Marc 16

Yesù sèè kpunaun min niì

1 Àyìwà, ɲànwɔ siɛ̀ dɔ̀n bouma shɔ̀ùn, Màngàdàràkà taan Mariyamùn, ko Yàkubà na Mariyamùn, ko Salome, twɛy yè bè ɲinin kinin dziù ì fì, ci ye bèe à ji Yesù fùàn mà.

2 Shikuan jisee jɔnaa gbishɛɛ̀mà mur'lɔn, yè fù, yè dɔ̀n be fùn kɔɔ rà.

3 È bèkɔɔn, yè e si tey bèe ci: «Tsì rii nà kpàa kònròngoron bo kɔ̀ɔ̀ dzii ra ɲe re ?»

4 È bèu tsyɛnbe kɔ̀ɔ̀ rà, yè e kuùn sen yè siin fa. Y'à jà, kpàa kòròngoron boo kɔ̀ɔ̀ dziɛ rà, à to naà gè blàbè san.

5 Tɔ̀un, yè dɔ̀n be kɔ̀ɔ̀ doùn. È dɔ̀un, yè dzunwɛyn sɔn tsuuŋma jà e sirama re, mɛ̀yɛ̀ blà fyɛ ni tɔ̀ mà. Yè shi fɔ è bè geren.

6 Tɔ̀ yeè dzin è ra ci: «E maà shi waa. È Nazarɛtsika kpiri Yesù rìi gbaun gɔɔ̀ rà, ye na tɔ̀ rii gaara ɔ ? À sèè kpunaun, à na ni mìin dɛ. È na à ɲɛɔ̀n min niì, tɔ̀ gàneè siin.

7 Ye b'a dè Piyɛrì ko à re kàràndzìn dzyee reè rà, ci è maa beu ye jɔɔn Galile mar'lɔn. Ye nà bè à jà mɔn, a ci à na à deò ye ra nìi tsuru.»

8 Tàan rèè bou min niì tɔ̀un, yè vwɛ̀ɛ̀y, yè e dan gbànbe kɔ̀ɔ̀ rà. È akiri na gbiimaɔ̀n fɔ è mà yè bà sɔ̀ɔn. È shi ɲaanfaa suun, è na dzi gèsɔn dè mòò rà.

Yesù sèè kpunaunmaà shɔ̀ùn, è yɛrɛ kpadèu nìì reè rà

9 [Àwà, Yesù sèè kpunaunmaà shikuan jisee jɔnaa gbishɛɛ̀mà nɔ̀n, è yɛrɛ kpadèu Màngàdàràkà taan Mariyamùn nì nà ŋe, à na kwey ɲɛ̀ɛ̀nun kaa boo tɔ̀ niì kpɛyn.

10 Nìì reè ko Yesù na ni esire, tɔ̀ yeè bè twɛy toro kɔ̀ tɔ̀ ra. Taamaŋununbe na ni è tsɛ, yè bà na gɛɛ.

11 Y'à myɛ̀n nìi fau Mariyamùn dzu ci Yesù jaama ni, è bà ci wò y'a jàu, è na ɲɛn à ra fyeu.

12 Tà shɔ̀ùn kɔn, kàràndzin neè fii nàu bo, yè bà bèe wɔ̀ sɔn ɲan, è yɛrɛ kpadè twɛy sa ra, niu'n kuru kpɛr'la.

13 Twɛy sèeŋ yè nà tɔ̀ goomaa lakɛɛ̀y kàràndzìn dzyee reè rà, twɛy tsu na ɲɛn tɔ̀ ra kɔn waa.

14 À lataan, è kàràndzin teeŋ sɔɔn ladzyeema to è ni ɲwɛɛ̀n nà, Yesù yè nà e yɛrɛ kpadè è ra. È re ɲɛynabɛybeè ko è re tantaamaxɔbeè è tɔ̀ dè è ra, kàtsu nìì reè y'à jàu à sèè kpunaunmaà shɔ̀ùn è bo saan ɲàn, è na ɲɛn twɛy rà waa.

Yesù ci nìì reè nà ɲɛn wò ra, goo nìì reè nà bà tɔ̀ tàànmàshɛn

15 Tà sapɛ shɔùn, è kòmànà dzin è ra ci: «Ye bè dziɲantsiɛ min niì sapɛ, ye Kùnàgoo Dziɔ̀ gbango mòdzian sapɛ ra.

16 Mòò riì ye ɲɛn à ra, è tsiì wò jaara yeè fòò Ŋaablà re shia goo rèè rà, tɔ nà tsi. Mòò riì to ma ɲɛn à ra, kitsia nà mɛɛy tɔ̀ tsɛ.

17 Nìì reè nà ɲɛn à ra, tàànmàshɛn niì reè nà tɔ̀ kpàdè, twɛy rìì siin: mun tsoo ra, è nà kwey rèè kaa boò mòdzian kpɛyn, yè kungooma ye ì dèe.

18 È nà myɛn reè kun e suun. È to kɛ̀nsɛɛn ye mòdzìn vua bàà mìn, tɔ̀ fa gèsɔn fa è ra waa. È nà e sià tsùù ɲìnìnkɔɔn reè tsɛ, yè Ŋaablà mafyɛ̀n twɛy rè, yè cɛrɛmabe.»

Yesù sen fuu min niì è bè jìrànxɔɔ̀ doùn

19 Àwà, Tsìfa Yesù gooma doumaà shɔ̀ùn kàràndzin neè ka tɔ̀ tsuru, è ɲansen fu bo è ɲan, è tèyn be jìrànxɔ rɔ̀n, è bè e tsuù Ŋaablà sirama si jaa rè.

20 Kàràndzin neè sa yeè dɔ̀n be, yè bè Kùnàgoo Dziɔ̀ gbango beè min niì sapɛ. Tsìfaà na wɔɔ è ra faagoò doùn. À na dzi siɔ̀n è ra yè kabagoo goo reè faa, tɔ̀ y'a kpàdè, ci è re gooma reè sààben.]