È bèu Yesù ka Pilatsì rè min niì
15
1 Àyìwà gbishɛɛ̀mà mur'lɔn, saaka jɔɔndzin neè, ko bɔɔ rèè, ko sàrìyà kaamoo reè, kitsi kunun kur'là mòdzian sapɛ, yè sija fa. Tà shɔ̀ùn, yè Yesù shì, yè b'a ka, yè b'a wɔ jàmààntsi Pilatsì suun.
2 Tɔ̀un, Pilatsì yè Yesù tey ci: «Wo rìì Dzyèèsìbee mòdzin neè rè màsà kpir'là ɔ̀ ?» Yesù ci à ra ci: «Wo rìì y'à dèu.»
3 Saaka jɔɔndzin neè yè sɔ̀n giri wɔ à ra.
4 Pilatsì yè sèè kɔn, à y'à tey ci: «Gooma pɛn na ni wo y'à ka è latsi ɔ ? È yɛ nìi sapɛ deè wo tsɛ, wo na à myɛ̀na ɔn ?»
5 Yesù na gooma pɛn ka è latsi. A goò yè ji Pilatsì dzii tsɛ.
6 Jii sapɛ, Geren n tsɛɛ̀ sɛr'là ye ba na wɔu, Pilatsì na kàsòdòùndzian soo bo bàjia, nìi mòdzian sàò.
7 Tɔ̀ y'a tàrà kpiri sɔn, ci Barabasì, tɔ̀ ko e koòsi ì na kun jiɔ̀ kàsoò rà, kàtsu è na e mabaɔn, yè màànkan fu, fɔ yè vui fa.
8 Tɔ̀un, Pilatsì dɛ̀rɔɔ̀ è nìi faa jàmaà rè, jii sapɛ, yè tèyn be à re, yè b'a gaa à re, ci è tɔ̀ fa ye re.
9 Pilatsì yè è tey ci: «Ye sào ni min Dzyèèsìbee mòdzin neè rè màsà kpir'là rìì bo bàji ɔ ?»
10 Àwà, Pilatsì na à tɔ̀, ci Yesù jaaɲininbe rìì kamà, saaka jɔɔndzin neè y'à wɔɔ wò suun.
11 Ŋà, saaka jɔɔndzin neè yè jàmaà duùn wɔ, gè riì ni à to y'à gaa Pilatsì rè, è Barabasì rìì bo bàji.
12 Pilatsì yè sèè kɔn, è tey ci: «Ye to nìi kir'là Dzyèèsìbee mòdzin neè rè màsà kpir'là, ye ci min fee fa tɔ̀ ra ?»
13 Yè sɛ̀ɛ̀y kɔn fààn na ci: «À to è gban gɔɔ̀ rà !»
14 Pilatsì yè è tey kpɛrɛ ci: «À to fee soo rii ɲaan faɔ̀ ?» Yè e vuà tèyn kpɛrɛ ci: «À to è gban gɔɔ̀ rà !»
15 Àwà, Pilatsì n'a re è jàmaà sàò fa nìi fa, è Barabasì bo bàji. Yesù, à y'à to yè tɔ̀ dɔrɔ sɛyn ka, è kòmànà à wɔ kaadzin neè suun, ci è bè gban gɔɔ̀ rà.
16 Tɔ̀un, kaadzin neè yè bè Yesù ka jàmààntsì gbaà fɔɔn doùn kèrè, yè kaadzin kur'là sapɛ ladzyèè mɔn.
17 Yè siin, yè vya xe bla ji à vu ra, yè daa myɛ̀n màsà baanfla, yè tɔ̀ kuu à kùùn.
18 Tɔ̀un, yè e maa y'à tswàa ci: «Dzyèèsìbee mòdzin neè rè màsà kpiri, tswɛ̀y yɛ a re !»
19 Yè kɔ̀n ka à baan e kuùn, yè dzweeyuà fyɛɛ̀ à tsɛ, yè e kunun gbaàn, yè e kuɔ̀ à bììn.
20 È nàu à ɲanŋmɛn dò tà tsuru watsi riì bwèy, yè vya xee bo à vu ra, y'à re vya rèè ji à mà, yè kòmànà bo à ka da rɔ̀n, ci ye bèe à gban gɔɔ̀ rà.
È Yesù gbaun gɔɔ̀ rà min niì
21 Àyìwà, è bèkɔɔn à ka, yè kpiri sɔn dɔn bokɔɔn ja, tɔ daàn jòon nɔ̀n. Tɔ̀ kpir'la tsoò Shimɔ̀n, è bà boò wɔ̀ sɔn ɲan ci Sirɛnì. À dzin nèè tsoo Alɛkisandziri ko Urufɔsì. Y'à bà fààn tɔ̀ kpir'la mà, ci è Yesù gbaàn gɔɔ̀ sen.
22 Yè bè Yesù ka gàne sɔn ɲan, è tɔ̀ kir'là Gɔligotà, nìi dzuɔn "Kùngɔ̀ xɔɔ̀ gàneè".
23 È bèu wɔ mɔn, yè mììnge sìn à ra jan sɔn gbiimaɔn tɔ̀ ɲan. Ŋà Yesù na e tsiì à mìn waa.
24 Tà shɔ̀ùn, yè Yesù gban gɔɔ̀ rà. Y'à re vya rèè tanan e si ra, nìi doùn è kaan jiu, è bà ni tɔ, nìi wù è sìn nìi rà.
25 Y'à gbaun gbishɛɛ̀mà nɔ̀n bwèy ɲìnìn bɔɔ̀ rìì là.
26 È na à vu kuàn sɛbɛɔ̀n à kùùn nèe tsuru ci: «Dzyèèsìbee mòdzin neè rè màsà kpir'là.»
27 Yè gookoronfabaa fii sa gban gɔɔ ì rà à ka, soo ni à sirama re, soo yè bà ni à ɲɔ̀nma re. [
28 Tɔ̀ tsuru, à dè niì faɔ̀ Ŋaablà re goomaa doùn ci: «Y'à sa daun goo koron fa reè ka.» tɔ̀ goomaa yè bo e shi tsɛ.]
29 Dɔ̀nbobaa rèè sa y'a ɲɛ̀n dɔ̀ɔn, yè e kuùn jia à ra, yè dziàn ci: «Eyì ! Wo rìì na Ŋaablà re gbà blàa cibaà, w'a sèè ji bwèy zhììgi doùn gbɛ ?
30 A yɛrɛ tsi e jàà bo gɔɔ̀ rà m'a jà sa kɛ̀ !»
31 Tɔ̀ soo tsuru, saaka jɔɔndzin neè ko sàrìyà kaamoo reè sa y'a ɲanŋmɛɛ̀n, yè dziàn e si ra ci: «N ci à to mòò kpɛrɛ ì tsiu ? À fa dzi e yɛrɛ tsi ɔ ?
32 Wò rii ye ba Ŋaablà Jaara Moò, Isirayɛlì màsà kpir'là, è jàà bo gɔɔ̀ rà, m'a jà. Tɔ̀un, mùn nà ɲɛn à ra.» Nìì reè sa gbaɔn à tɛyn gɔ̀ɔ rèè rà, twɛy sa y'a ɲɛ̀ɛn.
33 Àwà, bwèè nàu wɔ sènfi watsi riì bwèy, tsitsiì brìsi yè wɔ jàmàan min niì sapɛ. È to tɔ̀ tsuru, fɔ è bè suu ɲɛ̀rɛɛ̀rà dzu.
34 Ɲɛ̀rɛɛ̀rà wɔumaà, Yesù yè gɛyn vu blà bo ci: «Elì, Elì, lemà sabakitanì !» Nìi dzuɔn ci: «Mun ne Ŋaablà, mun ne Ŋaablà, feera w'a bon wɔu mun na ?»
35 Nìì reè na ni mɔn, twɛy swey tɔ̀ myɛ̀un min niì, yè dzin ci: «À siìn kɛɛra Àliì kir'là.»
36 Tɔ̀un, è ɲan mòò sɔn yè vwɛ̀ɛ̀y è bè fu sɔn sen, à y'à mùù mììnge kùunma nɔ̀n, à y'à vɔ̀ gɔ̀ɔ sɔn na, è b'a tsùù Yesù dzii ra, ci à y'à mìn. È dzin ci: «Y'a to m'a siin, Àliì ye ba nà nà à jàà o.»
37 Ŋà Yesù yè gɛyn vu blà bo, è xɔn bo.
38 Tɔ̀un, Ŋaablà re gbà blàa shiɲaanfi kunun vyaa yè vyɛ̀ fii, è sen jiran nɔ̀n, è nà fɔ dzɔn nɔ̀n.
39 Kaadzin jɛrɛ̀blàtsi rìi na ni mɔn Yesù jaaterema, tɔ̀ y'a xɔn bou'n kuru jau tà tsuru min niì, è dzin ci: «Sààben na, nè na Ŋaablà Dzin kpir'la rìì taki.»
40 Tɔ̀ y'a tàrà, tàan rèè swey sa na tsìiŋnà jeenà, yè bà siin faa. Twɛy tàan rèè ɲàn, Mariyamùn nìi kir'là Màngàdàràkà taàn, tɔ̀ na ni, Yàkubà dzininmaà ko Yosè na Mariyamùn na ni, ko Salome.
41 È Yesù to Galile mar'lɔn, twɛy tàan rèè rìì na gbaɔn à kpɛyn, yè goo faa à re. Tàan giri kpɛ̀rɛ̀kuru ì sa yeè bà na ni mɔn, nìì reè tèron à ka Yerusalɛmùn.
Yusufù Yesù fùàn wɔu min niì
42 Àyìwà, ɲɛ̀rɛɛ̀rà na wɔɔ nòn, tɔ̀ y'a tàrà à ɲànwɔ siɛ̀ jɔɔn wɔɔ jisee rìì, tɔ̀ raa gbee yè bà ɲànwɔ siɛ̀.
43 Yusufù, è bo Arimate wɔ̀ rɔ̀n, tɔ̀ sa na Dzyèèsìbee mòdzin neè rè kitsi kunun kuru blàa mòdzin blaa sɔn, nìi si na xɔ Ŋaablà re màsàbee goò tsɛ, è bà à màshua. Àwà, tɔ̀ kpir'la yè e kuùn xɔbe è bè Pilatsì kpɛyn, è bè Yesù fùàn gaa à re.
44 À myɛ̀unmaà Pilatsì rè ci Yesù saun nòn, tɔ̀ goò yè ji à dzii tsɛ. Àwà Pilatsì yè kaadzin jɛrɛ̀blàtsià kiri tɔ̀un à y'à tey, à san bwèy ye ba ciɔ̀n o.
45 À tɔ̀ goò kùnàgoo tàrau kaadzin jɛrɛ̀blàtsià rè min niì, è Yesù fùàn dzii sìn Yusufù rà.
46 Yusufù yè fùn wɔɔ vya fì tɔ̀un, è Yesù fùàn jàà bo gɔɔ̀ rà, à y'à wɔ à mà, è b'a wɔ fùnkɔɔ sɔn ne, tɔ ɲɛɛna faà ɲàn a ci kpankɔɔ. Tà shɔ̀ùn, è kpàà kunun brisi kòròngoron tsùù kɔ̀ɔ̀ dzii ra.
47 Tɔ̀ y'a tàrà, Màngàdàràkà taan Mariyamùn ko Yosè na Mariyamùn na Yesù fùàn ɲɛnmaà siɛ̀n.