Marc 13

Yesù nìi dèu Ŋaablà re gbà blàa ci goo tsɛ

1 Àyìwà, Yesù bokɔɔn Ŋaablà re gbà blàa doùn, à re kàràndzin neè soo yeè dzin à ra ci: «Kàrànfaà, w'e Ŋaablà re gbà blà ree siin ! À kpàà reè wùù wuu, à jiu'n kuru wù.»

2 Yesù ci à ra ci: «Wo jaa ni tɔ̀ gbà blà niì rà nèe, mun na ɲɛn à ra à kpàà dzin soo nà to soo tsɛ mìin waa, à sapɛ nà bara.»

3 Tà shɔ̀ùn, Yesù yè bè e tsuù Oliviku rèè jèèn tsɛ, à jaa yè bà kereò Ŋaablà re gbà blàa rà. À ni mɔn, Piyɛrì, ko Yàkubà, ko Yùxanà, ko Andère yeè b'a tey e si.

4 È ci: «Tɔ nà fa watsi riì, tɔ̀ dè mùn na. Tàànmàshɛn kɛn ni nà à to ɲe y'à tɔ̀, ci twɛy goo rèè sapɛ fa watsi wɔu ?»

Yesù ci goo nìì reè nà bà dziɲan doo tàànmàshɛn

5 Àwà, Yesù yè e maa tɔ̀un, è dziàn è ra ci: «Ye e yɛrɛ kaàwɔ, mòo mà nà e san fìrì waa.

6 Mòò giri nà nà mun tsoo ka, yè nà dzin ci ye rìì Ŋaablà Jaara Modzìàn. È to nà mòò giri sàn fìrì.

7 E ye na bà kaa goo ɲan gooma reè myɛ̀ɛn watsi riì bwèy, kaa blà blaa màànkaan yè bà ni, e maà shi waa. Fɔ tɔ̀ yeè fa, ŋà tɔ̀ fa bà dziɲaan dò bwey ŋe waa.

8 Jàmàan ko jàmàan nà fù e si kpɛyn, Masa gane ko Masa gane yeè fù e si kpɛyn. Dzɔ̀nxɔ̀ɔ̀mà kpinin bla blaa nà bà ni gàne rèè ɲàn, dzuà yè bà ni. Tàan donkunkɔɔn tsɛ ɲìnìnbee dziikuan ni nìi tsuru, à nà bà tɔ̀ rii tsuru.

9 Ye e yɛrɛ kaàwɔ ! È nà ye wɔ kitsi kun'neè suun, è to nà ye kuun'n kuru ɲaan fa Ŋaa blabe gba rèè doùn. Mun kamà, è nà bè ye ka jàmààntsi rèè ko màsa reè rè. Tɔ nà bà saabu, ye yè mun gooma de twɛy rà.

10 Àwà, fɔ Kùnàgoo Dziɔ̀ goomaa yè dè be dziɲantsiɛ kun neè sapɛ ra ŋe.

11 È ye e kun watsi riì bwèy yè bè e wɔ kitsi kun'neè suun, e naà gooma niì dè, e maà tɔ̀ ka e vyɛɛ̀y waa. Ŋaabla nà gooma niì wɔ ye dzu tɔ̀ watsia yɛ̀r'la ɲàn, ye tɔ̀ rii dè. Àwà, à fa bà ye yɛ̀r'leè goomakɔɔn waa, ŋà à nà bà Ŋaablà re Dzi Fɛnɛɛ rìì.

12 Keresi nà e keresi wɔ mòdzin ì suun y'à vu, Fà yè e dzin wɔ mòdzin ì suun y'à vu. Dzin ì yè fù e fa ì kpɛyn, y'à to yè vu.

13 Mun tsoò kamà ye goo nà xɔbe mòdzian sapɛ ma. Ŋà mòò riì sàn gbaunma nà to fɔ à lataan, tɔ nà tsi.

14 Àwà, ye na gè cɛnbarabaa kurushiumaà tsìiŋma jà gàne ɲan watsi riì bwèy à na wù è bà ni min niì waa, nèe gooma ree kàrànbaà y'à dzin sen. Tà doùn, nìì reè ni Yude mar'la ɲàn, twɛy yè vwɛ̀ɛ̀y be jèn nèè kpàkèrè.

15 Mòò riì ni gbàmaan tsɛ, tɔ mà jàà, ci wo nà gè sen gbàà doùn waa.

16 Mòò riì to ni jòon, tɔ mà dzin ci w'è kpɛyn sèe, w'e nà e re mɛ̀yɛ blaa sen waa.

17 Twɛy jisee reè sii sèè, tàan fwɛynma reè, ko dzina rèè nà byɛn fɔ è bè geren.

18 Ye Ŋaablà mafyɛ̀n, à mà na fa mùnkɛɛ̀ watsi ɲan waa.

19 Àwà, byɛnbe riì nà bà ni twɛy jisee reè sii sèè, à tsuru na fa ja ŋe waa fɔ dziɲan yeè ɲɛn, è bè suu fɔ dòònun dzu. À tsuru to yɛ̀rɛ̀ fa fa ja dɛ.

20 Àwà, Tsìfaà ma ba na sɔn boo twɛy byɛnbe jisee reè rà fyeu, mòò pɛn fa ni tsi waa. Ŋà à nìì reè boo e jaara, twɛy kamà, à sɔn boo twɛy jisee reè rà.

21 Tà doùn, mòò ye dzin e ra ci: "Ŋaablà Jaara Moò yɛ mìin", tàmafa "à yɛ nuu", e maà ɲɛn à ra waa.

22 E maà ɲɛn à ra waa, kàtsu doodebaa ì nà fù, yè dzin ci ye rìì Ŋaablà Jaara Moò, ko kɛɛra doodebaa ì. È nà tàànmàshɛn ì ko kabagoo goo ì fa, yè bà ni twɛy ka Ŋaablà re e jaara modzin bouma rèè sànfìrì siin, è ba dzia fa.

23 Tà doùn, ye e yɛrɛ kaàwɔ. Mun twɛy goo rèè sapɛ deu ye ra nòn, m'a ka ye toro kɔ̀ tsùù.

24 Àwà, twɛy jisee reè sii sèè, tɔ̀ byɛnbee dɔ̀n bouma shɔ̀ùn, bwèè nà tsitsiì wɔ, kuɔ̀ sa yeè to e vyeè bo bɛy.

25 Ŋaablaxɔɔ̀ rà swɛyn nèè nà mɛɛy, jìrànxɔ rɔ̀n dzibaabe reè sapɛ yeè yuuyuu bo e shɔùn.

26 Tɔ̀un, è nà Adamà dziàn nàkɔɔn ja è bo mun'na ɲàn, dzi brisi ko blàbe doùn.

27 Tà doùn, à nà e re mɛ̀rɛ̀kɛ rèè ka dziɲaan nɔ̀nkɔn nààleèn min niì sapɛ, à nìì reè boo e jaara, yè twɛy ladzyeè, è sen ŋaablaxɔɔ̀ kùngɔ soo rà, è bè fɔ kùngɔ soo rà.»

28 Àwà, Yesù yè geren goomaa rè ci: «Ye nèe goo rèe kaan kɛɛy fiigikuà tsɛ siin: À sààn neè ye e maa yè tsɔɔ gbaa nìi bwèy, ye y'à tɔ̀ɔ tɔ̀ bwèy, ci kpaan tsyɛnbeò.

29 Tɔ̀ soo tsuru, ye na nèe goo rèe rèè sa fakɔɔn ja watsi riì bwèy, ye bà à tɔ̀, ci Adamà dziàn nà watsia sa tsyɛnbeò, è bà ni dziɛ̀ rà nòn sa.

30 Sààben na, mun nì ci e ra, nèe watsi ree mòdzian sapɛ fa san dò fyeu, twɛy goo rèè sapɛ mà bà faɔ̀ waa.

31 Ŋaablaxɔɔ̀ ko dzɔ̀nxɔɔ̀ sa nà dɔ̀n bo, ŋà mun naa gooma reè, twɛy fa dɔ̀n bo fyeu.

32 Àwà, nìi twɛy goo rèè fa jisee ko è fa watsia, mòò pɛn na tɔ̀ tɔ̀ waa. Jìrànxɔ rɔ̀n mɛ̀rɛ̀kɛ rèè na à tɔ̀ ɔ, Ŋaablà Dzin Kpir'la na à tɔ̀ ɔ, fɔ Fà Ŋaablà soo pe.

33 Tà doùn, ye e yɛrɛ kaàwɔ, ye to tsùù e jaa ra, kàtsu à watsi riì soo goo, ye na tɔ̀ tɔ̀ waa.

34 À ni jàci kpiri sɔn, à ci e ye bè jìì rà, è re gbàà goo rèè wɔ to e re faagoofadzin neè suun, è faagoo farama sìn è soo soo sapɛ ra. Dziɛ̀ kplatsuubaà, è dzin to tɔ̀ ra, ci è to tsùù e jaa ra.

35 Tɔ̀ soo tsuru, e sa yeè to tsùù e jaa ra, kàtsu gbàtsià nà nà watsi riì bwèy, ye na tɔ̀ tɔ̀ waa. À nà nà ɲɛ̀rɛɛ̀rà rìì ò, à wɔ̀taama nì ò, à tsɛ̀kèn ben bwey rìì ò, à to gbishɛɛ̀mà nì ò, ye na tɔ waa.

36 Ye to tsùù e jaa ra, à mà nà bàràma e ɲan, à y'à jà ye cìiŋnà waa.

37 Mun nìi dèe ye ra, mun tɔ̀ rii dèe dzyee rèè sapɛ ra. Ye to tsùù e jaa ra.»