Marc 14

È na jaa gaa Yesù vu goo rà min niì

1 Àyìwà, à na too bwèy fii, Geren n tsɛɛ̀ sɛr'là ko Buru fu bɛɛ sɛr'là yè wɔ. Tɔ̀ y'a tàrà, saaka jɔɔndzin neè, ko sàrìyà kaamoo reè na jaa gaa, è nà dzi Yesù kun nìi tsuru sànbe ka, y'à vu. 2 È na dziàn ci: «N mà à to è bà sɛr'la watsia waa, tà boshɔ̀ùn, jàmaà nà màànkan fu.»

Tàan sɔn ɲinin kinin dziu koun Yesù kùùn min niì

3 Àwà, tɔ̀ y'a tàrà, Yesù na ni Betanì wɔ̀ rɔ̀n, Shimɔ̀n nè gbàà doùn, è tɔ̀ niì kir'là byèèmà kpir'là. È Yesù to ɲwɛɛ̀n nà mɔn, tàan sɔn yeè nà ɲinin kinin dziù sɔn ka, tɔ faɔ̀ gɔ̀ɔ sɔn terèke ka, nìi kir'là naari. Ɲin'nèe kpaxɔ fɔ è bè geren, è bà ni bwèyn sɔn doùn, nìi sa kpaxɔ. Taàn yè siin tɔ̀un è ɲinin bweyn nee dzii kɛɛy, è ɲin'nà kon Yesù kùùn. 4 Àwà, nìì reè na ni mɔn, à goò yè dɔ̀n swey kpɛyn è ɲan. Yè dziàn esira ci: «Feera nèe ɲinin kinin dziù rèe yè bara nèe tsuru maana maànà ? 5 À na dzia gɔɔ kpàxɔù rà, à ɲɛɛn yè sìn gbakɔɔn reè rà.» È vun'na taɔ à kpɛyn fɔ è bè geren. 6 Ŋà, Yesù yè dzin ci: «Ye taàn to mɔn. Feera y'a vunuun kɔɔ̀n ? À yɛ nìi faɔ̀ mun ne, à goowùù rii. 7 Àwà, gbakɔɔn reè, twɛy ni tsuù ye ka kudɛyn. Watsi o watsi ye ye dzibe, ye dzia goowùù fa è ra. Ŋà mun do, mun fa bà ni tsuù ye ka kudɛyn dɛ ! 8 Ɲinin kinin dziù rìi kon tsùuŋnà mun mà nòn, tɔ mun fùn wɔɔ raà rìì. À dzia bau nìi à tɔ̀ rii fau. 9 Sààben na, mun nì ci e ra, Kùnàgoo Dziɔ̀ nà dè dziɲan tsiɛ min o min, nèe tàan rèe raa goo faumaà sa nà dè, è taa yeè to à re.»

Yudà yè e dzii siun min niì ci wo nà Yesù wɔ suun

10 Tà doùn, nìi Yudà Sikariyɔtsì, Yesù rè kàràndzin teeŋ fii rèè sɔn, tɔ̀ yeè bè saaka jɔɔndzin neè kpɛyn, è bè dzin è ra, ci wo nà Yesù wɔ è suun. 11 Saaka jɔɔndzin neè tɔ̀ goomaa myɛ̀un min niì, tɔ̀ yeè è taamadzibe fɔ è bè geren. Yè e dzii sìn à ra, ci ye nà ɲɛyn sin à ra. Tɔ̀un, à nà dzi watsi wuu riì tàrà, è Yesù wɔ è suun, è maa è tɔ̀ jaa gaa.

Yesù kàràndzin fii kau min niì ci yè bè Geren n tsɛɛ̀ sɛrɛ ɲwɛyn goo jaa bo

12 Àwà, Buru fu bɛɛ sɛr'là jisee jɔnaa, è Geren n tsɛɛ̀ sɛr'là sààtòmòìrii reè vua tɔ̀ jisee niì, Yesù rè kàràndzin neè y'à tey ci: «Wo ci mìn bè Geren n tsɛɛ̀ sɛr'là ɲwɛyn goo jaa bo wo re min ?:» 13 Tà doùn, è re kàràndzin neè fii ka, è dzin è ra ci: «Ye bè wɔ̀ɔ̀ doùn. Ye ko kpiri sɔn nà tsi, yu ni à kùùn dzinin doùn. Ye e gban à kpɛyn. 14 È be dɔ̀n fɔɔn niì rè, ye tɔ̀ fɔɔntsia tey ci: "Kàrànfaà ci wò ko e re kàràndzin neè nà Geren n tsɛɛ̀ sɛr'là ɲɔn gbà kɛ̀nmaa nì doùn ?" 15 Tɔ̀un, à nà gbà blà sɔn kpadè ye ra sangasoò jiran nɔ̀n, gè rèè sapɛ ni nìi doùn, à mà yè bà byɛ̀n tsùuŋnà. Ye Geren n tsɛɛ̀ sɛrɛ ɲwɛyn goo jaa bo mùn ne tɔ̀ gbàà doùn.» 16 Kàràndzin neè yè bo tɔ̀un, yè dɔ̀n be wɔ̀ɔ̀ doùn. Yè b'a jà, a ci à y'à dèu è ra nìi tsuru. Tɔ̀un, yè Geren n tsɛɛ̀ sɛrɛ ɲwɛyn goo jaa bo.

Yesù dziun min niì ci kàràndzin neè soo nà wò jàànfa

17 Àwà, bwèè nàu dò min niì, Yesù ko e re kàràndzin teeŋ fii rèè yè bè dɔ̀n tɔ̀ gbàà doùn. 18 È ni ɲwɛɛ̀n nà watsi riì bwèy, Yesù yè dzin ci: «Sààben na, mun nì ci e ra, mòò sɔn nà mun jàànfa ye ɲan. À sa ni ɲwɛɛ̀n nà mun ka.» 19 È taama yè ŋununbe, yè maa, yè teè faa soo soo ci: «À na mun dɛ ?» 20 Yesù ci è ra ci: «Ye mòkun teeŋ fii rìi yɛ e si wɔɔ mun ka ɲwɛyn tasaà doùn, à ye sɔn ni. 21 Adamà dziàn kpɛ̀yn nà san a ci à sɛbɛɔ̀n à re goò tsɛ nìi tsuru. Ŋà mòò riì nà bà à jàànfaà saabu, tɔ̀ raa barau. Tɔ̀ tsìfa ma ba na kereu fyeu, tɔ̀ na fyan à mà.»

Yesù nìi ka jaa kpadei fau, ci tɔ wò gɔɔ̀n ko wò tsìɛn

22 Àwà, è ni ɲwɛɛ̀n nà, Yesù yè buru sen, è Ŋaa tswà, à y'à tara tara, à y'à wɔ è suun, è dzin ci: «Ye nèe tsi, y'a ɲɔn. À mun gɔɔ̀n rìì.» 23 Tà shɔ̀ùn, è yukuun ko e doùn mììnge sen, è Ŋaa tswà, à y'à sìn è ra, è sapɛ y'a sɔn min. 24 È dzin è ra ci: «Nèe mun tsìɛn nì, Ŋaablà ka dzyèèsìbee tsìɛn, nìi koon mòò giri kamà. 25 Sààben na, mun nì ci e ra, nèe shɔ̀ùn, mun fa nèe ɛ̀rɛ̀nzhɛn dzin nee yu mìn dɛ fyeu, fɔ jisee riì, mun nà à yeo mìn Ŋaablà re Màsàbee gàne rɔn.» 26 Tà shɔ̀ùn yè Ŋaabla makiri ye rèè cèè, yè kòmànà bo dɔ̀n be Oliviku rèè jèèn rà.

Yesù ci Piyɛrì nà dzin min niì, ci wò na wò tɔ̀ waa

27 Àwà, Yesù yè dzin kàràndzin neè rà ci: «Ye sapɛ nà vwɛ̀ɛ̀y ye yè mun to, kàtsu à sɛbɛɔ̀n nèe tsuru ci: "Mun nà sàà kplàtsuubaà vu, sàà rèè sapɛ to nà jee."» 28 Yesù yè dzin kɔn ci: «Min na sèè kpunan bo saàn ɲàn watsi riì bwèy, ye nà bè mun jà e jɔɔn Galile mar'lɔn.» 29 Piyɛrì to yè dzin à ra tɔ̀un ci: «È sapɛ kɛnsɛɛn ye vwɛɛ̀y yè wo to, mun fa vwɛ̀ɛ̀y byɛ.» 30 Yesù yè dzin à ra ci: «Sààben na, mun nì ci a ra, she fen nèe ɲan ko e sa, sani tsɛ̀keen yè ben jaa fii fa, wo nà bà à dè jaa zhììgi faɔ̀ nòn, ci wo na mun tɔ̀ waa.» 31 Ŋà Piyɛrì yè e dzu xɔbe, è dzin kɔn ci: «Mun kɛ̀nsɛɛn ye ba saàn wo ka rìì, mun fa dzin ci mun na wo tɔ̀ byɛ.» Dzyee rèè sapɛ sa yeè tɔ̀ soo dè.

Yesù bèu Ŋaablà mafyɛ̀n min niì

32 Tà shɔ̀ùn, yè dɔ̀n be gàne sɔn ɲan, nìi kir'là Gɛtsisemani. È bèu wɔ mɔn, Yesù yè dzin kàràndzin neè rà ci: «Ye e tsuù mìin, min bè Ŋaablà mafyɛ̀n na.» 33 Tɔ̀un, è Piyɛrì, ko Yàkubà, ko Yùxanà kiri gban e ra. À ɲɛyn yè nà e maa è shɛɛ̀n, à akir'là yè maa è gbiimaan. 34 È dzin è ra ci: «Taamaŋununbeè ni a ci à ni mun vu. Ye to tsùù e jaa ra mìin, e maà cìi waa.» 35 È kpɛrɛ̀ bè jɔɔn dɛyn tɔ̀un, è kunun gban, è Ŋaablà mafyɛ̀n, byɛnbe watsi ree dàn ye ba dzia gbànbe wò ra. 36 À ci: «Mun fàà, wo dzi ni goo sapɛ ra. Nèe byɛnbe ree dàn gbànbe n na. Ŋà mun naa sàɔ mà fa dɛ, wo raà rìì yè fa.» 37 Tà shɔ̀ùn, è kpɛyn sèè, è nà à jà è ciɛ̀. È dzin Piyɛr'là ci: «Shimɔ̀n, wo ciɛ̀ rìì ɔ̀ ? Wo na dzi fààn tarà w'e to a jaa ra watsi soo basɔùn doùn ɔ̀n ? 38 Ye to e jaa ra, ye Ŋaablà mafyɛ̀n, sànko Sùtana mà nà dzi e dzuun è dɔn fabɛy goo ɲan waa. Mòdzin gè niì, ŋɛ̀nɛ̀ɲan wuu ni à ɲan, ŋà à ŋɔ̀n nì fyɛn.» 39 Tà shɔ̀ùn è bè kɔn, è bè Ŋaablà mafyɛ̀n è twɛy gooma soo reè sèè dè. 40 È kpɛyn sèè nau è kpà kɔn, è nà à jà è ciɛ̀. Àwà, ciɛ̀ na è jaatsun neè vùnbeò. È nà nìi dè à ra, è naà tɔ̀ tɔ̀ waa. 41 À nàu e kpɛyn sèè na e jaa zhiigiraa ɲàn tà shɔ̀ùn, è dzin è ra ci: «Ye ni cìi rìì là ŋe, ye ɲanwɔ ɔ ? À wù tɔ̀ tsuru. Watsia wɔu. À yɛ nèe, è nà Adamà dziàn wɔ gooɲaan fa reè suun. 42 Ye fù m'a wa. Mun jàànfabaà yɛ e kpɛrɛɔ̀.»

È Yesù kuun min niì

43 Àwà, è Yesù dzii to twɛy gooma reè rà ŋe, tɔ̀ yeè bà Yudà kùngɔ bouma, kàràndzin teeŋ fii rèè soo. Jàma brìsi na gbaɔn à kpɛyn, bàmunun ko kɔn ì yè bà ni twɛy suun. Saaka jɔɔndzin neè, ko sàrìyà kaamoo reè, ko bɔɔ rèè rìì na è kaɔ. 44 Yesù jàànfabaà na tàànmàshɛn kpadeò à kunbaa rèè rà. À na dziɔn è ra ci: «Ye na à jà min si ɲɛun mòò riì fyɛ tsɛ m'a tswà, à wò rii. Y'a kun bè, y'a kààwɔu'n kuru wube.» 45 Àwà, Yudà nàu dzi min niì, è kpɛrɛ̀ Yesù rà suu, è dzin ci: «Kàrànfaà !» È siin è si ɲɛn à fyɛ tsɛ. 46 Tɔ̀un, y'à kun. 47 Nìì reè ni Yesù ka, twɛy mòò sɔn yè e raa bàmun'nà shɔ̀, è saaka jɔɔndzin blaa rè faagoofadzian raa toro sɔɔ̀n sen bo mɔn caù. 48 Yesù yè goomaa sen tɔ̀un, è dzin è ra ci: «Feera ye yè bà naɔ̀ mun kunmà bàmunun ko kɔn ì ka, a ci mun gookoronfabaà sɔn ni ? 49 Mun naà ni ye ka sii saa see Ŋaablà re gbà blàa fɔɔn doùn min bà mòdzian kàr'na ɔn ? Feera ye na mun kun tà bwèy ? Àwà, nèe sapɛ fau nì, sànko nìi deò Ŋaablà re goomaa doùn, tɔ̀ yeè bo e shi tsɛ.» 50 Tɔ̀un, Yesù rè kàràndzin neè sapɛ yeè vwɛ̀ɛ̀y y'à to. 51 Àwà, dzunwɛyn sɔn na gbaɔn Yesù kpɛyn, tɔ bringan basɔùn miniunà e ra. Yè tɔ̀ sa kun. 52 Ŋà y'à kuun min niì, è bringaan fùùru to è suun, è vwɛ̀ɛ̀y geren e maxɔ ra.

È dziun Yesù yè vu min niì

53 Tɔ̀un, yè bè Yesù ka saaka jɔɔndzin blaa rè gàne rɔ̀n. Saaka jɔɔndzin neè, ko bɔɔ rèè, ko sàrìyà kaamoo reè sapɛ yeè e si ladzyeè mɔn. 54 Piyɛrì yè to jeenà, è gban tsùù Yesù kpɛyn, fɔ yè bè dɔ̀n saaka jɔɔndzin blaa rè fɔɔn doùn. Piyɛrì dɔ̀un, è tsuù gànè kplàtsuu reè ka, è magɔ̀r'la sàà rà. 55 Saaka jɔɔndzin neè, ko kitsi kunun kuru blàa mòdzin neè sapɛ na sɔ̀n gaa wɔɔ̀ Yesù rà è ni dzi nìi bà kùn, y'à vu. Ŋà è na sɔ̀n gaa gbaɔ̀. 56 Àwà mòò giri yè fù yè doò ì wɔ à ra, è pɛn ne gooma to naà tsiɔ waa. 57 Swey yè nà fù yè doò ì wɔ à ra, nìi doùn è ci: 58 «Ɲe y'à myɛ̀un à dzu, ci Ŋaablà re gbà blà riì yɛ nèe, mòdzin ì yè bà e si ka à jiɔ̀, wo nà à ci, wò y'a sèè ji bwèy zhììgi doùn, nìi fa bà mòdzin ì rè si ka jiuma waa.» 59 Arì tɔ̀ goomaa doùn, twɛy pɛn ne gooma naà tsiɔ kɔn waa. 60 Tɔ̀un, saaka jɔɔndzin blaa yè fù è tsiì è fi, è Yesù tey ci: «È yɛ nìi sapɛ deè wo re goò ɲàn, pɛn na ni wo re dèràma ɔn ? 61 Ŋà Yesù yè e mɛnshɛ̀n, à na gèsɔn pɛn latsi. Saaka jɔɔndzin blaa yè sèè à y'à tey kɔn ci: «Wo rìì Ŋaablà Jaara Modzìnà ɔ̀n ? Mùn Ŋaablà riì blàbee, tɔ̀ Dzin kpir'la kɛ̀ ?» 62 Yesù yè dzin tɔ̀un ci: «À mun nì. Ye nà Adamà dziàn tsùuŋma jà Dzitsi Ŋaablà sirama si jaa rè, tà ko y'a nàkɔɔn ja è bo jìrànxɔ rɔ̀n mun'na tsɛ.» 63 Tɔ dèu min niì, è dɔ̀n saaka jɔɔndzin blaa kpɛyn fɔ è bè geren, è re mɛ̀yɛɛ vukɔrɔɔn vyɛ̀, è dzin ci: «Mùn shɛɛrɛ gaa feera kɔn ? 64 À Ŋaablà tsoo bara goòmà nìi dèu, ye sa y'a myɛ̀un. Y'a jàa dzùrù ?» È sapɛ yeè dzin ci à wù è vu. 65 Tɔ̀un, swey yè e maa yè dzweeyuà fyɛɛ̀ à tsɛ, swey y'à jaà shìa, y'à baan sikuɔ ka, yè dziàn ci: «Tsì rii wo baun ?» Gànè kplàtsuu reè sa y'a dɔr'là e taàkuùn.

Piyɛrì yè e sɔswɛrɔn min niì ci wò na Yesù tɔ̀ waa

66 Àwà, è Piyɛrì to fɔɔn doùn, saaka jɔɔndzin blaa rè faagoofadzin taan rèè soo yeè nà. 67 À Piyɛrì jàu min niì è ma gɔ̀r'la, à y'à siin to, è dzin ci: «Wo sa na ni Nazarɛtsika kpiri Yesù ka.» 68 Piyɛrì yè e sɔswɛy ci: «Mun na à tɔ̀ wo nìi dèe dɛ. Mun na à dzin seòn dɛ.» Tà shɔ̀ùn, Piyɛrì yè bo bè fɔɔn dɔ̀nmà dziɛ rà. [Tɔ̀un tsɛ̀ken sɔn yeè ben]. 69 Faagoofadzin taàn y'à jàu mɔn kɔn, nìì reè na ni mɔn, è maa, è dziàn twɛy rà e shɔùn, ci nèe sa yeè è sɔn ni. 70 Piyɛrì yè e sɔswɛy kɔn. Dɛ̀ɛnin tà shɔ̀ùn, nìì reè ni mɔn, twɛy yè dzin Piyɛr'là ci: «Sààben na, wo sa yeè è sɔn ni kàtsu wo Galile mar'la mòdzin ni.» 71 Tɔ dèu min niì, Piyɛrì yè e dzii ɲaan kere e yɛr'la, è kɛɛ̀y. È dzin ci: «Ye nèe kpir'liì goo dèe nèe, mun na à tɔ̀ waa.» 72 Tɔ̀ nɔ̀nkɔɔrɔn tsɛ̀ken sɔn yeè ben kɔn, tɔ̀ y'a jaa fiiraa. Tɔ̀ faumaà, Yesù gooma niì dèu Piyɛr'là, à taa yeè to tɔ̀ re, nìi yɛ ci: «Sani tsɛ̀keen yè ben jaa fii fa, wo nà bà à dè jaa zhììgi faɔ̀ ci wo na mun tɔ̀ waa.» Tɔ̀un, Piyɛrì yè e maa è gɛɛ.