ci ye yè e tsiiŋ e fa rèè faadzii ɲaan nà. È Ŋaablà re kɛɛra reè vuu, ye yè bà è kɔ̀ɔ̀ rèè lamɔnɔ̀nbaa.

49 Tɔ̀ rii y'à to, Ŋaablà re akiriblabeè doùn, è bà na à deò nèe tsuru ci: <Mun nà n ne kɛɛra ì, ko kɛɛradzin ì ka bè è re. E nà swey vu, yè swey byɛn>.»

50 Yesù yè geren goomaa rè kɔn ci: «Tà goo rèè kamà, è sen fɔ dziɲaan ɲɛn bwey, Ŋaablà re kɛɛra ge o ge vuu, Ŋaabla nà ye, ɲe bwèy rèe ɲan mòdzian tey, twɛy soo sookɔɔn sapɛ saàn mà.

51 E sen Abɛlì raa vu watsia rà, è bè suu fɔ Jakàrìya raa vu watsia dzu. È tɔ̀ vuu saaka rèè bomàà ko Ŋaablà re gbà blàa fi. Ɔ̀ɔn, mun nì ci e ra, Ŋaabla nà ye, ɲe bwèy rèe ɲan mòdzian tey, twɛy vui reè sapɛ ma gbee.

52 Sàrìyà kaamoo reè, byɛnbe ye nìn ! Ye twɛ̀ɛ gbàà dzii sòoŋ, y'a nèèdzian ji e kpɛyn. Ye fa dɔ̀n, dɔ̀n kuru to ni nìì reè rà, e fa à to twɛy yè dɔ̀n.»

53 Àyìwà, twɛy gooma reè sapɛ shɔùn, Yesù yè bo mɔn, è geren. À boumaà shɔ̀ùn mɔn, sàrìyà kaamoo reè, ko Faridziɲɛn rèè y'à dzu bo dzu bou'n kur'la sapɛ ra, yè bà na à gaa è gooma goo giri tsɛ.

54 È na e re gooma reè ka myɛ̀ɛ̀n nì ɲɛɛn à jɔɔn, gè riì ni à to è dè bɛɛ sɔn de, ye yè dzi à kun.